काठमाडौं । अर्जेन्टिनाका कप्तान लियोनेल मेस्सी आइतबार अमेरिकाको न्यु जर्सीस्थित मेटलाइफ स्टेडियममा हुने फिफा विश्वकप २०२६ को फाइनलमा स्पेनविरुद्ध मैदान उत्रँदा १० वर्षअघिको पीडादायी सम्झनालाई सुखद अन्त्यमा बदल्ने अवसरको खोजीमा हुनेछन् ।

मेस्सीका लागि यो फाइनल केवल विश्व फुटबलको सबैभन्दा ठूलो उपाधिको प्रतिस्पर्धा मात्र होइन, सन् २०१६ को कोपा अमेरिका सेन्टेनारियोको फाइनलमा चिलीसँग पेनाल्टी सुटआउटमा पराजित भएको तितो सम्झनाको पुनरागमन पनि हो । त्यही मैदानमा उनले पेनाल्टी चुकाएका थिए, बेन्चमा आँसु झारेका थिए र राष्ट्रिय टोलीबाट सन्यास लिने घोषणा गरेर विश्व फुटबललाई स्तब्ध बनाएका थिए ।

त्यतिबेला मेस्सीले भनेका थिए, ‘मेरो लागि राष्ट्रिय टोलीसँगको यात्रा सकियो । मैले धेरै प्रयास गरेँ’ त्यसपछि अर्जेन्टिनाभर उनलाई निर्णय पुनर्विचार गर्न आग्रह गर्दै व्यापक अभियान चलेको थियो ।

त्यसबेला १५ वर्षीय किशोर एन्जो फर्नान्डेजले सामाजिक सञ्जालमार्फत मेस्सीलाई भावुक सन्देश लेखेका थिए । उनले, ‘तपाईं जे गर्न चाहनुहुन्छ गर्नुस् तर कृपया टोलीमा रहनुहोस् । रमाइलोका लागि खेलिरहनुहोस भन्दै आग्रह गरेका थिए ।

एक दशकपछि फर्नान्डेज अहिले मेस्सीका समर्थक मात्र होइनन अर्जेन्टिनाका प्रमुख मिडफिल्डर बनेर उनीसँगै लगातार दोस्रो विश्वकप उपाधि जित्ने अभियानमा छन् । यता प्रशिक्षक लियोनेल स्कालोनीको नेतृत्वमा रहेको अर्जेन्टिनाले सेमिफाइनलमा इंग्ल्यान्डविरुद्ध २–१ को रोमाञ्चक पुनरागमन जित दर्ता गरेको थियो । उक्त खेलमा एन्जो फर्नान्डेजले बराबरी गोल गरेका थिए भने लाउटारो मार्टिनेजले इन्जुरी समयमा विजयी गोल गरेका थिए ।

अर्जेन्टिनाले लगातार १४ खेल जित्दै दक्षिण अमेरिकी टोलीको सबैभन्दा लामो लगातार जितको कीर्तिमान बराबरी गरेको छ । टोली सन् १९६२ मा ब्राजिलपछि लगातार दुई विश्वकप जित्ने दोस्रो राष्ट्र बन्ने लक्ष्यमा छ ।

यता युरोपियन च्याम्पियन स्पेन प्रतियोगिताको सबैभन्दा बलियो रक्षापंक्ति भएको टोलीका रूपमा फाइनलमा पुगेको छ । प्रशिक्षक लुइस दे ला फुएन्ते को टोलीले प्रतियोगिताभर केवल एक गोल मात्र व्यहोरेको छ र पुरुष विश्वकप इतिहासमै एक संस्करणमा सर्वाधिक ६ क्लिनसिट राख्ने पहिलो टोली बनेको छ ।

स्पेनले समूह चरणको पहिलो खेलमा केप भर्डेसँग गोलरहित बराबरी खेलेपछि लगातार ६ खेल जित्दै अस्ट्रिया, पोर्चुगल, बेल्जियम र फ्रान्सलाई हराएर फाइनल यात्रा तय गरेको हो। टोली ३७ खेलदेखि अपराजित रहँदै सन् २०१० पछि दोस्रो विश्वकप उपाधिको खोजीमा छ ।

अर्जेन्टिना र स्पेनबीच हालसम्म १४ खेल हुँदा दुवैले ६–६ खेल जितेका छन् भने दुई खेल बराबरीमा सकिएका छन् । विश्वकपमा उनीहरूबीचको एकमात्र भेट सन् १९६६ मा भएको थियो, जहाँ अर्जेन्टिनाले २–१ को जित निकालेको थियो । भने पछिल्लो भेट सन् २०१८ को मैत्रीपूर्ण खेलमा स्पेनले अर्जेन्टिनालाई ६–१ ले पराजित गरेको थियो । यसपटक भने सबैको नजर फेरि एकपटक मेस्सीमाथि केन्द्रित हुनेछ। १० वर्षअघि आँसुसहित मेटलाइफ स्टेडियम छाडेका मेस्सीसँग अब त्यही मैदानलाई आफ्नो करियरको अर्को अविस्मरणीय सफलताको साक्षी बनाउने अवसर छ । एएनआई

काठमाडौं । फिफा विश्वकप २०२६ अन्र्तगनको खेलमा फ्रान्सलाई पराजित गर्दै इङ्गल्याण्डले तेस्रो स्थान हासिल गरेको छ ।

आइतबार बिहान सम्पन्न खेलमा फ्रान्सलाई ६—४ ले पराजित गर्दै इङ्गल्याण्डले विश्वकपको तेस्रो स्थान हासिल गरेको हो ।

इङ्गल्याण्डको ऐतिहासिक जितमा जर्सी नम्बर ७ का स्ट्राइकर बुकायो साका नायक बने । साकाले खेलको ३७औं, ४५औं र ८७औं (पेनाल्टी) मिनेटमा गोल गर्दै सानदार ह्याट्रिक पूरा गरे । इङ्गल्याण्डका लागि खेलको तेस्रो मिनेटमै डिक्लान राइसले सुरुवाती गोल गरेका थिए । 

खेलको १८औं मिनेटमा राइसकै उत्कृष्ट असिस्टमा डिफेन्डर एज्री कोन्साले दोस्रो गोल गरेका थिए । 

खेलको अन्तिम समयमा फ्रान्सले लगातार गोल फर्काएर दबाब सिर्जना गरे पनि थपिएको समयको आठौं मिनेट अर्थात् ९०÷८ औं मिनेटमा जुड बेलिङ्ंघमले गोल थप्दै इङ्गल्याण्डको ६—४ को ऐतिहासिक जित पक्का गरे ।

यो जितसँगै इङ्गल्याण्डले विश्वकपको तेस्रो स्थान हासिल गरेको हो ।

काठमाडौं । फ्रान्सका मुख्य प्रशिक्षक डिडिएर डेसचाम्प्सले फिफा विश्वकप २०२६ को तेस्रो स्थानका लागि इंग्ल्यान्डविरुद्ध हुने खेल खेल्न आफूहरूको इच्छा नभए पनि कांस्य पदक जित्नु राष्ट्रिय टोलीको दायित्व भएको बताएका छन् ।

स्पेनसँग सेमिफाइनलमा २–० ले पराजित भएपछि लगातार तेस्रो पटक विश्वकपको फाइनल पुग्ने फ्रान्सको सपना समाप्त भएको थियो । अब फ्रान्सले शनिबार अमेरिकाको मियामीमा इंग्ल्यान्डसँग तेस्रो स्थानका लागि प्रतिस्पर्धा गर्नेछ ।

खेलअघिको पत्रकार सम्मेलनमा डेसचाम्प्सले तेस्रो स्थानको खेल मैत्रीपूर्ण नभई आधिकारिक प्रतिस्पर्धा भएकाले टोलीले पूर्ण जिम्मेवारीका साथ खेल्नुपर्ने बताए । उनले इंग्ल्यान्ड र फ्रान्स दुवै टोली तेस्रो स्थानको खेल खेल्न इच्छुक नभए पनि राष्ट्रिय जर्सीको सम्मानका लागि जित निकाल्नु आवश्यक रहेको उल्लेख गरे ।

‘यो मैत्रीपूर्ण खेल होइन । तेस्रो स्थानका लागि खेलिने आधिकारिक प्रतिस्पर्धा हो । खेलाडी, प्रशिक्षक समूह र मेरो जिम्मेवारी यो अन्तिम लक्ष्य पूरा गर्नु हो । यो फाइनलभन्दा कम महत्त्वपूर्ण हुन सक्छ, तर हामीले आफ्नो दायित्व पूरा गर्नुपर्छ,’ डेसचाम्प्सले भने ।

विश्वकपपछि फ्रान्सको मुख्य प्रशिक्षकबाट बिदा हुने तयारीमा रहेका डेसचाम्प्सले तेस्रो स्थान हासिल गरेर आफ्नो कार्यकाल सुखद अन्त्य गर्न चाहेको पनि बताए । हाम्रो लक्ष्य अब तेस्रो स्थान सुरक्षित गर्नु हो। यो जर्सी लगाउँदा त्यसप्रतिको जिम्मेवारी पनि आउँछ । मलाई थाहा छ, यो मेरो अन्तिम खेल हुनेछ । म कसैलाई रुन चाहन्नँ । एउटा अध्याय सकिँदैछ, तर जीवन अघि बढिरहन्छ,’ उनले भने ।

फ्रान्सका डिफेन्डर इब्राहिमा कोनाटेले पनि सेमिफाइनलको हारपछि कुनै पनि खेलाडी तेस्रो स्थानको खेल खेल्न इच्छुक नभएको स्वीकार गरे । तर उनले टोलीका लागि लामो समय योगदान दिएका डेसचाम्प्सलाई विजयी बिदाइ दिन सबै खेलाडी प्रतिबद्ध रहेको बताए ।

‘हामीमध्ये कसैले पनि तेस्रो स्थानका लागि खेल्न चाहेका थिएनौँ । तर अब विकल्प छैन। प्रशिक्षकले फ्रान्सेली फुटबलका लागि धेरै योगदान दिनुभएको छ । उहाँप्रति कृतज्ञता व्यक्त गर्ने सबैभन्दा राम्रो माध्यम यो खेल जितेर कांस्य पदक जित्नु हो,’ कोनाटेले भने ।

फ्रान्स र इंग्ल्यान्डबीचको तेस्रो स्थानको खेल शनिबार अमेरिकाको मियामीमा हुनेछ । दुवै टोली सेमिफाइनलबाट बाहिरिएपछि प्रतियोगिताको अन्तिम खेल जित्दै कांस्य पदकसहित विश्वकप यात्रा टुंग्याउने लक्ष्यमा छन् । एएनआई

काठमाडौं । अर्जेन्टिनाका कप्तान लियोनल मेस्सी र स्पेनका युवा स्टार लामिन यामालबीचको सम्बन्ध झण्डै दुई दशक पुरानो एउटा ऐतिहासिक तस्बिरले फेरि चर्चामा ल्याएको छ ।

सन् २००८ मा खिचिएको मेस्सी र बच्चा यामालको उक्त तस्बिर अहिले २०२६ फिफा विश्वकप फाइनलअघि विश्वभर भाइरल बनेको छ । मेस्सीले पनि उक्त तस्बिरको संयोगलाई ‘अविश्वसनीय’ भन्दै प्रतिक्रिया दिएका छन् । डी–स्पोट्र्सले सार्वजनिक गरेको भिडियोमा मेस्सीले यामाल सानो बच्चा हुँदा खिचिएको तस्बिर अहिले दुवै खेलाडी विश्वकप फाइनलमा प्रतिस्पर्धा गर्ने अवस्थासम्म आइपुग्नु आश्चर्यजनक भएको बताएका छन् ।

‘साँच्चिकै यो तस्बिर अस्तित्वमा हुनु नै अविश्वसनीय कुरा हो । हामीले यो तस्बिर खिच्दा ऊ केवल एउटा बच्चा थियो र अहिले हामी दुवै विश्वकप फाइनलमा प्रतिस्पर्धा गर्दैछौं । यो सबै कुरा नै अविश्वसनीय छ,’ मेस्सीले भनेका छन् ।

करिब १८ वर्षअघि बार्सिलोनाका खेलाडी रहेका मेस्सीले क्याटलान पत्रिका डियारियो स्पोर्टले आयोजना गरेको च्यारिटी फोटोसुटमा सहभागी हुँदा यामालसँग भेट गरेका थिए । बार्सिलोनाको ऐतिहासिक क्याम्प नोउ रंगशालामा भएको उक्त फोटोसुटमा २० वर्षीय मेस्सीले शिशु अवस्थाका यामाललाई उनकी आमा शिला एबेना नजिकै राखेर तस्बिर खिचाएका थिए । त्यतिबेला मेस्सी विश्व फुटबलका उदाउँदा खेलाडी थिए भने यामाल भविष्यमा स्पेनका प्रमुख प्रतिभामध्ये एक बन्ने कुरा कसैले कल्पना गरेका थिएनन् । तर अहिले करिब दुई दशकपछि दुवै खेलाडी विश्वकपको उपाधिका लागि एकअर्काविरुद्ध मैदानमा उत्रने भएका छन् । यो ऐतिहासिक तस्बिर स्वतन्त्र फोटोग्राफर जोन मोनफोर्टले खिचेका थिए । संयुक्त राष्ट्रसंघीय बाल कोष (युनिसेफ)ले समेत उक्त तस्बिर सार्वजनिक गर्दै मेस्सी र यामालको यात्रालाई विशेष रूपमा उल्लेख गरेको छ ।

युनिसेफले सामाजिक सञ्जाल एक्समा लेखेको छ, ‘हो, तपाईंहरूले देख्नुभएको तस्बिर वास्तविक हो । १८ वर्षभन्दा पहिले एउटा बच्चा लामिन यामाल र उनकी आमा शिला मेस्सीसँग युनिसेफको कोष संकलन कार्यक्रममा भेट भएका थिए ।’

युनिसेफले मेस्सी र यामाल दुवै मैदानमा मात्र नभई सामाजिक क्षेत्रमा पनि बालबालिकाको हितका लागि काम गरिरहेको उल्लेख गरेको छ । दुवै खेलाडी युनिसेफका सद्भावना दूतसमेत हुन् ।

यसैबीच, २०२६ फिफा विश्वकपको फाइनलमा साविक विजेता अर्जेन्टिना र युरोपियन च्याम्पियन स्पेन भिड्दैछन् । यो खेलले अनुभवी महान् खेलाडी मेस्सी र किशोर स्टार यामालबीचको पुस्तान्तरणको प्रतीकात्मक भिडन्तसमेत बन्ने अपेक्षा गरिएको छ ।

स्पेनले सेमिफाइनलमा फ्रान्सलाई २–० ले पराजित गर्दै फाइनल यात्रा तय गरेको हो भने अर्जेन्टिनाले इंग्ल्यान्डलाई २–१ ले हराउँदै उपाधि भिडन्तमा स्थान बनाएको हो । अर्जेन्टिनाको जितमा खेलको अन्तिम समयमा निर्णायक गोल भएको थियो । मेस्सी फाइनलअघि प्रतियोगिताको गोल्डेन बुट दौडमा शीर्ष स्थानमा छन् । इंग्ल्यान्डविरुद्धको सेमिफाइनलमा दुई असिस्ट गरेपछि उनले फ्रान्सका कप्तान किलियन एमबाप्पेलाई समेत पछि पारेका छन् । एएनआई

काठमाडौं । फिफा विश्वकप २०२६ को सेमिफाइनलमा इंग्ल्यान्डलाई पराजित गरेपछि राजनीतिक सन्देश बोकेको ब्यानर प्रदर्शन गरेका कारण अर्जेन्टिनाका मिडफिल्डर जियोभानी लो सेल्सो र टोलीमाथि फिफाले कारबाही गर्न सक्ने सम्भावना देखिएको छ ।

द एथलेटिक का अनुसार अमेरिकाको एटलान्टामा भएको खेलपछि लो सेल्सोले ‘माल्भिनास अर्थात फकल्याण्ड अर्जेन्टिनाकै हो’ लेखिएको ब्यानर प्रदर्शन गरेका थिए । फकल्याण्ड टापुलाई अर्जेन्टिनाले माल्भिनास भन्ने गरेको छ । जुन दक्षिण–पश्चिम एटलान्टिक महासागरमा रहेको बेलायतको विदेशी भूभाग हो ।

लो सेल्सोले उक्त ब्यानर डिफेन्डर निकोलास ओटामेन्डीसँग मिलेर केहीबेर समातेका थिए भने पछि मैदानमै राखेका थिए । उक्त टापुमाथिको सार्वभौमिकताको विषयमा अर्जेन्टिना र बेलायतबीच दशकौँदेखि विवाद रहँदै आएको छ ।

अन्तर्राष्ट्रिय फुटबल संघ बोर्ड र फिफाको नियमअनुसार खेलका क्रममा वा त्यससँग सम्बन्धित गतिविधिमा राजनीतिक, धार्मिक वा व्यक्तिगत सन्देश, नारा, झण्डा वा प्रतीक प्रदर्शन गर्न पाइँदैन । नियम उल्लङ्घन भएमा सम्बन्धित खेलाडी, टोली वा राष्ट्रिय फुटबल संघलाई प्रतियोगिता आयोजक वा फिफाले कारबाही गर्न सक्ने व्यवस्था छ ।

सन् १९८२ मा फकल्याण्ड टापुको नियन्त्रणलाई लिएर बेलायत र अर्जेन्टिनाबीच युद्ध भएको थियो । करिब दुई महिनासम्म चलेको उक्त युद्धमा बेलायत विजयी भएको थियो भने दुवै पक्षका सयौँ सैनिकको ज्यान गएको थियो ।

यसैबीच अर्जेन्टिनाकी उपराष्ट्रपति भिक्टोरिया भियारुएलले सामाजिक सञ्जाल एक्समार्फत ‘फकल्याण्ड अर्जेन्टिनाकै हो । उनीहरूले ब्यानर स्टेडियममा लैजान रोक लगाए, तर त्यो हाम्रो रगत र हृदयमा छ’ भन्दै लो सेल्सोको समर्थन गरेकी छन् ।

उता खेलमा भने अर्जेन्टिनाले उत्कृष्ट पुनरागमन गर्दै इंग्ल्यान्डलाई २–१ ले हराएर फाइनलमा स्थान सुरक्षित गरेको छ । इंग्ल्यान्डले ५५औँ मिनेटमा एन्थोनी गोर्डनको गोलबाट अग्रता लिए पनि अर्जेन्टिनाका एन्जो फर्नान्डेजले ८५औँ मिनेटमा बराबरी गोल फर्काए ।

इन्जुरी समयमा कप्तान लियोनेल मेसीको उत्कृष्ट क्रसलाई लाउटारो मार्टिनेजले हेडमार्फत गोलमा परिणत गर्दै अर्जेन्टिनालाई रोमाञ्चक जित दिलाए । अब उपाधिका लागि अर्जेन्टिनाले स्पेनसँग प्रतिस्पर्धा गर्नेछ भने इंग्ल्यान्डले तेस्रो स्थानका लागि फ्रान्ससँग खेल्नेछ । एएनआई

काठमाडौं । फ्रान्सका मुख्य प्रशिक्षक डिडिएर डेसचाम्प्सले फिफा विश्वकप २०२६ को सेमिफाइनलमा स्पेनसँग २–० ले पराजित भएपछि आफ्नो टोलीले अपेक्षाअनुसार प्रदर्शन गर्न नसकेको स्वीकार गरेका छन् ।

डालास स्टेडियममा भएको सेमिफाइनलमा स्पेनसँग पराजित हुँदै फ्रान्स प्रतियोगिताबाट बाहिरिएपछि डेसचाम्प्सले टोलीका खेलाडीहरू निकै निराश रहेको बताए । उनका अनुसार टोलीको लक्ष्य फाइनल पुग्ने भए पनि प्राविधिक त्रुटि र आक्रमणमा धार नदेखिँदा त्यसमा सफल हुन सकिएन ।

‘हाम्रा खेलाडी निकै निराश छन् । हाम्रो लक्ष्य फाइनल पुग्ने थियो । तर आज हामी प्राविधिक रूपमा आफ्नो सामान्य स्तरभन्दा तल खेल्यौं र स्पेनले खेलमाथि पूर्ण नियन्त्रण कायम ग¥यो,’ डेसचाम्प्सले भने ।

उनले हारको जिम्मेवारी आफ्नै टोलीले लिनुपर्ने उल्लेख गर्दै अवसरहरूको सदुपयोग गर्न नसक्नु महँगो परेको बताए । ‘यो मुख्य रूपमा हाम्रो आफ्नै कमजोरी हो । हामीले आक्रमणमा अपेक्षाअनुसार खतरा सिर्जना गर्न सकेनौं । केही गलत पासका कारण गोल गर्ने अवसर पनि गुमायौं । उच्च स्तरको फुटबलमा यस्ता गल्तीको मूल्य चुकाउनुपर्छ,’ उनले थपे ।

खेलमा स्पेनले सुरुदेखि नै सन्तुलित र प्रभावशाली प्रदर्शन गरेको थियो । लामिन यामालमाथि पेनाल्टी क्षेत्रभित्र फाउल भएपछि प्राप्त पेनाल्टीलाई मिकेल ओयार्जाबालले गोलमा परिणत गर्दै स्पेनलाई अग्रता दिलाएका थिए । त्यसपछि पेड्रो पोरोले डानी ओल्मोसँग उत्कृष्ट समन्वय गर्दै दोस्रो गोल गरेपछि स्पेनले सहज जित दर्ता ग¥यो। उत्कृष्ट प्रदर्शन गरेका पोरो ‘प्लेयर अफ द म्याच’ घोषित भए ।

स्पेन अब आइतबार न्यूयोर्क–न्यु जर्सी स्टेडियममा हुने विश्वकप फाइनलमा इंग्ल्यान्ड वा अर्जेन्टिनामध्ये एकसँग उपाधिका लागि प्रतिस्पर्धा गर्नेछ । सन् २०१० मा नेदरल्यान्ड्सलाई हराउँदै पहिलोपटक विश्वकप जितेको स्पेन दोस्रो पटक उपाधि जित्ने लक्ष्यमा हुनेछ ।

स्पेनका ओयार्जाबालले पछिल्ला २० अन्तर्राष्ट्रिय खेलमा १८ गोल पु¥याएका छन् । साथै, उक्त गोलसँगै उनी स्पेनका लागि ३० अन्तर्राष्ट्रिय गोल गर्ने छैटौं खेलाडी बनेका छन् । यता फ्रान्सले अब शनिबार हुने तेस्रो स्थानका लागि हुने प्लेअफ खेल खेल्नेछ । उक्त खेलमा कप्तान किलियन एमबाप्पेलाई गोल्डेन बुटको दौडमा आफ्नो गोल संख्या बढाउने अर्को अवसर हुनेछ । एएनआई

काठमाडौं । साविक विजेता अर्जेन्टिनाले फिफा विश्वकप २०२६ को सेमिफाइनलमा आफ्नो स्थान सुरक्षित गरेको छ ।

अमेरिकाको कान्सास सिटी स्टेडियममा आइतबार बिहान सम्पन्न अन्तिम क्वार्टरफाइनलमा स्विट्जरल्यान्डलाई ३–१ गोलअन्तरले पराजित गर्दै अर्जेन्टिनाले सातौँपटक विश्वकपको सेमिफाइनल यात्रा तय गरेको हो ।

खेलभर आक्रामक प्रदर्शन गरेको अर्जेन्टिनाले पहिलो हाफमै अग्रता बनाएको थियो । दोस्रो हाफमा पनि दबाब कायम राख्दै थप दुई गोल गरेपछि स्विट्जरल्यान्डमाथि सहज जित निकाल्न सफल भयो । स्विट्जरल्यान्डले एक गोल फर्काए पनि खेलमा पुनरागमन गर्न सकेन ।

यस जितसँगै अर्जेन्टिना लगातार उपाधि रक्षा गर्ने लक्ष्यतर्फ एक कदम नजिक पुगेको छ । अब अर्जेन्टिनाले फाइनल प्रवेशका लागि सेमिफाइनलमा अर्को बलियो प्रतिद्वन्द्वी इङग्ल्यान्डको सामना गर्नेछ ।

काठमाडौं । फिफा विश्वकप २०२६ अन्तर्गत अन्तिम क्वार्टरफाइनल खेलमा स्विट्जरल्यान्डले अर्जेन्टिनाविरुद्ध उत्कृष्ट पुनरागमन गर्दै खेललाई १–१ गोलको बराबरीमा ल्याएको छ ।

अमेरिकाको कान्सास सिटी स्टेडियममा जारी खेलको ६७औं मिनेटमा रिकार्डो रोड्रिगेजको सटीक असिस्टमा डान एनडोयेले गोल गर्दै स्विट्जरल्यान्डलाई बराबरी दिलाएका हुन् । अर्जेन्टिनाको रक्षापंक्तिको कमजोरीको फाइदा उठाउँदै एनडोयेले सहज फिनिसिङ गरेका थिए ।

यसअघि खेलको १०औं मिनेटमै अर्जेन्टिनाले अग्रता बनाएको थियो। कप्तान लियोनल मेसीले प्रहार गरेको कर्नरलाई एलेक्सिस म्याक एलिस्टरले उत्कृष्ट हेडरमार्फत गोलमा परिणत गर्दै टोलीलाई सुरुआती अग्रता दिलाएका थिए ।

पहिलो हाफमा खेलमाथि पकड जमाएको अर्जेन्टिनाले दोस्रो हाफमा भने स्विट्जरल्यान्डको आक्रामक खेलशैली सामना गर्नुपरेको थियो। बराबरी गोलपछि दुवै टोली निर्णायक गोलको खोजीमा आक्रमणलाई तीव्र बनाएका छन् ।

खेल जारी रहँदा सेमिफाइनल यात्रा सुनिश्चित गर्न दुवै टोलीले जित निकाल्ने प्रयास गरिरहेका छन् ।

काठमाडौं । फिफा विश्वकप २०२६ अन्तर्गतको खेलमा नर्वेलाई २–१ ले पराजित गरेको छ । 

आइतबार बिहान सम्पन्न भएको खेलमा नर्वेलाई पराजित गर्दै इङ्ल्यान्ड विश्वकपको सेमिफाइनलमा प्रवेश गरेको हो । 

जुड बेलिङहमले अतिरिक्त समयमा दुई गोल गरेको छ ।

खेलको ३६औं मिनेटमा नर्वेका मिडफिल्डर आन्द्रेयास सेल्डरपले उत्कृष्ट गोल गर्दै टोलीलाई सुरुवाती अग्रता दिलाए । तर, खेलको पहिलो हाफको थप गरिएको इन्जुरी समयमा इङ्गल्याण्डका जुड बेलिङ्ङ्घमले गोल फर्काउँदै खेललाई १—१ को बराबरीमा ल्याए ।

निर्धारित ९० मिनेटको खेल १—१ गोलको बराबरीमा सकिएको थियो । पछि थपिएको समयमा निर्णायक गोल गर्दै इङ्गल्याण्डले अन्तिम चारमा आफ्नो स्थान सुरक्षित गरेको हो ।

यस जितसँगै इङ्ल्यान्ड सेमिफाइनलमा प्रवेश गरेको छ । 

काठमाडौं । फिफा विश्वकप २०२६ को क्वार्टरफाइनलमा नर्वेले मियामीस्थित हार्ड रक स्टेडियममा इंग्ल्यान्डको सामना गर्दैछ । दुवै टोली सेमिफाइनलमा स्थान सुरक्षित गर्दै विश्वकप यात्रालाई ऐतिहासिक बनाउने लक्ष्यमा छन् । नेपाली समय अनुसार यी दुई टोली बीचको खेल आईतबार बिहान २ः४५ बजे सुरु हुनेछ ।

नर्वे फुटबल संघले सामाजिक सञ्जाल ‘एक्स’ मार्फत प्रशिक्षण सत्रका तस्बिर सार्वजनिक गर्दै टोली इंग्ल्यान्डविरुद्धको निर्णायक खेलका लागि पूर्ण रूपमा तयार रहेको जनाएको छ । पोस्टमा लेखिएको छ,‘निर्णायक दिनअघिको दिन ।’

प्रशिक्षक स्टाले सोलबाकेनको नेतृत्वमा रहेको नर्वे यस विश्वकपमा अप्रत्याशित रूपमा उत्कृष्ट प्रदर्शन गर्ने टोलीमध्ये एक बनेको छ । उसले राउन्ड अफ १६ मा पाँच पटकको विश्व विजेता ब्राजिललाई २–१ ले पराजित गर्दै पहिलोपटक विश्वकप क्वार्टरफाइनलमा स्थान बनाएको हो ।

ब्राजिलविरुद्धको खेलमा एर्लिङ हालान्डले दुई गोल गरेका थिए । उनले उत्कृष्ट दोस्रो गोल गर्दै नर्वेलाई अग्रता दिलाएका थिए । ब्राजिलका लागि नेयमारले पेनाल्टीमार्फत एक गोल फर्काए पनि नर्वेले ऐतिहासिक जित निकाल्यो ।

नर्वेले जारी विश्वकपमा आक्रामक खेल देखाउँदै पाँच खेलमा १२ गोल गरेको छ भने ९ गोल खाएको छ । समूह चरणमा फ्रान्ससँग पराजित भएको खेलबाहेक उसको प्रदर्शन प्रभावशाली रहेको छ । तर नर्वेको बाटोमा आत्मविश्वासका साथ अघि बढिरहेको इंग्ल्यान्ड रहेको छ । थोमस टुचेलको प्रशिक्षणमा रहेको इंग्ल्यान्डले राउन्ड अफ १६ मा सहआयोजक मेक्सिकोलाई ३–२ ले पराजित गर्दै क्वार्टरफाइनल पुगेको हो ।

१० खेलाडीमा सीमित भएर पनि इंग्ल्यान्डले उक्त खेलमा उत्कृष्ट प्रदर्शन गरेको थियो । जुड बेलिङ्घमले दुई गोल गरेका थिए भने ह्यारी केनले पेनाल्टीमार्फत अर्को गोल थपेका थिए । इंग्ल्यान्डले यस विश्वकपमा लगातार तीन खेल जितेको छ र हरेक जितमा कम्तीमा तीन गोल गरेको छ । पछिल्ला सात खेलमा उसले ६ जित निकालेको छ भने चीनविरुद्धको गोलरहित बराबरी मात्र अपवाद बनेको छ ।

यद्यपि, विश्वकपको नकआउट चरणमा युरोपेली टोलीविरुद्ध इंग्ल्यान्डको विगतको प्रदर्शनले नर्वेलाई केही आशा दिएको छ । इंग्ल्यान्ड विश्वकपबाट पछिल्ला ६ पटक बाहिरिँदा पाँच पटक युरोपेली टोलीसँग पराजित भएको थियो ।

तर इतिहास भने इंग्ल्यान्डको पक्षमा देखिन्छ । नर्वेले विश्वकपमा अहिलेसम्म कुनै पनि युरोपेली टोलीलाई पराजित गर्न सकेको छैन । साथै, इंग्ल्यान्डसँग पछिल्ला चार भेटमा नर्वेले गोल गर्न सकेको छैन । दुई टोलीबीचको समग्र प्रतिस्पर्धामा इंग्ल्यान्ड ७–२ ले अघि छ ।

यी दुई टोलीबीच पछिल्लो भेट सन् २०१४ को मैत्रीपूर्ण खेलमा भएको थियो, जहाँ वेन रुनीको पेनाल्टी गोलमा इंग्ल्यान्ड १–० ले विजयी भएको थियो । अब सेमिफाइनल प्रवेशका लागि हुने यो भिडन्तमा नर्वे आफ्नो ऐतिहासिक यात्रा कायम राख्न चाहन्छ भने इंग्ल्यान्ड उपाधि अभियानलाई अझ बलियो बनाउने लक्ष्यमा हुनेछ । एएनआई