सर्लाही । प्रतिनिधिसभा सदस्य निर्वाचन अन्तर्गत सर्लाही निर्वाचन क्षेत्र नम्बर ४ मा मतगणनाको पहिलो अपडेट सार्वजनिक भएको छ । प्रारम्भिक मतपरिणाम अनुसार राष्ट्रिय स्वतन्त्र पार्टी (रास्वपा) का उम्मेदवार अमरेश कुमार सिंह अग्रस्थानमा देखिएका छन् ।

हालसम्म गणना भएको मत अनुसार सिंहले १,२३५ मत प्राप्त गरेका छन् । त्यस्तै नेपाली कांग्रेसका उम्मेदवार गगन थापाले ७४४ मत ल्याएका छन् । नेकपा एमालेका उम्मेदवार अमनिश कुमार यादवले १९४ मत प्राप्त गर्दा नेकपा तर्फका उम्मेदवार रजनीश राय यादवले १२ मत प्राप्त गरेका छन् ।

काठमाडौं । जुम्लामा राष्ट्रिय प्रजातन्त्र पार्टी (राप्रपा)ले अग्रता लिएको छ । राप्रपाले जुम्लाबाट अग्रताको खाता खोलेको हो ।

तीनसय मत गणना हुँदा राप्रपा उम्मेदवार ज्ञानेन्द्र शाहीले १३५ मत ल्याउँदा नेपाली कम्युनिष्ट पार्टीले १०३ मत प्राप्त गरेको छ । यहाँ राप्रपाका नरेश भण्डारी उम्मेदवार छन् ।

नेपाली कांग्रेसका उम्मेदवार दीपबहादुर शाहीले २५ मत ल्याउँदा एमालेका उम्मेदवार शान्तिलाल महतले २३ मत प्राप्त गरेको छ ।

झापा । झापामा प्रतिनिधिसभा सदस्य निर्वाचन अन्तर्गत केही निर्वाचन क्षेत्रमा मतगणना सुरु भएसँगै सुरुवाती नतिजा सार्वजनिक हुन थालेको छ । हालसम्म झापाका पाँच निर्वाचन क्षेत्रमध्ये तीन क्षेत्रको मतगणना सुरु भएको निर्वाचन आयोगले बताएका छन् ।

सुरुवाती परिणामअनुसार दुई क्षेत्रमा रवि लामछाने नेतृत्वको राष्ट्रिय स्वतन्त्र पार्टीका उम्मेदवारहरूले अग्रता लिएका छन् ।

झापा क्षेत्र नं. ५ मा रास्वपाका बालेनले उल्लेखनीय अग्रता बनाएका छन् । २३०३ मत गणना हुँदा उनले १४७८ मत प्राप्त गरेका छन् । उनका निकटतम प्रतिस्पर्धी नेकपा एमालेका अध्यक्ष केपी शर्मा ओलीले ३८५ मत प्राप्त गरेका छन् । त्यसैगरी नेपाली कांग्रेसकी मन्धरा चिमरियाले ४२, नेकपाका रञ्जित तामाङले ६१ र श्रम संस्कृति पार्टीका समिर तामाङले १४९ मत प्राप्त गरेका छन्।

झापा–५ मा कुल १ लाख ६३ हजार ३७९ मतदाता रहेकोमा १ लाख ६ हजार ३७२ मत खसेको थियो ।

त्यस्तै, झापा क्षेत्र नं. २ मा पनि रास्वपाकी उम्मेदवार इन्दिरा राणा मगरले सुरुवाती अग्रता लिएकी छन् । २४१२ मत गणना हुँदा निवर्तमान उपसभामुखसमेत रहेकी उनले १५९९ मत प्राप्त गरेकी छन् । उनकी निकटतम प्रतिस्पर्धी नेकपा एमालेका देवराज घिमिरेले २७५ मत ल्याएका छन् ।

काठमाडौं । अमेरिका–इजरायलको संयुक्त आक्रमणमा मारिएका इरानका सर्वोच्च नेता आयातोल्लाह सैयद अली खामेनीको पार्थिव शरीर तेहरानस्थित ग्रान्ड मोसल्ला प्रार्थना परिसरमा राख्ने तयारी भइरहेको इरानी सरकारी सञ्चारमाध्यमले जनाएका छन् । तेहरानको ग्रान्ड मोसल्ला राजधानीका सबैभन्दा ठूला राज्य तथा धार्मिक समारोह आयोजना हुने विशाल प्रार्थना स्थल हो । खामेनीको निधनपछि आयोजना गरिएको तीन दिने श्रद्धाञ्जली कार्यक्रमअन्तर्गत हजारौँ शोकाकुल नागरिक उक्त स्थलमा उपस्थित हुने अपेक्षा गरिएको छ ।

इरानमा सर्वोच्च नेताको निधनपछि “विदाइ समारोह” तथा त्यसपछि “अन्त्येष्टि जुलुस” आयोजना गर्ने प्रोटोकल रहेको बताइएको छ । यता, इरानले बिहीबार इजरायल र अमेरिकाले इस्लामिक गणतन्त्रको शासन परिवर्तन गर्ने प्रयास गरे इजरायलको डिमोना आणविक केन्द्रलाई निशाना बनाउने चेतावनी दिएको छ । यो चेतावनी इजरायलका रक्षामन्त्री इस्रायल कात्जले “नयाँ नेता नियुक्त भए पनि उसलाई समाप्त पार्ने लक्ष्य हुन सक्छ” भन्ने अभिव्यक्ति दिएपछि आएको हो ।

उता इजरायलमा भने इरानले फेरि ब्यालेस्टिक मिसाइल आक्रमण गरेको इजरायली रक्षा बलले जनाएको छ । केन्द्रीय इजरायल, जेरुसेलम क्षेत्र तथा वेस्ट बैंकका केही भागमा सायरन बजाइएको बताइएको छ ।

इरानको इस्लामिक रिभोल्युसनरी गार्ड कोरले “अपरेसन ट्रु प्रमिस–४” अन्तर्गत १९औँ चरणको संयुक्त मिसाइल तथा ड्रोन आक्रमण सुरु गरेको जनाएको छ । आईआरजीसीका अनुसार “या हसन इब्न अली” नामक कोड प्रयोग गरी कब्जामा रहेका क्षेत्र र अमेरिकी सैन्य अड्डालाई लक्षित गर्दै ठूलो विस्फोटसहित आक्रमण सुरु गरिएको हो ।

यसअघि पनि आईआरजीसीले क्षेत्रभरि रहेका इजरायली तथा अमेरिकी लक्ष्यमा आक्रमण गरेको दाबी गरेको थियो । इरानी सरकारी टेलिभिजन प्रेस टिभीका अनुसार यो आक्रमण इजरायल र अमेरिकाको “उत्तेजनारहित आक्रमण” को जवाफस्वरूप सुरु गरिएको बताइएको छ ।
आईआरजीसीले अमेरिकी तथा इजरायली सातभन्दा बढी उन्नत रडार प्रणाली ध्वस्त पारेको दाबी गर्दै यसले उनीहरूको निगरानी सञ्जाल “अन्धो बनाएको” उल्लेख गरेको छ । साथै इरानी मिसाइलहरूले इजरायलको रक्षा मन्त्रालय परिसर, तेल अवीव तथा बेन गुरियन अन्तर्राष्ट्रिय विमानस्थललाई पनि निशाना बनाएको दाबी गरिएको छ ।

इरानी पक्षका अनुसार लगातार मिसाइल र ड्रोन आक्रमणका कारण इजरायलका विभिन्न क्षेत्रमा घण्टौँसम्म हवाई आक्रमणको सायरन बजेको र सर्वसाधारणलाई आश्रयस्थलमा बस्न बाध्य बनाएको छ । आगामी दिनमा आक्रमण अझ तीव्र र व्यापक हुने चेतावनी पनि इरानले दिएको छ ।
पश्चिम एसियामा जारी यो द्वन्द्व बिहीबार छैटौँ दिनमा पुगेको छ ।

अमेरिकी पक्षले आफ्नो सैन्य अभियान “भर्खर सुरु भएको” दाबी गरेकाले यो संघर्ष अपेक्षाभन्दा लामो समयसम्म चल्न सक्ने आशंका गरिएको छ । एएनआई

विराटनगर । फागुन २१ गते हुने प्रतिनिधिसभा निर्वाचनलाई लक्षित गर्दै कोशी प्रदेशभर अन्तिम तयारी तीव्र पारिएको छ । निर्वाचन आयोग नेपाल अन्तर्गत कोशी प्रदेश निर्वाचन कार्यालयले आवश्यक सबै प्राविधिक, प्रशासनिक तथा सुरक्षा तयारी पूरा हुने चरणमा पुगेको जनाएको छ ।

प्रदेश निर्वाचन कार्यालयका प्रमुख चोलाराज दंगालका अनुसार अधिकांश स्थानमा मतदान केन्द्र निर्माण सम्पन्न भइसकेको छ भने बाँकी स्थानमा पनि अन्तिम व्यवस्थापन कार्य भइरहेको छ । “दिनभरिमा सम्पूर्ण तयारी पूरा हुन्छ, भोलि बिहानदेखि नियमित समयमै मतदान प्रक्रिया सुरु हुन्छ,” उनले भने ।

मतपेटिका, मतपत्र, कर्मचारी परिचालन र मतदान केन्द्रमा आवश्यक सामग्री ढुवानीको कार्य अन्तिम चरणमा पुगेको कार्यालयले जनाएको छ ।

सुरक्षा घेरामा निर्वाचन, ८२१ संवेदनशील

निर्वाचनलाई शान्तिपूर्ण र भयरहित बनाउने उद्देश्यले सुरक्षा निकायले समेत विशेष रणनीति अपनाएको छ । कोशी प्रदेश प्रहरी कार्यालयका अनुसार प्रदेशभर रहेका १ हजार ९०७ मतदानस्थलमध्ये ४३९ मतदान स्थललाई ‘अति संवेदनशील’ सूचीमा राखिएको छ ।

प्रदेशस्तरीय सुरक्षा समितिले तयार पारेको वर्गीकरणअनुसार ८२१ मतदान स्थल ‘संवेदनशील’ र ६४७ मतदान स्थल ‘सामान्य’ सूचीमा राखिएका छन् । विगतका निर्वाचनमा भएका घटनाक्रम, मतदाताको सङ्ख्या, राजनीतिक गतिविधि, सीमा क्षेत्रको अवस्था, भौगोलिक विकटता तथा सम्भावित जोखिमको विश्लेषणका आधारमा वर्गीकरण गरिएको प्रहरी नायव महानिरीक्षक विनोद घिमिरेले जानकारी दिए ।

सुरक्षालाई नै थप सुदृढ बनाउन नेपाल सेनाले पनि सक्रिय भूमिका खेलेको छ । पूर्वी पृतना हेड क्वाटर मातहत कोशी प्रदेशका सम्पूर्ण जिल्लामा १२० स्थानमा बम डिस्पोजल टोली तैनाथ गरिएको सेनाले जनाएको छ ।

सम्भावित विस्फोटक पदार्थ, शङ्कास्पद वस्तु तथा गतिविधि नियन्त्रणका लागि उच्च सतर्कता अपनाइएको सेनाको भनाइ छ । मतदान अघिल्लो रातदेखि नै संयुक्त सुरक्षा गस्ती, चेकजाँच र निगरानी बढाइएको छ ।

३५ लाख बढी मतदाता, २४ अस्थायी मतदान केन्द्र

निर्वाचन कार्यालयको तथ्यांकअनुसार कोशी प्रदेशमा कुल ३५ लाख ७४ हजार ३१० मतदाता रहेका छन् । जसमा १७ लाख ४६ हजार ७३ महिला, १८ लाख २८ हजार २१३ पुरुष र २४ जना अन्य मतदाता रहेका छन् ।

विशेष परिस्थितिका मतदातालाई लक्षित गर्दै प्रदेशका २४ स्थानमा अस्थायी मतदान केन्द्र स्थापना गरिएको छ । कारागार, वृद्धाश्रम तथा विशेष सुरक्षा व्यवस्थाभित्र रहेका मतदातालाई मतदानको अवसर सुनिश्चित गर्न यस्तो व्यवस्था गरिएको हो ।

आचारसंहिता उल्लङ्घनका घटना भने जारी

निर्वाचन नजिकिँदै गर्दा केही स्थानमा आचारसंहिता उल्लङ्घनका घटनाहरू आएको स्वीकार गर्दै प्रमुख दंगालले सम्बन्धित निकायमार्फत आवश्यक कारबाही प्रक्रिया अघि बढाइएको बताए । मौन अवधिमा प्रचारप्रसार, सामाजिक सञ्जाल गतिविधि तथा समूहगत प्रदर्शनजस्ता गतिविधिमाथि निगरानी बढाइएको उनले स्पष्ट पारे ।

निर्वाचनलाई लोकतन्त्रको उत्सवका रूपमा लिँदै उनले सबै मतदातालाई निर्धक्क र उत्साहपूर्वक मतदान गर्न अपिल गरे ।

एजेन्सी । इरान विरुद्ध अमेरिका–इजरायल संयुक्त आक्रमणको तेस्रो दिन जेरुसेलम शहरका सडकहरू शान्त देखिएका छन् । सामान्यतया व्यस्त रहने सडकहरूमा थोरै मात्रामा पैदल यात्रीहरू देखिन्छन् ।

चाइना मिडिया ग्रुप (सीएमजी)का संवाददाताले जमिनमा खिचेको फुटेजमा धेरैजसो पसलहरू बन्द रहेको देखाइएको छ । जुन जेरुसेलमको एक महत्त्वपूर्ण व्यावसायिक मार्ग जाफा स्ट्रिटमा सामान्य दिनहरू भन्दा एकदमै फरक छ।

सडक किनमेल गर्नेहरू, ट्रामहरू र विक्रेताहरूले भरिएको थियो । तर अब यो शान्त छ, छिटपुट पैदल ट्राफिक मात्र छ र प्रहरी गस्ती र आपतकालीन कर्मचारीहरूमा उल्लेखनीय वृद्धि भएको छ।

इजरायलको म्यागेन डेभिड एडोम उद्धार सेवाका असंख्य प्रहरी सवारी साधन र उद्धार टोलीहरू सहितको बढ्दो सुरक्षा उपस्थितिले जारी तनावलाई प्रतिबिम्बित गरिरहेको छ । इरानद्वारा प्रक्षेपण गरिएको क्षेप्यास्त्रका कारण सतर्कता र सावधानीका उपायहरू बढाएको छ।

सार्वजनिक यातायात सामान्य रूपमा सञ्चालन भइरहेका छन् । जबकि सामान्यतया भीडभाड हुने प्रमुख सडकहरूमा ट्राफिक तीव्र रूपमा घटेको छ।

मंगलबार बिहान सबेरै, उत्तरी, मध्य र दक्षिणी इजरायलमा हवाई आक्रमणको साइरन बजाइएको थियो।

इजरायली सेनाले इरानबाट क्षेप्यास्त्र प्रक्षेपण पत्ता लगाएको र प्रक्षेपणहरूलाई सक्रिय रूपमा रोकिरहेको पुष्टि गरेको छ।
म्यागेन डेभिड एडोमले मंगलबार आक्रमणबाट कुनै हताहत वा घाइते नभएको बताए।(सीसीटीभीप्लस)

काठमाडौं । मध्यपूर्वमा द्वन्द्व चर्किंदै गएसँगै इजरायलले तेहरान र लेबनानको राजधानी बेरुतमा आक्रमण गरेको छ । इरानले साउदी अरेबियाको रियादमा अमेरिकी दूतावासमाथि ड्रोन आक्रमण गरेपछि इजरायलले उक्त आक्रमण गरेको हो । इजरायली सुरक्षा बलहरूले समाजिक सञ्जाल एक्समा प्रकाशित गरेको पोस्ट अनुसार, हाल तेहरान र बेरुतमा सैन्य लक्ष्यहरूलाई लक्षित गरेर एकसाथ आक्रमण जारी गरिएको छ । अल जजिराका अनुसार, बेरुतको हारेत क्षेत्रमा इजरायली आक्रमण भएको थियो ।

त्यस्तै, जेरुसलम पोस्टले रॉयटर्सलाई उद्धृत गर्दै रिपोर्ट गरेको छ कि रियादस्थित अमेरिकी दूतावास ड्रोन आक्रमणको शिकार भएको छ । यसै क्रममा, अपरेशन एपिक फ्युरीमा थप दुई अमेरिकी सैनिक मारिएका छन् र यस अभियानमा अमेरिकी मृतकको संख्या छ पुगेको छ ।
अल जजिराका अनुसार, दूतावासमाथि आक्रमणपछि अमेरिकी सरकारले साउदी अरेबियामा सबै कन्सुलर सेवा स्थगित गरेको छ भने इराकस्थित अमेरिकी दूतावासले गैर–आवश्यक सरकारी कर्मचारीहरूलाई बाहिर जान आदेश दिएको छ र बगदाद विमानस्थलको प्रयोगमा प्रतिबन्ध लगाएको छ ।

अमेरिकी र इजरायली संयुक्त आक्रमणको जवाफस्वरूप इरानले खाडी क्षेत्रका विभिन्न देशहरूमा मिसाइल तथा ड्रोन आक्रमण गरेको छ । बहराइनका अमेरिकी राजदूत अब्दुल्ला बिन राशिद अल खलीफाले सोमबार बताएअनुसार, बहराइनको हवाई रक्षा प्रणालीले ७० इरानी ब्यालिस्टिक मिसाइल र ५९ ड्रोन लक्षित क्षेत्रबाट रोकिएको छ ।

अमेरिकी सेन्ट्रल कमाण्डले मंगलबार जनाएको छ कि अमेरिकी सेनाले इरानी सैन्य पूर्वाधार, विशेष गरी इस्लामिक रिभोल्युसनरी गार्ड कोप्र्स सम्बन्धित सुविधालाई लक्षित गर्दै निरन्तर अपरेशन सञ्चालन गरेको छ ।

अल जजिराका अनुसार, इरानले बहराइनस्थित अमेरिकी हवाई अड्डामा “विशाल मिसाइल र ड्रोन“ आक्रमण गरेको दाबी गरेको छ । आइआरजीसीले मंगलबार बिहानको ड्रोन र मिसाइल आक्रमणमा अमेरिकी हवाई अड्डाको मुख्य कमान्ड भवन ध्वस्त भएको जनाएको छ। आक्रमणमा २० ड्रोन र ३ मिसाइलले शेख इसा अड्डामा प्रहार गरेको थियो र इन्धन ट्याङ्कीहरूमा आगो लागेको थियो ।
इरानका संयुक्त राष्ट्रसंघका राजदूत आमिर सईद इरावानीले भनेका छन् कि अमेरिकी–इजरायली आक्रमण जारी रहन्छ भने इरानले आफ्नो रक्षा निर्णायक रूपमा जारी राख्नेछ ।

खाडी क्षेत्रका देशहरू अब यस द्वन्द्वमा तानिएका छन् र अमेरिकी–इजरायली संयुक्त आक्रमणको जवाफस्वरूप इरानले मिसाइल र ड्रोन आक्रमण गरी क्षेत्रीय संघर्षलाई अझ व्यापक बनाएको छ । यसले नागरिक र विदेशी निवासिहरूका लागि जोखिम बढाएको छ ।
विश्व नेताहरू र अन्तर्राष्ट्रिय निकायहरू अहिले तनाव कम गर्न आग्रह गर्दै आएका छन् । तर द्वन्द्व निरन्तर जारी रहँदा यसको अन्त्य स्पष्ट देखिएको छैन । एएनआई

काठमाडौं । आज साँझ खण्डग्रास चन्द्र ग्रहण लाग्दैछ । साँझ ६:०४ बजे चन्द्रमा उदाउँदा नै ग्रहण लागेको अवस्थामा देखिने खगोलविद्हरूले बताएका छन् ।

वरिष्ठ खगोलविद् जयन्त आचार्यका अनुसार यो चन्द्र ग्रहण नेपालका विभिन्न स्थानबाट अवलोकन गर्न सकिनेछ । चन्द्रमा क्षितिजबाट माथि उठ्दै गर्दा यसको आधाभन्दा बढी भाग पृथ्वीको गाढा छायाले ढाकिएको देखिने उनले जानकारी दिए ।

उनका अनुसार चन्द्रमा उदाउँदा नै ग्रहण लागेको अवस्थामा देखिनु दुर्लभ खगोलीय घटना मानिन्छ । काठमाडौँमा चन्द्रमा ग्रहणसहित साँझ ६ः०४ बजे उदाउनेछ र करिब एक घण्टासम्म स्पष्ट रूपमा अवलोकन गर्न सकिनेछ ।

खगोलविद्हरूले चन्द्र ग्रहण अवलोकनका लागि कुनै विशेष उपकरण वा सुरक्षात्मक चस्माको आवश्यकता नपर्ने बताएका छन् । सूर्य ग्रहणभन्दा फरक, चन्द्र ग्रहणले आँखामा प्रत्यक्ष असर नपार्ने भएकाले खुला स्थानबाट नाङ्गो आँखाले सुरक्षित रूपमा अवलोकन गर्न सकिनेछ ।

काठमाडौं । आगामी बिहीबार हुने प्रतिनिधिसभा निर्वाचनका लागि मौन अवधि सुरू भएको छ । मतदान अघिको ४८ घण्टादेखि निर्वाचन आयोगले मौन अवधि सुरु गरेको हो । यो अवधिमा राजनीतिक दल, उम्मेदवार, सञ्चारकर्मी, सञ्चारमाध्यम, मतदाता लगायत सरोकारवाला सबै पक्षले पालना गर्नुपर्ने विशेष आचरण तोकिएको छ ।

कुनै पनि तरिकाबाट मत माग्न नपाउने
निर्वाचन प्रचारप्रसार तथा मत माग्नका लागि साउन्ड सिस्टम, सर्ट मेसेज सर्भिस (एसएमएस), सामाजिक सञ्जाल वा यस्तै अन्य कुनै साधन वा माध्यमको प्रयोग गर्नु हुँदैन ।

सामाजिक सञ्जालमा कडाइ
सामाजिक सञ्जाल, अनलाइन, छापा वा अन्य कुनै पनि माध्यमबाट राजनीतिक दल वा उम्मेदवारको पक्ष वा विपक्षमा कुनै सन्देश, सूचना वा प्रचारप्रसार सामग्री पोस्ट वा शेयर गर्न वा गराउनु हुँदैन ।

निर्वाचन प्रचारप्रसारमा रोक
निर्वाचन आयोगका अनुसार मौन अवधिमा निर्वाचन प्रचारप्रसार लगायत कुनै पनि प्रकारका छलफल, अन्तरक्रिया, सभा सम्मेलन, कार्यशाला गोष्ठी आदि गर्न पाइँदैन ।

भोज भतेर, हुलहुज्जत गर्न नहुने
बाजा बजाउन, नाचगान गर्न, सार्वजनिक भोज भतेर गर्न, जुलुस प्रदर्शन वा जुनसुकै किसिमको सभा वा समारोह गर्न वा हुलहुज्ञ्जत वा होहल्ला गर्न वा गराउन हुँदैन ।

मतदानमा बाधा पुर्याउन नहुने
मतदान कार्य प्रारम्भ हुनुभन्दा तीन घण्टा अघिदेखि मतदान कार्य समाप्त नभएसम्म कसैले पनि मतदाता वा मतदान केन्द्रमा मतदानको काममा संलग्न व्यक्ति वा कर्मचारीलाई बाधा पुर्याउने कार्य गर्नु हुँदैन ।

प्रचारप्रसार सामग्री हटाउनु पर्ने
मतदान हुने दिनको ४८ घण्टाअघि मतदान स्थलको तीन सय मिटर वरिपरि राखिएका राजनीतिक दल वा उम्मेदवारका प्रचारप्रसार सामग्री हटाउनुपर्छ ।

विज्ञापन हटाउनु पर्ने
राजनीतिक दल तथा उम्मेदवार, दलका भातृ सङ्गठनहरूले सामाजिक सञ्जालमार्फत गरिएका विज्ञापन तथा निर्वाचन प्रचारप्रसारका सामग्री हटाउनुपर्छ ।

मतदान केन्द्रमा शान्ति कायम राख्नु पर्ने
मतदान केन्द्र रहेको घर, भवन वा स्थानमा मतदानलाई असर पार्ने गरी त्यसको वरिपरिको कुनै निजी वा सार्वजनिक घर, भवन वा जग्गामा शान्ति भंग गर्न वा भय, त्रास सिर्जना गर्न वा निर्वाचनको वातावरण बिथोल्ने कार्य गर्न वा गराउनु हुँदैन ।

काठमाडौं । प्रतिनिधिसभा सदस्य निर्वाचन अन्तर्गत आज मध्यरातदेखि मौन अवधि सुरु हुने भएको छ । निर्वाचन प्रचारप्रसारका कार्यक्रमहरू आजसम्म मात्र गर्न पाइनेछन् ।

निर्वाचन आयोगका अनुसार सोमबार राति १२ बजेदेखि मौन अवधि सुरु भई मतदान सम्पन्न नहुँदासम्म लागू हुनेछ । यस अवधिमा निर्वाचन प्रचारप्रसार तथा यससँग सम्बन्धित कुनै पनि गतिविधि गर्न पाइने छैन ।

आयोगका अनुसार मौन अवधि मतदान हुने दिनको अघिल्लो ४८ घण्टादेखि लागू हुने भएकाले यस अवधिमा सभा, सम्मेलन, छलफल, अन्तक्र्रिया, कार्यशाला वा गोष्ठीजस्ता कार्यक्रम सञ्चालन गर्न निषेध गरिएको छ ।

त्यस्तै मतदानको ४८ घण्टाअघि मतदान स्थलको तीन सय मिटर वरिपरि राखिएका दल वा उम्मेदवारका प्रचार सामग्री हटाउनुपर्ने छ । यस अवधिमा कुनै पनि माध्यमबाट मत माग्न वा प्रचारप्रसार गर्न पाइने छैन ।

कार्यवाहक प्रमुख निर्वाचन आयुक्त रामप्रसाद भण्डारीले मौन अवधिमा आचारसंहिता उल्लङ्घन भएमा सम्बन्धित उम्मेदवारको मनोनयन नै रद्द हुन सक्ने चेतावनी दिएका छन् ।