बिहिबार, ११ असार २०८३
निर्माण व्यवसायीले बेवास्ता गरेपछि स्थानीय आफैँ जुटे सडक जोगाउन
रामेछाप । निर्माण व्यवसायीले सडक संरक्षणमा बेवास्ता गरेपछि रामेछापको मन्थली नगरपालिका–८ चिसापानीका स्थानीय आफै सडक जोगाउने काममा जुटेका छन् ।
गएको वर्षा र केही दिन अघिको वर्षाले कटान र गेग्र्यान थुपारेर क्षति पुगेको मन्थली– चिसापानी सडक मर्मत र सफा गर्नको लागि सम्बन्धित कार्यालय र निर्माण कम्पनीलाई अनुरोध गर्दा पनि चासो नदिए पछि सडक संरक्षणको लागि स्थानीय नै जुटेका वडाध्यक्ष गोपाल श्रेष्ठले जानकारी दिए ।
सो सडकको जबदे क्षेत्रको सबैभन्दा बढी क्षति पुगेको भागमा गेग्र्यान पन्छाउने, नाला सफा गर्ने तथा कटान गरेको ठाउँलाई पुर्ने काम गरिएको श्रेष्ठले बताए । अन्य क्षेत्रमा पनि अब स्थानीय नै मिलेर सडक संरक्षणमा जुट्नु पर्ने अवस्था आएको उनको भनाइ छ ।
जिल्ला पूर्वाधार कार्यालय मार्फत भएको सो सडक निर्माणको जिम्मा कान्छाराम कन्ट्रक्सनले पाएको थियो । निर्माण कम्पनीले सडक जिम्मा नलगाइसकेको अवस्थामा सडक संरक्षणको जिम्मा निर्माण कम्पनीकै हुने भए पनि त्यसको संरक्षणमा दुवै निकायले ध्यान नदिएका श्रेष्ठले गुनासो गरे । ‘जिम्मा त उनीहरूको हो, क्षति हुँदा हाम्रो हुन्छ, सडक रोकिँदा हाम्रो रोकिन्छ, त्यसैले सडक जोगाउने काममा लागेका हौँ’, श्रेष्ठले भने ।
सडकको निर्माण र संरक्षणमा निर्माण कम्पनी र जिम्मेवार कार्यालयले निक्कै लापरबाही गरेका श्रेष्ठको गुनासो छ । ‘सडक मर्मतको लागि पटक पटक वडाको तर्फबाट ताकेता गर्दा पनि भएको छैन’, उनले भने ।
आज मूख्यतया मौसम सफा रहने
काठमाडौं । हाल देशमा मूख्यतया स्थानीय तथा पश्चिमी वायूको आंशिक प्रभाव रहेको छ । जल तथा मौसम विज्ञान विभागका अनुसार आज देशभरको मौसम सफा रहने छ । आज दिउँसो कोशी प्रदेशलगायत बागमती, गण्डकी र कर्णाली प्रदेशको पहाडी भू–भागमा आंशिकदेखि साधारणतया बदली रही बाँकी भू–भागमा मौसम मूख्यतया सफा रहनेछ ।
कोशी र गण्डकी प्रदेशको पहाडी भू–भागका एक–दुई स्थानमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको छ ।
कोशी, बागमती, गण्डकी र कर्णाली प्रदेशको उच्च पहाडी तथा हिमाली भू–भागका एक–दुई स्थानमा हल्का वर्षा र हिमपातको सम्भावना रहेको जल तथा मौसम विज्ञान विभागले जनाएको छ ।
विभागले आज राती कोशी र गण्डकी प्रदेशको पहाडी भू–भागमा आंशिक बदली रही बाँकी भू–भागमा मूख्यतया सफा रहने जनाएको छ । कोसी र गण्डकी प्रदेशका उच्च पहाडी तथा हिमाली भूभागका केही स्थानमा हल्का वर्षा र हिमपातको सम्भावना रहेको छ ।
शिक्षामन्त्रीको राजीनामा स्वास्थ्यका कारण आएको हो : प्रधानमन्त्री
काठमाडौं । प्रधानमन्त्री केपी शर्मा ओलीले शिक्षा, विज्ञान तथा प्रविधिमन्त्री विद्या भट्टराईले आफूसँग असहमति नभई स्वास्थ्यका कारण राजीनामा दिएको स्पष्ट पारेका छन् ।
नेपाल कम्युनिष्ट पार्टीको ७६ औँ स्थापना दिवसका अवसरमा आयोजित कार्यक्रममा बोल्दै उनले मन्त्री भट्टराईको राजीनामालाई प्रधानमन्त्रीको असहयोग र उपेक्षाका कारण भनेर बाहिर चर्चा गरिएकोप्रति असन्तुष्टि जनाए ।
उनले भने, ‘उहाँ मैले बनाएको मन्त्री हो । मैले काम लगाइरहेको छु । सहयोग गरिरहेको छु । सिकाइराखेको छु । ठूलो मन्त्रालय छ, अहिले स्वास्थ्य ठिक भएन भनेर राजीनामा दिनुभएको हो । यसमा अन्य प्रचारबाजी गर्नुको कुनै अर्थ छैन ।’
साथै ओलीले नेपाली काँग्रेसका सभापति शेरबहादुर देउवा स्वास्थ्य परीक्षणका लागि बैँकक गएको सन्दर्भलाई पनि सरकार ढल्छ भन्ने खालका हल्लासँग जोड्न खोजिएको टिप्पणी गर्दै एमाले र काँग्रेससँगको सहमतिबमोजिम १५ महिनापछि आफूले सभापति देउवालाई प्रधानमन्त्री हस्तान्तरण गर्ने दोहोर्याए ।
मुस्लिम समुदायविरुद्ध आपत्तिजनक अभिव्यक्तिको विरोधमा सुनसरीबाट प्रधानमन्त्रीलाई ज्ञापनपत्र
इटहरी । नेपाल मुस्लिम इत्तेहाद संगठन सुनसरीले हिन्दू सम्राट सेना नेपालका केन्द्रीय उपाध्यक्ष कृष्ण कुमार यादवले मुस्लिम समुदायमाथि दिएको आपत्तिजनक अभिव्यक्तिको विरोधमा प्रधानमन्त्री केपी शर्मा ओलीलाई मंगलबार ज्ञापनपत्र बुझाएको छ ।
जिल्ला प्रशासन कार्यालय सुनसरीमार्फत पेश गरिएको उक्त ज्ञापनपत्र प्रमुख जिल्ला अधिकारी धर्मेन्द्र कुमार मिश्रलाई हस्तान्तरण गरिएको हो ।
संगठनले धार्मिक सद्भाव बिथोल्ने, समाजमा डर र आतङ्क फैलाउने अभिव्यक्तिहरूप्रति आपत्ति जनाउँदै तत्काल कानुनी कारबाहीको माग गरेको छ ।
संगठनका अध्यक्ष तुफेल अहमदले समाजमा हिंसा र विद्वेष फैलाउने व्यक्ति, समूह वा संगठनलाई सरकारले समयमै नियन्त्रणमा नल्याउँदा गृह प्रशासनको कार्यप्रति गम्भीर प्रश्न उठाएका छन् ।
ज्ञापनपत्रमा वीरगञ्जमा हालै हनुमान जयन्तिको शोभायात्राका क्रममा उत्पन्न तनाव र त्यसपछि भएको साम्प्रदायिक हिंसालाई विशेष रूपमा उल्लेख गरिएको छ।
घटनामा हातहतियारसहितका युवाहरूले मुस्लिम बस्तीमा पसेर घर, पसलमा तोडफोड गर्नुका साथै स्थानीय मुस्लिम समुदायलाई धम्कीपूर्ण शैलीमा आतंकित बनाएको उल्लेख छ ।
सामाजिक सञ्जाल र मिडियामार्फत सार्वजनिक भएका यी घटनाहरूले सम्पूर्ण मुलुकमा चिन्ता उत्पन्न गरेको संगठनको भनाइ छ ।
ज्ञापनपत्रमा सम्राट सेना, करणी सेना लगायतका समूहहरूको गैरकानुनी गतिविधि तत्काल बन्द गरिनुपर्ने, मुस्लिम समुदायको सुरक्षा सुनिश्चित गरिनुपर्ने र यस्ता समूहहरूद्वारा योजनाबद्ध रूपमा मुस्लिम बहुल क्षेत्रबाट शोभायात्रा निकाल्ने कार्यप्रति गम्भीर ध्यान दिनुपर्ने माग गरिएको छ ।
विशेष रूपमा, कृष्ण सनातनी भनिने व्यक्तिले काठमाडौंको एक सार्वजनिक कार्यक्रममा ‘बर्मामा ५ लाख मुस्लिम मारेझैं, नेपालमा पनि त्यसैगरि सबै मुस्लिमहरूलाई मार्ने’ भन्ने अभिव्यक्ति दिएको दाबी गर्दै संगठनले यस्तो हिंसात्मक भाषणको कडा निन्दा गरेको छ ।
समाजमा शान्ति, सहिष्णुता र भाईचारा कायम राख्न साम्प्रदायिक द्वन्द्व फैलाउने जोसुकै व्यक्तिलाई कानुनी दायरामा ल्याई निष्पक्ष छानबिन र कडा कारबाही गर्नुपर्नेमा संगठनले जोड दिएको छ । ज्ञापनपत्रमार्फत दीर्घकालीन समाधानको माग गर्दै मुस्लिम समुदायमाथि बारम्बार भइरहेको आतङ्कको अन्त्य गरी समाजमा शान्ति सुव्यवस्था कायम गर्न सरकारलाई आह्वान गरिएको छ ।
तीनसयमा पाइने रजिष्टर १७ हजारमा खरिद, अख्तियारमाथि नै आशंका
सिरहा । विस्तृत अनुसन्धान सकिएर भ्रष्टाचार भएको राय ठहरसहित अख्तियार दुरुपयोग अनुसन्धान आयोग बर्दिवास महोत्तरीले मुख्य कार्यालय टंगालमा पठाएको एउटा मुद्दा अचानक मुलतवीमा पठाइएको छ ।
आर्थिक वर्ष २०७९–०८० मा सर्लाहीको बलरा नगरपालिकाले सहकारीको रेकर्ड राख्ने १५ थान रजिष्टर खरिद गरेको थियो । बजारमा तीन सयमा पाइने रजिष्टर प्रतिगोटा १७ हजारमा खरिद भएको र भुक्तानी दिइएको उजुरी परेपछि अख्तियार बर्दिवास कार्यालयले अनुसन्धान थालेको थियो ।
तीन सय पर्ने रजिष्टर १७ हजार का दरले खरिद भएको देखिए पछि तत्कालीन प्रमुख प्रशासकीय अधिकृत उमेश महतो माथि भ्रष्टाचार गरेको अभियोजन पत्र विशेष अदालत काठमाडौंमा दर्ता हुने राय ठहरसहित बर्दिवास कार्यालयले टंगाल पठाएको थियो ।
तर बैशाखको पहिलो सातामा आरोपित प्रमुख प्रशासकीय अधिकृत (हाल सहिदनगर नगरपालिका धनुषामा कार्यरत) उमेश महतोले बलरा नगरपालिकाको राजस्व शाखामा रजिष्टर खरिदको सावाँ र व्याज समेत ३ लाख १० हजार रकम बुझाएका छन् । रकम बुझाएपछि यादवमाथि दायर गर्न ठीक्क पारिएको मुद्दा मुलतवीमा गएको छ ।
मुद्दा मुलतवीमा पार्न ठूलो रकमको लेनदेन भएको सुत्रहरूले दावी गरेका छन् । अख्तियार कार्यालय बर्दिवासबाटै प्रमुख प्रशासकीय अधिकृत महतोलाई बोलाएर रजिष्टर खरिद गर्दा भएको भुक्तानीको साँवा र व्याज रकम सरकारलाई फिर्ता गरेर भौचर बुझाउन भनियो । त्यसपछि महतोले अह्राइए बमोजिम रकम जम्मा गरेर भौचर बुझाए । बर्दिवासले मुद्दा मुलतवीमा जाने सिफारिससहित मिसिल टंगाल पठाइदिएको छ ।
मुद्दा मिलाउन अख्तियार कार्यालय बर्दिवासमा धनुषाका प्रमुख जिल्ला अधिकारी रामुराज कडरियाले भूमिका खेलेको आशंका गरिएको छ । प्रमुख जिल्ला अधिकारी कडरिया र प्रमुख प्रशासकीय अधिकृत महतो एकै नगरबासी भएको र छरछिमेकको नाताले महतोलाई बचाउन कडरियाले भूमिका खेलेको अनुमान गरिएको छ ।
यस विषयमा प्रजिअ कडरियालाई सोध्दा उनले उमेश महतोलाई नचिनेको र कसैलाई बचाउन कुनै पैरवी नगरेको बताए । उनले भने,‘अख्तियारले हामीलाई पनि बोलाउँछ । हामी आफ्नै कामले गएका हुन्छौं ।’ यस्तो आरोपमा कुनै सत्यता नभएको उनले जिकिर गरे ।
यस सम्बन्धमा अख्तियार दुरुपयोग अनुसन्धान आयोग बर्दिवास कार्यालयका सूचना अधिकारी तुलसीराम पौडेलले भने,‘अख्तियारको सबै निर्णय केन्द्रबाटै हुन्छ । हामीले राय सुझावसहित मिसिल टंगालमा पठाउने हो । उतैबाट बुझ्नुस् । हामीलाई थाहा भएन ।’ उनले राजिष्टर खरिदमा अनुसन्धान भएको भने स्वीकार गरे ।
अख्तियार बर्दिवास कार्यालयका प्रमुख रामबहादुर कुरुमवाङ्गसँग यसबारे प्रतिक्रिया माग्दा रजिष्टर खरिदमा अनुसन्धान भएको तर निर्णय टंगालबाटै हुने बताएर उनी पन्छिए ।
यता प्रमुख प्रशासकीय अधिकृत महतोलाई प्रश्न गर्दा ‘के तपाईँले रजिष्टर खरिद वापतको रकम नेपाल सरकारलाई फिर्ता गर्नुभएको हो ?’ जवाफमा भने,‘यस विषयमा मलाई थाहा छैन ।’ तर एकैछिन पछि फोन गरेर उनले भने,‘यस विषयमा भेटेरै कुरा गर्न मिल्लदैन ? भेटेरै कुरा गरौँ ।’
यता बलरा नगरपालिकाका प्रमुख प्रशासकीय अधिकृत सुशिल कुमार साहलाई रजिष्टर खरिद वापतको रकम राजस्व खातामा जम्मा भए नभएको बारे सोध्दा उनले भने,‘म राजस्व शाखामा कार्यरत कर्मचारीसँग सोधेर फोन गरेर जानकारी गराउँछु ।’ तर त्यसपछि उनको फोन लागेन ।
सिरहाका वयोवृद्ध वामपन्थी नेता रामजी यादव भन्छन्,‘अख्तियारले जित हुनेमा शंका भएका मुद्दाहरु पैसा तिराएर मुलतवीमा पठाउने निर्णय गर्दा भ्रष्टाचारले झन् प्रश्रय पाएको छ । अख्तियारले समाइहाले नगद फिर्ता गरिदिने नत्र पचाउने भन्दै धक फुकाएर भ्रष्टाचार गर्न थालेका छन् । स्थानीय तहमा वेथितिले सीमा पार गरेको छ,’ उनले अगाडि भने,‘अख्तियारमा पनि बेथिति देखियो । यो मुद्दा सेटिङ्गमै मुलतवी पारिएको हुनुपर्छ ।’
नेपाल आइपुगे भारतीय ऊर्जा मन्त्री मनोहरलाल खट्टर
काठमाडौं । भारतीय विद्युत् र आभास तथा सहरी मामिला मन्त्री मनोहरलाल खट्टर नेपाल आइपुगेका छन् । मंगलबार ऊर्जा, जलस्रोत तथा सिँचाइमन्त्री दीपक खड्काको निमन्त्रणामा नेपाल आएका उनलाई ऊर्जा मन्त्रालय र काठमाडौंस्थित भारतीय दूतावासका अधिकारीहरुले स्वागत गरेका थिए ।
विद्युत् मन्त्री खट्टरले भारत सरकारको सहयोगमा निर्माण सम्पन्न भएको कोशी करिडोर २२० केभी प्रसारण लाइन अन्तर्गत इनरुवा–बसन्तपुर–बानेश्वर–तुम्लिङटार २०० केभी प्रसारण लाइन तथा २२०–१३३–३३ केभी तुम्लिङटार सबस्टेसन, २२०–३३ केभी बानेश्वर सबस्टेसन र २२०–१३३–३३ केभी वसन्तपुर सबस्टेसन संयुक्त रूपमा संखुवासभा तुम्लिङटार सबस्टेसनमा उद्घाटन गर्ने कार्यक्रम रहेको छ ।
साथै उनले भारतले निर्माण गरेको अरुण तेस्रो जलविद्युत् आयोजनाको पावर हाउस तथा बाँध क्षेत्र अवलोकन गर्नेछन् भने दुई देशले संयुक्त रूपमा निर्माण गर्न लागेको प्रसारण लाइन निर्माण कम्पनीको सम्झौता पत्रमा हस्ताक्षर हुनेछ ।
त्यस्तै भोली बुधबार खट्टरले मुस्ताङ मुक्तिनाथ अवलोकन भ्रमण गर्ने कार्यक्रम छ । भोली नै उनले प्रधानमन्त्री केपी शर्मा ओली र उपप्रधानमन्त्री एवं सहरी विकासमन्त्री प्रकाशमान सिंहसँग शिष्टाचार भेट गर्नेछन् र भोली नै भारत फर्कने छन् ।
ट्रम्प नीतिको प्रभाव : अमेरिका घुम्न जानेहरुको संख्यामा उल्लेख्य गिरावट
एजेन्सी । अमेरिकी राष्ट्रपति डोनाल्ड ट्रम्पको नीतिका कारण विदेशी आगन्तुकहरूले संयुक्त राज्य अमेरिकाको यात्रा रद्द गर्न थालेका छन् ।
‘व्यापार युद्ध’ चर्किएसँगै विदेशी आगन्तुकहरूको मार्चमा आगमनमा लगभग १२ प्रतिशतले गिरावट आएको छ। अमेरिकी पर्यटन उद्योगले लामो समयदेखि विश्वका अन्य देशहरूसँग उल्लेखनीय व्यापार गरिरहेको थियो ।
जसले २०२४ को लागि लगभग १.३ ट्रिलियन अमेरिकी डलर राजस्व संकलन गरेको छ र लगभग १ करोड ५० लाख रोजगारी सिर्जना गरेको छ । अमेरिकी अन्तर्राष्ट्रिय व्यापार प्रशासनको तथ्याङ्क अनुसार, मध्य अमेरिकाबाट आउने आगन्तुकहरूको संख्यामा उल्लेख्य गिरावट आइसकेको छ । त्यस्तै पश्चिमी युरोपबाट आउने आगन्तुकहरूमा १७ प्रतिशतले घटेको छ। जर्मनी र स्पेनले क्रमशः २८ प्रतिशत र २५ प्रतिशतले सबैभन्दा नाटकीय गिरावट देखाएका छन्।
यी तथ्याङ्कहरूमा संयुक्त राज्य अमेरिकामा अन्तर्राष्ट्रिय पर्यटकहरूको सबैभन्दा ठूलो स्रोत क्यानडाका आगन्तुकहरू समावेश छैनन्। अमेरिकी यात्रा संघका अनुसार क्यानेडियालीहरूले वार्षिक रूपमा लगभग २ करोड भ्रमण गर्छन् । जाडोबाट बच्न फ्लोरिडा, एरिजोना र क्यालिफोर्निया जस्ता राज्यहरूमा छुट्टी मनाउन जाने र उनीहरूले २० अर्ब डलरभन्दा बढी खर्च गर्ने गरेका छन् ।
तर क्यानडाबाट संयुक्त राज्य अमेरिकाको सडक यात्रामा ३२ प्रतिशतले गिरावट आइसकेको छ । अमेरिकाबाट विमानमार्फत क्यानडा फर्कनेहरूको संख्या १३.५ प्रतिशतले घटेको छ।
ट्रम्प नीतिका कारण अमेरिकको अर्थतन्त्रमा गम्भीर असर पर्ने देखिएको छ । अमेरिकी यात्रा संघले यस वर्षभरि यस क्षेत्रले ७२ अर्ब डलर गुमाउन सक्ने चेतावनी दिएको छ।
पर्यटन अर्थशास्त्रको उद्योग अनुसन्धान फर्मले अप्रिल ३ मा जारी गरेको आफ्नो प्रतिवेदनमा २०२५ मा संयुक्त राज्य अमेरिकामा अन्तर्राष्ट्रिय आगन्तुकहरूमा ९.४ प्रतिशत गिरावट आउने प्रक्षेपण गरेको छ । (सीसीटीभीप्लस)
भान्जालाई बचाउन जाँदा मामा पनि बेपत्ता, सप्तकोशीमा खोजी तीव्र
इटहरी । सुनसरीको बराहक्षेत्र नगरपालिका–१ स्थित सप्तकोशी नदीमा नुहाउने क्रममा मामा–भान्जा बेपत्ता भएका छन् ।
सप्तकोशीमा बगेर बेपत्ता हुनेमा इटहरी उपमहानगरपालिका १६ बालग्रामका ४० वर्षीय नवराज बास्तोला र उनका १६ वर्षीय भान्जा जेनिस आचार्य रहेका जिल्ला प्रहरी कार्यालय सुनसरीका डीएसपी योगराज खतिवडाले जानकारी दिए ।
उनीहरू सोमवार बराहक्षेत्र मन्दिर नजिकै नुहाउने क्रममा नदीको तीव्र बहावमा परेका थिए । बेपत्ता परिवारका अनुसार सुरुवातमा भान्जा जेनिसलाई नदीले बगाएको थियो । उनलाई बचाउने प्रयासमा मामा नवराज पनि नदीमा फसेर बेपत्ता भएका हुन् ।
घटनापछि नेपाल प्रहरी र सशस्त्र प्रहरीले तत्कालै खोज तथा उद्धार कार्य सुरु गरेको छ । हालसम्म दुबै जना फेला नपरेको डीएसपी खतिवडाले जानकारी दिए ।
शुभकामना दिएको २४ घन्टामै पोप फ्रान्सिसको निधन
एजेन्सी । विश्वभरका क्याथोलिकहरुका आध्यात्मिक नेता पोप फ्रान्सिसको ८८ बर्षको उमेरमा निधन भएको छ । भ्याटिकनमा स्थानीय समयानुसार सोमवार बिहान ७ः३५ बजे , ८८ वर्षीय फ्रान्सिसको निधन भएको बीबीसीले जनाएको छ ।
कार्डिनल केभिन फेरेललाई उद्धृत गर्दै बीबीसीले जनाए अनुसार उनी मिर्गौला र श्वासप्रश्वास सम्बन्धी समस्याबाट पीडित थिए । लामो समय अस्पतालमा भर्ना भएर हालै घर फर्किएका थिए ।
भ्याटिकनको सेन्ट पिटर्स स्क्वाएरमा ‘ईस्टर सन्डे’का निम्ति उपस्थित भएको २४ घण्टा नबित्दै पोपको निधन भएको छ।
गत महिना पाँच सातासम्म अस्पतालमा भर्ना भएर फिर्ता भएका उनी आइतवार ह्वीलचेअरमा बसेर सेन्ट पिटर्स बसिलिकामा उपस्थित भीडलाई सम्बोधन गर्दै शुभकामना दिएका थिए ।
पोप फ्रान्सिस अर्जेन्टिनाका एक जेसुइट पादरी थिए, जो २०१३ मा रोमन क्याथोलिक चर्चका २६६ औं पोप बनेका थिए । उनी पोप बेनेडिक्ट सोह्रौंको उत्तराधिकारी निर्वाचित भएका थिए । (बीबीसी)
भारतीय विद्युत् मन्त्री नेपाल आउँदै, अरुण–३ को अवलोकन गर्ने
काठमाडौँ। भारतीय विद्युत् र आभास तथा शहरी मामिलामन्त्री मनोहरलाल खट्टर नेपाल आउने भएका छन् । मन्त्री खट्टर अरुण–३ जलविद्युत आयोजनाको अवलोकनको लागि मंगलबार (बैशाख ९ गते) नेपाल आउन लागेका हुन् ।
भारतीय कम्पनी सतलज जलविद्युत् निगम (एसजेवीएन)को स्वामित्वमा रहेको एसजेवीएन अरुण–३ पावर डेभलपमेन्ट कम्पनी (एसएपीडीसी)ले निर्माण गरिरहेको उक्त आयोजनाको निरीक्षणको लागि मन्त्री खट्टर आउन लागेको बताइएको छ ।
आयोजनाको अवलोकन गरी खट्टर बुधबार स्वदेश फर्किने छन् । साथै, ऊर्जा, जलस्रोत तथा सिँचाइमन्त्री दीपक खड्का पनि अरुण–३ को अवलोकन गर्न पुग्ने बताइएको छ । उक्त कार्यक्रममा एसजेवीएनका अध्यक्ष राज कुमार चौधरी तथा प्रमुख प्रशासकीय अधिकृत (सीईओ) प्रशान्त शर्माको पनि सहभागिता हुनेछ ।
विशेष गरी ऊर्जा मन्त्री दीपक खड्काको निमन्त्रणामा खट्टर नेपाल आउन लागेका हुन् । खट्टरले मन्त्री खड्कासँग अन्य जलविद्युत् आयोजनामा भारतीय लगानी साथै नयाँ आयोजनाका विषयमा छलफल गर्ने कार्य तालिका छ ।
यस्तै, उनले ९ गते नै अरुण–३ जलविद्युत आयोजनाको बाँध तथा पावर हाउस क्षेत्रको निरीक्षण गरी काठमाडौँ फर्किने छन् । सोही दिन ऊर्जामन्त्री खड्कासँगै भारतका विद्युत् मन्त्री खट्टरले विभिन्न ठाउँका सवस्टेशन संयुक्त रूपमा उद्घाटन गर्ने छन् ।
यसैगरी दुई देशले संयुक्त लगानीमा निर्माण गर्न लागेको प्रसारण लाइनको सम्झौतापत्रमा हस्ताक्षर गरेर निर्माणको प्रक्रिया अगाडि बढाइने बताइएको छ । वैशाख १० गते मन्त्री खट्टरले मुस्ताङको मुक्तिनाथको दर्शन गरी नेपाली मन्त्री तथा प्रधानमन्त्रीलाई भेटेर भारत फर्किने एसजेवीएनले जानकारी दिएको छ ।
एसजेवीएनले संखुवासभामा नौ सय मेगावाट क्षमताको अरुण तेस्रोको काम अहिले तीव्र गतिमा भइरहेको छ । अरुण तेस्रो आयोजनाको अधिकांश संरचनाको काम अन्तिम चरणमा पुगी सकेको छ । कम्पनीले सो आयोजनाको काम छिटो सक्ने लक्ष्यका साथ गरिरहेको छ । यस्तै, एसजेवीएनको सहायक एसएपीडीसीले ६६९ मेगावाटको तल्लो अरुण जलविद्युत् आयोजना निर्माण गरिरहेको छ ।
