भोजपुर । नागरिकलाई सहज र सरल तरिकबाट सेवा दिने भोजपुरमा रहेका अधिकांश सरकारी कार्यालयहरु भाडाका घरमा संचालनमा छन् । ती कार्यालयहरुको आफनै भवन नहुँदा प्रभावकारी सेवामा समेत समस्या देखिएको छ ।

जिल्लामा रहेका नेपाल टेलिकम, जिल्ला निर्वाचन कार्यालय, आर्युवेद स्वास्थ्य केन्द्र, नेपाल बैक लिमिटेड, कृषि बिकास बैक, राष्ट्रिय बाणिज्य बंैक, नेपाल बायु सेवा निगमजस्ता महत्वपूर्ण कार्यालयहरु भाडाका घरबाट नै संचालनमा छन् । कार्यालय राख्नका लागि खोजेजस्तो घर समेत नभेटिने गरेकाले थप समस्या सरकारी कार्यालयलाई रहेको कर्मचारीहरु बताउँछन । 

आफ्ना कार्यालयका भवनहरु नहुँदा भाडाको घरबाट सेवा प्रवाह गर्दे आइरहेको जिल्ला आर्युवेद स्वास्थ्य केन्द्र भोजपुरका बैद्य निरीक्षक मनोज कुमार पण्डितले बताए ।

उनले भने, ‘जिल्लामा कार्यालय संचालनमा आएसँगै भाडाका घरबाट सेवा प्रवाह भइरहेको छ, अहिले भने भवन निर्माणका लागि दाताबाट निःशुल्क जग्गा प्राप्त भएको छ तर पनि बजेट अभावका कारण भवन बनाउन नसक्दा भाडाको घरबाट नै सेवा चलिरहेको छ।’ सानो कोठाहरु भएका कारण सेवा प्रवाह समस्याका बावजुद पनि चलिरहेको छ ।  

आर्युवेद कार्यालय मात्र होइन अन्य कार्यालयहरुको पनि अवस्था त्यस्तै रहेको छ । कार्यालय प्रयोजनाका लागि जिल्लामा भनेको स्थानमा घर समेत अभाव हुने भएकाले भाडामा पाउन समेत मुस्किल हुने गरेको कार्यालयहरुको भनाई छ ।

जग्गा खरिद र भवन निर्माणका लागि बजेट बिनियोजन नहुने हुदाँ कार्यालय सदरमुकाममा भाडाको घरबाट नै सञ्चालन हुँदै आएको नेपाल बायु सेवा निगम भोजपुरका प्रमुख प्रकाश खडकाले बताए । भोजपुरमा हवाई उडान सुरु भएदेखि नै कार्यालय सञ्चालन र टिकट बिक्रीको काम निगमले भाडाको घरबाट नै गर्दै आई रहेको छ । 

सरकारी बैंकहरु राष्ट्रिय बाणिज्य बैंक, नेपाल बैंक र कृषि विकास बैंक समेत अहिले सदरमुकाममा भाडाका घरबाट नै सञ्चालन हुदै आई रहेका छन । निर्वाचनको जिम्मा पाएको जिल्ला निर्वाचन कार्यालय पनि अरुकै भवनमा चलि रहेको छ । 

जिल्ला समन्वय समितिकिो अतिथी गृहबाट अहिले निर्वाचन कार्यालय चलिरहेको छ । आफनो भवन नहुदाँ सम्पूर्ण कार्यहरु सोही घरबाट चलिरहेको निर्वाचन कार्यालयका प्रमुख डिकेन्द्र सुवेदीले बताए। कोठाहरु समेत पर्याप्त नभएका कारण निर्वाचनको समयमा सेवा प्रवाहमा झन बढी समस्या हुने गरेको सुवेदीको भनाई छ । 

नेपाल टेलिकमले पनि भाडामा घर लिएर सेवा प्रवाह गरिरहेको छ । भवन पनि नभएको र सदरमुकाम आसपासमा नै कार्यालय राख्नु पर्ने भएकाले घर भाडामा लिएको कर्मचारी रमेश सुवेदीले बताए । सरकारी कार्यालयहरु मात्र होइन स्थानीय तहका भवनहरु पनि बन्ने क्रममा छन भने वडा कार्यालयहरुको समेत आफनै भवनहरु छैन । 

काठमाडौं । नेपाली कांग्रेसको संस्थापन इतर समूहले १५ औं महाधिवेशन अन्तर्गत करिब ९० प्रतिनिधि सभा क्षेत्रको क्षेत्रीय अधिवेशन सम्पन्न गरेको छ ।

उक्त समूहका नेता किरणराज शर्मा पौड्यालका अनुसार हालसम्म ९० क्षेत्रको क्षेत्रीय र नौं जिल्लाको जिल्ला अधिवेशन पनि सकिएको छ ।

पौडेलले भने,‘कार्तिक १५ गते जिल्ला अधिवेशन छ त्यसअघि नै एक मात्र निर्वाचन क्षेत्र रहेका नौं जिल्लाका अधिवेशन सकिएको छ र नयाँ नेतृत्व आइसकेको छ । १५ गतेसम्ममा लगभग सबै जिल्लाको अधिवेशन सकिने छ । मंसिर ४ गते सातै प्रदेशको अधिवेशन पनि हुनेछ ।’

१५ औं महाधिवेशन मंसिर २१ देखि २३ गतेसम्म गर्ने प्रस्ताव गरिएको र सो अनुसार निर्णय भएको तालिका अनुसार आफूहरुले काम गरिरहेको उनले जानकारी दिए । 

जस अनुसार वडा अधिवेशन असोज १५ गते, पालिका अधिवेशन असोज २० गते, प्रदेश सभा÷प्रतिनिधि सभा क्षेत्रीय अधिवेशन असोज २३ गते गर्ने प्रस्ताव गरिएको थियो । 

त्यस्तै, जिल्ला अधिवेशन कात्तिक १५ गते, प्रदेश अधिवेशन मंसिर ४ गते तोकिएको छ ।

युवा नेता भरत खड्काका अनुसार उत्साहका साथ देशभर अधिवेशन भइरहेको छ । ‘अधिवेशनमा धेरैजसो युवा पुस्ताका साथीहरु नेतृत्वमा आउनुभएको छ । अग्रजहरुलाई सम्मानजनक स्थान दिंदै कांग्रेसमा युवाहरुको आकर्षण देखिएको छ, तल्लो तहदेखिका अधिवेशनमा नवयुवाहरुको सहभागिता उत्साहजनक देखिनुलाई पार्टीमा नयाँ उर्जा देखिएको भान हुन्छ,’ उनले भने ।

गगन कुमार थापा नेतृत्वको संस्थापन पक्षले १५ औं महाधिवेशन सम्पन्न गरिसकेको छ । इतर पक्षले पनि छुट्टै महाधिवेशनको तयारीमा जुटेको हो ।

गत पुसमा सम्पन्न विशेष महाधिवेशनपछि दुई भागमा विभाजित कांग्रेसको आधिकारिकता विवाद अझै सर्वोच्च अदालतमा विचाराधीन छ ।

विषेश महाधिवेशनबाट आएको गगन थापा नेतृत्वको कार्यसमितिले पाएको वैधतामाथि परीक्षण हुने भन्दै सर्वोच्च अदालतको पूर्ण इजलासले कांग्रेसको आधिकारिता विवादमा पुनः सुनुवाइ गर्न निस्सा दिएपछि उत्साहित भएको इतर समूह नियमित महाधिवेशनमा जुटेको हो ।

केन्द्रीय निर्वाचन समिति संयोजक तोकेर महाधिवेशनको तयारी गरिरहेको उक्त समूहले चाँडै विभिन्न समितिहरु बनाउने भएको छ ।

निवर्तमान सभापति शेर बहादुर देउवा पक्षले चुनदेवीमा सम्पर्क कार्यालय खोलेर समानान्तर गतिविधि गरिहेको हो । 

काठमाडौं । नेपालीको क्रिकेट मोहलाई नजिकबाट नियालेका क्रिकेट स्टार शोएब अख्तरले जारी नेपाल प्रिमियर लिग(एनपीएल)को तेस्रो संस्करणमा पाकिस्तानी खेलाडीले सहभागी हुन नपाएको विषयलाई पाकिस्तानी क्रिकेट बोर्ड (पीबीसी) समक्ष कुरा राख्ने बताएका छन् । 

पाकिस्तान क्रिकेट बोर्डले विदेशी क्रिकेट लिग खेल्न अनुमति माग्ने आफ्ना खेलाडीले २५ हजार अमेरिकी डलर बुझाउनुपर्ने सर्त अगाडि सारेपछि एनपीएलमा पाकिस्तानी खेलाडीको सहभागिता अन्योलमा परेको थियो ।

जसका कारण कर्णाली याक्सका तर्फबाट एनपीएल खेल्न नेपाल आएका पाकिस्तानी टी–२० कप्तान शाहिबजादा फरान फर्कन बाध्य भएका थिए । यसैगरि अन्य टिमले भित्र्याउने तयारी गरेका खेलाडी समेत आउन पाएनन् । 

 पहिलो पटक नेपाल आएका राहुलपिण्डी एक्सप्रेस नामले चर्चित अख्तरले मंगलबार कीर्तिपुरस्थित त्रिभुवन विश्वविद्यालय क्रिकेट रंगशाला अवलोकनपछि नेपाल क्रिकेट संघका पदाधिकारीसँग कुराकानीका क्रममा यस्तो बताएका हुन् । 

‘यस्तो कुराले मलाई दुःखी बनाएको छ । मैले यसबारे विस्तृत थाहा पाएको छैन तर यहाँबाट फर्केपछि पीसीबीसँग अवश्य कुरा राख्नेछु,’ अख्तरलाई उधृत गर्दै क्यानका उपाध्यक्ष रोशन सिंहले भने ।

साथमा आफूले नेपाल भ्रमणमा देखेको क्रिकेट मोह, बढ्दो पूर्वाधार क्षमताबारे पनि पीबीसीलाई जानकारी गराउने अख्तरले बताए ।

यसअघि टेलिभिजन पर्दामा असाधारण बलिङ गर्दै गरेको देखेका नेपाली क्रिकेट समर्थकहरू अख्तरलाई प्रत्यक्ष देखेपछि उत्साहित भएका थिए ।

जनकपुर बोल्ट्स र कर्णाली याक्स बिच खेल भइरहेका बेला कीर्तिपुर पुगेका अख्तरले रंगशाला परिसर घुम्दै समर्थकलाई अभिवादन गरेका थिए । 

फ्डलाइटको उज्यालोमा दर्शकको क्रेज हेरेपछि उनले ‘नेपालले सानो ठाउँमा उत्कृष्ट क्रिकेट पस्किरहेको छ’ भन्ने प्रतिक्रिया दिएका थिए । त्यसक्रममा नेपाली क्रिकेटको भविष्य राम्रो रहेको निष्कर्ष सहजै निकाल्न सकिने समेत अख्तरले प्रतिक्रिया दिएका थिए । 

टेलिभिजनमा खेलका दौरानमा आक्रामक देखिने अख्तर कीर्तिपुरमा भने सहज देखिनुभएको उपाध्यक्ष सिंहले बताए । 

क्यानका अध्यक्ष लगायतका पदाधिकारीसँगको कुराकानीमा अख्तरले नेपाली क्रिकेटलाई सहयोग गर्न आफू तयार रहेको समेत प्रतिवद्धता जनाएका थिए । 

काठमाडौँ । निर्माता तथा अभिनेता दीपकराज गिरीले निर्माताको लगानी सुरक्षित गर्ने र दर्शकलाई सन्तुष्ट पार्ने उदेश्यले फिल्ममा काम गर्ने गरेको बताएका छन् ।

दशैंलाई लक्षित गर्दै गत असोज ३१ गतेदेखि प्रदर्शनरत फिल्म ‘छ माया छपक्कै २’ ले घरेलुबजारमा अपेक्षित व्यापार नगरेपछि अभिनेता गिरीले सञ्चारकर्मीसँग कुराकानी गर्दै आफ्ना राम्रा फिल्मको कमाइ कम नै रहेको बताए ।

‘हाम्रो समूहले निर्माण गरेको फिल्म ‘वडा नम्बर ६’ लाई धेरैले राम्रो भन्नुहुन्छ, तर त्यसको कमाइ अन्य भन्दा कम छ । यसपटक पनि हामीले सकारात्मक प्रतिक्रिया पाएका छौँ, तर कमाइ भने राम्रो हुनसकेको छैन’, उनले भने ।

उनले आफ्नो समूह जोडिने फिल्ममा लगानी गरिदिने निर्माताको लगानी सुरक्षित गर्ने उदेश्यले आफूले काम गर्ने गरेको बताए । ‘हाम्रो मेकिङ र कथ्य शैलीले अलि बजेट बढाउने गरेको छ, त्यसैले हामी लगानी सुरक्षित हुने सङघारमा छौँ’, अभिनेता गिरीले भने ।

फिल्म ‘छ माया छपक्कै’ मा निर्माताको रुपमा रोहित अधिकारी जोडिएका छन् भने क्रिएटिभसहित आफ्नो अभिनय, लेखनलाई अभिनेता गिरीसहित अभिनेत्री दीपाश्री निरौलाले लगानी गरेका छन् । टेलीफिल्म हुँदै ठूलो पर्दामा उदाएका अभिनेता गिरीसहितको समूह जोडिएर बनेको फिल्म मध्ये सबैभन्दा कम कमाइ ‘छ माया छपक्कै २’ ले गरेको छ ।

बक्सअफिस स्रोतका अनुसार फिल्मले हालसम्म घरेलुबजारमा तीन करोड रुपैयाँ ग्रस कलेक्सन गरेको छ । दीपेन्द्र लामाको निर्देशनमा बनेको फिल्ममा दीपकराज गिरी, केकी अधिकारी, सनिशा भट्टराई, दीपाश्री निरौला, कर्मा शाक्य र रिहान गिरीलगायत कलाकारको अभिनय छ ।

यसको अघिल्लो भाग ‘छ माया छपक्कै’ले नौ करोड ९२ लाख रुपैयाँ ग्रस कलेक्सन गरेको थियो । पहिलो भागको व्यावसायिक सफलताका कारण सिक्वेलप्रति पनि दर्शकको चासो थियो । तर, सार्वजनिक रिपोर्टअनुसार फिल्मको अहिलेसम्मको कमाइ अघिल्लो भागको तुलनामा कम छ ।

भोजपुर । सरकारको एक सय पर्यटन गन्तव्यमा सुचीकृत मुन्दुम पदमार्ग । यो पदमार्गलाई पूर्वी पहाडको भर्जिन गन्तव्यकारुपमा पनि लिने गरिन्छ । आन्तरिक र बाह्रय पर्यटन प्रवर्धनमा पनि यस पदमार्गले चर्चा पाएको छ ।

यो पदमार्गलाई अन्तर्राष्ट्रिय क्षेत्रमा समेत थप चिनाउन बाहिरी ११ वटा मुलुकका श्रष्ठाहरुको सहभागितामा बृहत् अन्तर्राष्ट्रिय सम्मेलन समेत गरिएको थियो । मुन्दुम पदमार्गलाई विश्वभर चिनाउँदै पर्यटन, स्वरोजगार र आयआर्जन मार्फत पूर्वी नेपालको मात्र होइन समग्र राष्ट्रकै चर्चित पदमार्गमा विकास गर्ने उद्देश्यसहित आफूहरू लागि परेको टेम्केमैयुङ गाउँपालिका अध्यक्ष सरोज बस्नेतले बताए । 

अध्यक्ष बस्नेतले भने, ‘प्राकृतिक सुन्दरता, जैविक विविधता र किराँत समुदायको मौलिक परम्परालाई एकैसाथ प्रवद्र्धन गर्दै पदमार्गलाई विशिष्ट पर्यटकीय गन्तव्यका रूपमा अघि बढाइएको हो ।’ विभिन्न महोत्सवहरू सहित पालिकाले मुन्दुम पदमार्गको बारेमा विश्वव्यापी प्रचारप्रसार गर्दै आई रहेको छ । 

भोजपुर र खोटाङ जोडने मुन्दुम ट्रेलको सुरुवातसँगै आन्तरिक र बाह्रय पर्यटकहरूको आवागमन समेत बढ्दै गएको छ । फुर्सदलाई सदुपयोग गर्दै आफ्नो परिवार, साथीभाइसँग टेम्केडाँडा सहित मुन्दुम पदमार्ग घुम्न आउने पर्यटकका लागि यो क्षेत्र अहिले रोजाइको बनेको छ । घुम्दै जाँदा यस क्षेत्रमा होमस्टे, गोठस्टेहरु पनि सञ्चालन भएको र थपिने क्रम समेत बढेकोले यो क्षेत्र प्रमुख गन्तव्य बनेको टेम्केमैयुङ गाउँपालिका वडा नम्बर २, छिनामुखुमा सञ्चालनमा रहेको गोठेसिं होमस्टेका सञ्चालक प्रकाश राईले बताए । यो होमस्टे सदरमुकामबाट करिब ४० किलोमिटर पश्चिममा पर्छ ।  

भोजपुर र खोटाङको सिमानामा रहेको मुन्दुम पदमार्गको चखेवाडाँडा यहाँबाट नजिकै रहेको तीन हजार एक सय ३१ मिटरको उचाइमा रहेको टेम्केडाँडाबाट पर्यटन क्षेत्रको गन्तव्य मानिन्छ । सुन्दर टेम्केडाँडा चुचुरोबाट तराईका सुन्दर हरिया फाँटहरू, कञ्चनजंगा, मकालु लगायत उत्तरतर्फ सेताम्मे मनोरम हिमशृङ्खला, सुन्दर हरिया डाँडाखर्क, खोटाङको दिक्तेल र भोजपुर सदरमुकाम र अनगिन्ती प्राकृतिक सुन्दरताको भरपुर मनोरञ्जन लिन सकिने भएकाले यो डाँडामा पुग्ने सङ्ख्यामा पनि बढ्दै गएको छ । 

मुन्दुम पदमार्गमा क्षेत्रमा गोठ राखेर बसेका कृषकहरूको बसोबास हुने गरेको छ । यहाँ खुलेका गोठस्टेहरुमा स्थानीय परिकारहरू चौँरीको दूध, फापर, कोदो, गहुँको ढिँडो, लोकल कुखुरा, रायो, आलु, सिमीलगायत स्थानीय उत्पादनलाई प्राथमिकतामा राखिएको छ । यस क्षेत्रको पदयात्रामा आन्तरिक तथा बाह्य देश अमेरिका, कोरिया, जर्मनी, स्पेन, क्यानडा लगायत क्षेत्रका पर्यटकहरू आउने गरेको र उनीहरूले स्थानीय उत्पादनलाई मन पराएको गोठस्टे सञ्चालकहरूको भनाई छ । 

प्राकृतिक सुन्दरता र पारिवारिक वातावरणमा रम्न चाहनेहरूका लागि विभिन्न स्थानहरूमा सञ्चालित होमस्टेहरू प्रभावकारी बन्दै गएको विराटनगरबाट यो क्षेत्र घुम्न आएका सुनिल निरौलाले बताए । उनले भने, ‘वास्तवमा प्रचारमा रहेजस्तै मुन्दुम पदमार्ग आकर्षण छ, यो क्षेत्रमा पुग्ने जोसुकैलाई पनि त्यहाँको वातावरणले आनिन्दत बनाउछ ।’

खोटाङको साकेला गाउँपालिकाको तावाभन्ज्याङबाट सुरु हुने पदमार्ग भोजपुरको टेम्केडाँडा, चखेवाभञ्ज्याङ, धोदे्र, हाँसपोखरी, जुके, याकुले हुँदै लैरे, रावाधाप, साल्पापोखरीबाट पुनः मैयुङ भएर एकरोत, बाघखोर हुँदै भोजपुर फर्कन सकिन्छ । उक्त पदमार्ग यात्रा पूरा गर्न नेपालीलाई पाँचदेखि नौ दिन लाग्ने र विदेशीका लागि १० देखि २० दिनसम्म लाग्ने स्थानीयको धारणा छ । 

छोटो दुरीको यात्रा भने तीनदेखि पाँच दिनमै पूरा गर्ने सकिन्छ । आन्तरिक तथा बाह्य पर्यटनसँग जोडिएको मुन्धुम पदमार्गको विकास र प्रवर्धनका लागि स्थानीय, प्रदेश र संघीय सरकारले विशेष कार्यक्रम सञ्चालन गर्न सकेमा प्रमुख गन्तव्य नै यो मार्ग हुने छ । 

सम्बन्धित पालिकाहरूको समन्वय र सहकार्यमा स्विस सरकारले पदमार्गमा क्षेत्रमा भौतिक संरचना निर्माण लागि सहयोग गर्दे आई रहेको छ । 

विराटनगर । कोशी प्रदेश सरकारले सप्तकोशी नदीमा भएको पानीबोट दुर्घटनाको सत्यतथ्य अध्ययन तथा छानबिन गर्न प्रदेश सचिव आसमान तामाङको संयोजकत्वमा समिति गठन गरेको छ । मंगलबार बसेको मन्त्रिपरिषद् बैठकले सात दिनभित्र प्रतिवेदन पेस गर्ने गरी समिति गठन गर्ने निर्णय गरेको हो ।

आइतबार दिउँसो भोजपुरबाट सुनसरीको वराहक्षेत्रस्थित चतरातर्फ आउँदै गर्दा अरुण र दूधकोशी दोभानमा दुर्घटनामा पर्दा तीन जनाको ज्यान गएको थियो भने तिन वेपत्ता भएका छन् । 

ज्यान गुमाउनेमा सुनसरीकी लिला राई र आर्या राई र भोजपुरका रत्नबहादुर नेपाली रहेका छन् ।  

घटनाप्रति मन्त्रिपरिषद्ले दुःख व्यक्त गर्दै दुर्घटनामा ज्यान गुमाएका नागरिकप्रति श्रद्धाञ्जली अर्पणका साथ शोकसन्तप्त परिवारजनमा समवेदना व्यक्त गरिएको छ । साथै घाइतेहरूको शीघ्र स्वास्थ्यलाभको कामना गर्दै हराइरहेका व्यक्तिको उद्धारका लागि सम्बन्धित निकायलाई अनुरोध गर्ने निर्णय गरिएको सरकारका प्रवक्ता तथा आन्तरिक मामिला एवं कानुनमन्त्री गोम्बु शेर्पाले जानकारी दिए । 

मन्त्री शेर्पाका अनुसार मन्त्रिपरिषद् बैठकले मुख्य न्यायाधिवक्ताको कार्यालयको आर्थिक वर्ष २०८२र८३ को वार्षिक प्रतिवेदन कोशी प्रदेशसभामा पेस गर्ने निर्णयसमेत गरेको छ ।

मन्त्रिपरिषद् बैठकले कोशी प्रदेश समन्वयात्मक पर्यटकीय सेवा कक्ष तथा हटलाइन सञ्चालन निर्देशिका, २०८३ स्वीकृत गर्ने निर्णय पनि गरेको छ ।

काठमाडौं । वरिष्ठ मौसमविद् विभूति पोखरेलले आज र भोलि नेपालको मौसम सामान्यतया सफा रहने बताएकी छन् । उनले बंगालको खाडीमा विकसित ‘अर्णब’ चक्रवातका कारण बिहीबारदेखि शनिबारसम्म मौसममा प्रभाव पर्न सक्ने देखिएको बताइन् । 

पोखरेलका अनुसार अर्णब चक्रवात हाल बंगालको खाडीमा अति शक्तिशाली चक्रवाती आँधीका रूपमा रहेको छ । उक्त चक्रवात भोलिसम्म भारतको विशाखापट्टनम आसपास जमिनमा प्रवेश गर्ने सम्भावना रहेको छ । जमिनमा प्रवेश गरेपछि भने यो पश्चिम–उत्तरपश्चिमतर्फ अघि बढ्दै क्रमशः कमजोर हुने पूर्वानुमान गरिएको छ ।

उनले भनिन्, ‘आज र भोलिलाई मौसम सामान्यतया सफा नै छ । अर्णब चक्रवात बङ्गालको खाडीमा रहेको छ । भेरी सिभियर साइक्लोनिक स्ट्रोम धेरै शक्तिशाली चक्रवातको रुपमा बङ्गालको खाडीमा छ, यो जमिनमा विशाखापट्टनममा ल्यान्डफल जमिनमा आउन सक्ने देखिएको छ । जमिनमा आइसकेपछि विस्तारै पश्चिम उत्तर पश्चिमतिर लाग्ने देखिएको छ ।’

क्षेत्रीय विशेष मौसम केन्द्रबाट जारी चक्रवातको मार्गअनुसार नेपाल नजिक आइपुग्दा यसको शक्ति निकै कमजोर हुने र न्यून चापीय क्षेत्र वा चक्रवातीका रूपमा प्रभाव पार्न सक्ने मौसमविद् पोखरेलले बताइन् ।

चक्रवातको सम्भावित मार्ग नेपाल आसपास देखिएकाले सतर्कता अपनाउनु पर्ने उनले बताइन् । 

यसैलाई ध्यानमा राखेर मौसम पूर्वानुमान महाशाखाले बिहीबार, शुक्रबार र शनिबारका लागि चेतावनी जारी गरेको छ । महाशाखाले यसअघि नै विशेष मौसम बुलेटिनसमेत जारी गरिसकेको छ ।

पछिल्लो मौसम विवरणअनुसार चक्रवातको तीव्रतामा केही कमी आएको भए पनि उच्च हिमाली क्षेत्रमा सतर्कता अझै आवश्यक रहेको पोखरेलले बताइन् । 

चक्रवातको प्रभावका कारण देशका धेरै स्थानमा हल्कादेखि मध्यम वर्षा हुने सम्भावना रहेको छ भने केही स्थानमा भारी वर्षा हुन सक्ने अनुमान गरिएको छ । विशेषगरी उच्च हिमाली क्षेत्रमा भारी हिमपात, हिमपहिरो र हिमआँधीको जोखिम रहेको उनले बताइन् । 

यतिबेला धान काट्ने मौसमसमेत भएकाले मध्यम वर्षाले समेत कृषि क्षेत्रमा असर पार्न सक्ने भन्दै मौसमविद्ले किसानलाई समयमै धान भित्र्याउन आग्रह गरिन् । विशेषगरी बिहीबारअघि नै धान काट्ने तथा सुरक्षित स्थानमा राख्ने व्यवस्था गर्न सुझाव दिइएको छ ।

त्यस्तै, उच्च हिमाली क्षेत्रमा हिमपातको सम्भावना रहेकाले पदयात्रामा रहेका पर्यटक तथा अन्य व्यक्तिलाई विशेष सावधानी अपनाउन आग्रह गरिएको छ । उच्च क्षेत्रमा रहेका व्यक्तिलाई सुरक्षित स्थानमा बस्न वा सम्भव भएसम्म तल्लो क्षेत्रमा झर्नसमेत अनुरोध गरिएको छ ।

विराटनगर । नेपाली राजनीतिमा युवा तथा बौद्धिक वर्गको सहभागिता र नेतृत्वबारे बहस भइरहेका बेला नेपाली कांग्रेसको १५औँ महाधिवेशनबाट कोशी प्रदेशतर्फ युवा महिला केन्द्रीय सदस्यमा निर्वाचित डा. योसिका भट्टराईको राजनीतिक यात्रा चासोको विषय बनेको छ ।

पेशाले चिकित्सक रहेकी भट्टराई राजनीतिमा प्रवेश गर्नुअघि स्वास्थ्य क्षेत्रका समस्यासँग प्रत्यक्ष जोडिएकी थिइन् । उपचारमा सर्वसाधारणको पहुँच, आर्थिक अभावका कारण बिरामीले भोग्नुपर्ने कठिनाइ र स्वास्थ्य सेवाको सीमितताले उनलाई राजनीतिमा सक्रिय हुन प्रेरित गरेको छ । उनी राजनीतिमार्फत स्वास्थ्यसहित शिक्षा, रोजगारी र विकासका आधारभूत क्षेत्रमा सुधार गर्नुपर्ने बताउँछिन् ।

राजनीतिमा प्रवेश गर्दाको अनुभव, पार्टीभित्र समावेशी प्रतिनिधित्वको महत्त्व, युवाका समस्या र जनताको विश्वास जित्न निर्वाह गर्नुपर्ने भूमिकाबारे कोशी प्रदेशका प्रतिनिधि खेमराज सापकोटाले डा. भट्टराईसँग गरेको कुराकानीको सम्पादित अंश:

तपाईंको चुनावी अनुभव कस्तो रह्यो ?

सुरुमा मैले आफ्नो क्षेत्र नम्बर २ बाट उम्मेदवारी दिएको थिएँ । त्यहाँ पुगेदेखि नै राम्रो समर्थन पाएँ । मैले आफ्नो राजनीतिक पृष्ठभूमि नभएको र राजनीतिबारे धेरै जानकारी पनि नभएको कुरा स्पष्ट रूपमा राखेकी थिएँ । तर समाजका लागि केही गर्नुपर्छ र आफूले सक्ने सेवा प्रदान गर्नुपर्छ भन्ने मेरो भावना थियो । मतदाताले त्यसलाई बुझिदिनुभयो र साथ दिनुभयो ।

म आफैँ पनि आश्चर्यचकित हुन्थेँ । एक जनासँग भोट माग्न जाँदा उहाँले अरू चार–पाँच जनालाई समेत भेटाइदिनुहुन्थ्यो । ‘तपाईंजस्तो मान्छेलाई अगाडि बढाउनुपर्छ, रोक्नु हुँदैन’ भन्ने भावना मतदातामा पाएँ । उहाँहरूले मप्रति देखाउनुभएको विश्वास र समर्थनकै कारण आज यो स्थानमा आइपुगेकी हुँ ।

कांग्रेसले विभिन्न समुदाय र समूहको प्रतिनिधित्व सुनिश्चित गर्न अपनाएको क्लस्टर प्रणालीलाई कसरी लिनुभएको छ ?

नेपाली कांग्रेसले विभिन्न जातजाति, समुदाय, पुस्ता र समूहको प्रतिनिधित्व सुनिश्चित गर्न क्लस्टरको व्यवस्था गरेको छ । यसले सम्बन्धित समुदायका समस्या पार्टीभित्र उठाउन सहज बनाउँछ ।

युवा, महिला वा कुनै समुदायका मानिसले समस्या भोगिरहेका छन् भने त्यसलाई पार्टीभित्र उठाउन र समाधानका लागि पहल गर्न सम्बन्धित समूहको प्रतिनिधित्व आवश्यक हुन्छ । त्यसैले सबैको आवाज समेट्ने वातावरण सिर्जना गर्न कांग्रेसले गरेको यो अभ्यास राम्रो लागेको छ ।

चिकित्सक भएर पनि राजनीतिमा लाग्नुपर्ने आवश्यकता किन महसुस गर्नुभयो ?

यसका दुई–तीनवटा कारण छन् । पहिलो कुरा, समाजमा परिवर्तन ल्याउन राजनीतिमा पनि सक्रिय हुनुपर्छ भन्ने मलाई लाग्छ । चिकित्सकको काम दैनिक बिरामीको उपचार गर्नु हो । म विराट टिचिङ हस्पिटलमा काम गर्छु । हाम्रो क्षेत्रमा आर्थिक अवस्था कमजोर भएका धेरै बिरामी हुनुहुन्छ । उहाँहरूका लागि उपचारको खर्च जुटाउनै कठिन हुन्छ । कतिपय अवस्थामा आवश्यक परीक्षण र अनुसन्धानसम्म पहुँच पु¥याउन समस्या हुन्छ ।

यस्तो अवस्था देख्दा दुःख लाग्छ । हामीले अध्ययन गरेर हासिल गरेको ज्ञान र सीपबाट बिरामीलाई सेवा दिन चाहन्छौँ, तर सबै अवस्थामा चाहेजस्तो सेवा दिन सकिँदैन । यसबाट स्वास्थ्य सेवामा सुधार गर्न चिकित्सकको व्यक्तिगत प्रयास मात्र पर्याप्त नहुने रहेछ भन्ने महसुस भयो । त्यसैले समस्याको नीतिगत समाधान खोज्न राजनीतिमा आउनुपर्छ भन्ने लाग्यो ।

नेपाली कांग्रेस रोज्नुको कारण पनि छ । यो लोकतान्त्रिक सिद्धान्तमा विश्वास गर्ने र व्यक्तिले आफ्नो विचार तथा आवाज राख्न पाउने पार्टी हो भन्ने मेरो बुझाइ छ । पार्टीको सिद्धान्त र लोकतान्त्रिक मूल्यप्रति मेरो विश्वास छ । देशका लागि केही गर्नुपर्छ र लोकतन्त्र आवश्यक छ भन्ने भावना बोकेर म कांग्रेसमा आबद्ध भएकी हुँ ।

राजनीतिमा प्रवेश गरेपछि कस्ता चुनौती देख्नुभएको छ ? तिनको समाधान कसरी गर्न सकिन्छ ?

हरेक व्यक्तिको सोच, विचार र प्राथमिकता फरक हुन्छ । त्यसैले सबैको विचार मिल्छ भन्ने हुँदैन । तर व्यक्तिगत प्राथमिकता र स्वार्थभन्दा माथि उठेर देश र जनताको हितलाई केन्द्रमा राख्न सक्नुपर्छ ।

कुनै विषयमा फरक मत भए पनि संवाद र सहमतिका आधारमा अघि बढ्नुपर्छ । व्यक्तिगत सोचमा आवश्यकताअनुसार सम्झौता गरेर साझा उद्देश्यका लागि मिलेर काम गर्न सक्नुपर्छ । देश र जनताको हित नै हाम्रो मुख्य उद्देश्य हुनुपर्छ ।

स्वास्थ्य, शिक्षा र यातायात कुनै पनि देशको विकासका आधार हुन् । यी क्षेत्रमा नागरिकको पहुँच सहज बनाउन आवश्यक छ । त्यसका लागि सबै पक्षबीच छलफल गरेर स्पष्ट योजना बनाउनुपर्छ । जनताले आधारभूत सेवा सहज रूपमा पाउने अवस्था सिर्जना गर्नेतर्फ राजनीति केन्द्रित हुनुपर्छ ।

जनताको विश्वास जित्न र आफूले पाएको जिम्मेवारीलाई न्याय गर्न के गर्नुपर्छ ?

जनताको विश्वास जित्न सबैभन्दा पहिले उहाँहरूको मन जित्नुपर्छ । त्यसका लागि मेहनत गर्नुपर्छ । जनताले विश्वास गरेनन् भनेर हार मानेर बस्नु हुँदैन । आफ्नो क्षमता प्रमाणित गर्नुपर्छ र जिम्मेवारीअनुसार काम गरेर देखाउनुपर्छ ।

मलाई अहिले आफ्नो पद र जिम्मेवारीप्रति निकै गम्भीर महसुस हुन्छ । यो पदमा पुगेपछि म त्यसका लागि योग्य हुनुपर्छ र आफूलाई दिइएको जिम्मेवारी पूरा गर्नुपर्छ । आफ्नो भूमिकालाई न्याय गर्न सक्नुपर्छ भन्ने लाग्छ ।

आज विश्वास गरेर भोलि नै जनताले सबै कुरा स्वीकार गरिहाल्छन् भन्ने हुँदैन । त्यसका लागि समय लाग्छ । मैले यसका लागि काम गरेर विश्वास जित्नुपर्छ । जनताको विश्वास व्यवहार र कामबाट हासिल गर्ने हो ।

युवाका मुख्य समस्या के हुन् ? रोजगारी र आर्थिक अवसर बढाउन के गर्नुपर्छ ?

मुख्य समस्या रोजगारीकै हो । एउटा उमेरमा पुगेपछि मानिसले आफ्नो परिवारलाई आर्थिक रूपमा सहयोग गर्न सक्नुपर्छ । तर आफैँ आत्मनिर्भर हुन नसक्दा र परिवारलाई सहयोग गर्न नसक्दा निराशा बढ्छ ।

त्यसैले नेपालमै व्यापार, व्यवसाय र रोजगारीका अवसर कसरी सिर्जना गर्न सकिन्छ भन्ने विषयमा ध्यान दिनुपर्छ । लगानी गर्न चाहने व्यक्तिलाई प्रोत्साहन गर्नुपर्छ । सरकारले लगानीमैत्री वातावरण बनाउनुपर्छ, ताकि लगानीकर्ताले सहज रूपमा व्यवसाय गर्न सकून् ।

लगानी बढेपछि नयाँ व्यवसाय खुल्छन् र रोजगारीका अवसर सिर्जना हुन्छन् । त्यसैले युवालाई रोजगारी दिने मात्र नभई उनीहरू आफैँले व्यवसाय सुरु गर्न सक्ने वातावरण बनाउनु पनि आवश्यक छ । यसका लागि सरकारले स्पष्ट नीति, सहज प्रक्रिया र लगानीका लागि अनुकूल वातावरण तयार गर्नुपर्छ ।

पार्टीभित्र हुने आलोचना र अब कांग्रेसले लिनुपर्ने कार्यदिशालाई कसरी हेर्नुभएको छ ?

हामीले पार्टीगत आग्रहका आधारमा एकअर्काको आलोचना गर्नु हुँदैन। आलोचना गर्दा रचनात्मक हुनुपर्छ । अरूले राम्रो काम गरेको छ भने त्यसको प्रशंसा पनि गर्न सक्नुपर्छ ।

अरूको राम्रो पक्षलाई स्वीकार गर्न सकियो भने आफूले त्यसबाट सिकेर अझ राम्रो काम गर्न सक्छौँ । अरूले गरेको राम्रो कामको प्रशंसा गर्दै आफूले त्यसलाई कसरी अझ प्रभावकारी बनाउन सकिन्छ भन्ने सोच राख्नुपर्छ ।

एकअर्काको खुट्टा तान्नेभन्दा मिलेर अघि बढ्नु आवश्यक छ । अरूले राम्रो काम गर्दा त्यसको प्रशंसा गर्ने र आफूले त्यसको भन्दा अझ राम्रो काम कसरी गर्न सकिन्छ भन्ने भावनाका साथ अघि बढ्नुपर्छ । राजनीति प्रतिस्पर्धा मात्र होइन, देश र जनताको हितका लागि सहकार्य गर्ने माध्यम पनि हो ।

भोजपुर । भोजपुर नगरपालिका वडा नम्बर ३, गुप्तेश्वरका प्राथमिक शिक्षक ज्ञानबहादुर खडका पेन्सन पट्टा बनाउन काठमाडौं जानु पर्ने अवस्थामा थिए । तर शिक्षा विकास तथा समन्वय इकाईबाट नै ई-पेन्सन पट्टाको व्यवस्था सुरु भएपछि उनी सहितका शिक्षकलाई राहत मिलेको छ ।       

जनज्योति आधारभूत विद्यालयबाट अवकाश शिक्षक खडकालाई इकाईले पहिलो ई-पेन्सन पट्टा उपलब्ध गराएको थियो । सामुदायिक विद्यालयका शिक्षकहरूका लागि भोजपुरमा ई–पेन्सन पट्टा दिन सुरु गरिएको हो । 

राष्ट्रिय किताब खाना (शिक्षक) शाखाले शिक्षकका लागि कोशी प्रदेश र पहाडी जिल्लाहरूमा पहिलो पटक भोजपुरबाट ई–पेन्सन सेवा सुरु गरेको राष्ट्रिय किताब खाना (शिक्षक) शाखाका कर्मचारी गणेश श्रेष्ठले बताए । उनले भने प्रदेश र पहाडी जिल्लामा पहिलो जिल्लाका रूपमा भोजपुरबाट सेवा सुरु भएको छ । 

ई–पेन्सनको परीक्षण सफल भएकाले यसलाई विस्तार गरिँदै लगिएको छ । अहिलेसम्म अवकाशपछि पेन्सनपट्टा प्राप्त गर्न शिक्षकले विद्यालय, स्थानीय तह र इकाई हुँदै किताब खानाको कार्यालयसम्म आउनुपर्ने अवस्था थियो । अब शिक्षकले आफ्ना कागजात इकाईमा बुझाएपछि त्यहीँबाट पेन्सनपट्टा प्राप्त गर्न सक्ने शिक्षा विकास तथा समन्वय इकाई प्रमुख निवास न्यौपानेले जानकारी दिए ।  

निजामती कर्मचारीका लागि गत चैतदेखि ई–पेन्सन सुविधा लागू गरिएको छ । अवकाशपछि कागजात बोकेर शिक्षक तथा कर्मचारी काठमाडौं आउँदा खर्चिलो र झन्झटिलो हुने गरेको गुनासो बढेपछि शिक्षकहरूमा समेत यो सेवा सुरु गरिएको छ । 

‘अहिलेसम्म अवकाश भएपछि विद्यालय, पालिका, इकाई हुँदै किताब खानामा आएर पेन्सनपट्टा बन्थ्यो,’ यशोधरा माविका प्रअ विष्णु कुमार राईले भने, ‘जिल्लाबाट नै सेवा लिने अवसर शिक्षकलाई मिल्यो, यसले अवकाशप्राप्त शिक्षकहरूलाई राहत मिलेको छ ।’

एजेन्सी । उत्तर कोरियाली नेता किम जोङ उन चीन र उत्तर कोरियालाई जोड्ने नवनिर्मित यालु नदी पुल हुँदै चीनको सीमावर्ती सहर डानडोङ पुगेका छन्। 

सरकारी स्रोतलाई उद्धृत गर्दै योनहाप समाचार संस्थाले शनिबार यसबारे जानकारी दिएको हो।

योनहापका अनुसार, सरकारी स्रोतले किम उक्त दिनको सुरुमै नयाँ पुल हुँदै डानडोङ पुगेको पुष्टि गरेको छ।

चीनले चीन र उत्तर कोरियाबीचको सीमा निर्धारण गर्ने यालु नदीमाथि निर्माण गरिएको नयाँ पुल सञ्चालनमा आएको घोषणा गरेपछि यो घटनाक्रम सार्वजनिक भएको हो। 

चीनको सरकारी समाचार संस्था सिन्ह्वाका अनुसार, चिनियाँ विदेश मन्त्रालयकी प्रवक्ता माओ निङले अक्टोबर १४ मा उक्त पुलले दुई देशबीचको व्यापार तथा जनस्तरको आदानप्रदानलाई सहज बनाउने बताएकी थिइन्।

‘चीन र डीपीआरकेबीच भएको सहमतिअनुसार उक्त पुल बिहीबारदेखि औपचारिक रूपमा सञ्चालनमा आउनेछ। सोही दिन दुवै पक्षले संयुक्त रूपमा उद्घाटन समारोह आयोजना गर्नेछन्,’ माओले नियमित पत्रकार सम्मेलनमा भनेकी थिइन्।

चीन र उत्तर कोरियालाई ‘पहाड र नदीले जोडिएका मित्रवत् छिमेकी’ को संज्ञा दिँदै माओले नयाँ पुल दुई देशबीचको सम्पर्क सञ्जालका लागि महत्त्वपूर्ण पूर्वाधार भएको बताएकी थिइन्।

उनले उक्त पुलले द्विपक्षीय व्यापार र जनस्तरको आदानप्रदान बढाउनुका साथै दुवै देशका जनताको जीवनस्तर सुधार गर्न सहयोग पुग्ने अपेक्षा गरिएको पनि बताएकी थिइन्।

यसैबीच, उत्तर कोरियाली नेता किम जोङ उनकी बहिनी किम यो जोङले बिहीबार दक्षिणी सीमामा ‘नयाँ प्रतिकारात्मक साधन’ तैनाथ गर्ने र दक्षिण कोरियालाई लक्षित प्रचारप्रसारका लागि प्रयोग गरिने लाउडस्पिकर केही दिनभित्रै तयारी अवस्थामा राख्ने चेतावनी दिएकी छन्।

योनहाप समाचार संस्थाका अनुसार, उत्तर कोरियाली केन्द्रीय समाचार संस्था (केसीएनए) ले प्रकाशित गरेको वक्तव्यमा किम यो जोङले भनेकी छन्, ‘हाम्रा नयाँ प्रतिकारात्मक साधनहरू दक्षिणी सीमाको सम्पूर्ण क्षेत्रमा परिचालनका लागि सतर्क अवस्थामा राखिनेछन् र दक्षिण कोरिया गणतन्त्र (आरओके) विरुद्ध प्रयोग गरिने लाउडस्पिकर केही दिनभित्रै तयारी अवस्थामा रहनेछन्।’

योनहापका अनुसार, उनको यो भनाइ सार्वजनिक हुनुभन्दा एक दिनअघि उनले उत्तर कोरियाले यसै महिनाको अन्त्यतिर दक्षिण कोरियातर्फ प्रचारात्मक लाउडस्पिकर प्रसारण पुनः सुरु गर्ने चेतावनी दिएकी थिइन्। यसले दुई छिमेकी देशबीचको तनाव थप बढ्ने संकेत गरेको छ।

किम यो जोङले दक्षिणी सीमालाई थप मजबुत बनाउने प्योङयाङको प्रयासको पनि बचाउ गरेकी छन्। उनले उक्त निर्माण कार्य उत्तर कोरियाको आफ्नै भूभागभित्र निरन्तर जारी रहने बताएकी छन्।

यी घटनाक्रमबीच सामाजिक सञ्जालमा किम जोङ उनको गम्भीर मस्तिष्क रक्तस्रावका कारण मृत्यु भएको दाबीसमेत फैलिएको छ । यद्यपि, ती दाबी स्वतन्त्र रूपमा पुष्टि गर्न सकिने आधारहरु फेला परेका छैनन् । 

यसैबीच, उत्तर कोरियाको सरकारी सञ्चारमाध्यमले किम जोङ उनले एक प्रदर्शनीमा जुत्ता तथा महिलाका लुगाहरूको निरीक्षण गरिरहेको तस्बिर सार्वजनिक गरेको छ।

न्युयोर्क पोस्टका अनुसार, कोरियाली केन्द्रीय समाचार संस्थाले किमले सोमबार उक्त प्रदर्शनीको भ्रमण गरेको जनाएको छ। यद्यपि, ती तस्बिरको स्वतन्त्र रूपमा प्रमाणीकरण हुन सकेको छैन।

अमेरिकामा रहेका चिनियाँ असन्तुष्ट वानजुन सीले सामाजिक सञ्जालमा किम अस्पताल भर्ना भएको र सम्भावित उत्तराधिकारीसम्बन्धी संकटका बीच चीनले प्योङयाङमा सेना परिचालन गरेको दाबी गरेपछि यी अफवाह थप फैलिएका हुन्।

तर, उनका दाबीलाई पुष्टि गर्ने स्वतन्त्र रूपमा प्रमाणित गर्न सकिने आधार सार्वजनिक गरिएको छैन। (एएनआई, फोटो–रोयर्टस/एएनआई)