काठमाडौं । सरकारले पूर्वगृहमन्त्री सुधन गुरुङ्ग मन्त्री हुँदा र त्यसपछि उठेका सार्वजनिक सरोकारका विषयमा अध्ययन तथा छानबिन गर्न समिति गठन गरेको छ। मन्त्रिपरिषद्को २०८३ वैशाख २८ गतेको बैठकले उच्च अदालतका पूर्वन्यायाधीश अच्यूतप्रसाद भण्डारी अध्यक्ष, महालेखा नियन्त्रक शोभाकान्त पौडेल र सहन्यायाधीवक्ता अच्युतमणी न्यौपाने सदस्य रहने गरी समिति गठन गर्ने निर्णय गरेको हो ।
गुरुङले पदबाट राजीनामा दिएको २१ दिनपछि छानबिन समिति गठन भएको हो । उनले वैशाख ९ गते पदबाट राजीनामा दिएका थिए ।

बाँके । ‘हामीले यो ठाउँलाई केवल बस्ने ठाउँ मात्रै बनाएका थिएनौँ, यहीँ हाम्रो जीवन थियो, बच्चाहरूको भविष्य थियो, बूढाबूढीको सहारा थियो,’ शान्तिनगरकी देवकला सापकोटाले भक्कानिँदै भनिन्, ‘डोजर चलेको दिनदेखि बच्चाहरू डराएर रातभर सुत्न सकिरहेका छैनन् । उनीहरू आफ्नो किताबकापी खोजिरहेका छन् ।

स्कूल जानुपर्ने उमेरका छोराछोरी अहिले खुला आकाशमुनि बस्न बाध्य छन् । बिहान उठ्दा उनीहरूले ‘आमा हाम्रो घर फेरि बन्छ ?’ भनेर सोध्छन्, तर मसँग जवाफ छैन ।’

उनले होल्डिङ सेन्टरको कष्टपूर्ण अवस्थाबारे थप्दै भनिन् ‘सानो बच्चालाई पोषणयुक्त खाना चाहिन्छ, दूध चाहिन्छ, तर अहिले हामीलाई दुई छाक कसरी जुटाउने भन्ने चिन्ता छ । बिरामी परेका जेष्ठ नागरिकलाई समयमै औषधि खुवाउन सकिएको छैन । कतिपयले नियमित उपचार गराउँदै आउनुभएको थियो, तर अहिले अस्पताल लैजाने अवस्था पनि छैन । गर्भवती र सुत्केरी महिलालाई आराम चाहिन्छ, तर यहाँ रात कटाउनै मुस्किल छ ।’

कोहलपुर नगरपालिका वडा नम्बर ११ स्थित कोहलपुर नगर विकास समितिको स्वामित्वमा रहेको जग्गामा निर्माण गरिएका १ सय ४० घरटहरा हटाइएपछि त्यहाँ बसोवास गर्दै आएका सयौँ परिवार अहिले अस्थायी होल्डिङ सेन्टरमा जीवन बिताउन बाध्य भएका छन् । सो क्षेत्रमा करिब ७ सय ५१ परिवार बस्दै आएका थिए ।

विस्थापितमध्येका गोरखबहादुर घर्तीले डोजर चलेको क्षण सम्झिँदै भारी मनले भने, ‘हामी गरिब थियौँ, तर मेहनत गरेर सानो घर बनाएका थियौँ । त्यो घरमा हाम्रा दुःख, पसिना र सपना गाँसिएका थिए । डोजरले घर भत्काउँदा हामीलाई हाम्रो अस्तित्व नै मेटाइयो जस्तो लाग्यो ।’
उनले थपे, ‘मेरो नातिनातिना नियमित स्कूल जान्थे । उनीहरूको पढाइ राम्रो हुँदै थियो । अहिले किताब, पोशाक, कापी सबै हराएको छ । बच्चाहरू तनावमा छन् । साना बच्चाले राम्रो खाना नपाउँदा बिरामी पर्न थालेका छन् । बूढी आमाले नियमित औषधि खानुहुन्छ, तर अहिले औषधि किन्ने पैसा छैन । रातभर उहाँको स्याहार गर्नुपर्छ । हामीसँग बस्ने ठाउँ त छैन भने उपचार कसरी गराउने ?’

कोहलपुर ५ का रामबहादुर गाइनले होल्डिङ सेन्टरको भीडभाडतर्फ हेर्दै भारी मनले भने, ‘वर्षौँदेखि दुःख गरेर बनाएको घर एकैदिनमा माटोमा मिल्यो । त्यो केवल चार वटा भित्ता र टिनको छानो मात्रै थिएन, त्यो हाम्रो जीवन थियो, हाम्रो आश्रय थियो, बच्चाहरूको भविष्य थियो । त्यो सबै चक्नाचुर भयो ।’

बिहान बेलुका मजदुरी गरेर एकएक रुपैयाँ जोगाउँदै घर बनाएका बताउने राम बहादुरले त्यही घरमा बच्चाहरू हुर्किएको सम्झंदै छाना र माना दुवै नभएको पीडा सुनाए ।

उनले केहीबेर रोकिँदै गहभरि आँसु पार्दै भने, ‘घर भत्किँदा मेरा साना छोराछोरीले कराउँदै ‘हाम्रो घर किन भत्काइयो रु भनेर सोधिरहेका थिए । उनीहरूको त्यो रोदन अझै कानमा गुञ्जिरहेको छ । अहिले होल्डिङ सेन्टरमा सबैजना एउटै साघुँरो कोठामा बसिरहेका छौँ । गर्मीले सास फेर्न गाह्रो हुन्छ । राति बच्चाहरू निदाउन सक्दैनन् । राम्रो खाना छैन, सफा ठाउँ छैन । बिरामी पर्न थालेका छन् ।’

उनले मैलो गम्छाले निधारको पसिना पुच्दै थपे, ‘मेरो परिवारमा जेष्ठ नागरिक हुनुहुन्छ । उहाँलाई दैनिक औषधि चाहिन्छ । पहिले जसोतसो मजदुरी गरेर औषधि किन्थ्यौँ, तर अहिले औषधि किन्ने कि बच्चालाई खाना खुवाउने भन्ने अवस्था आएको छ । सुत्ने निश्चित ठाउँ छैन । वर्षात् सुरु भयो भने कहाँ ओत लाग्ने भन्ने चिन्ता छुट्टै छ ।’

रामबहादुरले भविष्यको चिन्ता गर्दै भने,‘अब फेरि नयाँ घर कसरी बनाउने ? कहाँबाट सुरु गर्ने ? हामीसँग न जग्गा छ, न पैसा छ । जीवनभरी कमाएको सबै धन त्यही घरमा लगाएको थिएँ । पहिलेको घर बनाउनै वर्षौँ लाग्यो । फेरि उही दुःख दोहो¥याएर नयाँ घर ठड्याउन सकिन्छ कि सकिँदैन भन्ने डरले रातभर निद्रा लाग्दैन । उमेर पनि ढल्किसक्यो । अब फेरि ईँटा, काठ र टिन जोडेर घर बनाउने शक्ति कहाँबाट ल्याउने ?’ भक्कानिदै उनले भने । ‘गरिबको घर भत्किँदा केवल टिन र बाँस मात्र भाँचिँदैन रहेछ, त्योसँगै उसको साहस, सपना र भविष्य बाँच्ने भरोसा पनि टुक्राटुक्रा हुँदोरहेछ ।’

जानकी विकले पनि आँसु पुछ्दै भने, ‘हाम्रो घर भत्किँदा बच्चाहरू कराइरहेका थिए । उनीहरूले आफ्नो खेल्ने ठाउँ, पढ्ने ठाउँ सबै गुमाए । अहिले खुला ठाउँमा बस्दा उनीहरू असुरक्षित महसुस गरिरहेका छन् । सुत्केरी महिला र साना बच्चालाई निकै गाह्रो भएको छ । पानी, शौचालय र स्वास्थ्य उपचारको अभावले झन् पीडा थपिएको छ ।’

हामीलाई हटाउँदा कम्तिमा बच्चाहरूको पढाइ र बिरामीहरूको उपचारबारे सोचिएको भए हुन्थ्यो भन्ने गुनासो जानकीले गरिन् । ‘अहिले बच्चाहरू स्कूल जान पाएका छैनन् । बूढाबूढीको स्वास्थ्य बिग्रँदै गएको छ । हामीलाई केवल बस्ने ठाउँ होइन, बाँच्न सक्ने वातावरण चाहिएको हो ।’ उनले भने, ‘यहाँ ल्याएर नगरपालिकाले त राख्यो । तर यहाँ केवल आकाशबाट आउने पानी र आँधिहुरीबाट जोगिएको छ । तर हाम्रो उचित आहारको व्यवस्था कस्ले गर्ने ? छोराछोरीको स्कूल फि कसरी तिर्ने ? के यो सबै कुराको ग्यारेन्टी नगरपालिकाले लिन्छ ?’

नगरपालिकाले भने सार्वजनिक जग्गा संरक्षणका लागि अभियान सञ्चालन गरिएको जनाएको छ । नगरपालिकाले वैशाख १६ गते १० दिने अल्टिमेटम जारी गर्दै अतिक्रमित क्षेत्र खाली गर्न आग्रह गरेको थियो ।

नगर प्रमुख पूर्णप्रसाद आचार्यका अनुसार वास्तविक भूमिहीन तथा सुकुम्बासी परिवारको तथ्याङ्क प्रमाणीकरणपछि मात्रै उचित व्यवस्थापन गरिनेछ । उनले वास्तविक लाभग्राहीको पहिचान गरी दीर्घकालीन समाधानतर्फ काम भइरहेको बताए ।

यस अभियानमा स्थानीय प्रशासन, जनप्रतिनिधि, नगर प्रहरी तथा सुरक्षाकर्मी परिचालन गरिएको छ । विस्थापित परिवारका लागि अस्थायी बसोवासको रूपमा होल्डिङ सेन्टर सञ्चालनमा ल्याइएको नगरपालिकाले जनाएको छ ।

तर, होल्डिङ सेन्टरमा बसिरहेका परिवारहरूको पीडा भने अझै उस्तै छ । उनीहरूका लागि डोजरले केवल घरका भित्ता भत्काएको छैन, बालबालिकाको पढाइ, जेष्ठ नागरिकको उपचार, सुत्केरी र गर्भवती महिलाको सुरक्षा तथा वर्षौँदेखि जोडिएको आशा र भरोसामाथि नै गहिरो चोट पु¥याएको अनुभूति गराएको छ ।

काठमाडौं । सांसद निस्कल राईले प्रधानमन्त्रीको निरन्तर अनुपस्थितिप्रति आपत्ति जनाएका छन् ।

आज बसेको प्रतिनिधिसभा बैठकको आकस्मिक समयमा बोल्दै उनले सदनमा प्रधानमन्त्रीको उपस्थिति खोजिएको भए पनि आज पनि प्रधानमन्त्री उपस्थित नभएको बताए ।

उनले भने, ‘सासदहरुले सदनमा प्रधानमन्त्रीको उपस्थिति खोज्नु भयो । आज पनि अवस्था उस्तै छ । सदनमा प्रधानमन्त्रीको उपस्थिति छैन । आफैले बनाएको नीति तथा काय क्रममा उठेको प्रश्नको जवाफ दिने क्रममा कार्य सूचि आज देखिएको छ । तर सदन प्रधानमन्त्रीलाई देखेनै ।’

सांसद राईले संसदको गरिमा र प्रतिष्ठा जोगाउने जिम्मेवारी सभामुखको भएको उल्लेख गर्दै सभामुखले सदनको इज्जत कायम राख्न नसके कसैले पनि संसदको गरिमा बढाउन नसक्ने धारणा राखे ।

उनले भने, ‘सभाको गरीमा बढाउने र इज्जत जोगाउने सभामुखको हो । सभामुखले सभाको इज्जत राख्न सक्नु भएन भने कसैले पनि सभाको गरीमा बढाउन सक्दैनन् । सभामुख मार्फत तत्काल प्रधानमन्त्रीलाई सदनमा बोलाउन आग्रह गर्दछु । ’

उनले सभामुखमार्फत तत्काल प्रधानमन्त्रीलाई सदनमा उपस्थित गराउन आग्रह समेत गरे ।

काठमाडौं । नेपाल इन्भेष्टमेन्ट मेगा बैंक लिमिटेडका प्रमुख कार्यकारी अधिकृत (सीइओ) ज्योति प्रकाश पाण्डे ठगी तथा आपराधिक विश्वासघात सम्बन्धी कसूरमा पक्राउ परेका छन् ।

‘स्मार्ट टेलिकम प्रा. लि’ को अनुमतिपत्र रद्द भई नेपाल सरकारको नियन्त्रणमा रहेको सम्पत्तिलाई बेइमानीपूर्वक हानी नोक्सानी पु¥याएको आरोपमा प्रहरीले उनलाई नियन्त्रणमा लिएको हो । ६३ वर्षीय पाण्डेलाई जिल्ला प्रहरी कार्यालय सिन्धुलीको सहयोगमा सिन्धुलीको बसपार्कस्थित मदनभण्डारी राजमार्गबाट लुकिछिपी भागिरहेको अवस्थामा मिति २०८३÷०१÷२९ गते राति पक्राउ गरिएको केन्द्रीय अनुसन्धान ब्यूरो (सीआइबी) ले जनाएको छ ।

अनुसन्धानका अनुसार, स्मार्ट टेलिकमले अनुमतिपत्र नवीकरण नगरेपछि सरकारको स्वामित्वमा आएका भौतिक संरचना र प्रणालीहरूलाई लिलामी प्रक्रियामार्फत सरकारी हक टुटाउने उद्देश्यले काम गरेको पाइएको छ । पाण्डे लोन रिकभरी कमिटिको अध्यक्षको हैसियतमा उक्त प्रक्रियामा संलग्न थिए । उनले प्रयोग गर्ने मोबाइल फोन स्विच अफ गरी फरार हुन खोज्दा प्रहरीले सवारी चेकजाँचको क्रममा उनलाई फेला पारेको थियो ।

यसका साथै, नेपाल इन्भेष्टमेन्ट मेगा बैंकले २०८२÷०६÷०३ मा निकालेको लिलामी सूचनामा घरबहाल र विद्युत महसुल वापतको ४० करोड रुपैयाँ समेत कबोल गर्नुपर्ने शर्त राखेको देखिएको छ । बैंकले उक्त रकम लिएर पनि हालसम्म घरधनी र विद्युत महसुल नबुझाई ठगी गरेको भन्दै प्रहरीले मुलुकी अपराध संहिता, २०७४ अन्तर्गत थप अनुसन्धान अगाडि बढाएको छ ।

यस घटनामा संलग्न अन्य विषय र प्रमाणहरूका बारेमा ब्यूरोले थप खोजी गरिरहेको प्रवक्ता शिव कुमार श्रेष्ठले जानकारी दिएका छन् ।

काठमाडौं । अमेरिकी राष्ट्रपति डोनाल्ड ट्रम्प तीनदिने उच्चस्तरीय चीन भ्रमणका लागि बिहीबार प्रस्थान गरेका छन् । ट्रम्प र चिनियाँ राष्ट्रपति सी जिनपिङबीच हुने बहुप्रतीक्षित भेटवार्तामा दुई देशबीचको व्यापार, प्रविधि तथा द्विपक्षीय सम्बन्धका विभिन्न विषयमा छलफल हुने अपेक्षा गरिएको छ । ट्रम्पले व्यापार नै वार्ताको मुख्य एजेन्डा हुने संकेत दिएका छन् ।

यो ट्रम्प र सी जिनपिङबीचको नवौँ प्रत्यक्ष भेटवार्ता हुनेछ । साथै, सन् २०१७ पछि कुनै अमेरिकी राष्ट्रपतिको यो पहिलो चीन भ्रमण पनि हो ।
ह्वाइट हाउसका अनुसार अमेरिकी प्रथम महिला मेलानिया ट्रम्प यस भ्रमणमा सहभागी हुने छैनन् । चीन प्रस्थानअघि सञ्चारकर्मीसँग कुरा गर्दै ट्रम्पले भ्रमणप्रति आशावादी रहेको बताएका छन् । उनले चीनसँग आगामी धेरै दशकसम्म बलियो सम्बन्ध कायम रहने विश्वास व्यक्त गरे ।

‘राष्ट्रपति सीसँग मेरो सम्बन्ध निकै राम्रो छ । हामी सधैं राम्रोसँग मिलेर काम गरेका छौँ र चीनसँगको सहकार्य सकारात्मक रहेको छ,’ ट्रम्पले भने । इरानसँग सम्भावित सम्झौतामा सी जिनपिङले भूमिका खेल्न सक्ने विषयमा सोधिएको प्रश्नमा ट्रम्पले इरानलाई सैन्य रूपमा कमजोर बनाइएको दाबी गर्दै अमेरिका आफ्नो लक्ष्य पूरा गर्न सक्षम रहेको बताए ।

ट्रम्पले चीनसँग हुने वार्तामा व्यापार सबैभन्दा महत्वपूर्ण विषय रहने पनि उल्लेख गरे । यस भ्रमणमा ट्रम्पसँग अमेरिकी विदेशमन्त्री मार्को रुबियो, रक्षामन्त्री पिट हेगसेथलगायत उच्च अधिकारी सहभागी छन् । त्यस्तै, प्रविधि, वित्त, रक्षा तथा उपभोक्ता क्षेत्रका प्रमुख अमेरिकी कम्पनीका प्रतिनिधिहरू पनि अमेरिकी प्रतिनिधिमण्डलमा सहभागी रहेको जनाइएको छ । एएनआई

काठमाडौँ । सरकारले नेपाली जलको ब्राण्डिङ गर्ने नीति लिएको छ ।
सोमबारसंसद्को संयुक्त बैठकमा राष्ट्रपति रामचन्द्र पौडेलले सरकारको को नीति तथा कार्यक्रम प्रस्तुत गर्दै हिमालयन ओरिजिन सर्टिफाइड वाटर अवधारण मार्फत नेपाली जलको ब्राण्डिङ गरिने जानकारी दिएका हुन् ।
उनले भने, हिमालयन ओरिजिन सर्टिफाइड वाटर अवधारण मार्फत नेपाली जलको ब्राण्डिङ गरिने भएको छ । त्यस्तै उनले सीमा विवादको समाधान कूटनीतिक संवादबाट खोजिने पनि जानकारी दिए ।

काठमाडौं । संघीय संसद्का दुवै सदनको बैठक आज बस्ने भएको छ । राष्ट्रपति रामचन्द्र पौडेलले संघीय संसद्का दुवै सदनको संयुक्त बैठकलाई आज सम्बोधन गर्ने कार्यक्रम रहेको संसद् सचिवालयले जनाएको छ ।

संविधानको धारा ९५ अनुसार राष्ट्रपतिले अपराह्न ४ बजे संयुक्त सदनमा सरकारको नीति तथा कार्यक्रम प्रस्तुत गर्नेछन् ।

राष्ट्रपति पौडेलबाट नीति तथा कार्यक्रम प्रस्तुत हुने संयुक्त बैठकमा दिउँसो ३ :४५ बजे अगावै उपस्थित हुन प्रतिनिधिसभा तथा राष्ट्रियसभाका सदस्यलाई आग्रह समेत गरेको छ ।

यसअघि प्रतिनिधिसभा र राष्ट्रियसभाको दुवै बैठक दिउँसो २ बजेदेखि छुट्टाछुट्टै सुरु हुनेछ ।

काठमाडौं । हाल नेपालमा पश्चिमी वायू, स्थानीय वायू र नेपालको पूर्वी भूभाग नजिक तल्लो वायूमण्डलमा रहेको न्यून चापीय क्षेत्रको साथै मध्य र पूर्वी भूभागको उपल्लो वायूमण्डलमा रहेको न्यून चापीय रेखाको समेत आंशिक प्रभाव रहेको छ ।

अहिले कोशी प्रदेश लगायत बागमती र गण्डकी प्रदेशका पहाडी तथा हिमाली भूभागहरूमा साधारणतया बादल तथा देशका बाँकी भूभागहरूमा आंशिक बादल लागिरहेको छ । कोशी र बागमती प्रदेशका हिमाली तथा पहाडी भूभागहरूमा तथा लुम्बिनी प्रदेशको हिमाली भूभागको एकरदुई स्थानमा मेघगर्जन र चट्याङसहित मध्यम वर्षा भैरहेको छ।

दिउँसो सुदूरपश्चिम प्रदेश लगायत देशका हिमाली र पहाडी भूभागमा साधारणतया बादल लाग्नेछ र तराई भूभागमा आंशिक बादल लाग्नेछ। देशका हिमाली र पहाडी भूभागका थोरै स्थानहरूमा तथा लुम्बिनी र सुदूरपश्चिम प्रदेशका तराई भू(भागका एकरदुई स्थानमा मेघगर्जन र चट्याङ्गसहित मध्यमसम्म वर्षाको सम्भावना रहेको छ।

आज राती कोशी, मधेश, बागमती, गण्डकी र लुम्बिनी प्रदेश लगायत देशका हिमाली र पहाडी भूभागमा साधारणतया बादल लाग्नेछ र बाँकी भूभागमा आंशिक बादल लाग्नेछ। कोशी, मधेश, बागमती, गण्डकी र लुम्बिनी प्रदेशका थोरै स्थानहरूमा तथा बाँकी प्रदेशका एक(दुई स्थानमा मेघगर्जन र चट्याङ्गसहित मध्यमसम्मको वर्षा र हिमपातको सम्भावना रहेको छ।

काठमाडौं । सगरमाथा आधार शिविरमा सरकारी निकायको कमजोर उपस्थितिले अनाधिकृत गतिविधि बढेको पाइएको छ । आरोहणका लागि पुगेका स्वदेशी तथा विदेशीहरुले राष्ट्रियता र सार्वभौकितामा समेत असर पर्ने किसिमका गतिविधि गर्ने गरेको आरोहण दलका सदस्यहरुले बताउने गरेका छन् ।

यस वर्षको वसन्त ऋतुमा सगरमाथा आरोहणबाट उल्लेख्य राजस्व सङ्कलन भएपनि अवैधानिक तथा अनाधिकृत गतिविधि बढेको प्रत्यक्षदर्शीहरुले बताए । हालै एक टेन्टमा भारतीय झन्डा फहराइएको तस्विरप्रति धेरैले चासो देखाएका छन् । त्यहाँ नेपाल–भारतको संयुक्त झण्डा भएपनि भारतीय ठूलो र नेपाली झन्डालाई खुम्चाइए(सानो आकार)को देखिन्छ । इन्डो–तिब्बत सीमा प्रहरीको टोलीले झन्डा राखेको अनुमान गरेपनि आधिकारिक प्रमाण फेला परेको छैन् ।

नेपाल सरकारको पर्यटन विभागको फिल्ड अफिस आधार शिविरमा भएपनि न्यून संख्याका कर्मचारी र क्षेत्राधिकार सिमित भएकाले अवैधानिक गतिविधि न्यूनीकरण हुन सकेको छैन् ।

पर्यटन विभागका महानिर्देशक रामकृष्ण लामिछानेले क्षेत्राधिकार भित्र रहेर अधिकतम काम गरिरहेको प्रष्टाए । ‘हामीसँग पाँच जनाको टोली छ, यो पर्याप्त होइन । जटिल भूगोल, स्वास्थ्य समस्या र अत्यावश्यक सामग्रीको अभाव छ । जोकोही लामो समयसम्म बसेर काम गर्ने अवस्था छैन् । तर अवैध काम रोक्न भने हाम्रो टोली सक्रिय छ,’ उनले भने ।

सगरमाथाको अन्तर्राष्ट्रिय गौरवलाई कायम राख्दै तोकिएको क्षेत्राधिकारभित्र रहेर काम गर्दा सानातिना कमजोरीहरुलाई अतिरन्जित नगर्न उनले आग्रह समेत गरे । ‘भौगोलिक अवस्था जटिल रहेकाले सबैतिर सरकारी नजर नपुगेको हुनसक्छ, आरोहीहरुको संख्या धेरै भएकाले काम गर्न सहज छैन् । तर गौरवको विषयलाई ध्यान दिनपर्ने बाध्यता छ,’ उनले भने ।

यता, विभागको फिल्ड कार्यालयले अनाधिकृत रुपमा राखिएका झन्डा वा अन्य सामग्रीहरु हटाइसकेको दाबी गरेको छ । साथै अन्य अवैध गतिविधि नियन्त्रणमा सक्रिय रहेको जनाएको छ ।

सुनसरी, बराहक्षेत्र । बराहक्षेत्र नगरपालिका–३ नडाहस्थित टेकाने रोस्ट एण्ड सेकुवा कर्नर सभाहलमा साहित्य सम्मान तथा पुरस्कार समर्पण कार्यक्रम भव्य रूपमा सम्पन्न भएको छ। कार्यक्रममा स्थानीय लेखक, कवि, साहित्यकार तथा युवा समाजसेवीहरूको उल्लेखनीय उपस्थिति रहेको थियो।

कार्यक्रममा साहित्य क्षेत्रमा उच्च योगदान पुर्‍याएको भन्दै रेखा सुवेदीलाई “स्वर्णिम साहित्य पुरस्कार” प्रदान गरिएको थियो। उहाँलाई नगद रु. ५०,००५, प्रमाणपत्र, ट्रफी तथा दोसल्लासहित सम्मान गरिएको आयोजकले जनाएको छ।

त्यसैगरी साहित्य क्षेत्रमा पुर्‍याएको विशेष योगदानको कदर गर्दै शरणकुमार राईलाई नगद रु. १०,००५, प्रमाणपत्र, ट्रफी तथा दोसल्लासहित सम्मान गरिएको थियो।

“सम्पूर्ण सर्जकहरू एक हौं, सभ्य समाज निर्माणमा जुटौं” भन्ने मूल नाराका साथ आयोजित कार्यक्रममा लोकगायक तेजेन्द्र  गन्धर्भले सांगीतिक प्रस्तुति प्रस्तुत गर्नुभएको थियो। कार्यक्रममा शुभकामना मन्तव्य राख्ने वक्ताहरूले समाजलाई सही दिशातर्फ अग्रसर गराउन तथा चेतना अभिवृद्धि गर्न साहित्यको महत्वपूर्ण भूमिका रहने धारणा व्यक्त गरेका थिए।

उक्त समारोहका प्रमुख अतिथि प्राज्ञ तथा सुप्रसिद्ध कवि–साहित्यकार श्रवण मुकारुङ रहनुभएको थियो। कार्यक्रम आयोजक समितिका संयोजक तथा साहित्यकार प्रकाश दिप्शालीको सभापतित्वमा सम्पन्न भएको थियो।