धरान,२६ असार। पूर्वी क्षेत्रको धरान सहरमा अवस्थित पाथीभरा प्रि–आर्मी ट्रेनिङ एकेडेमीले आज (असार २६ गते) गुरु पूर्णिमाको पर्व भव्यताका साथ मनाएको छ। हरेक वर्ष आषाढ शुक्ल पूर्णिमाका दिन मनाइने यस पर्वमा गुरुप्रतिको श्रद्धा र सम्मान व्यक्त गर्ने परम्परा अनुसार एकेडेमीले विशेष कार्यक्रम आयोजना गरेको हो।

विगत १८ वर्षदेखि गोर्खा ब्रिट्रिश आर्मी र सिंगापुर पुलिस फोर्स भर्तीका लागि इच्छुक नेपाली युवाहरूलाई तयारी तालिम प्रदान गर्दै आएको पाथीभरा, गोर्खा भर्ती हुन चाहने युवाहरूको लागि तयारीका लागि पहिलो रोजाइमा पर्दै आएको छ। एकेडेमीले शारीरिक तन्दुरुस्ती, शैक्षिक ज्ञान र मानसिक दृढताका लागि आवश्यक सम्पूर्ण तालिम प्रदान गर्दै आएको छ। यहाँबाट प्रशिक्षित सयौं युवाहरूले सफलतापूर्वक ब्रिट्रिश आर्मी र सिंगापुर पुलिस फोर्स मा आफ्नो स्थान बनाउन सफल भएका छन्।

यस एकेडेमीमा तयारीरत ट्रेनी सौगात राईले कार्यक्रमबारे जानकारी दिँदै भने, "हामी यहाँ २०२६ को छनोट प्रक्रियाका लागि धेरै साथीहरू तयारी गरिरहेका छौं। आज गुरु पूर्णिमा भएकाले हाम्रा गुरुहरूलाई सम्मान स्वरूप यो कार्यक्रम आयोजना गरिएको हो।" उनले थपे, "यसका लागि पाथीभरा एकेडेमीले पनि केही व्यवस्थापनका लागि सहयोग र साथ दिनुभएको छ। यसको लागि हामी सबै ट्रेनीहरूको तर्फबाट एकेडेमीको म्यानेजमेन्ट टिमलाई धन्यवाद दिन्छौं।" ट्रेनीहरूले फूलमाला, टीका र मिठाईका साथ आफ्ना गुरुहरूलाई सम्मान गरेका थिए। गुरुहरूले पनि आफ्ना विद्यार्थीहरूलाई सफलताका लागि शुभकामना र आशीर्वाद प्रदान गरे।

कार्यक्रममा एकेडेमीका सञ्चालक मिलन राईले सम्पूर्णलाई गुरु पूर्णिमाको शुभकामना व्यक्त गर्दै गुरुको महत्वका बारेमा आफ्ना धारणा व्यक्त गरे। उनले विद्यार्थीहरूको उज्ज्वल भविष्यको कामना गर्दै गुरु र विद्यार्थीबिचको सम्बन्धलाई थप सुदृढ बनाउनुपर्नेमा जोड दिए। "गुरुले विद्यार्थीलाई सही मार्ग देखाउँछन् र उनीहरूको जीवनलाई आकार दिन्छन्," राईले भने, "यस एकेडेमीको सफलताको पछाडि हाम्रा अनुभवी गुरुहरूको अथक परिश्रम र समर्पणको ठूलो हात छ।"

मुगु । खत्याड गाउँपालिकाको वडा नं ६ मा पर्ने लाम्र पन्सेरीमा रहेको भगवती माध्यमिक विद्यालयमा अध्वनरत विद्यार्थीहरू भौतिक पूर्वाधारको अभावमा चिसो भुइँमै बसेर पढ्न बाध्य छन् ।

विद्यालयमा भवन अभाव हुँदा यहाँका विद्यार्थीहरू खुला आकाश, टिनको टहरा र बहु कक्षाको व्यवस्था गरी भुइँमा बसेर पठनपाठन गर्न बाध्य भएको पाइएको हो । भौतिक पूर्वाधार निर्माणका लागि विद्यालयसँग पर्याप्त जग्गा भएपनि स्रोतको अभावमा पूर्वाधार निर्माण हुन नसकेको हो ।

पूर्वाधार अभावमा ईसीडी कक्षा देखि १० कक्षासम्म बध्यनरत ३ सय ५० भन्दा बढी विद्यार्थीहरूलाई पठनपाठनका लागि निकै समस्या भएको विद्यालयले बताएको छ । विद्यालयमा आठवटा मात्र कोठा छन् । जसमा फरक फरक दुईवटा कक्षाका विद्यार्थीहरू सँगै बसेर अध्ययन गरिरहेको विद्यालयका प्रधानाध्यापक बिस्नु केसीले जानकारी दिए ।

कक्षा कोठा निर्माणका लागि आ.व. २०७६/७७ मा कर्णाली प्रदेश सरकारको सामाजिक विकास कार्यालयले २८ लाख रुपैयाँ बजेट विनियोजन गरेको थियो ।

तर, सो बजेटले भवन निर्माण गर्न अपुग भएपछि निर्माणाधीन भवन अलपत्र अवस्थामा छ । पूर्वाधार निर्माणमा सहयोग गर्न स्थानीय र प्रदेश सरकारसँग मौखिक रूपमा सहयोग मागिए पनि त्यसको सुनुवाइ नभएको प्रधानाध्यापक केसीले बताए ।

‘विद्यालयमा कक्षाकोठा नै अभाव भएकाले पढाइ राम्रो हुन सकेको छैन् । व्यक्तिगत सरसफाइमा पनि असर परेको छ । खुला आकाश र चौरमा बसेर पढ्नु परेको छ भने एउटै कक्षामा दुई फरक कक्षाका विद्यार्थी बसेर पढ्नुपर्दा होहल्ला बढी हुने भएकाले शिक्षकले पढाएको कुरा समेत बुझन गाह्रो भएको छ,’कक्षा दशमा अध्ययनरत छात्रा आकृति शाहीले भनिन् ।

राज्यले शिक्षा, स्वास्थ्य, र रोजगारीको जस्ता अनेक शीर्षमा बजेट छुट्याएपनि बजेट अभावमा मुगु जिल्लामा रहेका धेरै विद्यालयहरूको अवस्था यस्तै रहेको वडा नम्बर ६ का  वडा अध्यक्ष भरत बहादुर शाहीले बताए । उनका अनुसार प्रदेश सरकारले दिएको बजेटले विद्यालयको जग हाल्न मात्र पुगेकोले आधा निर्माण भएको भवन वर्षौँ देखि अलपत्र अवस्थामा छ ।

काठमाडौं । शिक्षा, विज्ञान तथा प्रविधि मन्त्री रघुजी पन्तले शिक्षा विधेयक पारित गर्ने विषयलाई केही दिन होल्ड गर्न आग्रह गरेका छन् । सोमबार शिक्षा, स्वास्थ्य तथा सूचना प्रविधि समितिको बैठकमा उनले मन्त्रीको हैसियतले सबै कुराहरु मिलाउन समय चाहिएको भन्दै बैठकलाई  स्थगित गर्न आग्रह गरेका छन् । 

उनले भने, ‘यो बैठकलाई आज स्थगित गरौं किनभने एउटा कुरा प्रष्ट भन्न चाहान्छु संसदीय प्रणालीमा र समितिमा पनि सरकारको तर्फबाट मन्त्रीले यसलाई अहिले रोकौ भनेपछि त्यो विधेयकको रुपमा अगाडि जादैँन् । यसलाई अहिले स्वीकारको पक्षमा नजाउ, तपाईहरुसँग मेरो कुरा मिल्छ तर मन्त्रीको हैसियतले सबै कुराहरु मिलाउन मलाई समय चाहियो । यो समय जटिल छ, यो अवस्थामा सबै कुरा मिलाउन पर्छ संयोजन गरेर जानुपर्छ । त्यसकारण समय चाहियो तर सरकारले मानेन हामी पास गर्छौ भन्नु हुन्छ भने म रोक्दिन तर सरकारले अहिले नगरौं भनेको कुरा अगाडि बढेको मलाई कुरा अझसम्म भएको थाहा छैन् ।’

बैठक फेरि अनिश्चितकालका लागि स्थगित भएको छ । केही सांसदहरूले मन्त्रीले विधेयक पारित प्रक्रियामा ‘ढिलाइ गर्न खोजेको’ आरोपसमेत लगाए । तर, अन्ततः समितिका सभापति अम्मरबहादुर थापाले सबै सदस्यको प्रतिक्रिया सुनेपछि बैठक ‘पुनः आह्वान नहुन्जेलसम्म’ स्थगन भएको घोषणा गरेका छन् ।

धरान, असार १६। विगत ३२ वर्षदेखि धरानमा कम्प्युटर शिक्षा प्रदान गर्दै आएको मिक कम्प्युटर प्रा.लि.ले यस आर्थिक वर्ष २०८१/८२ मा धरान उपमहानगरपालिकासँगको सहकार्यमा "हाम्रो अभियान: कम्प्युटर प्रयोगको व्यावहारिक ज्ञान प्रदान" नाराका साथ आधारभूत कम्प्युटर कोर्सको निःशुल्क तालिम सफलतापूर्वक सम्पन्न गरेको छ। यस कार्यक्रमले धरानका वडा नं. ३, ९ र ११ का कुल ७८ जना विद्यार्थीलाई आधारभूत कम्प्युटर ज्ञान प्रदान गरेको हो।

कार्यक्रममा वडा नं. ३  बाट १७ जना, वडा नं. ९ बाट २४ जना, र वडा नं. ११ बाट ३७ जना विद्यार्थीले सहभागिता जनाएका थिए । धरान ११ बाल सञ्जालका अध्यक्ष रोजन शंकरका अनुसार प्रत्यक्ष सहभागितामा कम बजेटमै धेरै विद्यार्थीले यो अवसर प्राप्त गर्न सकेको बताएकाछन् ।

कार्यक्रमको समापन समारोह धरान ११ का वडाध्यक्ष श्री लोकेन्द्र फागो लिम्बुको प्रमुख आतिथ्यमा सम्पन्न भएको थियो। अध्यक्ष लिम्बुले यो कार्यक्रम एस.ई.ई. परीक्षामा सहभागी भई नतिजाको पर्खाइमा रहेका विद्यार्थीहरूलाई लक्षित गरी वडाले पहिलो पटक ल्याएको जानकारी दिनुभयो । उहाँले आगामी वर्षहरूमा पनि यस्तै व्यावहारिक शिक्षासँग सम्बन्धित कार्यक्रमहरू निरन्तर ल्याउने प्रतिबद्धता व्यक्त गर्नुभयो ।

मिक कम्प्युटर प्रा.लि. धरानका सञ्चालक तथा प्रवन्ध निर्देशक राजकुमार थोप्राले आफ्नो भनाइ राख्दै धरान ११ नं. वडाले आफ्ना वडाबासीहरूका लागि तीन महिने कम्प्युटर सीप तालिमका लागि २०८१/८२ को बजेट उपलब्ध गराएकोमा वडा समितिलाई हार्दिक धन्यवाद ज्ञापन गरे । उनले सूचना प्रविधि (आई.टी.) क्षेत्रमा अगाडि बढ्नका लागि यो आधारभूत सिकाइ महत्वपूर्ण रहेको र आगामी दिनमा थप उन्नत कोर्सहरूको तालिम लिई दक्ष बन्नका लागि सबैलाई शुभकामना व्यक्त गरे ।

काठमाडौ । माध्यमिक शिक्षा परीक्षा (एसईई) प्रदेशबाटै गर्न सरकारले प्रस्ताव गरेको छ । शनिबार सिंहदरबारमा बसेको प्रतिनिधिसभा अन्तर्गतको शिक्षा, विज्ञान तथा प्रविधि समितिको बैठकमा सरकारको तर्फबाट शिक्षामन्त्री रघुजी पन्तले सो प्रस्ताव अघि सारेका हुन् । 

बैठकमा बोल्दै उनले एसईई प्रदेशबाट सञ्चालन गर्नुपर्ने र एसईईले गुणस्तर कायम गर्न मद्दत पुग्ने बताए । उनले एसईई हटाइयो भने सीटीभीटीमा भर्ना के गर्ने भनि प्रश्न गरे । 

उनले भने, ‘बजेटमा पनि एसईई प्रदेशमा दिने भनेर पास गरेको छ । सीटीभीटीमा भर्ना हुने पनि एसईई पछि हो । एसईई हटायो भने सीटीभीटीमा भर्ना के गर्ने ।  सरकरले प्रदेशमा गर्ने भनेर ल्याएको छ । एसईई राखौं प्रदेशबाट सञ्चालन गरौं । एसईईले गुणस्तर कायम गर्न मद्दत गर्छ ।’

काठमाडौं । राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा प्रकाशनको प्रक्रिया अन्तिम चरणमा पुगेको जनाएको छ । नतिजा प्रकाशनको प्रक्रियाको अन्तिम तयारी गरिरहेको बोर्डले नतिजा प्रकाशनको मिति भने टुंग्याएको छैन । त्यसैका लागि बोर्डले आज बोर्ड बैठक बस्ने तयारी गरेको छ ।

नतिजाको विषयमा छलफल गर्न परीक्षा बोर्डको बैठक आज बस्ने भए पनि समय भने निर्धारण भैइसकेको छैन ।

२०८१ को एसईई परीक्षा ७ चैतदेखि सञ्चालन भएको थियो । परीक्षामा नियमिततर्फ ४ लाख ३१ हजार ४६६ र ग्रेडवृद्धितर्फ ६७ हजार ७१५ गरी जम्मा ४ लाख ९९ हजार १८३ विद्यार्थी सहभागी भएका थिए ।

जनकपुर। जनकपुरधामस्थित रामसागर रामस्वरूप बहुमुखी (राराब) क्याम्पसमा बीबीएस तेस्रो वर्षको परीक्षाको प्रवेशपत्र वितरणमा ढिलाइ भएपछि उत्पन्न विवादले शुक्रवार उग्र रूप लिएको छ। आक्रोशित विद्यार्थी र प्रहरीबिचको झडपमा केही प्रहरी घाइते भएका छन् भने दुई विद्यार्थी नेता पक्राउ परेका छन्।

शुक्रवारबाट सुरु भएको बीबीएस तेस्रो वर्षको परीक्षाका लागि प्रवेशपत्र वितरणमा ढिलाइ हुँदा विद्यार्थीहरू आक्रोशित बनेका थिए। आफ्नो प्रवेशपत्र नभेटिएपछि विद्यार्थीहरूले स्ववियु सभापति मनिष यादवलाई जानकारी गराएका थिए। यादवले यस विषयमा क्याम्पस प्रमुख वसन्त कर्णसँग बुझ्दा उनले गैरजिम्मेवारीपूर्वक जवाफ दिएको विद्यार्थीहरूको आरोप छ।

क्याम्पस प्रमुखको जवाफबाट क्रुद्ध बनेका विद्यार्थीहरूले उनीसँग विवाद गर्न थालेपछि क्याम्पस प्रमुखले प्रहरीलाई खबर गरेका थिए। स्थिति नियन्त्रणमा लिने क्रममा प्रहरीले विद्यार्थीहरूलाई गालीगलौज गरेको विद्यार्थीहरूको आरोप छ, जसले गर्दा विवाद झन् चर्किएको थियो। यस झडपमा केही प्रहरी पनि घाइते भएको जिल्ला प्रहरी कार्यालय धनुषाले पुष्टि गरेको छ।

स्थिति नियन्त्रणभन्दा बाहिर गएपछि प्रहरीले स्ववियु सभापति मनिष यादव र विद्यार्थी नेता चमनप्रसाद गोइतलाई पक्राउ गरेको छ। धनुषाका प्रहरी नायव उपरीक्षक वरुणबहादुर सिंहका अनुसार, प्रहरीले विवाद साम्य पार्न खोज्दा विद्यार्थी नेताहरूले अभद्र व्यवहार गरेपछि उनीहरूलाई पक्राउ गर्नुपरेको हो।

विद्यार्थी नेताहरूको पक्राउको विरोधमा विद्यार्थीहरूले क्याम्पस चोकमा सडक अवरुद्ध गर्दै प्रदर्शन गरेका थिए। हाल उनीहरू जिल्ला प्रशासन कार्यालय अगाडि प्रदर्शन गरिरहेका छन् र पक्राउ परेका विद्यार्थी नेताहरूको तत्काल रिहाइको माग गरिरहेका छन्।

यता, क्याम्पस प्रमुख वसन्त कर्णले प्रवेशपत्र काठमाडौंबाटै आउन ढिलाइ भएकाले वितरणमा ढिलाइ भएको प्रतिक्रिया दिएका छन्। यस घटनाले जनकपुरधामको शैक्षिक वातावरणमा तनाव सिर्जना गरेको छ

काठमाडौँ । शिक्षा, विज्ञान तथा प्रविधि मन्त्रालयले माध्यमिक शिक्षा परीक्षा (एसईई) प्रदेशबाट सञ्चालन गर्ने प्रस्ताव गरेको छ । शनिवार शिक्षा, स्वास्थ्य तथा सूचना प्रविधि समितिको बैठकमा भएको विद्यालय शिक्षा विधेयकमाथिको छलफलमा एसईइलाई प्रदेशबाट सञ्चालन गर्ने प्रस्ताव राखेका हुन् । 

उनले भने,‘अधिकार स्थानीय तहको नै हो । तर त्यो अधिकार निरङकुश र मनलाग्दी ढंगले प्रयोग गर्न नपाओस् भन्न शिक्षकहरूको योग्यता शिक्षा सेवा आयोगले तोक्छ । उनीहको विभिन्न रेकर्ड राख्ने र धेरै अधिकार नदिइकन जुन शिक्षा इकाई छ त्यसलाई कायम गर्ने कुरा सरकारको नीति कार्यक्रममा पनि आएको छ । एसईई प्रदेश सरकारलाई नै जिम्मा लगाउ । प्रदेशलाई जिम्मा लगाएपछि त्यसमा शिक्षा इकाईले पनि सहयोग गर्छ ।माध्यमिक शिक्षा अब स्थानीय सरकारको अधिकार हो भन्ने कुरामा प्रस्ट छौैँ ।’ 

त्यस्तै उनले निजी विद्यालय शैक्षिक गुठी र कम्पनीमै स्थापना र सञ्चालन गर्ने प्रस्ताव गरे । निजी विद्यालयलाई निषेध गरेर जान नसकिने भन्दै कडाइका साथ नियमन र गुठीमा जानेलाई प्रेरित गर्नुपर्ने उनको भनाई छ । 

सरकार र आन्दोलनकारीबिचको सहमतिमा हस्ताक्षर वाध्यता हो : सभापति थापा

यस्तै, बैठकमा समितिका सभापति अम्मरबहादुर थापाले सरकार र आन्दोलनकारीबिचको सहमतिमा बाध्य भएर आफूले हस्ताक्षर गरेको बताए । आफूले हस्ताक्षर नगरेसम्म आन्दोलन नरोकिने अवस्था देखेपछि बाध्य भएर हस्ताक्षर गरेको बताएका हुन् । 

उनले भने, ‘त्यहाँ समस्या समाधान नहुने भएपछि हस्ताक्षर गर्नुपर्ने बाध्यता पर्यो । म समितिमा आएर आलोचित पनि भएको छु । उपसमितिले त्यहाँ गएर सही नगर्नु भनेको थियो । हस्ताक्षर नगरेरै आउन खोजेको हो । मैँले नै हस्ताक्षर नगरेसम्म आन्दोलन रोकिँदै नरोकिने भएपछि बाध्य भएको हुँ । मैले त्यो विषयमा धेरै आलोचना खेप्नु पनि प¥यो । सरकार र आन्दोलनकारीबिचको सम्झौता संसद्भित्र प्रवेश गर्नु भनेको कमजोरी थियो । मैले त्यहाँ पनि यही शब्द भनेको थिएँ । संसदीय प्रणाली विपरीत मलाई हस्ताक्षर नगराउनुस् भनेको थिएँ त्यसैलाई जबरजस्ती भन्ने शब्द परेको हो । नत्र मैले जबरजस्ती हात समाएर गराएको भनेको छैन ।’

त्यस्तै पूर्व शिक्षामन्त्री तथा राष्ट्रिय स्वतन्त्र पार्टीकी सांसद सुमना श्रेष्ठले विद्यालय शिक्षा विधेयक बनाउने विषयमा बाह्य प्रेसर आउने गरेको भन्दै त्यो सह्य नहुने बताइन् । 

धरान, सुनसरी । अत्यधिक गर्मीका कारण विद्यार्थीको स्वास्थ्यमा प्रतिकूल असर पर्न सक्ने भन्दै धरान उपमहानगरपालिका अन्तर्गतका सबै सामुदायिक तथा संस्थागत विद्यालयहरू जेठ २९ र ३० गते (दुई दिन) का लागि बन्द हुने भएका छन्।

उपमहानगरपालिकाले जारी गरेको सूचनाअनुसार विगत केही दिनदेखि तापक्रममा उल्लेख्य वृद्धि भई पठनपाठन सञ्चालनमा कठिनाइ भएको र बालबालिकाको स्वास्थ्यमा नकारात्मक प्रभाव पर्ने देखिएकाले यो निर्णय गरिएको हो। बन्द गरिएका यी दुई दिनको बिदालाई विद्यालयको वार्षिक बर्खे बिदाबाट समायोजन गरिनेछ।

यद्यपि, धरान उपमहानगरपालिकाका वडा नं. ४ र २० अन्तर्गतका विद्यालयहरूका लागि भने विशेष व्यवस्था गरिएको छ। यी वडाका विद्यालयहरूले आफ्नो भौगोलिक अवस्था र भौतिक संरचनाको प्रकृतिलाई ध्यानमा राखी, अत्यन्त आवश्यक परेमा मात्र विद्यालय बन्द गर्न सक्नेछन्। यसका लागि सम्बन्धित विद्यालयका प्रधानाध्यापकहरूलाई आफ्नो विद्यालयको अवस्थाको मूल्याङ्कन गरी सोही अनुसार निर्णय लिन अनुरोध गरिएको छ।

उपमहानगरपालिकाले जारी गरेको सूचनामा यस अवधिमा तापक्रममा गिरावट आएमा वा मौसमको अवस्था अनुकूल बनेमा भने विद्यालयहरूलाई नियमित पठनपाठन तत्काल सञ्चालन गर्न समेत अनुरोध गरिएको छ। 

रामेछाप । मन्थली नगरपालिका–९ को पुरानागाउँ स्थित स्थानापति मावि बाङ्गेसल्लामा जनप्रतिनिधि समेतको उपस्थितिमा विद्यालयमा तालाबन्दी गरिएको छ । 

सोमबार विद्यालयमा पठनपाठन भइरहेको समयमा जिल्ला समन्वय समिति रामेछापकी सदस्य हिराकुमारी गिरी, वडा सदस्य धनलाल तामाङ समेतको उपस्थितिमा बैठक बसी विद्यालयमा ताला लगाइएको हो । 

विद्यालय व्यवस्थापन समितिलाई पूर्णता नदिएको भन्दै सोमबार विद्यालय व्यवस्थापन समितिका ज्येष्ठ सदस्य धनबहादुर तामाङको अध्यक्षतामा जनप्रतिनिधि समेतको उपस्थितिमा बैठक बसी निर्णय नै गरेर विद्यालयमा ताल लगाइएको छ । 

गत पुस १५ गते विद्यालय व्यवस्थापन समितिको निर्वाचन भई सदस्यहरू निर्वाचित भइसकेको अवस्थामा कानुन अनुसार मनोनीत गर्नुपर्ने सदस्य मनोनीत गरेर अध्यक्ष नचुनिएको उनीहरूको आरोप छ । विद्यालय व्यवस्थापन समितिको बैठक राख्न ज्येष्ठ सदस्यले पटक पटक अनुरोध गर्दा पनि विद्यालय प्रशासनले अटेर गरेको कारण ताल लगाउनु परेको निर्णयमा उल्लेख छ । 

पठनपाठन भईरहेको बेला विद्यार्थीहरूलाई कक्षाबाट निकाली जनप्रतिनिधिले नै विद्यालयमा तालाबन्दी गरेको कारण पठन पठान प्रक्रिया अवरुद्ध भएकोले घटनामा संलग्नलाई कारवाही गर्नुपर्ने माग गर्दै विद्यालयका प्रधानाध्यापक शम्भु मण्डलले सोमबार नै जिल्ला प्रशासन कार्यालय रामेछापमा निवेदन दर्ता गराएका छन् ।  

प्रमुख जिल्ला अधिकारी श्यामकृष्ण थापाले मंगलबार आज दुवै पक्षलाई छलफलको लागि बोलाइएको जानकारी दिए ।