जसपाको विरोध सभा : केवलकार कुनै हालतमा बन्न हुदैन

धरान । ताप्लेजुङ मुकुम्लुङ्ग (पाथीभरा) मा चन्द्र ढकाल नेतृत्वले निर्माण गर्दै गरेको केवलकारको चौतर्फी विरोध भइरहेको बेला जनता समाजवादी पार्टीले पनि  विरोध जनाएको छ । बुधवार धरानको भानुचौकमा जसपा धरान नगर समितिले आयोजना गरेको विरोध सभामा केवलकार कुनै हालतमा बन्न नहुने जसपा नेताहरूले तर्क गरेका छन ।

सभालाई सम्बोधन गर्ने क्रममा जसपा प्रदेश सचिव राम माण्डुपा राईले मुकुम्लुङमा केवलकार बनाउने नाउँमा राज्यले जनताको सांस्कृतिक अधिकार प्रति प्रहार गरेको बताएका छन । अब भने आइ.एल.ओ न.१६९ लागु पर्नुपर्नेमा उनले जोड दिए । यो आदिवासी तथा जनजाति समुदायसम्बन्धीको अन्तर्राष्ट्रिय सन्धि हो । उनका अनुसार यो सन्धिमा एक राष्ट्र,राज्यभित्र बसोबास गर्ने आदिवासी तथा जनजाति समुदायका अधिकारको रक्षा गर्ने दायित्व सरकारको काँधमा हुन्छ भनिएको छ । आदिवासीहरूका जीवन पद्धति र संस्कृतिहरूको सम्मान; भूमि तथा प्राकृतिक स्रोत प्राप्त गर्ने उनीहरूको अधिकार मान्यता तथा विकासका प्राथमिकतालाई प्रस्ट व्याख्या गरिएको छ । त्यो आधारमा केवलकार निर्माण को विरोध जायज छ उनले भने । मुकुम्लुङ आदिवासी जनजाति लिम्बू समुदायहरूको आस्थाको केन्द्र पनि हो केवलकारले यहाँको महत्त्व विशेषता माथि ह्रास ल्याउने सम्भावना भएकोले केवलकार बन्न नहुने समेत उनले बताए ।

जसपा धरान नगर अध्यक्ष नगेन्द्र पारघरी लिम्बुले कमिसनको लोभमा प्रहरी प्रशासन खटाएर केवलकार जबरजस्ती बनाउन खोजिएको  केवलकार बनाउने नाममा २७ करोड ८५ लाख को कमिसन करप्सनमा राज्य  डुबेको आरोप लगाएका छन । व्यक्तिगत स्वार्थ र फाइदाको लागि स्थानीयको भावना मर्म विपरीतको काम भएको बताउदै उनले यस्तो राज्यको कदम प्रतिको विरोधमा जसपा धरान नगर कमिटी पहिलो पङ्तीमा रहेको बताए ।
उनिहरूले विरोध सभामा केवलकार चाहिदैन,मुकुम्लुङको संरक्षण गर, सशस्त्र प्रहरीको गोलि लागि घाइते बनेकाहरूको निःशुल्क उपचार गर, गोलि हान्न निर्देशन दिन सिडिओ लाई कार्यवाही गर लगायतको नारा नगाएका थिए ।

 जसपा मजदुर अध्यक्ष  चन्द्र सोताङ्ग,जसपा सुनसरी जिल्ला सदस्य मदन तामाङ्ग,विद्यार्थी प्रदेश न.१ अध्यक्ष चन्द्र किराँती, तेज नारायण चौधरी,कौशिला चेम्जोङ्ग लगायतले कार्यक्रममा बोलेका थिए ।