सोमबार, १५ मंसिर २०८२
जसपा-कम्युनिष्ट एकताको चर्चा 'भ्रामक': अध्यक्ष राई
काठमाडौँ । जनता समाजवादी पार्टी (जसपा) का केन्द्रीय अध्यक्ष अशोककुमार राईले आफ्नो पार्टी र नेपाली कम्युनिष्ट पार्टी बीच 'एकताका लागि सबै कुरा मिलिसकेको र हस्ताक्षर मात्र बाँकी रहेको' भन्ने चर्चा भ्रामक रहेको स्पष्ट पारेका छन् ।
अध्यक्ष राईले आज आफ्नो फेसबुकमार्फत एक सन्देश जारी गर्दै ती चर्चाप्रति गम्भीर ध्यानाकर्षण भएको जनाउँदै पार्टी एकताको कुनै प्रकारको सहमति नभएको जनाएका हुन् ।
“पार्टीको औपचारिक निर्णय बिना कुनै पनि व्यक्तिको निजी इच्छा वा धारणाको आधारमा पार्टी एकता सम्भव हुँदैन,” उनले फेसबुक सन्देशमा स्पष्ट पारेका छन्।
अध्यक्ष राईले पार्टीभित्र आवश्यक छलफल र निर्णय प्रक्रिया पूरा नगरी सार्वजनिक गरिएका यस्ता अभिव्यक्तिहरूले कार्यकर्ता तथा समर्थकहरू माझ भ्रम सिर्जना गर्न खोजेको र पार्टीभित्र विभाजनको वातावरण पैदा गर्न खोजिएको भन्दै आपत्ति प्रकट गरेका छन् ।
उनले अनधिकृत रूपमा यस्ता विषयहरू सार्वजनिक गर्ने कार्य नगर्न चेतावनी दिएका छन् ।
अध्यक्ष राईले जसपाका सम्पूर्ण सदस्य तथा समर्थकहरूलाई एकता, अनुशासन र स्पष्टताका साथ काम गर्न अपिल गरेका छन् ।
औपचारिक निर्णय नभएका विषयमा भ्रम छर्ने कार्यबाट टाढा रहन आग्रह गर्दै उनले जसपा आफ्ना सिद्धान्त र प्रक्रियामा दृढतापूर्वक अघि बढ्ने प्रतिबद्धता पनि व्यक्त गरेका छन् ।
सम्बन्धित खबर
