काठमाडौं । शिक्षा, विज्ञान तथा प्रविधि मन्त्री महावीर पुनले त्रिभुवन विश्वविद्यालय किर्तिपुरको जंगल परिसरभित्र सुन्दर पार्क निर्माणका लागि स्थानीय बासिन्दा र विश्वविद्यालयका विद्यार्थीहरूलाई श्रमदान गर्न आह्वान गरेका छन् ।

मन्त्री पुनका अनुसार किर्तिपुरस्थित त्रिभुवन विश्वविद्यालयको करिब ३५० रोपनी क्षेत्रफलमा फैलिएको जंगलभित्र रहेको झाडीलाई श्रमदाताहरूले २५ दिनको श्रमदानमार्फत प्रायः फडानी गरिसकेका छन् । उनका अनुसार, यो कार्यमा सहभागी श्रमदाताहरू मध्ये अधिकांश बाहिरी जिल्लाबाट आएका विद्यार्थि स्वयंसेवकहरू हुन् ।

पुनले सामाजिक सञ्जाल फेसबुकमा पोस्ट गर्दै लेखेका छन्, “अब किर्तिपुर विश्वविद्यालयको जंगल सफा हुँदै सुन्दर पार्क बन्ने तयारीमा छ । यो काम केही उत्साही स्वयंसेवकहरूले २५ दिनदेखि श्रमदान गरेर सम्भव बनाएका हुन् । अब स्थानीय बासिन्दा, विद्यार्थी र इच्छुक व्यक्ति सबैलाई यस अभियानमा सहभागी हुन अनुरोध गर्दछु ।”

श्रमदान अभियानले विश्वविद्यालय परिसरको फोहर र झाडीले ढाकिएको क्षेत्रलाई सफा मात्र गरेको छैन, भविष्यमा हरियाली र सार्वजनिक उपयोगका लागि खुला ठाउँमा रूपान्तरण गर्ने लक्ष्य पनि लिएको छ । मन्त्री पुनका अनुसार, पार्कमा हिँडडुल मार्ग, वृक्षारोपण, विश्राम स्थल र अध्ययन तथा मनोरञ्जनका लागि अनुकूल वातावरण तयार पार्ने योजना छ ।

किर्तिपुरस्थित त्रिभुवन विश्वविद्यालय नेपालको सबैभन्दा ठूलो र ऐतिहासिक शिक्षण संस्था हो । जहाँ हरेक वर्ष हजारौँ विद्यार्थी अध्ययन गर्छन् । मन्त्री पुनको नेतृत्वमा सुरु भएको यो श्रमदान अभियानले विश्वविद्यालयलाई केवल शैक्षिक केन्द्र नभई समुदायमैत्री, हरित र वातावरणमैत्री क्षेत्र बनाउने अपेक्षा गरिएको छ ।

काठमाडौं । अमेरिकाले अब देखि मधुमेह, मोटोपनाजस्ता स्वास्थ्य समस्या भएका विदेशी नागरिकलाई भिसा अस्वीकार गर्न सकिने व्यवस्था लागू गरेको छ । ट्रम्प प्रशासनले नयाँ निर्देशन जारी गरी अमेरिका प्रवेशमा थप कडाइ गर्दै यस्तो व्यवस्था लागु गरेको हो ।
सीबीएस न्युजका अनुसार यो निर्देशन अमेरिकी विदेश मन्त्रालयले दूतावास तथा वाणिज्य दूतावासहरूलाई पठाएको हो । निर्देशनमा भिसा आवेदकले ‘पब्लिक चार्ज’ अर्थात् सरकारको आर्थिक बोझ बन्न सक्ने सम्भावना देखिएमा उनीहरूलाई अयोग्य मान्न अधिकारीहरूलाई सुझाइएको छ ।
निर्देशनमा भनिएको छ,‘आवेदकको स्वास्थ्य अनिवार्य रूपमा विचार गर्नुपर्छ । कार्डियोभास्कुलर रोग, श्वासप्रश्वाससम्बन्धी रोग, क्यान्सर, मधुमेह, मेटाबोलिक तथा स्नायु रोगदेखि मानसिक स्वास्थ्य समस्यासम्मले अत्यधिक महँगो उपचार आवश्यक पर्न सक्छ ।’
यससँगै भिसा मूल्यांकनमा संक्रामक रोग वा खोप अभिलेख मात्र होइन, दीर्घरोग तथा उमेरसम्बन्धी जोखिम पनि प्रमुख तत्वका रूपमा समावेश गरिएका छन् ।
मोटोपनाले दम, स्लीप एपनिया तथा उच्च रक्तचाप उत्पन्न गराउन सक्ने भएकाले यसलाई पनि पब्लिक चार्जको जोखिमसँग जोडेर मूल्यांकन गर्न निर्देशनमा उल्लेख छ । विश्वको करिब १० प्रतिशत जनसंख्या मधुमेहबाट पीडित रहेको र मुटुरोग विश्वमै मृत्युको प्रमुख कारण बनेको पृष्ठभूमिमा यो कदम थप कठोर मानिएको छ ।
यस्तै, आवेदकसँग उपचार खर्च सम्हाल्न पर्याप्त आर्थिक स्रोत छ कि छैन भन्ने आकलन गर्न अधिकारीहरूलाई भनिएको छ । विशेष गरी सरकारी खर्चमा दीर्घकालीन उपचार वा सेवामा निर्भर हुनुपर्ने सम्भावना छ कि छैन भन्नेबारे प्रश्न उठाइनेछ ।
निर्देशनले आवेदकका परिवार सदस्यहरूको स्वास्थ्य अवस्थालाई पनि मूल्यांकनमा समावेश गर्ने व्यवस्था मिलाएको छ । ‘आश्रित परिवारमा दीर्घरोग वा विशेष हेरचाह आवश्यक पर्ने सदस्य छन् भने, त्यसले आवेदकको रोजगारीमा असर पार्छ कि पार्दैन ?’ यो निर्देशनबारे अमेरिकी विदेश मन्त्रालयका प्रवक्ताले अझै कुनै टिप्पणी गर्न बाँकी रहेको एएनआईले जनाएको छ ।
एएनआई

काठमाडौं ।  प्रधानमन्त्री सुशीला कार्कीले नयाँ पुस्तालाई मतदाता नामावलीमा नाम सङ्कलन गरेर आगामी निर्वाचनमा विवेकको मत प्रयोग गर्न आह्वान गरेकी छन् ।

प्रधानमन्त्री कार्कीले आज भिडियो सन्देश दिँदै आगामी फागुन २१ गतेका लागि तोकिएको प्रतिनिधिसभाको निर्वाचनका लागि विवेकको मत प्रयोग गर्न आह्वान गरेकी हुन् ।

उनले भिडियो सन्देश  जारी गर्दै  भनेकी  छन्, ‘जेनजी युवा र समस्त नेपालीको सपनाको नेपाललाई यथार्थको नेपाल बनाउन, सबैभन्दा पहिला तपाईँ–हामीले हाम्रो मतदाता परिचयपत्र बनाउनुपर्छ । अनि त्यसको सही उपयोग गरेर सही प्रतिनिधि छान्नुपर्छ ।’

प्रधानमन्त्री कार्कीले विद्यमान बेथितिसँग लड्न र देश विकासमा सँगै अगाडि बढ्न हरेक योग्य नागिरकले आफ्नो मताधिकारको सदुपयोग गर्नुपर्ने समेत बताएकी  छन् ।

उनले भनिन्, ‘तपाईँहरू आफैँ सही प्रतिनिधि बन्नुपर्छ । विद्यमान बेथितिसँग लड्न र देश विकासमा सँगै अगाडि बढ्न हरेक योग्य नागिरकले आफ्नो मताधिकारको सदुपयोग गर्नुपर्छ । मताधिकारको सदुपयोग गर्न नजिकैको निर्वाचन कार्यालय गएर आजै मतदाता परिचय बनाऔँ ।’

काठमाडौं । जनता समाजवादी पार्टी (जसपा) को केन्द्रीय समिति बैठक मंसिर १९ र २० गते काठमाडौंमा आयोजनागरी सम्पन्न भएको छ । दुई दिनसम्म चलेको बैठकमा पार्टी अध्यक्ष अशोककुमार राईले प्रस्तुत गरेका नयाँ नीति तथा कार्ययोजना सर्वसम्मत रूपमा पारित गर्दै बैठक सम्पन्न गरिएको हो। उक्त बैठकले वर्तमान राजनीतिक अवस्था, संविधान संशोधन, आगामी निर्वाचनको तयारी र संगठन सुदृढीकरणका विषयमा विस्तृत छलफल गरेको थियो ।

बैठकमा अध्यक्ष राईले प्रस्तुत गरेको कार्ययोजनामा प्रत्यक्ष निर्वाचित कार्यकारी प्रमुख, संविधान संशोधनको प्रतिबद्धता, समानुपातिक समावेशीकरण, गैरदलीय स्थानीय चुनाव, सुशासन र भ्रष्टाचार नियन्त्रणका एजेन्डाहरूलाई मुख्य प्राथमिकतामा राखिएको छ। जसपाले संघीय शासन प्रणालीमा सुधारका लागि संघमा कार्यकारी राष्ट्रपति, प्रदेशमा मुख्यमन्त्री र स्थानीय तहमा कार्यकारी प्रमुख सबैलाई जनताबाट प्रत्यक्ष निर्वाचनमार्फत चयन गर्ने व्यवस्था गर्नुपर्ने प्रस्ताव अघि सारेको छ । पार्टीका अनुसार, यस्तो प्रणालीले राजनीतिक स्थायित्व, जवाफदेहीता र जनताले प्रत्यक्ष निर्वाचित गराउने अधिकारको पनी सुनिश्चित गर्न सहयोग पुर्‍याउनेछ ।

बैठकले वर्तमान संविधानलाई अधुरो, अपुरो र विभेदकारी ठहर गर्दै सबै समुदायको पहिचान र अधिकार सुनिश्चित गर्न संविधान संशोधनको माग दोहोर्‍याएको छ । राज्यका सबै अंग, तह र निकायमा पछाडि परेका वर्ग, जाति, क्षेत्र, लिङ्ग र समुदायहरूको जनसङ्ख्याको अनुपातमा पूर्ण समानुपातिक समावेशीकरण सुनिश्चित गर्नुपर्ने नीति पार्टीले तय गरेको छ। त्यसैगरी जसपाले स्थानीय तहमा हुने निर्वाचन गैरदलीय आधारमा सम्पन्न गर्नुपर्ने व्यवस्थाका लागि पहल गर्ने उल्लेख गरेको छ ।

बैठकले सरकारका सम्पूर्ण राजनीतिक तथा संवैधानिक नियुक्तिहरूमा दलीय भागबन्डा, नातावाद र कृपावादको अन्त्य गरी योग्यता, क्षमता र समानुपातिक समावेशी आधारमा नियुक्ति गर्नुपर्ने माग गरेको छ। पार्टीले भ्रष्टाचार नियन्त्रणमा जोड दिँदै सबै भ्रष्टाचारसम्बन्धी मुद्दाहरूको निष्पक्ष छानबिन गर्न सम्बन्धित निकायहरूलाई निर्देशन दिन सरकारसँग आग्रह गरेको छ ।

जसपाले हालै भएको जेनजी आन्दोलनका क्रममा देखिएका घटनाप्रति गम्भीर ध्यानाकर्षण जनाउँदै त्यसको निष्पक्ष छानबिन गर्न माग गरेको छ। भदौ २३ गते अर्थात् सेप्टेम्बर ८ मा आन्दोलन दबाउने क्रममा भएको “युवा नरसंहार र गोलीकाण्ड” को सत्य तथ्य पत्ता लगाई दोषीलाई कानुनी कारबाही गर्न र घाइतेको उपचार तथा परिवारजनको सुरक्षा सुनिश्चित गर्न पार्टीले आग्रह गरेको छ। त्यस्तै, भदौ २४ गते अर्थात् सेप्टेम्बर ९ मा भएका आगजनी र प्रहरी हत्या जस्ता घटनाका अपराधीहरूलाई तत्काल गिरफ्तार गर्नुपर्नेमा बैठकले जोड दिएको छ। जसपाले गृह मन्त्रालयले छानविन आयोगको प्रतिवेदन नआईकन गिरफ्तार नगर्नु भन्ने निर्देशनलाई गलत ठहर गर्दै न्यायिक प्रक्रिया अघि बढाउन माग गरेको छ ।

बैठकले आगामी निर्वाचनका लागि संगठनलाई सुदृढ बनाउँदै पूर्ण तयारीका साथ सहभागी हुने निर्णय गरेको छ। जसपाले परिस्थितिअनुसार समान विचार र एजेन्डा भएका दलहरूसँग मोर्चाबन्दी वा चुनावी तालमेल गर्न केन्द्रीय कार्यकारिणीलाई अधिकार प्रदान गरेको छ। मोर्चाबन्दीका लागि संघीय लोकतान्त्रिक गणतन्त्रको रक्षा, बहुजातीय धर्मनिरपेक्ष समाजवाद, सहभागितामूलक समावेशी लोकतन्त्र र सामाजिक–आर्थिक न्याय सुनिश्चित गर्ने विषयहरूलाई न्यूनतम एजेन्डाका रूपमा तय गरिएको छ। यद्यपि, मोर्चाबन्दी वा तालमेल सम्भव नभएमा पार्टीले एक्लै निर्वाचनमा प्रतिस्पर्धा गर्न तयार रहेको स्पष्ट गरिएको छ ।

बैठकले पार्टीको प्रचारप्रसार र संगठन विस्तारलाई प्रभावकारी बनाउन डिजिटल सञ्चार माध्यमको प्रयोगलाई प्राथमिकतामा राख्ने निर्णय गरेको छ। जसपाका सम्पूर्ण संरचनालाई अनलाइन प्लेटफर्ममा आबद्ध गराई डिजिटल संजालमार्फत सदस्यता अभिवृद्धि गर्ने योजना पनि पारित गरिएको छ । संघीय लोकतान्त्रिक गणतन्त्र, पहिचान र समावेशिताविरुद्ध भइरहेका प्रयासहरूलाई वैचारिक र राजनीतिक रूपमा चिर्ने तथा प्रतिवाद गर्ने कार्यलाई पनि पार्टीले अबको प्रमुख जिम्मेवारीका रूपमा लिएको छ ।

बैठकले संविधान निर्माणको समयदेखि जसपाले उठाउँदै आएका विषयहरूलाई आजको ‘जेनजी’ पुस्ताका युवाहरूले पनि उठाइरहेको भन्दै ती मागहरूको कार्यान्वयनमा ढिलाइ नगरी तुरुन्तै पहल गर्नुपर्ने निष्कर्ष निकालेको छ। अध्यक्ष अशोककुमार राईले बैठकलाई सम्बोधन गर्दै संविधान संशोधन, प्रत्यक्ष जनमत आधारित शासन प्रणाली, समानुपातिक समावेशीकरण, सुशासन र भ्रष्टाचार नियन्त्रणजस्ता एजेन्डाहरूलाई व्यवहारिक रूपमा कार्यान्वयन गर्न पार्टी प्रतिबद्ध रहेको बताएका छन् ।

यसैगरी, बैठकले नेपालको राजनीतिक स्थायित्व, सामाजिक समावेशिता र सुशासनका लागि जसपाले ल्याएका नीति तथा कार्यक्रमलाई आगामी निर्वाचनमा मुख्य एजेन्डाका रूपमा अघि सार्ने निर्णय गरेको छ। पार्टीले अबको प्रमुख ध्यान संगठन सुदृढीकरण, निर्वाचन तयारी र जनस्तरमा विश्वास पुनःस्थापना गर्ने अभियानमा केन्द्रित गर्ने जनाएको छ ।

काठमाडौं । ‘हामी नेपाल’का संस्थापक सुदन गुरुङले गृहमन्त्री ओमप्रकाश अर्यालविरुद्ध कडा कदम चाल्ने चेतावनी दिएका छन् । उनले गृहमन्त्रीलाई लक्षित गर्दै कडा शब्दमा आलोचना समेत गरेका छन् ।सामाजिक सञ्जालमार्फत उनले गृहमन्त्रीले जनताको भरोसा तोडेका आरोप लगाउँदै तत्काल कदम चाल्न चेतावनी दिएका हुन् । 

गुरुङले भनेका छन्, ‘तपाईंले जनताको भरोसा पूरा गर्न सक्नुभएको छैन । देशभर ‘हत्यारालाई कारबाही गर’, ‘भ्रष्टाचारीलाई कारबाही गर’ भन्ने आवाज उठ्दा पनि तपाईं ‘जेनजीलाई कारबाही’ भन्ने आवाज मात्र सुन्ने गृहमन्त्री बन्नुभयो । यो राष्ट्रप्रतिको अपमान हो ।’

उनले गृहमन्त्रीलाई शहीदको बलिदान, नेपाली जनताको आशा र आँसु सम्झन आग्रह गरेका छन् । उनले भनेका छन्, ‘काम गर्न नसके पद छोड्ने वाचा गर्नुभएको थियो । अब त्यो समय आएको छ । किनभने दुई महिना भइसक्दा पनि न भ्रष्टाचारविरुद्ध कारबाही भएको छ, न हत्यारा विरुद्ध कारवाही गरिएको छ ।’

गुरुङले आफू र आफ्ना सहकर्मीहरू राष्ट्रहितका लागि लडिरहेको बताउँदै लेखेका छन्, ‘देशको हितको लागि लड्दा मैले भ्रामक समाचार, चरित्र हत्या र अपमान सहनु प¥यो । म सोच्थें—कामले बोल्छ । तर अब तपाईंबाट आशा हराइसकेको छ ।’

यसैगरी उनले जेनजीका माग पूरा नभएसम्म चुनाव हुन नदिने चेतावनी समेत दिएका छन् । उनले चेतावनी दिंदै भनेका छन्, ‘यदी नेपाली जनता र जेनजीका मागहरू सम्बोधन भएनन् भने यसपालीको चुनाव हुन दिइने छैन । अझै पनि गृहमन्त्रीको पदमा टाँसेर बस्नुभयो भने दुई दिनपछिको प्रेस कन्फ्रेन्सले तपाईंको भविष्य निर्धारण गर्नेछ ।’

काठमाडौं । महान्यायाधिवक्ता सविता भण्डारीले विद्रोहपछिको राजनीतिक अवस्थालाई सरकारका लागि अवसर र चुनौती दुवैको रूपमा व्याख्या गरेकी छिन् । राष्ट्रिय एकताको लागि नागरिक पहलद्वारा आयोजित ‘राष्ट्रहित सर्वोपरि कन्क्लेभ’ अन्तर्गत ‘विद्रोह पछिको बाटो ः चिन्ता र चुनौती ?’शीर्षकको तेस्रो प्यानल छलफलमा बोल्दै उनले हालको सरकार सुशासन र कानूनी प्रक्रियाको सन्तुलनमा उभिएको बताइन् ।

उनले भनिन्, ‘सरकार गठन हुँदा सुशासनका विषयमा ध्यान दिनुपर्छ भनेर भनिएको थियो । अभियोजन र सजायका कुरा आफ्ना ठाउँमा छन्, तर त्यससँगै विभिन्न आवाजहरू उठिरहेका छन् । तत्कालीन प्रधानमन्त्री केपी शर्मा ओली र रमेश लेखकजस्ता व्यक्तिहरूलाई तत्काल पक्राउ गरियोस् भन्ने माग भइरहेका छन् । तर कसैलाई दोषी ठहर गर्न प्रमाण आवश्यक हुन्छ ।’

उनले तत्कालीन सरकारले आन्दोलनमा गोली चलाउने आदेश दिएको थियो वा थिएन भन्ने विषय अनुसन्धानबाटै स्पष्ट आउनुपर्ने बताइन् ।

भण्डारीले थपिन्, ‘जाँचबुझ आयोग गठन भइसकेको छ र त्यसले काम गरिरहेको छ । अनुसन्धानको निष्कर्ष नआउँदै कसैलाई दोषी ठहर गर्न मिल्दैन । तत्कालीन सरकारले आन्दोलनमा गोली चलाउने आदेश दिएको थियो वा थिएन भन्ने कुरा पनि अनुसन्धानबाटै स्पष्ट हुनुपर्छ । सरकार त्यस दिशामा प्रयासरत छ ।’

उनले प्रहरी प्रशासन अनुसन्धानमा सक्रिय रहेको र मिडियामा नदेखिए पनि आवश्यक कानूनी प्रक्रिया अघि बढिरहेको बताइन् ।

काठमाडौं । जनता समाजवादी पार्टी नेपालका प्रवक्ता मनिष कुमार सुमनले जेनजी आन्दोलनका लागि अनुमति लिने जेनजी अगुवाहरू आन्दोलन पछि मृत्युवरण गरेकाहरुको मलामी र घाइतेहरूलाई भेट्न अस्पतालहरूमा नपुगेको बताएका छन् । तर तिनै नेता तथा अगुवाहरूले क्रेडिट लिन खोजेको उनको आरोप छ ।

राष्ट्रिय एकताको लागि नागरिक पहलद्वारा आयोजित ‘राष्ट्रहित सर्वोपरि कन्क्लेभ’ अन्तर्गत ‘बदलिँदो राजनीति : सच्चिँदै कि सक्किँदै दल ?’शीर्षकमा आयोजित दोस्रो प्यानलको छलफलमा बोल्दै उनले जेनजी आन्दोलन पछि जेनजी अगुवाहरू राज्य स्वघोषित गर्ने हानथाप गर्न लागेको बताए ।

उनले भने, ‘जो पुरुषोत्तम यादव जी तपाईले सिडियो कार्यालयबाट अनुमति लिन जानुभएको थियो उनलाई कुनै मलालीमा खासै देखिन त्यो ७६ जनाहरूको मलामीमा । अस्पतालमा पनि खासै भेटिन । उनलाई मात्र हैन त्यो आयोजक भन्ने पछिल्लो दिनमा भेप खाएर उदाएकाहरू अथवा सामाजिक सञ्जालमा आफ्ना विशिष्ट चरित्र प्रधान गर्ने मेयर सावहरू कोही पनि जो त्यो आन्दोलनको उपलब्धि लिन हानथाप गरिरहेका छन् तिनीहरूमध्ये कसैलाई मैले मृत्युवरण गरेरका वा अस्पतालमा छटपटाई रहेकाहरू सम्म गएको पनि देखिन ।’

उनले आफ्नो सिफारिसमा मन्त्री, प्रधानमन्त्री बन्नुपर्ने भन्दै आफै हानथाप गरिरहेको भन्दै जेनजीका अगुवाहरूसँग गुनासो पोखे ।

‘उहाँहरू बरु मेरो सिफारिसमा प्रधानमन्त्री बनाइदेयौँ । राज्य म हुँ राज्यले गर्नुपर्ने काम म गर्छु बाकी तपाईहरू विपतको व्यवस्थापन गर्ने कामहरू गर्नुस् भनेर आफै राज्य स्वघोषित गर्ने हानथाप थियो,’उनले भने ।

उनले जेनजी आन्दोलनपछि जनयुद्ध गरेर आएको पार्टी फुटेको भन्दै जनता समाजवाद नेपाल पार्टी फुट्दै अनि जुट्दै बलियो बनेको समेत बताए ।

‘फुट्दै फुट्दै जादा जनता समाजवाद पार्टी नेपाल फुट्दै भन्दा पनि जुट्दै जुट्दै गएको हो । एकदिन बाबुराम भट्टराई हाम्रै पार्टीको नेता हुनुन्थ्यो । अशोक राई हाम्रौ पार्टीमा हुनुहुन्थ्यो,’उनले थप भने, ‘पछिल्लो दिन फुटेकोमा हाम्रो पार्टीलाई मात्र किन खिसीटिउरी गर्नुहुन्छ । जनयुद्ध गरेर आएको पार्टी पनि फुटेर आएको देखेको छु । आफै फुटेर ओली ठिक छैनन् भनेर फुटेर हिडेकाहरू पनि फुटेको देख्दैछु ।’

प्रवक्ता सुमनले राजनीतिक दलहरू सचिनै पर्ने बाध्यता रहेको भन्दै जेनजी आन्दोलनले ०८४ मा हुने चुनाव ०८२ हुनु बाहेक केही फाइदा नरहेको बताए ।

काठमाडौं । नेपाली कम्युनिस्ट पार्टीको एकता राष्ट्रिय सम्मेलनले ९ बुँदे प्रस्ताव पारित गरेको छ । काठमाडौंमा जारी सम्मेलनले पार्टीको नाम, चुनाव चिह्नलगायतका विभिन्न ९ बुँदे प्रस्ताव पारित गरेको हो ।

सम्मेलनमा एकता प्रक्रियामा सहभागी पार्टीहरूले पार्टी एकता गरेर ‘नेपाली कम्युनिष्ट पार्टी’ निर्माण गर्ने निर्णय गरेको छ भने चुनाव चिह्न ‘पाँच कुने तारा’ राख्ने निर्णय गरिएको छ ।  दश पार्टी मिलेर बनेको नेपाली कम्युनिस्ट पार्टीको संयोजकमा पुष्पकमल दाहाल (प्रचण्ड) र सहसंयोजकमा माधव नेपाल चयन भएका छन् ।

यस्ता छन्, ९ बुँदे प्रस्तावहरू :

१. एकता प्रक्रियामा सहभागी पार्टीहरूले पार्टी एकता गरेर ‘नेपाली कम्युनिष्ट पार्टी’ निर्माण गर्ने निर्णय गरिएको छ ।

२. चुनाव चिह्न ‘पाँच कुने तारा’ राख्ने निर्णय गरिएको छ ।

३. एकतामा सहभागी सबै सदस्यहरू अबदेखि नेपाली कम्युनिष्ट पार्टीका सदस्य हुने निर्णय गरिएको छ ।

४. एकतामा सहभागी सबै पार्टीका नेताहरूसँग आवश्यक परामर्श गरेर पार्टीका केन्द्रीय संरचनाहरूलाई पूर्णता दिने र सङ्गठनात्मक समायोजन सम्बन्धी काम गर्ने तथा यसअघि सबै घटकका केन्द्रीय समितिलाई समायोजन गरी केन्द्रीय समिति निर्माण गर्ने निर्णय गरिएको छ ।

५. केन्द्रीय संरचनाहरूलाई पूर्णता दिने र संगठनात्मक समायोजनसम्बन्धी काम गर्ने अख्तियारी पार्टीका संयोजक र सहसंयोजकलाई दिने प्रस्ताव गरिएको छ ।

६. विगतका प्रतिनिधिसभा, राष्ट्रिय सभा, प्रदेश सभा र स्थानीय तहमा नेकपा माओवादी केन्द्र, नेकपा एकीकृत समाजवादी, नेपाल समाजवादी पार्टी, नेकपा माओवादी समाजवादीको चुनाव चिह्नबाट निर्वाचित जनप्रतिनिधिहरू अबदेखि नेपाली कम्युनिष्ट पार्टीका जनप्रतिनिधि हुनेछन् ।

७. पार्टी एकतामा सामेल सबै पार्टीहरूको चल–अचल, बैंक मौज्दातलगायतका सम्पत्तिको स्वामित्व र दायित्व अबदेखि नेपाली कम्युनिष्ट पार्टीको स्वामित्वमा रहनेछ ।

८. नेपाली कम्युनिष्ट पार्टीको घोषणापत्र पारित गरिएको छ ।

९. नेपाली कम्युनिष्ट पार्टीको विधान छलफल र आवश्यक सुझावसहित पारित गरिएको छ ।

काठमाडौं । नेकपा (एकीकृत समाजवादी) का महासचिव घनश्याम भूसालले कमजोर र ओरालो लागेकाहरूको एकताबाट देश र वाम आन्दोलनले निकास पाउन नसक्ने बताएका छन् ।

बुधवार काठमाडौंमा आयोजित पत्रकार सम्मेलनमा बोल्दै उनले ‘उकालो लाग्ने’ भन्ने भाष्य सिर्जना गर्न कमजोरहरूको एकता अघि सारिएको भए पनि त्यसले वास्तविक समाधान नदिने बताए । भूसालले नेकपा माओवादी केन्द्रसँग पार्टी एकताको तयारीप्रति आपत्ति जनाउँदै समाजवादको जिम्मेवारी लिएर एमाले विभाजन गरी बनेको एकीकृत समाजवादी अहिले त्यो उद्देश्यबाट विचलित भएको टिप्पणी गरे ।

उनले भने, “संकट मोचन गर्ने फर्मुला तयार भएको छ । तर कमजोरहरू, ओरालो लागेकाहरूको एकताले उकालो लागिन्छ भन्ने भाष्य बनाइँदैन । जो आफैं ओरालो हिँड्दैछन्, त्यसले निकास दिन सक्दैन ।”

भूसालले तथाकथित ‘एकताको भ्रम’ मा नपर्न आग्रह गर्दै पार्टीका सम्पूर्ण कमिटी, जनसंगठन, विभाग र आयोगका सदस्यहरूलाई आ–आफ्नो हैसियतमा धैर्यताका साथ रहँदै क्रान्तिकारी विकल्प निर्माणबारे छलफलमा जुट्न आह्वान गरे।

उनका अनुसार, मङ्सिर पहिलो हप्तामा आयोजना हुने राष्ट्रिय भेलाबाट आगामी कार्यभार र कार्ययोजना तय गरिनेछ । उनले सो भेलालाई क्रान्तिकारी पुनर्गठनको दिशामा उठाइएको महत्वपूर्ण कदम भन्दै देशभित्र र बाहिर रहेका देशभक्त, लोकतन्त्रवादी, प्रगतिशील, वामपन्थी तथा कम्युनिष्टहरूलाई सुझाव र सल्लाह दिन अनुरोध गरे  ।

काठमाडौं । नेकपा एकीकृत समाजवादीकीे नेतृ राम कुमारी झाँक्रीले समाजवादी पार्टीसँगको यात्रा टुंगिदै गर्दा खासै दुखेसो नलागेको  बताएकी छन् । 

बुधवार काठमाडौँमा पत्रकार सम्मेलन गर्दै नेतृ झाँक्रीले आज पार्टीसँगको यात्रा टुंगिदा एक हिसाबले खुसी नै भएको बताइन् । उनले समाजवादी पार्टी सँगको यात्रा गलत हो भन्ने थाहा हुँदाहुँदै पनि सुधार गर्नका लागि केही जिम्मेवारी भएकाले छोड्न नसकेको भन्दै अहिले यो यात्रा टुगिंएको जानकारी दिइन् ।  

‘यो यात्रा अवरुद्ध छ भन्ने कुरा हामीले धेरै पहिला थाहा पाएका थियौँ, यो गलत बाटो हो भन्ने पनि थाहा थियो तर त्यसलाई सुधार गर्नका लागि हामी सँग केही जिम्मेवारीहरू थिए । त्यही कारणले गर्दा त्यो यात्रा बिचैमा टुंग्याउन सकेका थिएनौँ तर आज यो यात्रा टुंगिएको छ । तर यात्रा टुंगिदै गर्दा हामी एक हिसाबले खुसी नै छाँै,’उनले भनिन् ।

उनले नेकपा एकीकृत समाजवादी पार्टी निमार्णका क्रममा एउटा अभियानमा चल्छ भन्ने विश्वासका साथमा लागेको भन्दै  आजबाट त्यो विश्वास पनि  सकिएको बताइन् । उनले समाजवादी पार्टी सँगको यात्रा नयाँ पार्टी विघटन सँगसँगै सकिएको दाबी गरिन् । 

‘नेकपा एकीकृत समाजवादी पार्टी निमार्णका क्रममा एउटा अभियानमा चल्छ भन्ने विश्वासका साथमा  हामी लागेका थियौँ तर त्यो आजबाट सकिएको छ । समाजवादी पार्टी सँगको यात्रा त्यो पार्टी विघटन सँगसँगै टुंगियो । त्यो पार्टी सँगको यात्रा टुंगिसके पछाडि हाम्रो रोकिएको अवस्था हो । हामी भित्रपनि धेरै आइडियाहरू छ । हामी सँग पनि थुप्रै साथिहरू छन्, तर यो गर्नुको कारण यसको १ बजेपछि हाम्रो पार्टीको औपचारिक घोषणा हुँदैछ,’उनले भनिन् । 

नेतृ झाँक्रीले समाजवादी पार्टी, दल भित्रका आन्तरिक लोकतन्त्रहरू  खुम्चिएको  बेला निमार्ण भएको भन्दै जनतामा भरोसा रहेकै कारण भरोसालाई डोर्याउँदै पार्टी निमार्ण गरेको तर समयले पार्टी विसर्जन गर्ने बनाएको पनि बताइन् । 

‘समाजवादी पार्टी यस्तो बेला निमार्ण भएको थियो जुनबेला दल भित्रका आन्तरिक लोकतन्त्रहरू पनि खुम्चिएको थियो, जनतामा भरोसा थियो तर त्यो भरोसालाई डोर्‍याउनु सक्छौँ होला भन्ने विश्वासले पार्टी निमार्ण गरेको थियौँ । तर समयले पार्टी विसर्जन गर्ने बनायो,’उनले भनिन् ।