काठमाडौं । निर्वाचन आयोगले निर्वाचन आचारसंहिता लागू भएयता हालसम्म २३ वटा उजुरी दर्ता भएको जनाएको छ । तीमध्ये १२ वटा सम्बन्धित व्यक्ति तथा संस्थासँग स्पष्टीकरण सोधिसकेको छ ।

आइतबार आयोगमा आयोजित नियमित पत्रकार सम्मेलनमा प्रवक्ता तथा सहसचिव नारायणप्रसाद भट्टराईले स्पष्टीकरण सोधिएका उजुरीमध्ये १२ वटाको जवाफ आइसकेको जानकारी दिए ।

उनका अनुसार कानुनी प्रावधानअनुसार सफाइको अवसर नदिई कारबाही गर्न नपाइने भएकाले आयोगले पहिला स्पष्टीकरण सोध्ने प्रक्रिया अपनाएको बताए ।

‘प्राप्त उजुरीहरुमध्ये २३ वटा उजुरी परेको छ । जसमा सम्बन्धित व्यक्ति तथा संस्थालाई स्पष्टीकरण सोध्ने काम भएको छ । १२ वटाको जवाफ आइसकेको छ । आयोगले कारबाही गर्नुअघि अनिवार्य रूपमा स्पष्टीकरण सोध्नुपर्छ । चित्त बुझ्दो जवाफ आएमा सफाइ दिइन्छ,’ भट्टराईले भने, ‘यदि चित्त बुझ्दो जवाफ आएन भने कारबाही गरिनेछ ।’

त्यसैगरी, उनले निर्वाचन आचारसंहिता उल्लंघनसम्बन्धी तथ्यसहितका उजुरी तथा गुनासो दर्ता गर्न आयोगले छुट्टै इमेल ठेगाना सार्वजनिक गरेको जानकारी दिए । उनका अनुसार ‘इसीएम डट सिओसी एड द रेट इलेक्सन डट जिओभी डट एनपी’ इमेलमार्फत आयोगमा उजुरी तथा गुनासो पठाउन सकिने व्यवस्था गरिएको प्रवक्ता भट्टराईले बताए ।

उनले भने, ‘आयोगको तर्फबाट निर्वाचन आचारसंहिता सम्बन्धमा तथ्य सहित उजुरी गर्नलाई हामीले एउटा इमेल ठेगाना सार्वजनिक गरेका छौं । ‘इसीएम डट सिओसी एड द रेट इलेक्सन डट जिओभी डट एनपी’ त्यो चाँही आयोगको तर्फबाट उजुरी र गुनासो गर्नलाई व्यवस्था गरिएको इमेल हो।’

काठमाडौं । नेपाल–जापान कूटनीतिक सम्बन्ध स्थापनाको ७०औँ वर्षगाँठको अवसरमा राष्ट्रपति रामचन्द्र पौडेल आज आइतबार जापानको औपचारिक भ्रमणमा प्रस्थान गर्ने भएका छन्। जापान सरकारको निमन्त्रणामा राष्ट्रपति पौडेल नेपाली प्रतिनिधिमण्डलको नेतृत्व गर्दै जापान जाने परराष्ट्र मन्त्रालयले जनाएको छ ।

परराष्ट्र सचिव अमृतबहादुर राईका अनुसार राष्ट्रपति पौडेल आज राति ११ः३० बजे नेपाल एयरलाइन्सको उडान नम्बर ४३३ मार्फत जापान प्रस्थान गर्नेछन्। भ्रमण सम्पन्न गरी उनी माघ २१ गते अपराह्न ४ः३० बजे स्वदेश फर्कने कार्यक्रम रहेको छ।

भ्रमणका क्रममा माघ १९ गते जापान सरकारले आयोजना गर्ने नेपाल–जापान कूटनीतिक सम्बन्धको ७०औँ वार्षिकोत्सवसम्बन्धी विशेष समारोहमा राष्ट्रपति पौडेल सहभागी हुनेछन्।

त्यसैगरी माघ २० गते टोकियोस्थित इम्पेरियल प्यालेसमा जापानका सम्राट नारुहितोसँग राष्ट्रपति पौडेलको राजकीय शिष्टाचार भेट तय गरिएको छ। सोही दिन जापानका प्रधानमन्त्री सुश्री ताकाइची सानाएसँग पनि राष्ट्रपति पौडेलको भेटवार्ता हुने तालिका रहेको परराष्ट्र मन्त्रालयले जनाएको छ। भ्रमणकै क्रममा जापानका विदेश राज्यमन्त्री होरिइ इवाओसँग पनि शिष्टाचार भेट हुनेछ।

यस भ्रमणका दौरान राष्ट्रपति पौडेल जापानी व्यावसायिक समुदायसँगको अन्तरक्रियामा सहभागी हुनेछन् भने जापानस्थित नेपाली राजदूतावासले आयोजना गर्ने स्वागत समारोहमा पनि उपस्थित हुने कार्यक्रम छ।

राष्ट्रपति पौडेलसँगै उनकी धर्मपत्नी सबिता पौडेल तथा उच्चस्तरीय सरकारी अधिकारीहरू भ्रमण टोलीमा सहभागी हुनेछन्।

काठमाडौं । प्रतिनिधिसभा निर्वाचनको मिति नजिकिँदै जाँदा निर्वाचन आयोगले मतपत्र छपाइको काम तीव्र बनाएको छ। आयोगका अनुसार आगामी फागुन २१ गते हुने निर्वाचनका लागि प्रत्यक्षतर्फ १५ जिल्लाका मतपत्र छपाइ सम्पन्न भइसकेको छ ।

हालसम्म १५ जिल्लाका १८ निर्वाचन क्षेत्रमा प्रयोग हुने प्रत्यक्षतर्फका मतपत्र छापिइसकेको आयोगले जनाएको छ । मतपत्र छपाइको काम भक्तपुरस्थित जनक शिक्षा सामग्री केन्द्रमा भइरहेको छ ।

डोल्पा, मुगु, जुम्ला, कालिकोट, हुम्ला, सल्यान र जाजरकोट जिल्लाका मतपत्र पूर्ण रूपमा तयार भइसकेका छन्। त्यस्तै दैलेखका दुवै निर्वाचन क्षेत्र, सुर्खेतका क्षेत्र नं. १ र २, रुकुम पश्चिम, बाजुरा र अछामका क्षेत्र नं. १ र २, कैलाली क्षेत्र नं. १, झापा क्षेत्र नं. ५ तथा सुनसरी क्षेत्र नं. १ का मतपत्र छपाइ सम्पन्न भएको आयोगले जानकारी दिएको छ ।

आयोगका अनुसार नमूना मतपत्रतर्फ १० लाख ९८ हजार २०० प्रति छपाइ भई सम्बन्धित निर्वाचन क्षेत्रमा वितरण गरिसकिएको छ । यसैगरी समानुपातिक प्रणालीतर्फ दुई करोड आठ लाखभन्दा बढी मतपत्र छपाइको काम पनि पूरा भएको छ ।

काठमाडौं । नेपाली कांग्रेसका महामन्त्री एवं काठमाडौं क्षेत्र ५ का प्रतिनिधि सभा सदस्य उम्मेदवार प्रदीप पौडेलले नीति निर्माणका लागि सुझाव संकलन थालेका छन् ।
महामन्त्री पौडेलले सामाजिक सञ्जालमार्फत नीति निर्माणका लागि सार्वजनिक सुझाव आह्वान गरेका हुन् ।

‘आगामी पाँच वर्षका लागि काठमाडौं ५ को नीति निर्माणमा अमूल्य सुझाव अपेक्षा गरेको छु,’ उनले भनेका छन् ।

नेता पौडेलले सबै नागरिकले सुझाव दिन सक्ने भन्दै अनलाइन तथा भौतिक दुवै माध्यमबाट सुझाव लिइरहेको बताए । ‘यस क्षेत्र र राष्ट्रको नीति निर्माणका लागि दिएको विश्वासकै आधारमा प्रतिनिधि सभामा निर्वाचित भएको थिएँ,’उनले भने, ‘यसपाली आगामी कार्यकालका लागि नागरिकको चाहनाअनुसार अघि बढ्न सुझाव संकलन थालेको हुँ ।’

नेता पौडेलले विभिन्न क्षेत्रका विशेषज्ञता प्राप्त क्षेत्रसँग भेटघाट गरेर समेत सुझाव संकलन गरिरहेका छन् ।

विगतमा आफूले गरेको काम सार्वजनिक गर्दै प्राप्त सुझाव र विज्ञहरुको प्रतिक्रियाका आधारमा आगामी योजना समेत सार्वजनिक गर्ने तयारी भैरहेको उनको सचिवालयले जनाएको छ ।

कांग्रेस महामन्त्री समेत रहेका नेता पौडेलले पार्टीको चुनावी घोषणापत्रका लागि समेत विषय विज्ञहरुबाट सुझाव संकलन गरिरहेका छन् ।

काठमाडौं । पछिल्लो एक सातादेखि भारतबाट मागअनुसार एलपी ग्यास आयात हुन नसक्दा नेपाली बजारमा आपूर्ति असहज भएको छ । जसले गर्दा उपभोक्ताले अभाव समेत झेल्नु परेको छ ।

सबैभन्दा धेरै ग्यास आयात हुने इन्डियन आयल कर्पोरेसन (आईओसी) को बरौनी रिफाइनरी मर्मतका क्रममा रहेकाले त्यहाँबाट कोटाअनुसार ग्यास लोड हुन नसकेको नेपाल आयल निगमले जनाएको छ ।

निगमका अनुसार नेपालमा मुख्यतः बरौनी, मथुरा, पारादीप र दुर्गापुर रिफाइनरीबाट ग्यास आयात हुँदै आएको छ । तीमध्ये मथुरा रिफाइनरीबाट भने नियमित रूपमा कोटाअनुसार ग्यास आइरहेको छ । तर बरौनी रिफाइनरीमा पुरानो प्लान्टका कारण बारम्बार मर्मत आवश्यक पर्ने भएकाले बीच–बीचमा दुई–चार दिनसम्म ग्यास लोड नै हुन नसकेको निगमको भनाइ छ ।

यस्तै, नेपाल एलपी ग्यास उद्योग संघका अध्यक्ष दिवान चन्दले पनि अहिले बरौनीबाट सीमित मात्रामामात्रै ग्यास आउन थालेको स्विकार गरे । ‘पारादीप र दुर्गापुर रिफाइनरीबाट पनि अपेक्षाभन्दा कम आपूर्ति भइरहेको छ,’ उनले भने । जाडोयाममा भारतमै पनि ग्यासको खपत बढ्ने भएकाले आईओसीले पहिला आफ्नै आन्तरिक माग पूरा गरेपछि मात्र नेपालतर्फ आपूर्ति गर्ने चलन रहेकाले समेत समस्या बढेको हो ।’

जाडो महिनामा विशेषगरी काठमाडौं उपत्यकामा ग्यासको खपत सामान्य समयको तुलनामा २०–२५ प्रतिशतसम्म बढ्ने गर्दछ । नेपालमा प्रतिमहिना करिब ४७–४८ हजार मेट्रिक टन ग्यास आवश्यक पर्नेमा चालु महिनामा आयात ४२–४३ हजार मेट्रिक टनमा सीमित हुने अनुमान गरिएको छ । यसरी चार–पाँच हजार मेट्रिक टनसम्म ग्यास कम आयात हुँदा बजारमा अभाव देखिएको चन्दले जानकारी दिए ।

अर्कोतर्फ, बरौनीबाट ग्यास नपाउँदा पारादीप (ओडिसा) जस्ता टाढाका रिफाइनरीसम्म गाडी पठाउनुपर्ने अवस्था आउँदा ढुवानीका साधनको अभाव पनि समस्या बनेको चन्दको भनाई छ । उनका अनुसार गाडी समयमै नपुग्दा लोडिङ प्रभावित भएको छ ।

चन्दकाअनुसार ग्यास आयातमा देखिएको समस्या करिब २०–२५ दिनदेखि रहे पनि बजारमा भने पछिल्लो एक–डेढ हप्तादेखि मात्र प्रत्यक्ष प्रभाव देखिन थालेको हो । अहिले उपलब्ध गाडी प्रयोग गरी ग्यास ल्याउने प्रयास तीव्र पारिएको र क्रमशः आपूर्ति सुधार हुँदै गएको उनले बताए । “यो समस्या धेरै दिन लम्बिँदैन, अब एक–डेढ हप्ताभित्र आपूर्ति क्रमशः सामान्य अवस्थामा फर्किनेछ,” निगम स्रोतले जनाएको छ ।

उदयपुर । जनता समाजवादी पार्टी (जसपा) का उदयपुर निर्वाचन क्षेत्र नं. १ का प्रतिनिधिसभा उम्मेदवार गणेश राईले आफ्नो चुनावी अभियान तीव्र बनाएका छन् । उनी घर–घर पुगेर मतदाता भेट्दै क्षेत्रको विकास र नागरिक अधिकार संस्थागत गर्न आफूलाई मत दिन आग्रह गरिरहेका छन् ।

घरदैलो अभियानका क्रममा स्थानीयसँग प्रत्यक्ष संवाद गर्दै राईले क्षेत्रका जनचाहना अझ स्पष्ट रूपमा बुझ्न पाएको बताएका छन्  । भाषणभन्दा काम र परिणामलाई प्राथमिकता दिने प्रतिबद्धता जनाउँदै उनले उदयपुरबासीको भरोसालाई व्यवहारबाट प्रमाणित गर्ने दृढ संकल्प व्यक्त गरे ।

अन्य प्रतिस्पर्धीलाई गाली गर्दै भाषण गर्नु भन्दा मतदाताको घर–घर पुगेर समस्या र आवश्यकता बुझ्नु नै सही राजनीति भएको राईको धारणा छ ।

चुनावी अभियानकै क्रममा उनले रोजगारी सिर्जना, शिक्षा तथा स्वास्थ्य सेवाको सुधार, ग्रामीण सडक विस्तार, पर्यटन र कृषिको आधुनिकीकरण, खोलाको कटान नियन्त्रण, स्थानीय समस्याको समाधान, सुशासन तथा भ्रष्टाचार अन्त्यलाई आफ्नो मुख्य एजेन्डाका रूपमा अघि सारेका छन् ।

यसैबीच, गत भाद्र २३ र २४ गते भ्रष्टाचारविरुद्ध र सुशासनको पक्षमा जेन–जीद्वारा सञ्चालित आन्दोलनप्रति उच्च सम्मान व्यक्त गर्दै राईले जनता समाजवादी पार्टी स्थापना कालदेखि नै शासन व्यवस्था सुधार, पहिचानमा आधारित संघीयता, प्रत्यक्ष निर्वाचित कार्यकारी प्रमुख तथा पूर्ण समानुपातिक समावेशी प्रणालीलाई मुख्य राजनीतिक मुद्दा बनाउँदै आएको उल्लेख गरे ।

सबै समुदायको बसोबास रहेको उदयपुर–१ मा घरदैलो अभियानका क्रममा मतदाताबाट उत्साहजनक प्रतिक्रिया पाइरहेको बताउँदै राईले यसपटकको निर्वाचनमा जाँतो चिन्हमा मतदान गरी आफ्नो तथा पार्टीको प्रतिबद्धतालाई अनुमोदन गर्ने विश्वास व्यक्त गरेका छन् ।

काठमाडौं। आगामी फागुन २१ गते हुने प्रतिनिधिसभा निर्वाचनलाई स्वच्छ, निष्पक्ष र विश्वसनीय बनाउन निर्वाचन आयोगले आचारसंहिता उल्लङ्घन नियन्त्रणमा कडाइ गरेको छ।

आचारसंहिताको पूर्ण पालना गराउन आयोगले राजनीतिक दल, उम्मेदवार, संस्था तथा सरोकारवाला सबै पक्षलाई निरन्तर ध्यानाकर्षण गराउँदै आएको जनाएको छ ।

केन्द्रीय आचारसंहिता अनुगमन समितिमा प्राप्त उजुरी र जानकारीका आधारमा हालसम्म २१ वटा स्पष्टीकरण सोधिएको र ३०२ हानिकारक सूचना कानुनी कारबाहीका लागि सम्बन्धित निकायमा पठाइएको आयोगले जनाएको छ ।

राजनीतिक दल, उम्मेदवार र संस्थासहित २१ जनासँग स्पष्टीकरण सोधिएकोमा तीमध्ये पाँच वटा स्पष्टीकरणको मात्र जवाफ प्राप्त भएको छ भने बाँकी स्पष्टीकरणका लागि ताकेता भइरहेको छ । समयमै जवाफ नआएमा कानुनबमोजिम थप कारबाही प्रक्रिया अघि बढाइने आयोगको भनाइ छ।

आयोगका अनुसार आचारसंहिताको उल्लङ्घन हुने गरी मिथ्या, भ्रमपूर्ण तथा घृणास्पद अभिव्यक्ति दिने व्यक्ति तथा समूहको निगरानीलाई पनि आयोगले तीव्र बनाएको छ। गैरकानुनी गतिविधिमा संलग्न व्यक्ति वा संस्थालाई नियामक निकायसँगको सहकार्यमा कानुनी दायरामा ल्याउन पहल भइरहेको आयोगले जनाएको छ ।

आयोगमा स्थापना गरिएको निर्वाचन सूचना सम्प्रेषण तथा समन्वय केन्द्रअन्तर्गतको सूचना सदाचार प्रवद्र्धन इकाई पूर्ण रूपमा क्रियाशील रहेको छ ।

उक्त इकाईले हालसम्म पहिचान गरेका कूल ३०२ वटा हानिकारक सूचनालाई निर्वाचन आचारसंहिता, २०८२, विद्युतीय (इलेक्ट्रोनिक) कारोबार ऐन, २०६३ तथा प्रेस काउन्सिल ऐन, २०४८ बमोजिम कारबाहीका लागि सम्बन्धित निकायमा पठाइएको आयोगका प्रवक्ता नारायणप्रसाद भट्टराईले जानकारी दिए ।

आयोगले सबै राजनीतिक दल, उम्मेदवार, सञ्चारमाध्यम र आम नागरिकलाई निर्वाचन आचारसंहिता पूर्ण रूपमा पालना गरी लोकतान्त्रिक अभ्यासलाई सफल बनाउन सहयोग गर्न आग्रह गरेको छ।

काठमाडौं । देश र जनताको स्वतन्त्रता तथा अधिकारका लागि जीवन आहुति दिने सहिदहरूको स्मरणमा आज शुक्रबार देशभर सहिद दिवस विविध कार्यक्रमका साथ मनाइँदैछ । प्रजातन्त्र, स्वतन्त्रता र न्यायका लागि आफ्नो जीवन बलिदान गर्ने सहिदप्रति श्रद्धाञ्जली अर्पण गर्दै यो दिवस मनाउने गरिन्छ ।

नेपालमा प्रजातन्त्र स्थापनाका लागि ज्यान अर्पण गर्ने चार महान् सहिद—धर्मभक्त माथेमा, दशरथ चन्द, गङ्गालाल श्रेष्ठ र शुक्रराज शास्त्रीसहित विभिन्न कालखण्डमा बलिदान दिएका सहिदहरुको सम्झनामा हरेक वर्ष माघ १६ गते सहिद दिवस मनाइन्छ।

राणा शासनविरुद्ध आवाज उठाएको आरोपमा तत्कालीन शासकले ती सहिदलाई मृत्युदण्ड दिएको थियो। उनीहरूको साहसिक बलिदानले नेपाली समाजमा चेतनाको बीजारोपण गर्दै जहानियाँ राणा शासनको अन्त्य र प्रजातन्त्र स्थापनाको मार्ग प्रशस्त गरेको इतिहास छ ।

सहिद दिवस केवल स्मरणको दिन मात्र नभई प्रजातन्त्र स्थापना, पुनःस्थापना तथा देशको सार्वभौमिकता र स्वतन्त्रताका लागि संघर्ष गरेका सहिदको योगदानबाट प्रेरणा लिने अवसरसमेत हो। यही उद्देश्यसहित माघ १० देखि १६ गतेसम्म ‘सहिद सप्ताह’ घोषणा गरी विभिन्न सचेतनामूलक तथा श्रद्धाञ्जली कार्यक्रमहरु आयोजना हुँदै आएका छन्।

स्वतन्त्रताको माग गर्दै संघर्ष गर्ने क्रममा १९९७ सालमा सहिद शुक्रराज शास्त्रीलाई माघ १० गते काठमाडौंको टेकुस्थित पचलीमा, धर्मभक्त माथेमालाई माघ १३ गते सिफलमा तथा गङ्गालाल श्रेष्ठ र दशरथ चन्दलाई माघ १५ गते शोभाभगवतीमा राणा शासकले मृत्युदण्ड दिएको थियो।

आजको दिन सहिदको सपना र बलिदानलाई स्मरण गर्दै लोकतन्त्रको संरक्षण, सुशासन र नागरिक अधिकारप्रति प्रतिबद्धता व्यक्त गर्ने दिनका रूपमा मनाइँदैछ ।

संखुवासभा । आगामी फाल्गुण २१ गते सम्पन्न हुने प्रतिनिधिसभा निर्वाचनलाई लक्षित गर्दै नेपाल कम्युनिष्ट पार्टी (एमाले) संखुवासभाले जिल्लाभर चुनावी अभियान सञ्चालन गर्ने तयारी तीव्र पारेको छ ।
पार्टीका जिल्ला कमिटी अध्यक्ष खड्गबहादुर राईको संयोजकत्वमा जिल्लास्तरीय १ हजार १ सदस्यीय प्रचारप्रसार कमिटी गठन गरिएको बुधबार पत्रकार सम्मेलन गरेर जानकारी गराइएको छ ।
१० स्थानीय तह रहेको संखुवासभामा एमालेले ठूला पालिकामा ५०१ सदस्यीय र साना पालिकामा ३०१ सदस्यीय निर्वाचन परिचालन कमिटी गठन गरिएको अध्यक्ष राईले जानकारी दिए ।
यी कमिटीमार्फत प्रतिनिधिसभा सदस्य पदका उम्मेदवार डा अर्जुनकुमार कार्कीलाई जिताउन वडा, टोल र बस्ती स्तरसम्म घरदैलो तथा जनसम्पर्क अभियान सञ्चालन गरिने जिल्ला कमिटी सचिवालय सदस्य किरणकुमार शाक्यले बताए ।
पार्टीले प्रचार सामग्रीको तयारी तथा वितरण, सवारी साधनको प्रयोग र अन्य व्यवस्थापनका सम्पूर्ण कार्यहरू निर्वाचन आचारसंहिताको पूर्ण पालना गर्दै गरिने स्पष्ट पारेको छ । अध्यक्ष राईले माघ १५ देखि फागुन २ गते सम्मको प्रचारतालिका समेत सार्वजनिक गरेका छन् ।
को हुन् अर्जुन कार्की
‘समृद्ध नेपाल सुखी नेपाली समुन्नत संखुवासभा मेरो जिम्मेवारी’ भन्ने मूल नाराका साथ निर्वाचनमा होमिएका डा कार्की अमेरिकाका लागि नेपालका पूर्व राजदूत हुन् ।
अल्पविकसित मुलुकहरुको अधिकारका लागि कार्यरत गैर सरकारी संस्थाहरुको संजाल, एलडीसी वाच, को अन्तर्राष्ट्रिय संयोजक भएर पनि काम गरिसकेका कार्कीले संयुक्त राष्ट्र संघ लगायत अन्तरराष्ट्रिय मंचहरुमा नेपाल जस्ता अल्प विकसित मुलुकहरुको पक्षमा पैरवी गर्दै आएका छन् ।
नेपालमा मानव अधिकार तथा सामाजिक क्षेत्रमा लामो समयदेखि काम गर्दै आएका कार्की प्रत्यक्ष राजनीतिमा संलग्न भएको भने यो पहिलो पटक हो ।

काठमाडौं । जल तथा मौसम पूर्वानुमान महाशाखाका अनुसार हाल देशमा पश्चिमी न्यूनचापीय प्रणालीको आंशिक प्रभाव रहेको छ । जसका कारण कोशी, बागमती, गण्डकी, कर्णाली प्रदेशका पहाडी भू–भागमा पूर्णतया बादल लागेको छ भने बाँकी भागमा आंशिक बादल लागेको छ । बागमती र गण्डकी प्रदेशका केही स्थानमा हल्का वर्षा पनि भइरहेको महाशाखाले जनाएको छ ।
महाशाखाका अनुसार आज दिउँसो तराईका धेरै स्थानमा हुस्सु लाग्ने छ । कोशी, बागमती र गण्डकी प्रदेशका उच्च पहाडी तथा हिमाली भागमा आंशिक बादल लाग्ने छ भने बाँकी क्षेत्रमा मुख्यतया मौसम सफा रहनेछ ।
कोशी, बागमती र गण्डकी प्रदेशका उच्च पहाडी तथा हिमाली भागका एक÷दुई स्थानमा हल्का हिमपात र वर्षाको सम्भावना रहेको पनि महाशाखाले जनाएको छ । ।
त्यसैगरी, महाशाखाका अनुसार आज राति तराईका केही स्थानमा हुस्सु लाग्ने छ भने लुम्बिनी, कर्णाली, सुदूरपश्चिम, कोशी, बागमती र गण्डकी प्रदेशका उच्च पहाडी तथा हिमाली भागमा आंशिक बादल लाग्ने छ । बाँकी अन्य क्षेत्रमा मुख्यतया मौसम सफा रहनेछ ।
कोशी, बागमती र गण्डकी प्रदेशका उच्च पहाडी तथा हिमाली भागका एक÷दुई स्थानमा हल्का हिमपात र वर्षाको सम्भावना पनि रहेको छ ।