काठमाडौँ । आज गणतन्त्र दिवस विभिन्न कार्यक्रम गरी देशभर मनाइँदैछ । विसं २०६५ जेठ १५ गतेजननिर्वाचित संविधानसभाको पहिलो बैठकले २४० वर्षदेखि नेपालमा कायम रहेको निरङ्कुश राजतन्त्रको अन्त्य गरी सङ्घीय लोकतान्त्रिक गणतन्त्र घोषणा गरेको दिनलाई गणतन्त्र दिवसका रुपमा मनाउने गरिएको छ । 

नेपालमा कायम रहेको निरङ्कुश राजतन्त्रको अन्त्य गरी सङ्घीय लोकतान्त्रिक गणतन्त्र घोषणा गरेको थियो । तत्कालीन सात राजनीतिक दलको शान्तिपूर्ण जनआन्दोलन र नेपाल कम्युनिष्ट पार्टी (माओवादी) को सशस्त्र सङ्घर्षका उपलब्धिका रूपमा देशले गणतन्त्रको अभ्यास गरेको १८ वर्ष पूरा भएको छ ।

जेठ १५ लाई नेपाली जनताले स्वतन्त्रता, उदार सामाजिक न्यायसहितको समावेशी समानुपातिक लोकतान्त्रिक गणतन्त्र र नागरिक सर्वोच्चता प्राप्त गरेका थिए। गणतन्त्र दिवसलाई वंशियतन्त्रलाई जनताले जितेको उत्सवका रूपमा पनि लिइन्छ ।

जनअपेक्षा र जनभावनाअनुरूप चल्नु नै गणतान्त्रिक संविधानको मूल भावना हो । यसलाई लोकतान्त्रिक गणतन्त्र राजनीतिक व्यवस्था मात्र नभई शासकीय पद्धति र जीवनशैली भएकाले उदारवादी आदर्शको उपजका रूपमा हेरिन्छ । विश्वमा अभ्यासमा रहेका शासन व्यवस्थामध्ये लोकतान्त्रिक गणतन्त्र सबैभन्दा उत्तम मानिन्छ । 

१८ औँ गणतन्त्र दिवसको अवसरमा मुलुकभर विभिन्न कार्यक्रमको आयोजना गरी भव्यता र हर्षोल्लासका साथ मनाइँदैछ । यस अवसरमा सरकारले आज सार्वजनिक बिदा दिएको छ ।

बराहक्षेत्र, सुनसरी । किराँत राई समुदायको महान् पर्व उभौली साकेला २०८२ जेठ १४ गते बराहक्षेत्र नगरपालिका–३ स्थित बाङ्गेबजारमा भव्यताका साथ सम्पन्न भएको छ। किरात राई यायोक्खा बराहक्षेत्र ३, ४, ५ (साबिक भरौल) को आयोजनामा भएको कार्यक्रममा चतरा, प्रकाशपुर, नडाह, अमाह सिमसार, चक्रघटी, र बिचपानी हुँदै नगर क्षेत्रमा आइपुगेर समापन भएको हो ।

साकेला समापन समारोहको उद्घाटन समाजसेवी तथा शिलीमाङपा सूर्य कुमार राईले गर्नुभएको थियो। कार्यक्रममा उपस्थित विभिन्न वक्ताहरूले शुभकामना मन्तव्य व्यक्त गर्दै पर्वको महत्वमाथि प्रकाश पारेका थिए। यो पर्वले किराँत राई समुदायको मौलिक संस्कृति, परम्परा र आपसी भाइचारा प्रवर्धन गर्न महत्वपूर्ण भूमिका खेलेले बताएकाछन् ।

प्रमुख अतिथि किरात राई यायोक्खा सुनसरीका उपाध्यक्ष यलमहाङ राई र विशिष्ट अतिथि जिल्ला कोषाध्यक्ष तेज बान्तावा राईले किराँत राई समुदायको पहिचान, अधिकार र यसलाई स्थापित गर्न यायोक्खाको भूमिकाबारे विस्तृत प्रकाश पार्नुभयो र १ नँ. प्रदेशलाई पहिचानको आधारमा पुनःनामाकरण गरि किरात प्रदेश बनाउनुपर्ने बताउनुभयो। 

उहाँहरूले २०८२ को उभौली साकेलाको अन्तिम समापन जेठ १७ गते हुने जानकारी दिँदै सुनसरी जिल्ला भित्रका सम्पूर्ण वडा प्रादेशिक समितिहरूलाई भव्य र सभ्य तरिकाले सहभागिताका लागि अनुरोध गर्नुभयो। यो आह्वानले जिल्लाभरका किराँत राई समुदायलाई एकताबद्ध गरी सांस्कृतिक पर्वलाई अझ उचाइमा पुर्‍याउने लक्ष्य राखेको छ।

कार्यक्रममा किरात राई यायोक्खा बराहक्षेत्रका विभिन्न तहका प्रतिनिधि तथा विशिष्ट व्यक्तित्वहरूको बाक्लो उपस्थिति थियो। सो अवसरमा किरात राई यायोक्खा बराहक्षेत्र नगर अध्यक्ष नरेश राई, बान्तावा खिम नगर उपाध्यक्ष चिना राई, यायोक्खा नगर सदस्य मणि प्रसाद राई, किरात राई यायोक्खा बराहक्षेत्र १ र २ का अध्यक्ष सुबधन राई, किरात राई यायोक्खा बराहक्षेत्र ६, ७ र ८ (साबिक महेन्द्रनगर) का अध्यक्ष मनिस राई, किरात राई यायोक्खा बराहक्षेत्र ९ र १० प्रकाशपुरका अध्यक्ष जंग बहादुर राई लगायत दहलकुमार राई, बलराज चाम्लिङ राई, मित्रराज राई लगायतको सहभागिता रहेको थियो। यसैगरी, इलाका प्रहरी कार्यालय चक्रघटी र अस्थायी प्रहरी चौकी बाङ्गे बजारका प्रतिनिधिहरूका साथै विभिन्न बुद्धिजीवी तथा संघ-संस्थाका प्रतिनिधिहरूको उपस्थितिले कार्यक्रमलाई थप भव्य बनाएको थियो।

विराटनगर । संघीय गृहमन्त्री रमेश लेखकको राजीनामा माग गर्दै कोशी प्रदेशसभामा बुधबार एक सांसदले गीतमार्फत विरोध जनाएका छन् ।  नेकपा (माओवादी केन्द्र) का प्रदेशसभा सदस्य गोम्बु शेर्पाले शून्य समयमा चर्चित गीत ‘भिजिट भिसामा हजुर’ गाएर गृहमन्त्री लेखकमाथि गम्भीर आरोप लगाउँदै राजीनामा माग गरेका हुन् ।

शेर्पाले आफ्नो सम्बोधनको सुरुवात चर्चित गीतबाट गर्दै भने, ‘भिजिट भिसामा हजुर, भिजिट भिसामा भुइँ छाडेर उड्ने हजुर, पश्चिम दिशामा’ यस गीतमार्फत उनले विदेश पलायनमा जान बाध्य नेपाली युवाहरूको पीडा चित्रण गरेका थिए ।  त्यसपछि उनले त्रिभुवन अन्तर्राष्ट्रिय विमानस्थलबाट भिजिट भिसाको नाममा बेरोजगार युवाहरूबाट लाखौँ रुपैयाँ असुली हुने गरेको दाबी गरे ।

शेर्पाले गृहमन्त्री लेखकको सचिवालयमा ‘बदनाम र विवादास्पद’ व्यक्ति सक्रिय रहेको भन्दै मिलेमतोको आशंका व्यक्त गरे ।  उनले आरोप लगाए, ‘लुटधन्दा सञ्चालन गर्ने व्यक्तिहरूको मुख्य संरक्षण गृहमन्त्री स्वयं हुन्। त्यसैले अनुसन्धानमा सघाउन उहाँले पदबाट राजीनामा दिनुपर्छ ।’

कांग्रेस सांसदको आपत्ति

शेर्पाको भनाइप्रति नेपाली कांग्रेसका प्रदेशसभा सदस्य प्रदीपकुमार सुनुवारले कडा आपत्ति जनाए । उनले भिजिट भिसा प्रकरण संघीय सरकारले हेर्ने विषय भएको उल्लेख गर्दै प्रदेशसभामा यस विषयलाई अतिरञ्जित ढंगले उठाइएको आरोप लगाए । 

‘संसद्को आफ्नै मर्यादा हुन्छ । संघीय संसद्को अपमान हुनेगरी प्रदेशसभामा यस्ता विषय उठाइनु अनुचित हो ।’ सुनुवारले भने  उनले भिजिट भिसा सम्बन्धी विषयमा अनुसन्धान र कारबाहीको प्रक्रिया संघीय सरकारको कार्यक्षेत्रमा पर्ने भएकाले त्यसलाई राजनीतिक रूपमा दुरुपयोग नगर्न आग्रह गरे ।

विराटनगर । सुनसरी–मोरङ औद्योगिक कोरिडोर अन्तर्गत इटहरी–१२ मा अवस्थित तिरुपति प्लाइउड उद्योगमा गएराति भीषण आगलागी भएको छ । राति साढे २ बजेबाट सुरु भएको आगो नियन्त्रणमा आउन सकेको छैन ।

इलाका प्रहरी कार्यालय इटहरीका प्रहरी नायब उपरीक्षक लक्ष्मी भण्डारीका अनुसार आगो नियन्त्रणका लागि मोरङ र सुनसरीका विभिन्न स्थानीय तहका एक दर्जन दमकल बिहानैदेखि खटिएका छन् । दमकल टोलीसँगै नेपाल प्रहरी, सशस्त्र प्रहरी र अन्य सुरक्षाकर्मी पनि आगो नियन्त्रणमा जुटेका छन् ।

तर उद्योगभित्र प्लाइउड उत्पादनमा प्रयोग हुने काठ, केमिकल, कागजलगायत अत्यन्तै ज्वलनशील सामग्रीहरू भएकाले आगो नियन्त्रणमा कठिनाइ भइरहेको प्रहरी नायब उपरीक्षक भण्डारीले जानकारी दिए ।

प्रहरीका अनुसार उद्धार र नियन्त्रण कार्य अझै जारी छ र आवश्यक सुरक्षात्मक सावधानी अपनाउँदै अग्निनियन्त्रणको प्रयास भइरहेको छ ।

काठमाडौं । बहुप्रतिक्षित राष्ट्रिय सौन्दर्य प्रतियोगिता मिस युनिभर्स नेपाल २०२५ को लागि दर्ता औपचारिक रूपमा खुला गरिएको छ । ग्लोबल ग्ल्यामर भेन्चरको आयोजनामा बुधबार काठमाडौंस्थित हिल्टन होटलमा आयोजित विशेष कार्यक्रममा यो घोषणा गरिएको हो ।

कार्यक्रममा मिस युनिभर्स नेपालकी राष्ट्रिय निर्देशक सङ्गीता पुरीले सम्पूर्ण ब्रह्माण्डमा नेपाली महिलाहरूको असीम क्षमता उजागर गर्ने प्लेटफर्म भएको बताइन् । 

प्रतियोगिताको समावेशी र लोकतान्त्रिक स्वरूपबारे जानकारी दिँदै उनले भनिन्, ‘तपाईं जस्तो हुनुहुन्छ, त्यही नै तपाईंको सौन्दर्यता हो ।’ उनले अगाडि थपिन्, ‘हामी सबै पृष्ठभूमिका महिलाहरूलाई स्वागत गर्दछौं । यो मञ्च आत्मविश्वास देखाउने, अवसर समाउने र सम्पूर्ण ब्रह्माण्डमा नेपाली महिलाहरूको असीम क्षमता उजागर गर्ने प्लेटफर्म हो ।’

यो वर्ष प्रतियोगिता आठ भागमा आधारित रियालिटी टिभी शो को रूपमा प्रस्तुत गरिनेछ । यस माध्यमबाट दर्शकहरूले प्रतियोगीहरूको यात्रा, चुनौती र परिवर्तनलाई नजिकबाट अनुभव गर्न सक्नेछन् ।

दर्ता प्रक्रिया जेठ १५ देखि असार १५ सम्म खुला रहनेछ । इच्छुक सहभागिहरूले खल्ती एप, मिस युनिभर्स नेपालको वेबसाइट वा सोसल मिडिया प्लेटफर्म मार्फत दर्ता गर्न सक्नेछन् । सहभागी महिला कम्तीमा १८ वर्ष उमेर पुगेको र प्लस टु  वा सो सरहको शैक्षिक योग्यता प्राप्त गरेको हुनुपर्नेछ ।

प्रतियोगिता समावेशी मूल्यमा आधारित रहेकाले उचाइ, तौल वा वैवाहिक स्थितिमा कुनै प्रतिबन्ध नराखिएको आयोजकले जानकारी दिएको छ । नेपाली नागरिकसँगै गैरआवासीय नेपाली महिलाहरूले पनि प्रतियोगितामा सहभागिता जनाउन पाउनेछन् ।

कार्यक्रममा मिस युनिभर्स नेपाल २०२५ सम्पदा घिमिरे, अन्तर्राष्ट्रिय श्रम संगठन नेपालका देश निर्देशक नुमान ओजकान, मिस युनिभर्स राष्ट्रिय निर्देशक सङ्गीता पुरी, कोरियोग्राफर दिक्पाल कार्की तथा मिस युनिर्भ नेपालकी अध्यक्ष साबी पुरीको विशेष उपस्थिति रहेको थियो ।

प्रतियोगिताका टप प्रतिस्पर्धीहरूले साउन महिनामा २५ दिने इन्टेन्सिभ ट्रेनिङ प्राप्त गर्नेछन् भने भदौमा क्लोज क्याम्प सञ्चालन हुनेछ । ग्रान्ड फिनाले भदौमा महिनामा आयोजना गरिनेछ । 

मिस युनिभर्स नेपालले यस वर्ष समाजसेवा र सामाजिक कल्याणका क्षेत्रमा अन्तर्राष्ट्रिय श्रम संगठनसँग सहकार्य गर्ने घोषणा समेत गरेको छ ।

काठमाडौं । गृहमन्त्रीको राजीनामा माग्दै विपक्षी दलका सांसदहरुको नाराबाजीपछि प्रतिनिधि सभाको बैठक स्थगित भएको छ । बुधबार बसेको प्रतिनिधिसभाको बैठकमा भिजिट भिसा प्रकरणमा गृहमन्त्री रमेश लेखकले राजीनामा दिनुपर्ने माग बैठक सुरू हुनासाथ माओवादी, रास्वपा र राप्रपाका सांससहरुले संसद अवरोध गरेका थिए । 

त्यसपछि सभामुख देवराज घिमिरेले बैठक आधा घण्टाको लागि स्थगित भएको जानकारी गराए । 

काठमाडौं । नेपाल राष्ट्र बैंकका गभर्नर डा. विश्वनाथ पौडेलविरुद्ध सर्वौच्च अदालतमा दायर रिटमा बुधबारका लागि पेसी तोकिएको छ ।

अधिवक्ताहरू अनन्त लुइँटेल, प्रतिभा उप्रेती र विशाल थापाले राष्ट्र बैंक ऐन २०५८ ले अनिवार्य गरेको विज्ञतासमेत नभएको व्यक्तिलाई गभर्नरमा नियुक्ति गरिएको भन्दै पौडेलविरुद्ध रिट दायर गरेका थिए ।

रिटमा पौडेललाई गभर्नरमा सिफारिस, नियुक्ति तथा शपथ गराउने निर्णय गैरकानूनी भएको जिकिर गरिएको छ ।

मुगु । मुगुको खत्याडगाउँपालिकाको क्यातडीक्षेत्रमा रहेको सात रोपनी जग्गामा स्थानीय युवाहरूले उत्पादन गरेको आलुले बजार नपाउने हो कि भन्ने चिन्ता थपिएको छ । 

बाँझो र बाँदर लाग्ने जग्गामा खेती गरेका युवाहरू उत्पादित आलुले बजार नपाउने चिन्तामा परेका हुन् । लाखौँ मूल्यका आलु उत्पादन भएका आलुले बजार नपाउँदा खेतबारीमै कुहिएर खेर जाने हो कि भन्नेचिन्ता परेको हो । 

खत्याड गाँउपालिका वडा नम्बर ५ का अनन्त जौजी, भानुभक्त रावल र जुम्ला जिल्ला कनका सुन्दरी गाउँपालिका वडा नम्बर ३का बम बहादुर बुढाले सामूहिक आलु खेती गरेको तर बजार नपाउने चिन्ता परेको कृषक वम बहादुर बुढाले बताए ।

उत्पादित आलु हाल ४० रुपैयाँ प्रतीकेजीका दरले विक्री भइरहेको छ । तर उत्पादित अन्य आलु कुहिएर जाने हो कि भन्ने चिन्ता लागेको कृषक अनिरुद्र जौसीले बताए । तर पालिका प्रमुख अज बहादुर शाहीले बजार खोजी गर्ने बचन दिएका छन् । 

काठामाडौं । सार्वजनिक यातायात व्यवसायीहरुले अनिश्चितकालिन सवारी साधन बन्दसहितका आन्दोलनका कार्यक्रम सार्वजनिक गरेका छन् । मंगलबार ६ वटा व्यवसायिक संगठनहरुले सात बुँदे मागसहित आन्दोलनका कार्यक्रम सार्वजनिक गरेका हुन् ।

संवारी ऐन २०४९ को परिच्छेद २ को दफा ८ को २ र दफा १२ को १ बिपरित हुनेगरी संघीय ऐनसंग बाझिने सातै प्रदेश सरकारहरुले ल्याउने तयारी गरेको र गण्डकी प्रदेश सरकारले मिति २०८२।०२।०१ गते राजपत्रमा प्रकाशित गरि निजी सवारी साधन (रातो प्लेट)संचालन गर्न ल्याएको नियमावलि २०८२ दफा २ को (ज) तत्काल खारेजीको माग गर्दै आन्दोलनका कार्यक्रम सार्वजनिक गरेका हुन् ।

उनीहरुले जेठ १८ गतेसम्म मागहरु सम्बोधन नभए १९ गतेबाट देशव्यापी रुपमा अनिश्चितकालका लागि सवारी साधनहरु घर ग्यारेजमा थन्काउने चेतावनी समेत दिएका छन् । 

पत्रकार सम्मेलनमा बोल्दै नेपाल यातायात व्यवसायी राष्ट्रिय महासंघका अध्यक्ष विजय बहादुर स्वाँरले गण्डकी प्रदेश सरकारले प्राइभेट गाडीमा मानिस राख्न पाउने नियम बनाउनु नै आन्दोलनको ठूलो कारण बनेको बताए । यस विषयमा सरकार गम्भिर नभएका कारण यातायात व्यवसायीले दुःख पाएको बताए ।

उनले अहिले यो २१औँ शताब्दिमा आएर पनि गरिखानेलाई गरिखान नदिने सोच राख्नु नै गलत रहेको बताए ।  

कार्यक्रममा बोल्दै सार्वजनिक यातायात व्यवसायिक महासंघका अध्यक्ष डा. डोलनाथ खनालले हरेक नम्बर प्लेटको आ–आफ्नै विशेषता हुने भएकाले त्यसलाई कुल्चिएर अघि बढ्न नहुने बताए । 

अर्का व्यवसायी सरोज सिटौलाले गण्डकी प्रदेशका मुख्यमन्त्रीका कारण आन्दोलनमा जान बाध्य भएको बताए । उनले मंगलबार बेलुका आन्तरिक बैठक राखेर आन्दोलनलाई थप सशक्त बनाउने बताए ।

जनकपुर । अख्तियार दुरुपयोग अनुसन्धान आयोगले मधेश प्रदेशसभा सदस्य सरोज कुमार सिंहका स्वकीय सचिव बिनोद कुमार लाल कायस्थलाई भ्रष्टाचार आरोपमा नियन्त्रणमा लिएको छ ।

आयोगको टोलीले जेठ १२ गते जनकपुरधाम उपमहानगरपालिका–९ स्थित सरस्वती टोलबाट अपराह्न १ बजे उनलाई पक्राउ गरेको आयोगद्वारा जारी प्रेस विज्ञप्तिमा उल्लेख रहेको छ ।

आयोगका अनुसार सांसद सिंहले विभिन्न उपभोक्ता समितिहरू गठन गरेको देखाई ती समितिका खातामा आएको रकम आफ्ना स्वकीय सचिवमार्फत झिकाएर आफू र आफ्नी श्रीमतीको व्यक्तिगत खातामा जम्मा गराएका हुन ।

साथै, बिनोद कुमार कायस्थको खातामा समेत सरकारी रकम जम्मा गराई दुरुपयोग गरिएको भन्ने उजुरीका आधारमा उनलाई पक्राउ गरिएको हो ।

स्वकीय सचिव कायस्थ पक्राउपछि आयोगले सांसद सिंहले प्रयोग गर्दै आएका विद्युतीय उपकरणहरू पनि नियन्त्रणमा लिएर अनुसन्धान प्रक्रिया अगाडि बढाइएको छ ।