काठमाडौं । गृहमन्त्री रमेश लेखकले प्रधानमन्त्री केपी शर्मा ओलीको स्पेन भ्रमणमा सरकारी प्रतिनिधी मण्डल बाहेक गएको भन्ने विषयमा निष्पक्ष छानविन गर्न निर्देशन दिएका छन् ।

मन्त्री लेखकले सोमबार बिहान स्पेन भ्रमणबारे छानबिन गर्न गृह सचिब गोकर्णमणि दुवाडी र प्रहरी महानिरीक्षक दीपक थापालाई निर्देशन दिएका हुन् ।

‘प्रधानमन्त्री ज्यूको प्रतिनिधी मण्डल बाहेक स्पेन को को गए ?कुन विधिप्रक्रिया र कुन संस्थामार्फत स्पेन भ्रमण गए भन्ने विषय छानविन गर्न निर्देश गरेको छु’ मन्त्री लेखकले भने,‘जानका लागि भिजिट भिषाको प्रवन्ध कसले ग¥यो ? लगायतका विषयमा अनुसन्धान हुनेछ ।’

उक्त विषयको गहन छानविनका लागि प्रहरीको केन्द्रीय अनुसन्धान ब्यूरो र मानब बेचबिखन अनुसन्धान ब्यूरो खटिनेछ । ‘यस विषयमा दोषी देखिएकाहरुलाई कारबाही गरिने छ । ’उनले भने । प्रधानमन्त्री ओली गत असार १४ गते स्पेन भ्रमणमा गएका थिए ।

जनकपुर । सामाजिक संजाल टिकटक मार्फत सार्वजनिक रुपमा अश्लील शब्द र गाली गलौज गर्ने एक युवतीलाई धनुषा प्रहरीले पक्राउ गरेको छ ।

पक्राउ पर्नेमा जनकपुरधाम उप–महानगरपालिका–२४ की करिब २० वर्षीया रोशनी खातुन रहेकी छन् । सामाजिक सञ्जाल टिकटकमा निरन्तर अभद्र भाषा प्रयोग गरेको आरोपमा टिकटकर खातुनलाई नियन्त्रणमा लिइएको जिल्ला प्रहरी कार्यालय धनुषाले जनाएको छ ।

प्रहरीका अनुसार खातुनले टिकटकमा प्रयोग गरेको भाषा र व्यवहारले समाजमा नकारात्मक असर पारेको र सार्वजनिक नैतिकता र सामाजिक सद्भावमा खलल पु¥याउने किसिमको रहेको छ ।

खातुनविरुद्ध ‘अभद्र व्यवहार’ सम्बन्धी मुद्दा दर्ता गरिएको छ भने जिल्ला अदालतबाट म्याद थप गरी उनलाई जिल्ला प्रहरी कार्यालयको हिरासत कक्षमा राखेर अनुसन्धान भइरहेको छ  ।

काठमाडौं । गाजा सहरको केन्द्रस्थित अल—नुसेरात शरणार्थी शिविरमा आइतबार पानी भर्ने क्रममा इजरायली ड्रोन आक्रमण हुँदा ६ बालबालिकासहित कम्तीमा १० जनाको मृत्यु भएको गाजाको आपतकालीन सेवाका अधिकारीहरूले जनाएका छन् । 

सेनाले सर्वसाधारणमा भएको कुनै पनि क्षतिप्रति दुःख व्यक्त गरेको छ । इजरायली सेनाले आफूले एक आतंकवादीलाई निशाना बनाएको तर गोला–बारूद धेरै मिटर टाढा खसेको बताएको छ ।

घटनास्थलमा पानीको ट्याङ्कर छेउमा लाइनमा बसेका व्यक्तिहरूमाथि ड्रोनबाट क्षेप्यास्त्र प्रहार गरिएको थियो ।

इजरायली रक्षा बलले यस आक्रमणमा ‘एक आतंकवादीलाई’ लक्षित गरिएको भए पनि प्राविधिक त्रुटिका कारण बम लक्षित स्थानभन्दा धेरै पर खसेको स्वीकारेको छ । यस घटनाको समीक्षा भइरहेको सेनाले जनाएको छ ।

इजरायली रक्षा बलले घटनामा निर्दोष नागरिकको मृत्यु हुन पुगेको प्रति दुःख व्यक्त गर्दै भनेको छ, ‘हामी नागरिक क्षति न्यून पार्न सक्दो प्रयास गर्छौं र निर्दोष नागरिकहरूलाई क्षति पुगेमा खेद व्यक्त गर्छौं ।’

काठमाडौं । देशका विभिन्न स्थानमा आज हल्कादेखि भारी वर्षाको सम्भावना रहेको छ । जल तथा मौसम विज्ञान विभागका अनुसार दिउँसो देशभर साधारणतया बदली रहनेछ । 

देशभर मनसुनी वायुको प्रभाव तथा मनसुनको न्यूनचापीय रेखा पूर्वमा सरदर स्थानको आसपास र पश्चिममा सरदर स्थानभन्दा थोरै उत्तरतिर रहेका कारण देशका धेरै स्थानमा वर्षाको सम्भावना रहेको हो । 

कोसी, मधेस, वाग्मती, गण्डकी, लुम्बिनी र सुदूरपश्चिम प्रदेशलगायत देशको पहाडी भूभागमा केही स्थानहरूमा तथा बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना छ । 

कोसी, वाग्मती, गण्डकी, लुम्बिनी र कर्णाली प्रदेशका एकदुई स्थानमा भारी वर्षाको पनि सम्भावना छ । 

उच्च पहाडी तथा हिमाली भूभागका थोरै स्थानमा हल्कादेखि मध्यम वर्षा र हिमपातको सम्भावना छ ।

विभागले राति देशभर साधारणतया बदली रहने बताएको छ । कोसी, मधेस, वाग्मती, गण्डकी र लुम्बिनी प्रदेशका केही स्थान तथा बाँकी प्रदेशका थोरै स्थानमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। 

झापा । प्रधानमन्त्री केपी शर्मा ओलीले झापाको दमक नगरपालिकास्थित मदनडाँगी (ताराबारी) डिपु सडक स्तरोन्नती आयोजनाको आइतबार उद्घाटन गरेका छन्  ।

विश्व बैंकको सहयोगमा नगरपालिकाको गौरवको आयोजनाका रूपमा रहेकोे सडक नेपालभरका १७ सडकमध्ये एक हो ।  ४४ करोड २४ लाख लागतमा निर्मित ४.८६ किमी सो सडक समयमै सम्पन्न भएको नमूना आयोजना मानिन्छ ।

त्यस्तै उद्घाटन कार्यक्रममा बोल्दै प्रधानमन्त्री ओलीले देशभर विकास निर्माणका लहर ल्याउने क्रममा यो सडक पनि रहेकोे जनाउँदै मेची–महाकालीसम्म थालेका काम सक्ने अभियानमा सरकार रहेकोे बताएका छन्  । उनले  दमकको बेलडाँगीमा विशाल रंगशाला निर्माण हुने घोषणा पनि गरे । 

उनले हरेक क्षेत्रमा सुधार ल्याउने योजनाबमोजिम स्वयंसेवी भावनाका साथ महत्त्वपूर्ण विषयमा निस्शुल्क अनलाइन कक्षा संचालन गरेपछि यस वर्ष एसइइमा नतिजा १३ प्रतिशतले सुधार आएको बताए ।  

आफ्नो स्पेन भ्रमण सफल भएको पक्षलाई ओझेल पार्ने गरी केही विरोधी र अराजक तत्वले अरु कुरा नपाएर स्पेनमा मान्छे छाडेर आयो भनेर झुट र घटिया प्रचार गरेको भन्दै उनले यस्ता कुराहरूको जवाफ दिन आवश्यक नभएको टिप्पणी गरेका थिए ।  

कार्यक्रममा भौतिक पूर्वाधार तथा यातायातमन्त्री देवेन्द्र दाहाल, कोसी प्रदेशका मुख्यमन्त्री हिक्मतकुमार कार्की, पूर्व मुख्यमन्त्रीहरु शेरधन राई, उद्वव थापालगायत सहभागी भएका थिए  ।

काठमाडौँ । जनता समाजवादी पार्टी नेपाल (जसपा) र नागरिक उन्मुक्ति पार्टी (नाउपा) सत्ताको लोभमा फस्दा आफ्नै पार्टीका महत्त्वपूर्ण निर्णयहरू कार्यान्वयन गर्न आनाकानी गरिरहेका छन्।

जसपा नेपालको कार्यकारिणी समितिले प्रधानमन्त्री केपी शर्मा ओली नेतृत्वको सरकार पूर्णतः असफल भएको निष्कर्षसहित सरकारलाई दिएको समर्थन फिर्ता लिन संसदीय दललाई निर्देशन दिएको एक साता बितिसक्दा पनि कार्यान्वयन हुन सकेको छैन। गत असार ७ र ८ गते बसेको कार्यकारिणी समितिले असार ९ गते सार्वजनिक गरेको निर्णयअनुसार ओली सरकार भ्रष्टाचार नियन्त्रण, सुशासन, संविधान संशोधन र आर्थिक सुधारमा असफल रहेको ठहर गरेको थियो।

पार्टी अध्यक्ष उपेन्द्र यादवकै अध्यक्षतामा बस्ने संसदीय दलको बैठकले यो निर्णय कार्यान्वयन गर्नुपर्ने भए पनि बैठक बस्न आलटाल भइरहेको छ। पार्टीभित्रैका नेताहरूका अनुसार, साउन पहिलो साता हुने मन्त्रीपरिषद् विस्तारमा सहभागी भई मन्त्री पद हत्याउने उद्देश्यले समर्थन फिर्ताको निर्णयमा ढिलाइ भएको हो। यद्यपि, जसपा नेपालका प्रवक्ता मनिष सुमनले आइतवार संसदीय दलको बैठक बस्ने र त्यसैले समर्थन फिर्ताबारे निर्णय गर्ने बताएका छन्।

यता, नाउपाले ओली सरकारलाई दिएको समर्थन फिर्ता लिइसकेको छ र प्रतिनिधि सभामा प्रतिपक्षी बेन्चमा बस्दै आएको छ। सुदूरपश्चिम, लुम्बिनी र मधेश प्रदेश सरकारलाई दिएको समर्थन पनि नाउपाले फिर्ता लिएको छ। तर, पार्टीको निर्देशन विपरीत संघीय सरकारमा संस्कृति, पर्यटन तथा नागरिक उड्डयन राज्यमन्त्री रहेका अरुण चौधरीले भने अझै राजीनामा दिएका छैनन्। पार्टी अध्यक्ष रञ्जिता श्रेष्ठले राजीनामा दिन निर्देशन दिएको बताए पनि चौधरी सम्पर्क विहीन छन्।

सुदूरपश्चिमका मुख्यमन्त्रीले नाउपाका मन्त्री रामेश्वर चौधरीलाई पदबाट बर्खास्त गरेपछि नाउपाले संघीय र प्रादेशिक सरकारहरूबाट समर्थन फिर्ता लिएको थियो। तर, प्रधानमन्त्री ओलीले समर्थन फिर्ताबारे पुनर्विचार गर्न आग्रह गरेपछि नाउपाका संरक्षक रेशमलाल चौधरी र अध्यक्ष श्रेष्ठले प्रधानमन्त्री ओली र नेपाली कांग्रेसका सभापति शेरबहादुर देउवासँग छुट्‍टाछुट्‍टै भेटघाट गरेका छन्। जसपा, नेपाल जस्तै नाउपा पनि मन्त्रीपरिषद् पुनर्गठनमा 'फुलमन्त्री' लिने दाउमा लागेको र त्यसकै कारण राज्यमन्त्री चौधरीले राजीनामा नदिएको चर्चा छ।

काठमाडौँ । काठमाडौँ महानगरपालिकाले आज आर्थिक वर्ष २०८२–०८३को बजेट ल्याउँदै छ। शुक्रवार बसेको काठमाडौँ महानगरपालिकाको कार्यपालिका बैठकले आइतवार दिउँसो २ बजे नगरसभा गर्ने निर्णय गरेको हो।

सोही निर्णय अनुसार आज दिउँसो २ बजे बस्ने नगरसभामा बजेट प्रस्तुत हुनेछ।देशका ६ मध्ये पाँच महानगरपालिकाले निर्धारित समय मै आगामी आर्थिक वर्षको बजेट ल्याएका भए पनि काठमाडौँ महानगरपालिकामा भने आन्तरिक विवादको कारण बजेट ल्याउन सकेको थिएन।

काठमाडौँ । अफ्ताव आलमलाई उन्मुक्ति दिएको भन्दै न्याधीशहरूलाई कालोमोसो दल्ने नेकपा (बहुमत) का नेताहरूलाई पार्टीले सम्मान तथा अभिनन्दन गरेको छ । शनिवार राजधानीको संवाद डबलीमा पार्टीको ३ नम्बर ब्युरो (बागमती प्रदेश)ले पत्रकार सम्मेलन गरी स्वागत तथा अभिनन्दन गरेको हो ।

पार्टीका स्थायी समिति सदस्य उदयबहादुर चलाउने‘दिपक’ले गरिब तथा निमुखा जनताको न्यायको लागि जोखिम उठाएर हिम्मत गरेका नेताहरूलाई बधाई तथा धन्यवाद दिए । चलाउने पछिल्लो समयमा राज्यका तीनवोटै अंगहरूमा भ्रष्टाचार चरमचुलीमा पुगेको बेला आफ्नो पार्टीले त्यसविरुद्ध नयाँ अभियान चलाएको पनि बताए ।

जनताले सहि प्रकारको जनउत्तरदायी न्यायप्रणाली र अदालत नभएपछि आफ्नो पार्टी त्यसविरुद्ध लागेको बताउँदै भने, ‘जहाँ–जहाँ जनतामाथि अन्याय र अत्याचार हुन्छ, त्यहाँ–त्यहाँ नेकपा (बहुमत) उपस्थित हुन्छ, र हिम्मत गर्ने कमरेडहरूलाई सलाम छ ।’

पार्टीका २ नम्बर ब्युरो इन्चार्ज बाबुराम गजमेरले कालोमोसो दलेर जनपक्षीय कार्य गर्ने आफ्ना साथिहरूलाई बधाई दिए । गजमेरले देश र जनतामाथि संसदवादी पार्टी र उनिहरूको भ्रष्टाचार तथा बेथिति र अत्याचारविरुद्ध आफ्नो पार्टी लड्ने प्रतिबद्धता जनाए । समाजवादी व्यवस्थाले मात्रै देश र जनताले भोग्नु परेको अहिलेको समस्याबाट मुक्ति पाउने गजमेरको ठम्याई छ ।

कलोमोसो टोलीका सदस्य तथा पार्टीका केन्द्रीय सदस्य अभिनाश कुँवरले २४ दिने प्रहरी हिरासत र ४ दिने कारागार बसाईले धेरै कुरा सिकाएको बताउँदै भने, ‘हाम्रो बन्द पर्खालको बसाई उत्साहप्रद रह्यो, जनताको लागि कालोमोसो मात्रै हैन अपराधीहरूलाई त्यो भन्दा माथिको कारबाही गर्न तयार छौँ ।’

सो टोलीका अर्का सदस्य तथा पार्टी केन्द्रीय सदस्य पदम मगरले देशमा अन्याय र अत्याचारले सीमा नाघेको बताउँदै त्यसविरुद्ध निडर भएर अगाडी बढ्ने प्रतिबद्धता जाहेर गरे ।

गत जेठ २९ गते बीरगञ्ज उच्च अदालतको इजलासभित्रै अभिनाश कुँवर, पदम मगर र गर्भू महतोले न्यायाधीश द्वोय खुसिराम थारु र अर्जुन महर्जनलाई कालोमोसो छ्यापेका थिए । आलमले उन्मुक्ति पाए लगत्तै विभिन्न राजनीतिक दल तथा नेता कार्यकर्ता र आमजनताले न्यायाधीश विकेर फैसला गरेको भन्दै त्यसको व्यापक विरोध जनाएका थिए ।

चितवन जिल्ला इन्चार्ज पूर्ण विकले सञ्चालन गरेको कार्यक्रममा पार्टी स्थायी समिति सदस्य द्वोय डिडी पाण्डे र निर्मलसहितका विभिन्न तहका नेता तथा कार्यकर्ताहरूको उपस्थिति रहेको थियो ।

रौतहट । जनता समाजवादी पार्टी (जसपा) का मधेश प्रदेश अध्यक्ष अशोक यादवमाथि झुठा मुद्धा लगाएको भन्दै नेता तथा कार्यकर्ताहरूले मलंगवा बजार बन्द गराएका छन् ।

उनिहरूले सर्लाहीका एसपी योगेन्द्रकुमार खड्कामाथि कारबाही हुनुपर्ने र प्रहरीले लगाएको झुठा मुद्दा खारेज गर्नुपर्ने माग अघि सारेका हुन् ।

जसपा मधेश प्रदेश अध्यक्षमाथि लगाइएको मुद्दा फिर्ता नलिए आन्दोलन जारी रहने जसपा सर्लाहीका अध्यक्ष शम्भुप्रसाद यादवले बताए।

उनका अनुसार प्रहरीको ज्यादती विरुद्ध दुई दिने मलंगवा बजार बन्द आह्वान गरेको हो । पहिलो दिन शनिवार बिहानैदेखि  मलंगवा बजार बन्द हुनुका साथै यातायात समेत ठप्प छ ।

मलंगवाको विभिन्न स्थानमा जनता समाजवादी पार्टीका नेता तथा कार्यकर्ताहरूले टायर बालेर प्रदशन गरेका छन् । लामो तथा छोटो दूरीका कुनै पनि सवारी साधन मलंगवा–नवलपुरसँग जोडिएको सहायक राजमार्ग भएर चल्न सकेका छैनन्।

मलंगवा बजार क्षेत्रको कलकारखाना बन्द छ । जिल्ला प्रहरी कार्यालय सर्लाहीले भने ठाउँ ठाउँमा प्रहरीको उपस्थिति बाक्लो बनाएको छ । सर्लाही जिल्ला अदालतबाट प्रहरीले जसपा नेता यादवविरुद्ध पक्राउ पुर्जी जारी गरिसकेको छ ।

अदालतबाट पक्राउ पुर्जी जारी भएको एक साता बितिसक्दा पनि प्रहरीले यादवलाई पक्राउ गर्न भने सकेको छैन।  पूर्व मधेश प्रदेश सभा सदस्य समेत रहेका यादव र एसपी खड्काबिच असार १९ गते राति टेलिफोनमा अपशब्द प्रयोग गर्दै गालीगलौज र बाझाबाझ भएपछी अदालतबाट पक्राउ पुर्जी जारी भएको हो ।

सर्लाही जिल्ला अदालतले यादवविरुद्ध आपराधिक उपद्रो कसुरमा पक्राउ गर्न असार २० गते नै अनुमति दिएको थियो ।

जसपा नेता यादवलाई प्रहरीले खोजी गरिरहेको जिल्ला प्रहरी कार्यालय सर्लाहीले जनाएको छ । खोजी रहेका नेता यादव भने आफ्नो सामाजिक सन्जालमा विभिन्न भिडियो पोस्ट गर्ने र सञ्चारमाध्यमलाई अन्तर्वार्ता दिने काम भने गरिरहेकै छन् ।

काठमाडौं । दुबै इन्जिनमा एकै पटक इन्धन प्रवाह रोकिएपछि एयर इन्डियाको विमान दुर्घटना भएको प्रारम्भीक कारण खुलेको छ । भारतीय विमान दुर्घटना अनुसन्धान ब्यूरो (एबीआई) ले शनिबार जारी गरेको प्रारम्भिक अनुसन्धान रिपोर्टले यस्तो देखाएको हो । हालै दुर्घटनाग्रस्त एयर इन्डियाको विमानको दुवै इन्जिन उडान भरेको केही सेकेन्डमै बन्द भएको थियो ।

रिपोर्टमा भनिएको छ कि फ्लाइट एआई–१७१ विमान दुर्घटनाग्रस्त हुनुभन्दा पहिले, दुई इन्जिनको इन्धन प्रवाह नियन्त्रण गर्ने स्विचहरू एक अर्काको एक सेकेन्ड भित्र बन्द भएका थिए ।

जसले गर्दा विमान इन्जिनहरूले काम गर्न बन्द गरेका थिए । ककपिट भ्वाइस रेकर्डरले देखाउँछ कि एक पाइलटले सोधे, “तपाईंले किन बन्द गर्नु भयो?“ र अर्को पाइलटले जवाफ दिन्छ, “मैले गरेको होइन् ।“

दुर्घटना रिपोर्टले यो पनि देखाएको छ कि दुबै स्विचहरू “सामान्य“ स्थितिमा फिर्ता सारिएको थियो र इन्जिन १ ले रिकभरीको संकेत देखाए पनि, तर इन्जिन २ ले गर्न सकेन् ।

“विमानस्थलबाट प्राप्त सीसीटीभी फुटेजमा लिफ्ट–अफ पछि तुरुन्तै प्रारम्भिक आरोहणको समयमा राम एयर टर्बाइन तैनाथ गरिएको देखाइएको छ । उडान मार्गको वरपर कुनै पनि उल्लेखनीय चराहरुको गतिविधि देखिएको छैन् । विमानस्थलको परिधिको पर्खाल पार गर्नु अघि विमानले उचाइ गुमाउन थालेको रिपोर्टमा उल्लेख छ ।

लन्डन जाने एयर इन्डियाको विमान, बोइङ ७८७–८ ड्रीमलाइनर, जुन १२ मा अहमदाबादको सरदार वल्लभभाई पटेल अन्तर्राष्ट्रिय विमानस्थलबाट उडान भरेको केही समयपछि दुर्घटनाग्रस्त भएको थियो । जुन भारतको पश्चिमी राज्य गुजरातको राजधानी शहर गान्धीनगरबाट लगभग १७ किलोमिटर दक्षिणमा थियो । जसमा २४२ जना मध्ये एक जना बाहेक सबैको मृत्यु भयो र १९ जना जमिनमा थिए ।