भिजिट भिसा काण्डले सत्ताको जनविरोधी चरित्र उदाङ्गो पार्‍योः रास्वपा प्रमुख सचेतक परियार

काठमाडौँ  । राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियारले नेपाली राज्य र सत्ता सञ्चालकहरूको जनविरोधी चरित्र भिजिट भिसा प्रकरणले छर्लङ्ग पारेको बताएका छन्। शनिबार काठमाडौँमा आयोजित एक छलफल तथा अन्तरक्रिया कार्यक्रममा बोल्दै परियारले जनताको सुविधाका लागि बनाइएको राज्य नागरिकलाई दुःख दिने खालको बनेको भन्दै यसैकारण सदनमा सहमति नगरी आन्दोलन जारी राखिएको स्पष्ट पारे।

परियारले भने, ‘नेपाली राज्य कति हदसम्म जनविरोधी छ, सरकार र सत्ता चलाउनेहरू कुन हदसम्म जनतालाई दुःख दिने खालका छन् भन्ने कुरा भिजिट भिसा काण्डले प्रमाणित गरेको छ। त्यसकारणले पनि हामीले सहमति गरेनौं। लामो समयदेखि नीति र संरचना बनाएर जनताको सजिलोका लागि यो राज्य बनाएको हो। तर हाम्रो राज्य कस्तो भएछ भने नीति र संरचना बनाएर नागरिकलाई दुःख दिने खालको बनाएका रहेछौं। त्यसकारण पनि हामीले सदनमा सहमति नगरी आन्दोलन जारी राखेका हौं।’

उनले नेपाली कांग्रेस, नेकपा एमाले र नेकपा माओवादी केन्द्रबाट अब देशको विकास सम्भव नभएको दाबी गरे। रवि लामिछानेमाथि षड्यन्त्र गरी रास्वपालाई समाप्त पार्न खोजिए पनि पार्टी सांगठनिक रूपमा झन् बलियो बनेको उनको भनाइ थियो।

परियारले थपे, ‘नेपाली कांग्रेस, नेकपा एमाले र नेकपा माओवादी केन्द्रबाट अब यो देशलाई न्याय र विकास हुँदैन। यिनीहरूलाई लागेको थियो रवि लामिछानेमाथि षड्यन्त्र गरेर जेल हालिदिएपछि सिंगो रास्वपा समाप्त हुन्छ भन्ने। तर यहाँसम्म आउँदा राष्ट्रिय स्वतन्त्र पार्टी हिजोभन्दा आज सांगठनिक हिसाबमा सबैभन्दा बलियो भएको छ।’

रवि लामिछानेको नेतृत्वमा सुरु भएको संघर्षले गर्दा आम मानिसले सदनसम्म पुग्ने मौका पाएको भन्दै परियारले विगतका लोकतन्त्रवादी, समाजवादी र कम्युनिष्ट भनिनेहरूले आम नागरिकलाई राज्य सत्ताको पहुँचमा नपुर्‍याएको आरोप लगाए।

‘नेपालको राजनीतिमा तपाईं हामीजस्ता आम गरिखाने मान्छेले पहुँच राख्न सक्दैनन्,’ उनले भने, ‘आज त हामीले रवि लामिछानेको नेतृत्वमा एउटा संघर्ष सुरु गरेको हुनाले सन्तोष परियारजस्तो आम मान्छे सदनसम्म पुग्ने मौका पायो। विगतका मै हुँ भन्ने लोकतन्त्रवादी, समाजवादी र आफूलाई कम्युनिष्ट भन्नेहरूले पनि आम नागरिकलाई राज्य सत्ताको पहुँचमा पुर्‍याएका छैनन्। सधैं त्यही वर्ग, जाति र समुदायले नेपाली राजनीति र सत्ता चलायो।’

सात दशकभन्दा लामो समय शासन गरेर पनि निश्चित समूहबाहेक अन्य समूहको हित नगर्ने, नेपाली, मधेसी, पहाडी, दलित, महिलाको हित नगर्ने यस्ता राजनीतिक पार्टीहरू आवश्यक छैनन् भनेर नै राष्ट्रिय स्वतन्त्र पार्टीको स्थापना भएको उनको भनाइ थियो।