धरान ।  संयुक्त पहिचानवादी मोर्चाका केन्द्रीय नेता नन्दु याम्फु जनता समाजवादी पार्टी (जसपा) मा प्रवेश गरेका छन् । जनता समाजवादी पार्टी १ नं. प्रदेश समितिको आजदेखि धरानमा सुरु भएको प्रथम पूर्ण बैठकको अवसरमा पार्टी केन्द्रीय कार्यकारिणी समिति सदस्य तथा १ नं. प्रदेश इन्चार्ज रमेश राईले याम्फुलाई पार्टीमा स्वागत गर्दै औपचारिक रूपमा प्रवेश गराएका हुन् ।

कार्यक्रममा १ नं. प्रदेशसभा सदस्य तथा पूर्व स्वास्थ्य मन्त्री एवं पार्टी केन्द्रीय कार्यकारिणी समिति सदस्य निर्मला तावा, केन्द्रीय कार्यकारिणी समिति सदस्यहरू भिम राई, गोपाल राई, चन्द्रकुमारी कार्की, मान बहादुर राई लगायतका नेताहरूले खादा ओढाई याम्फुलाई स्वागत गरेका थिए ।

पार्टी प्रवेश पश्चात बोल्दै याम्फुले संयुक्त पहिचानवादी मोर्चाका संयोजक राष्ट्रिय तथा अन्तर्राष्ट्रिय रूपमा अध्यापन गराउने व्यक्ति भएको र पहिचानको आन्दोलनका लागि केही सकारात्मक योगदान गर्लान् भन्ने विश्वासका साथ आफूले साथ दिएको बताए । तर अन्ततः पहिचान विरोधी र संघीयता विरोधी पार्टी रास्वपातर्फ आन्दोलनलाई विसर्जन गराएकोले  आफूले पुरानै राजनीतिक घर फर्किने निर्णय गरेको उनको भनाइ थियो ।

उनले भने, “मोर्चाका साथीहरू कहिले यता त कहिले उता ढुङ्गाजस्तै लडिरहेका छन्, कहाँ अडिन्छन् भन्ने थाहा छैन । मेरो लागि विचार प्रधान हो । त्यसैले जनता समाजवादी पार्टी मेरो पुरानै घर हो, विचार बोक्ने पार्टी हो । अब मेरो उमेर, योग्यता र क्षमताअनुसार पार्टीले जुन तहमा जिम्मेवारी दिनुहुन्छ, त्यसै तहबाट बाँकी आन्दोलन र मेरो राजनीतिक यात्रालाई अघि बढाउन चाहन्छु ।”

जनता समाजवादी पार्टी १ नं. प्रदेश समितिको प्रथम पूर्ण बैठक आज पौष २३ गतेदेखि सुरु भई भोलि पौष २४ गतेसम्म सञ्चालन हुने जनाएको छ । भोलिको बैठकमा प्रस्तुत प्रस्तावहरूमाथि व्यापक छलफल गरी बैठक समापन गरिने प्रदेश समिति उपाध्यक्ष मिरा कार्कीले जानकारी दिइन् ।

काठमाडौं । गृह मन्त्रालयले तराई तथा मधेशका केही जिल्लाहरूमा धार्मिक तथा सामाजिक सद्भाव खलबलाउने गरी भएका केही घटनाका सम्बन्धमा जिल्ला तहमा धार्मिक सहिष्णुता कायम राख्न भएका पहलकदमीसहितको प्रगतिलाई समेटेर पठाउन ७७ वटै जिल्ला प्रशासन कार्यालयहरूलाई १०–बुँदे निर्देशनात्मक सर्कुलर जारी गरिएको छ।

मङ्गलवार गृह मन्त्रालयकी उपसचिव तथा सूचना अधिकारी रमा आचार्य सुवेदीद्वारा जारी निर्देशनमा सबै प्रमुख जिल्ला अधिकारीहरूलाई कानुनले निषेध गरेका त्यसका गैर–कानुनी क्रियाकलापमा लाग्ने जो कोहीलाई अविलम्ब कानुनी दायरामा ल्याई कारबाही प्रक्रिया सुरु गर्न निर्देशन दिएको छ।

यस्तै, बुँदा नम्बर २ मा धार्मिक, सामाजिक, एवंम सांस्कृतिक सद्भाव र सहिष्णुता प्रवद्र्धन गर्न सरोकारवालासहितको समन्वय बैठक गर्न निर्देशन भएको छ। यसका लागि जिल्ला स्थित राजनीतिक दलका प्रमुखहरु, सामाजिक, सांस्कृतिक एवम् धार्मिक क्षेत्रका अगुवाहरूलाई सद्भावका लागि सार्वजनिक आव्हान गर्ने निर्देशन भएको छ।
सबै पक्षहरूको सहभागितामा सद्भाव ¥याली आयोजना गरी त्यस्ता घटनाहरू बढ्न नदिने र सीमा क्षेत्रमा हुने आवागमनलाई कडाइका साथ चेक जाँचको व्यवस्था मिलाउन पनि गृहको सर्कुलरमा भनिएको छ।

स्थानीय स्तरमा समेत विभिन्न सञ्चार माध्यमहरूबाट स्थानीय भाषामा सामाजिक सद्भाव बढ्ने खालका कार्यक्रम सञ्चालन गर्न र प्रदेश तथा स्थानीय स्तरमा समन्वयात्मक र प्रवद्र्धनात्मक कार्यक्रमहरू सञ्चालनमा जोड दिन निर्देशन गरिएको छ।

यस्तै, बुँदा नम्बर ७ मा, प्रमुख जिल्ला अधिकारीको संयोजकत्वमा सात–सदस्सीय जिल्ला शान्ति तथा सामाजिक सद्भाव समिति गठन गरी क्रियाशील गर्ने गराउने बारे निर्देशन गरिएको छ। समितिमा जिल्ला सुरक्षा समितिका पदाधिकारीहरू सदस्य, जिल्लास्थित राजनीतिक दलका अध्यक्ष वा प्रतिनिधि सदस्य, नेपाल उद्योग वाणिज्य महासङ्घका जिल्ला अध्यक्ष सदस्य, पत्रकार महासङ्घका जिल्ला अध्यक्ष सदस्य, नेपाल बार एसोसिएसनका जिल्ला अध्यक्ष सदस्य, जिल्ला समन्वय समितिका प्रमुखले तोकेको प्रतिनिधि र सामाजिक, सांस्कृतिक एवम् धार्मिक क्षेत्रका अगुवा सदस्य रहने समिति गठन गरिएको छ।

यस्तै विगतका वर्षहरूमा घटनाहरूको अभिलेखको आधारमा विवाद हुन सक्ने सम्भावित कार्यक्रम वा पर्वहरूको सूची तयार गरी वार्षिक क्यालेन्डर तयार गर्ने गरीसमेत काम गर्न निर्देशन गरिएको छ।

रौतहट । धनुषा घटनालाई लिएर वीरगञ्जमा उत्पन्न तनाव न्यूनीकरण गर्न जिल्ला प्रशासन कार्यालय पर्सामा आयोजित सर्वपक्षीय बैठक मंगलवार सम्पन्न भएको छ ।
प्रमुख जिल्ला अधिकारी भोला दाहालको अध्यक्षतामा बसेको उक्त बैठकले जिल्लामा शान्ति सुरक्षा कायम गर्न र सामाजिक सद्भाव जोगाउन विभिन्न महत्त्वपूर्ण निर्णयहरू गरेको छ ।
बैठकले सामाजिक र धार्मिक सद्भावलाई दीर्घकालीन रूपमा कायम राख्न एक ’स्थायी सद्भाव संयन्त्र’ गठन गर्ने निर्णय गरेको छ । यस संयन्त्रले आगामी दिनमा हुनसक्ने सम्भावित विवादहरूलाई समाधान गर्न र आपसी भाइचारा बलियो बनाउन काम गर्नेछ ।
बैठकका मुख्य निर्णयहरू यस प्रकार छन् :
१. अनुमति अनिवार्यः अबदेखि कुनै पनि किसिमका जुलुस, प्रदर्शन वा सार्वजनिक कार्यक्रम आयोजना गर्न अनिवार्य रूपमा जिल्ला प्रशासन कार्यालयको पूर्व अनुमति लिनुपर्नेछ,
२. कानुनी कारबाहीः सामाजिक सञ्जाल वा अन्य कुनै माध्यमबाट धार्मिक द्वेष फैलाउने, भ्रामक सूचना सम्प्रेषण गर्ने वा हिंसाका लागि दुरुत्साहन गर्ने व्यक्ति तथा समूहलाई पहिचान गरी कानुनी दायरामा ल्याउन स्थानीय प्रशासन सक्रिय रहनेछ,
३. मिडियाको भूमिकाः सञ्चारकर्मीहरूलाई धार्मिक र सामाजिक सद्भावमा खलल नपुग्ने गरी जिम्मेवारीपूर्वक र सन्तुलित समाचार सम्प्रेषण गर्न अनुरोध गरिएको छ,
प्रमुख जिल्ला अधिकारी दाहालले सर्वपक्षीय बैठकका निर्णयहरूको कार्यान्वयनबाट वीरगञ्जको स्थिति छिट्टै सामान्य हुने विश्वास व्यक्त गरेका छन । उनले सम्पूर्ण नगरवासीहरूलाई संयम अपनाउन र परापूर्वकालदेखि चल्दै आएको सामाजिक सद्भाव कायम राख्न विशेष अपिल समेत गरेका छन ।
यसैबीच, सुरक्षा अवस्थालाई मध्यनजर गर्दै प्रशासनले वीरगञ्जमा जारी गरेको कफ्र्युको अवधि आज साँझ ६ बजेसम्मका लागि लम्ब्याएको छ। प्रशासनले कफ्र्युको समयमा घरबाहिर ननिस्कन र सुरक्षाकर्मीलाई सहयोग गर्न आग्रह गरेको छ ।

काठमाडौं । नेपाली कांग्रेसको केन्द्रीय कार्यालय सानेपाबाहिर तनाव भएको छ । विशेष महाधिवेशन पक्षधरहरुले नेताहरुविरुद्ध नाराबाजी समेत गरे । विशेष पक्षधरमा नेताहरूलाई पार्टी कार्यालय प्रवेशमा रोक लगाइएपछि उनीहरूले पनि अर्को खेमाका नेताहरूलाई भित्र छिर्न रोक्ने प्रयास गरेका छन् ।

पार्टीका पूर्व उपसभापति विमलेन्द्र निधिलाई पार्टी कार्यालय प्रवेशका क्रममा अवरोध भएको छ । मंगलबार बोलाइएको केन्द्रीय कार्यसम्पादन समितिको बैठकका लागि नेताहरु केन्द्रीय कार्यालय पुगेका थिए । तर उनीहरुले वैकल्पिक गेट प्रयोग गर्नु परेको छ ।

नेपाली कांग्रेसका ५४ प्रतिशत महाधिवेशन प्रतिनिधिले विशेष महाधिवेशन माग्दै हस्ताक्षर बुझाएको यही पुस अन्तिममा तीन महिना पुग्दैछ । कम्तीमा ४० प्रतिशत प्रतिनिधिले माग गरेमा ३ महिनाभित्र विशेष महाधिवेशन बोलाउनैपर्ने बाध्यकारी व्यवस्था कांग्रेसको विधानमा छ ।

रौतहट । धनुषामा भएको घटनालाई लिएर उत्पन्न विवादका कारण अशान्त बनेको वीरगञ्जमा जारी कफ्र्युको अवधि थप गरिएको छ । जिल्ला प्रशासन कार्यालय पर्साले सुरक्षा संवेदनशीलतालाई ध्यानमा राख्दै आज (मङ्गलबार) दिउँसो १ बजेसम्मका लागि कर्फ्यूलाई निरन्तरता दिएको हो ।

यसअघि प्रशासनले सोमबार साँझ ६ बजेदेखि आज बिहान ८ बजेसम्मका लागि कफ्र्यु आदेश जारी गरेको थियो । तर, तोकिएको समयभित्र स्थिति पूर्ण रूपमा सामान्य नभएपछि स्थानीय प्रशासनले थप ५ घण्टा कफ्र्यु लम्ब्याउने निर्णय गरेको हो ।

पर्साका प्रमुख जिल्ला अधिकारी भोला दाहालका अनुसार संवेदनशील क्षेत्रहरूमा अझै सुरक्षा सतर्कता आवश्यक देखिएकाले शान्ति–सुरक्षा कायम राख्न कफ्र्यु थप्नुपरेको हो ।

‘हामीले अवस्थाको निरन्तर मूल्याङ्कन गरिरहेका छौँ,’ प्रजिअ दाहालले भने, ‘दिउँसो १ बजेपछि परिस्थितिको समीक्षा गरी कफ्र्यु खुकुलो पार्ने वा थप गर्ने भन्नेबारे पुनः निर्णय लिइनेछ ।’

कहाँ–कहाँ छ कर्फ्यू ?
प्रशासनले वीरगञ्जको पूर्वमा बाइपास रोड, पश्चिममा सिर्सिया पुल, उत्तरमा पावर हाउस चोक र दक्षिणमा शङ्कराचार्य गेटसम्मको क्षेत्रलाई कफ्र्यु क्षेत्र तोकेको छ । यो अवधिमा सर्वसाधारणलाई घरबाहिर निस्कन, भेला हुन, जुलुस निकाल्न वा प्रदर्शन गर्न पूर्ण रूपमा निषेध गरिएको छ ।

सुरक्षा व्यवस्था कडा
तनाव उत्पन्न भएपछि वीरगञ्जका मुख्य चोक, बजार र संवेदनशील क्षेत्रहरूमा नेपाल प्रहरी तथा सशस्त्र प्रहरी बलको बाक्लो उपस्थिति रहेको छ ।
सुरक्षाकर्मीहरूले निरन्तर गस्ती गरिरहेका छन् । प्रशासनले अत्यावश्यक सेवाहरू जस्तै एम्बुलेन्स, दमकल, स्वास्थ्यकर्मी र सञ्चारकर्मीहरूलाई भने परिचयपत्रका आधारमा आवतजावतमा छुट दिएको छ ।

जिल्ला प्रशासन कार्यलयले दुवै समुदायलाई संयम अपनाउन र सामाजिक सद्भाव कायम राख्न अपिल गरेको छ।

काठमाडौं । भेनेजुएलाका अपदस्थ राष्ट्रपति निकोलस मादुरोका छोरा निकोलस मादुरो गुएराले बुबा–आमाको भेनेजुएला फिर्ती सुनिश्चित गर्न अन्तर्राष्ट्रिय समुदायसँग ऐक्यबद्धताको आह्वान गरेका छन् ।

अमेरिकाले आफ्ना बुबा निकोलस मादुरो र आमा सिलिया फ्लोरेसलाई पक्राउ गरेको घटनालाई उनले ‘अपहरण’ को संज्ञा दिएका छन् । सोमबार भेनेजुएलाको राष्ट्रिय सभामा सम्बोधन गर्दै मादुरो गुएराले दुई दिनअघि क्याराकासमा अमेरिकी सेनाले गरेको सैन्य कारबाहीमार्फत मादुरो दम्पतीलाई पक्राउ गर्नु भेनेजुएलाको सार्वभौमिकतामाथि गम्भीर आक्रमण भएको बताए । उनले यस्तो अभ्यास सामान्यीकृत भए कुनै पनि देश सुरक्षित नरहने चेतावनीसमेत दिए ।

“यदि राष्ट्रप्रमुखको अपहरणलाई सामान्य मान्न थालियो भने कुनै पनि देश सुरक्षित रहँदैन । आज भेनेजुएला, भोलि आदेश नमान्ने जुनसुकै देश हुन सक्छ,” उनले भने । साथै उनले अन्तर्राष्ट्रिय समुदायलाई मौन नबस्न आग्रह गर्दै यसलाई वैकल्पिक राजनीतिक मुद्दा नभई नैतिक र कानुनी दायित्वको विषय भएको बताए । मादुरो गुएराले आफ्ना बुबा, आमा तथा आफूविरुद्ध अमेरिकी अभियोगपत्रमा लगाइएका लागुऔषध तस्करी र हतियारसम्बन्धी आरोपहरू अस्वीकार गर्दै आफ्नो परिवार राजनीतिक प्रतिशोधको शिकार भएको दाबी गरे ।

यसैबीच, अपदस्थ राष्ट्रपति निकोलस मादुरो सोमबार न्युयोर्कस्थित संघीय अदालतमा उपस्थित भई आफू निर्दोष रहेको बताएका छन् । अदालतमा बोल्दै उनले क्याराकासस्थित आफ्नै निवासबाट पक्राउ गरिएको भन्दै आफ्नो गिरफ्तारी अन्तर्राष्ट्रिय कानुनविपरीत भएको दाबी गरे । उनका कानुनी सल्लाहकारहरूले यसलाई ‘सैन्य अपहरण’ भन्दै अमेरिकी अदालतको क्षेत्राधिकार नै चुनौती दिने तयारी गरेको जनाएका छन् । यसअघि पानामाका पूर्व नेता म्यानुअल नोरेगाले पनि अमेरिकाले विदेशी भूमिमा पक्राउ गर्नु गैरकानुनी भएको दाबी गरेका थिए । तर त्यतिबेला अमेरिकी अदालतले गिरफ्तारीको वैधता भन्दा अभियोगमै केन्द्रित रहेको उदाहरण रहेको सीएनएनले स्मरण गराएको छ ।

अमेरिकी अधिकारीहरूका अनुसार अमेरीकाले भेनेजुएलामा अन्तरिम सरकार स्थापना गर्ने दिशामा काम गरिरहेको छ । विदेशमन्त्री मार्को रुबियोले नीति निर्माण र दबाब कायम राख्ने रणनीति प्राथमिकतामा रहेको बताएका छन् । अमेरिकाले मादुरोविरुद्ध लागुऔषध तस्करी, नार्को–आतंकवाद तथा हतियारसम्बन्धी गम्भीर अभियोग लगाएको छ । ट्रम्प प्रशासनले उनलाई अमेरिकी अदालतमा अमेरिकी कानुनअनुसार कठोर कारबाही गरिने जनाएको छ । यस घटनाले अन्तर्राष्ट्रिय कानुन र राष्ट्रको सार्वभौमिकताबारे विश्वस्तरमा नयाँ बहस सुरु गराएको छ । एएनआई

काठमाडौं । बेलायतमा ‘वर्क परमिट’ दिलाइदिने बहानामा ठगीका घटना बढेको भन्दै सचेत रहन लण्डनस्थित नेपाली दूतावासले आग्रह गरेको छ ।

दूतावासले एक विज्ञप्ति जारी गर्दै कामका लागि प्रायोजक खोजिदिने बहानामा नेपालीहरु ठगीमा परेका गुनासो बढेकाले ठगीबाट बच्न आग्रह गरेको हो ।

‘ठगी गर्नेहरु कतिपय नेपालीमूलका व्यक्तिहरु नै रहेको बुझिएको छ भने चिनेजानेकै नेपालीहरुमार्फत तेश्रो मुलुकका व्यक्तिहरुसँगको सम्पर्कमा पुगी ठगीमा परेकाहरुको गुनासो पनि आएको छ,’ विज्ञप्तिमा उल्लेख छ ।

कतिपय बेलायतमै रहेका तर कामको खोजी गरिरहेका नेपालीसमेत ठगीमा परेको गुनासो बढिरहेको दूतावासले जनाएको छ । ठगीमा परेको गुनासो गर्नेहरूमा नेपालबाट बेलायत आउन चाहनेहरुको संख्या धेरै रहेको दुतावासले जनाएको छ ।

यस्ता अपराधहरु नेपाल र बेलायत दुवै मुलुकमा दण्डनीय हुने हुनाले समस्या परेको खण्डमा नेपालका अनुसन्धान गर्ने निकायहरु तथा बेलायतमा रहेका स्थानीय प्रहरी एवं नेशनल एण्टी फ्रड नेटवर्क (एक्सन फ्रड) मा उजुरी गर्न समेत दूतावासको सुझाव छ ।

काठमाडौं । काठमाडौं महानगरपालिकाका मेयर बालेन्द्र साह (बालेन) राष्ट्रिय स्वतन्त्र पार्टी (रास्वपा)को केन्द्रीय नेतृत्वमा प्रवेश गरेका छन् । आइतबार साँझ बसेको केन्द्रीय समिति बैठकले उनलाई केन्द्रीय सदस्यमा मनोनित गर्ने निर्णय गरेको हो । बालेन रास्वपाको ‘वरिष्ठ नेता’का रुपमा रहनेछन् । रास्वपा प्रवक्ता मनिष झाका अनुसार बैठकले बालेनसहित २६ जनालाई केन्द्रीय सदस्यमा मनोनित गरेको छ ।

यी हुन् नयाँ केन्द्रीय सदस्यहरु
१. बालेन्द्र शाह (वरिष्ठ नेता)
२. सुनिल लम्साल
३. भूप देव शाह
४. सस्मित पोखरेल
५. सागर ढकाल
६ .सरिता ज्ञवाली
७. रमेश पौडेल
८. केपी खनाल
९. खडक राज पौडेल
१०. सन्तोष गिरि
११. लक्ष्मण थारु
१२. खगेन्द्र सुनार
१३. डा. नमिता यादव
१४. लक्ष्मी बर्देवा
१५. राम कुमार ढुंगाना
१६. रोहन कार्की
१७. अनन्त राज घिमिरे
१८. सुशान्त बैदिक
१९. प्रदिप ज्ञवाली
२०. जेम्स कार्की
२१. मधुसुदन ढकाल
२२. ओजस्वी थापा
२३. शिव यादब
२४. आदित्य आचार्य
२५. प्रदिप पाण्डे
२६. खेम राज साउद ।
सभापति रवि लामिछाने र बालेनबीच पुस १३ गते भएको सहमतिअनुसार केन्द्रीय समिति बैठकले समायोजन प्रक्रिया अघि बढाएको हो ।

काठमाडौँ । अमेरिकी राष्ट्रपति डोनाल्ड ट्रम्पले कोलम्बियाबारे दिएको कडा र अभूतपूर्व टिप्पणीले कोलम्बियामा समेत अमेरिकी हस्तक्षेपको आशंका बढेको छ ।

ट्रम्पको टिप्पणीले अन्तर्राष्ट्रिय स्तरमा विवाद चर्काएको छ । वासिङ्टनमा पत्रकारहरूसँगको छोटो संवादका क्रममा ट्रम्पले कोलम्बियालाई ‘एउटा बिरामी मानिसले चलाएको देश’ भन्दै वर्तमान नेतृत्व ‘धेरै समय टिक्ने छैन’ भन्ने टिप्पणी गरेका हुन् ।

पत्रकारले यसले कोलम्बियामा अमेरिकी कारबाहीको संकेत हो कि भनेर सोध्दा ट्रम्पले ‘मलाई त ठीकै लाग्छ’ भन्दै जवाफ दिएका थिए । उनको यो छोटो अभिव्यक्तिले कोलम्बियामा सम्भावित अमेरिकी हस्तक्षेपको अड्कलबाजी बढाएको छ भने व्यापक आलोचना समेत भएको छ ।

कोलम्बिया लामो समयदेखि लागूऔषध नियन्त्रण, क्षेत्रीय सुरक्षा र आर्थिक सहकार्यका क्षेत्रमा अमेरिकाको नजिकको साझेदार रहँदै आएको छ । यता, कोलम्बियाका राष्ट्रपति गुस्ताभो पेट्रोले अमेरिकाले देखाएको ‘आक्रामकता’ विरुद्ध ल्याटिन अमेरिकालाई एकजुट हुन आह्वान गरेका छन् ।
पेट्रोले सामाजिक सञ्जाल एक्समा लेख्दै दक्षिण अमेरिकी राजधानीमाथि बमबारी गर्ने विश्वको पहिलो देश अमेरिका भएको दाबी गरे ।

‘यो घाउ लामो समयसम्म रहनेछ । बदला होइन, एकता नै आवश्यक छ,’ उनले उल्लेख गरेका छन् । साथै उनले ल्याटिन अमेरिका एकताबद्ध नभए दासझैँ व्यवहार गरिने चेतावनी दिँदै क्षेत्रीय सहकार्य मजबुत बनाउन आग्रह गरेका छन् ।

यसैबीच, ट्रम्पले अर्को ल्याटिन अमेरिकी देश क्यूबालाई पनि निशाना बनाएका छन् । एयर फोर्स वनमा पत्रकारहरूसँग कुरा गर्दै उनले क्यूबा आर्थिक रूपमा पतनको संघारमा रहेको र भेनेजुएलाबाट प्राप्त तेलमा निर्भर रहेकाले त्यहाँ कुनै सैन्य कारबाही आवश्यक नपर्ने दाबी गरे ।

ट्रम्पको लगातारको कडा अभिव्यक्तिले ल्याटिन अमेरिकासँग अमेरिकाको सम्बन्धको भावी दिशा र कूटनीतिक भाषाशैलीबारे गम्भीर प्रश्न उठाएको छ । एएनआई

बराहक्षेत्र (सुनसरी) । जनता समाजवादी पार्टी (जसपा) बराहक्षेत्र नगरपालिका–३ नम्बर वडा समितिको आज पुनर्गठन सम्पन्न भएको छ। 

उक्त कार्यक्रम जनता समाजवादी पार्टी  सुनसरी जिल्ला सदस्य सञ्जय राईको प्रमुख आतिथ्यतामा सम्पन्न भएको हो। 

कार्यक्रममा जनता समाजवादी पार्टी बराहक्षेत्र नगर समिति अध्यक्ष जे.बी. हाङ राई, नगर सचिव भूपेन्द्र राजधामी तथा समाजवादी युवा संघ बराहक्षेत्र नगर अध्यक्ष मुस्कान राई विशेष अतिथिका रूपमा उपस्थित थिए।

कार्यक्रमलाई सम्बोधन गर्दै प्रमुख अतिथि सञ्जय राईले जनता समाजवादी पार्टीका माग र मुद्दाहरू हिमाल, पहाड तथा तराई–मधेशसम्म फैलिएको सबै नेपालीको अपनत्व झल्काउने खालको रहेको बताए। उनले उत्पीडित वर्ग, जाति र क्षेत्रलाई समेट्ने समावेशी समानुपातिक प्रणाली, संघीयता, सुशासन, समृद्धि र समाजवाद पार्टीको मुख्य एजेन्डा रहेको उल्लेख गरे।

विशेष अतिथि जे.बी. हाङ राईले नयाँ पुस्ताले उठाइरहेका अधिकांश मुद्दाहरू जनता समाजवादी पार्टीले करिब १३ वर्षअघिदेखि नै उठाउँदै आएको बताउँदै जसपा र वर्तमान पुस्ताका मागहरू धेरै हदसम्म मिल्दोजुल्दो रहेको धारणा राखे। उनले यदि जसपाका मागहरू बहुमत प्राप्त दल तथा सरकारले समयमै सम्बोधन गरेको भए प्रदेशमा पाँच वर्षभित्र पाँचपटक मुख्यमन्त्री फेरबदल हुने अवस्था नआउने बताए। प्रत्यक्ष जनमतबाट निर्वाचित सरकार बनेको भए पाँच वर्षसम्म स्थिर सरकार सञ्चालन भई भौतिक पूर्वाधार तथा विकासका योजना र कार्यक्रमहरू सहज, सरल र निरन्तर रूपमा सफल हुने उनको भनाइ थियो।

उक्त कार्यक्रममा जनता समाजवादी पार्टी बराहक्षेत्र–३ वडा समितिका पदाधिकारी तथा सदस्यहरू सर्वसम्मत रूपमा चयन गरिएका छन्। नवगठित समितिको अध्यक्षमा वीरबहादुर मगर चयन भएका छन् भने उपाध्यक्षमा नरेन्द्र कटुवाल, सचिवमा सुम्निमा राई, सह–सचिवमा श्याम कार्की र कोषाध्यक्षमा कोपिला चाम्लिङ चयन भएका छन्। त्यस्तै सदस्यहरूमा नीरबहादुर राई, भीमबहादुर राउत, सुकु देवान राई, पर्वतशिला राई, आशाराम राजधामी, नर्बदा राई, भावना रसाइली, गणेश चौधरी र माधव राई चयन भएका छन्।

नवगठित वडा समितिले पार्टी संगठन सुदृढीकरण गर्दै स्थानीय तहमा जनसम्पर्क विस्तार गर्ने प्रतिबद्धता व्यक्त गरेको छ।