बुधबार, १० असार २०८३
पत्रकारमाथि दुर्व्यवहार गरेकोमा तत्काल क्षमा याचना गर्न माग
काठमाडौँ । वरिष्ठ अधिवक्ता शम्भु थापाले पत्रकारमाथि दुर्व्यवहार गरेको घटनाप्रति अनलाइन टिभी पत्रकार संघले आपत्ति जनाएको छ ।
बिहिवार प्रेस वक्तव्य जारी गर्दै संघले प्रेस स्वतन्त्रता र सञ्चारकर्मीहरूको सुरक्षामाथि गम्भीर प्रश्न उठाएको भन्दै तत्काल क्षमा याचना गर्न माग गरेको हो ।
‘प्रेस स्वतन्त्रता र पत्रकारको भूमिकाका बारेमा पर्याप्त जानकार व्यक्तिबाटै भएको यस प्रकारको व्यवहारले प्रेस स्वतन्त्रता र सञ्चारकर्मीहरूको सुरक्षामाथि गम्भीर प्रश्न उठाएको छ । त्यसैले सञ्चारकर्मी माथि आक्रमण गर्नु भएका वरिष्ठ अधिवक्ता थापालाई तत्काल क्षमा याचना गर्न हामी माग गर्दछौँ,’प्रेस वक्तव्यमा लेखिएको छ ।
बिहिवार नेकपा एकीकृत समाजवादी पार्टी केन्द्रीय कार्यालयमा रिपोर्टिङका लागि गएका नेपाल प्रेसका फोटो पत्रकार उमेश कार्कीको क्यामरामा अधिवक्ता थापाले हानेका थिए ।
सञ्चारकर्मीहरू नागरिकलाई सत्य सूचना प्रवाह गर्न निरन्तर खटिरहेका भन्दै सञ्चारकर्मीको काममा कुनै बाधा अवरोध नगन सरोकारवालालाई ध्यानाकर्षण समेत गराएको छ ।
आज पहाडी भेगमा चट्याङसहित वर्षाको सम्भावना
काठमाडौं । हाल देशको पश्चिम र मध्य भू—भागमा पश्चिमी तथा स्थानीय वायुको प्रभाव रहेको छ भने पूर्वको अधिकांश भू—भागमा मनसुनी वायुको प्रभाव रहेको मौसम पूर्वानुमान महाशाखाले जनाएको छ । आज देशको पहाडी भागमा आंशिकदेखि साधारणतया बदली रही बाँकी भागमा मुख्यतया सफादेखि आंशिक बदली रहनेछ ।
महाशाखाका अनुसार कोशी प्रदेशका केही स्थानहरूमा बाँकी प्रदेशका पहाडी भागका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ । देशका उच्च पहाडी तथा हिमाली भागका थोरै स्थानहरूमा हल्का वर्षा र हिमपातको सम्भावना रहेको छ ।
आज राती भने कोशी प्रदेशलगायत देशको पहाडी भू—भागमा आंशिक बदली रही बाँकी भू—भागमा मुख्यतया सफा रहनेछ । कोशी, बागमती र गण्डकी प्रदेशका उच्च पहाडी तथा हिमाली भू—भागका एक÷दुई स्थानमा हल्का वर्षा र हिमपातको सम्भावना रहेको छ ।
सुम्निमा पारुहाङ प्रतिमा निर्माणका लागि सन्तमणि राईद्वारा आर्थिक सहयोग
धरान, सुनसरी । धरान-२० स्थित चिण्डेडाँडामा निर्माणहुने सुम्निमा पारुहाङ प्रतिमाका लागि भूतपूर्व ब्रिटिस गोर्खा आर्मी सन्तमणि राईले २ लाख रुपैयाँ आर्थिक सहयोग प्रदान गर्नुभएको छ।
केपिलासगढी गाउँपालिका वडा नं. २ (साविक खार्ताम्छा – ६) स्थायी घर भई हाल इटहरी - २०, सुनसरीमा बस्नुहुने राईले आफ्ना कान्छा छोरा नविन राईमार्फत बिहीबार धरान - १८ स्थित ग्रीन टीहाउसमा सुम्निमा पारुहाङ प्रतिष्ठान नेपालका कोषाध्यक्ष दत्त लिम्बुलाई उक्त रकम हस्तान्तरण गर्नुभएको हो।
सहयोग हस्तान्तरण कार्यक्रममा बोल्दै नविन राईले, "सृष्टिकर्ता सुम्निमा र पारुहाङको प्रतिमा निर्माण हुँदा हाम्रो परिवारले सकेको आर्थिक सहयोग गरेको हो I बाबा सन्तमणि राई र आमा कुमारी राईको तर्फबाट प्राप्त यो सहयोग रकमले प्रतिमा निर्माण कार्यमा टेवा पुग्ने विश्वास व्यक्त गर्नुभयो।"
नविन राईले थप्नुभयो, "यस्तै सहयोगहरूबाट प्रतिमा निर्माण हुने र धरानको धार्मिक तथा सांस्कृतिक पहिचानलाई थप उचाइमा पुर्याउने विश्वास हामीले लिएका छौँ। धरानको धार्मिक, सांस्कृतिक विकास जस्तो पवित्र कार्यमा हाम्रो परिवारले सकेको आर्थिक योगदान गर्न पाउनु खुसीको कुरा हो ।"
यो निर्माण कार्यले आउने सबै सन्ततिहरूका लागि आफ्नो सभ्यता, भाषा र धर्मको संरक्षण गर्ने प्रेरणा मिलोस् भन्ने हाम्रो परिवारले आशा राखेको छ। उहाँहरूका अनुसार, यो स्थान भावी पुस्तालाई सही जानकारी दिन सक्ने एक धार्मिक र सांस्कृतिक स्थल बन्नुका साथै इतिहास, संस्कृति र पहिचानलाई जीवन्त राख्न महत्त्वपूर्ण भूमिका खेल्ने पनि विश्वास व्यक्त गर्नुभयो।
सन्तमणि राईको परिवार तर्फबाट सुम्निमा पारुहाङ प्रतिष्ठान नेपाललाई यस पवित्र कार्यको सफल सम्पन्नताका लागि शुभकामना समेत व्यक्त गरेका थिए।
सदन अवरोध खोल्न माओवादीले विपक्षी दलसँग छलफल गर्ने
काठमाडौँ । नेकपा माओवादी केन्द्रले संसद्को अवरोध हटाउन सत्तापक्ष र विपक्षीसँग छलफल गर्ने भएको छ । बिहीबार बसेको माओवादी केन्द्रको केन्द्रीय पदाधिकारी बैठकले संसद् अवरोध खुलाउन पहल गरी सदनमा एउटा छलफलको वातावरण बनाउनुपर्छ भन्ने आजको छलफलको निष्कर्ष निकालेको प्रवक्ता अग्नि सापकोटाले जानकारी दिए ।
उनले भने,‘जिम्मेवार प्रतिपक्षको हिसाबले निकास निकाल्न अधिकतम जोड हुनेछ। भिजिट भिसा प्रकरणमा छानबिन अपरिहार्य छ । मुख्य चाही छानबिन हो । व्यक्ति विशेषमा हाम्रो ध्यान छैन् । तर मुख्य कुरा छानबिनकै हो भन्ने छ । अब यसलाई सकारात्मक निष्कर्षमा पुर्याउनुपर्छ भन्ने हिसाबले हिजोको सदन स्थगित भएको हो । सरकारी पक्षका पार्टी र विपक्षी पार्टीसँग कुराकानी गर्नुपर्ने छ । आज कुराकानी हुन्छ । यो महत्वपूर्ण विषय भएकोले सदनमा एउटा छलफलको वातावरण हुनुपर्छ भन्ने हाम्रो आजको छलफलको निष्कर्ष निकालेको छ।’
माओवादी केन्द्रले संसदमा गृहमन्त्री रमेश लेखकलाई बोल्न दिनुपर्ने पक्षमा रहेको संकेत समेत देखाएको छ ।
आज विश्व वतावरण दिवस मनाइँदै
काठमाडौं । आज जुन ५ अर्थात् विश्व वतावरण दिवस । नेपालमा पनि विभिन्न कार्यक्रम गरि मनाइँदै छ । ‘प्लाष्टिक प्रदूषण न्यूनीकरणः हाम्रो दायित्व’ भन्ने नाराका साथ विश्वका विभिन्न मुलुकमा यो दिवस मनाइँदै आएको छ।
संयुक्त राष्ट्रसङ्घले आह्वान गरेबमोजिम सन् १९७३ देखि प्रत्येक वर्ष जुन ५ तारिखलाई विश्व वातावरण दिवसको रूपमा मनाउन थालिएको हो ।
राष्ट्रसङ्घका अनुसार हरेक वर्ष पृथ्वीमा ४० करोड टन प्लाष्टिकजन्य फोहर उत्पादन हुने गरेको, उत्पादित त्यस्तो फोहरमध्ये त्यसको १० प्रतिशत मात्र पुनः प्रयोग हुने तथा एक करोड १० लाख टन प्लाष्टिक नदी, तलाउ र महासागरमा विसर्जन हुने गरेको छ ।
नेपालको संविधान ०७२ को धारा ३० मा प्रत्येक नागरिकलाई स्वच्छ वातावरणको मौलिक हकको प्रत्याभूत गर्नुको साथै पीडित पक्षलाई वातावरणीय प्रदूषण वा ह्रास वा कानुनबमोजिम क्षतिपूर्ति पाउने व्यवस्था पनि गरेको छ ।
आइसिसी विश्वकप लिग—२ : नेदरल्यान्ड्सविरुद्ध नेपाल विजयी
काठमाडौं । आइसिसी विश्वकप लिग—२ अन्तर्गत नेदरल्यान्ड्ससँग भएको खेलमा नेपाल विजयी भएको छ । बुधबार स्कटल्यान्डको डुन्डेस्थित फोर्थहिल क्रिकेट मैदानमा भएको खेलमा नेपालले नेदरल्यान्डसलाई पाँच विकेटले पराजित गर्दै विजयी भएको हो ।
नेदरल्यान्डसले दिएको २२६ रनको लक्ष्य नेपालले ४७ दशमलव एक ओभरमा पाँच विकेट गुमाउँदै पूरा गरेको थियो ।
नेपालको जितमा आरिफले महत्वपूर्ण अर्धशतक बनाउन सफल भए । उनले ९९ बलमा ७८ रनमा आउट भए ।
यसैगरी, नेपाली टोलीका उपकप्तान दीपेन्द्र सिंह ऐरीले ५१ बलमा ‘नट आउट’ ३८ रन बनाए । पाँचौँ विकेटका लागि आरिफ र दीपेन्द्रले ८९ रनको महत्वपूर्ण साझेदारी गरेका थिए ।
ओपनर कुशल भुर्तेलले ४२ बलमा २५ रन बनाए । कप्तान रोहित पौडेल ३९ बलमा २३ रन बनाउँदै आउट भए । अर्का ओपनर आसिफ शेखले २२ बलमा १९ रन बनाए । भीम सार्की २६ बलमा ११ रनमा आउट भए ।
नेदरल्यान्डसका लागि माइकल लेभिटले दुई विकेट लिए भने भिभियन किंग्मा र पल भान मेकरेनले समान एकरएक विकेट लिए ।
त्यसअघि टस जितेर पहिला ब्याटिङ रोजेको नेदरल्यान्डस ४९ दशमलव एक ओभरमा २२५ रनको योगफल बनाएको थियो । नेदरल्यान्ड्सका लागि नोहा कोर्सले ५५ बलमा पाँच चौकाको सहयोगमा सर्वाधिक ४८ रन बनाए ।
यसैगरी, कप्तान स्कट एडवार्डसले ७१ बलमा चार चौकाको सहयोगमा सर्वाधिक ४६ रन जोडे। विक्रमजित सिंहलाई ३८ रन बनाए। ज्याक लायन ३४ बलमा २७ रन बनाएर आउट भए।
नेपालका लागि सोमपाल कामीले तीन विकेट लिए भने करण केसी, ललित राजवंशी र सन्दीप लामिछानेले समान दुई–दुई विकेट लिए। यो जितसँगै नेपाल १४ खेलमा १० अङ्कका साथ लिगको सातौँ स्थानमा छ ।
आजको मौसम : मेघगर्जन र चट्याङसहित वर्षाको सम्भावना
काठमाडौं । हाल देशको पश्चिम र मध्य भागमा पश्चिमी तथा स्थानीय वायुको प्रभाव रहेको छ भने कोशी प्रदेशका अधिकांश भागमा मनसुनी वायुको प्रभाव रहेको मौसम पूर्वानुमान महाशाखाले जनाएको छ ।
अहिले कोशी प्रदेशलगायत देशका पहाडी भू—भागमा आंशिकदेखि साधारणतया बदली रही बाँकी भागमा मौसम मुख्यतया सफा रहेको छ । कोशीका थोरै स्थानमा हल्कादेखि मध्यम वर्षा भइरहेको छ ।
मौसम पूर्वानुमान महाशाखा अनुसार आज दिउँसो कोशी, मधेश, बागमती, गण्डकी र लुम्बिनीलगायतका पहाडी भागमा आंशिकदेखि साधारणतया बदली रही बाँकी भागमा मुख्यतया सफादेखि आंशिक बदली रहनेछ ।
कोशीका केही स्थानमा, मधेश र बागमतीलगायत बाँकी पहाडी भू(भागमा तथा बाँकी भू—भागका एक÷दुई स्थानमा चट्याङसहित हल्कादेखि मध्यम वर्षाको सम्भावना छ ।
महाशाखा अनुसार उच्च पहाडी तथा हिमाली भागका थोरै स्थानमा हल्का वर्षार हिमपातको सम्भावना छ ।
त्यस्तै, राति कोशी र मधेशलगायत बागमती र गण्डकीका पहाडी भागमा आंशिकदेखि साधारणतया बदली रही बाँकी भागमा मुख्यतया सफादेखि आंशिक बदली रहनेछ ।
कोशीका थोरै स्थानमा तथा मधेशलगायत बागमती, गण्डकी र कर्णालीका पहाडी भू(भागका एक÷दुई स्थानमा चट्याङसहित हल्कादेखि मध्यम वर्षाको सम्भावना छ ।
कोशी, बागमती, गण्डकी र कर्णालीका उच्च(पहाडी तथा हिमाली भागका एक÷दुई स्थानमा हल्का वर्षा र हिमपातको सम्भावना रहेको महाशाखाले जनाएको छ ।
अन्तरजातीय विवाह गर्ने दलित जोडी सम्मानित, सामाजिक रूपमा स्थापित हुन अझै गाह्रो
रामेछाप । १९ औँ जातीय छुवाछुत तथा भेदभाव उन्मुलन दिवसका अवसरमा बुधबार रामेछापको मन्थलीमा अन्तरजातीय विवाह गर्ने दलित समुदायका जोडीलाई सम्मान गरिएको छ ।
मन्थली नगरपालिकाका अन्तरजातीय विवाह गरेका जोडीलाई नगद पुरस्कार र सम्मान पत्रद्वारा सम्मानित गरिएको हो । मन्थली नगरपालिका प्रमुख लब श्रेष्ठ र प्रमुख जिल्ला अधिकारी श्यामकृष्ण थापा लगायतले कार्यक्रममा उनीहरूलाई सम्मान गरेका हुन् ।
मन्थली नगरपालिकाको आर्थिक सहयोग, राष्ट्रिय दलित कल्याण संघको सहआयोजना र राष्ट्रिय दलित पत्रकार संघ रामेछापको आयोजना भएको कार्यक्रममा १२ वटा विवाहित जोडिलाई सम्मान गरिएको थियो ।
कार्यक्रममा वर्षौ अघि विवाह गरेका त्यस्ता जोडीले आफ्नो अनुभव सुनाउँदै अहिले पनि सामाजिक रुपमा स्थापित हुन गाह्रो भएको अनुभव सुनाएका थिए । उनीहरूले अहिले पनि दलित र गैरदलित बिचको विवाहले सामाजिक रूपमा मान्यता पाउन निक्कै कठिन भएको अनुभव सुनाएका थिए ।
संयुक्त जनआन्दोलन समितिमा आवद्ध ४५ दल, समूह र अभियानको बैठक सम्पन्न
काठमाडौं । संयुक्त जनआन्दोलन समितिमा आवद्ध ४५ दल, समूह र अभियानको वैठक आज सम्पन्न भएको छ । बुधबार बसेको उक्त बैठकमा गत एकहप्तादेखि सञ्चालन हुँदै आएको जनआन्दोलनको समीक्षा गरिनुको साथै भावी कार्य योजनाका बारेमा समेत छलफल भएको थियो ।
बैठकले आन्दोलनमा उत्साहजनक जनसहभागिताको निमित्त सवैमा हार्दिक आभार प्रकट गरेको छ । आगामी अन्दोलनका कार्यक्रमहरुमा समेत विभिन्न वर्ग, पेशा लगायत निजमति, सेना र प्रहरी सेवामा रहेर राष्ट्रको हितमा कार्य गरेका राष्ट्रसेवकहरु तथा आम जनताको व्यापक सहभागिताको निम्ति बैठकले अपिल गरेको छ ।
उक्त बैठकको भावनालाई दृष्टिगत गर्दै संयुक्त जनआन्दोलन समितिले देहाय बमोजिमका कार्यहरु निर्धारण गरेको छ ।
क) पहिलो चरणको आन्दोलनबाट प्राप्त अनुभवलाई दृष्टिगत गर्दै आन्दोलनको भावी स्वरुपमा केही परिमार्जन गरिनेछ ।
ख) काठमाडौं उपत्यकाको विभिन्न पालिकाहरुमा विरोध प्रदर्शनहरू निरन्तर जारी राखिनेछ ।
ग) काठमाड़ों अतिरिक्त देशको विभिन्न प्रमुख शहरहरुमा विरोध सभा, धर्ना तथा जनप्रदर्शन गरिनेछ ।
घ) आन्दोलनलाई अझ सशत्त प्रभावकारी र उपल्धिमूलक वनाउन स्थानीय तहदेखि नै संयुक्त जनआन्दोलन समिति गठनगरिनेछ ।
ड) देशको विभिन्न जिल्लाहरुमा प्रतिवद्ध र जुझारु य्वा कार्यकर्ताहरूको समूह तयार गरिनेछ ।
च) देशका विभिन्न जिल्लाहरुमा आन्दोलनका विभिन्न कार्यक्रमहरु सञ्चालन गरिसकेपछि आन्दोलनलाई काठमाडौंकेन्द्रित गरिनेछ ।
राजावादी भेलामा लिङदेन नआएपछि होहल्ला
काठमाडौं । आज बसेको राजावादीहरुको संयुक्त जनआन्दोलन समितिको बैठक स्थगित भएको छ । बुधबार दोस्रो चरणको आन्दोलन तयारीबारे छलफल गर्न बैठक बोलाइएको थियो तर राप्रपाका अध्यक्ष राजेन्द्र लिङ्देन अनुपस्थित भएपछि बैठक स्थगित भएको हो ।
राजावादी मोर्चाको सबैभन्दा ठूलो घटक राप्रपाका अध्यक्ष राजेन्द्र लिङ््देन अनुपस्थित बनेपछि कार्यकर्ताले विरोध गरेका थिए । विरोधकैबीच राप्रपा नेपालका अध्यक्ष कमल थापालाई बोल्न समय दिइएपछि होहल्ला सुरू भयो । त्यसपछि संयुक्त जनआन्दोलन समितिका अध्यक्ष नवराज सुवेदीले आफैँ माइक लिएर सम्बोधन गरे । उनले सानो कमिटी बनाएर आजै नयाँ आन्दोलन कार्यक्रम बनाइने भन्दै भेला स्थगित भएको घोषणा गरे ।
भेला सुरु भएलगत्तै लिङ्देनको कार्यव्यस्तताका कारण आउन नसकेको जानकारी गराइएको थियो । लिङ्देन अहिले संसदमा छन् । कार्यकर्ताहरुले भने यही संसद चाहिने भए आन्दोलन केका लागि भन्दै असन्तुष्टि पोखे । केहि बाहिर रहेका कार्यकर्ताले भने जबसम्म राजा र जनता एकता हुँदैनन् तबसम्म आन्दोलन गरि रहने बताएका छन् । राजाले नै जनताको साथ चाहियो भनेपछि हामी सडकमा आएको बताएका छन् । आन्दोलन समिति ल्याउने भनेर लागेकाले नै गणतन्त्रवादीसँग ल्याउन लागेको केहि कार्यकर्ताले बताएका छन् ।
यसैगरी विनोद कंडेलले आन्दोलनमा भाग लिने प्रति धन्यवाद ज्ञापन गरेका छन् । राप्रपा महामन्त्री राजेन्द्र गुरुङले जुन उदेश्य भित्र हिडेका छौँ त्यसलाई फोकस गर्न पर्ने बताए । उनले एकमत भएर आन्दोलनमा उत्रिन आवश्यक रहेकाले आन्दोदनलाई गन्तव्यमा पुर्याएर मात्र छोड्ने बताए ।
