गोरखा । गोरखाको चुमनुब्री गाउँपालिका–६ स्थित बूढीगण्डकी नदीमा आएको ठूलो बाढीलाई मध्यनजर गर्दै नदीको तटीय क्षेत्रमा बसोबास गर्ने नागरिकलाई सतर्क रहन आग्रह गरिएको छ ।

बाढीको जोखिमलाई ध्यानमा राख्दै गोरखा, तनहुँ, चितवन तथा नवलपरासी पूर्व र पश्चिमका नदी तटीय क्षेत्रमा बसोबास गर्ने नागरिकसम्म तत्काल सूचना पुर्‍याउन अपिल गरिएको छ ।

सम्भावित जोखिममा रहेका बस्तीका बासिन्दालाई समयमै सुरक्षित स्थानमा सार्न र आवश्यक परे खोज तथा उद्धार कार्यमा सहयोग गर्न आग्रह गरिएको छ ।

काठमाडौं । देशभरका प्रमुख नदीनालाहरूमा पानीको बहाव हाल सतर्कता तहभन्दा तल सामान्य अवस्थामा रहेको छ । बाढी पूर्वानुमान महाशाखाले जारी गरेको बुलेटिनअनुसार आज सबै मुख्य नदीहरूमा जलसतह सामान्य घटबढको स्थितिमा रहेको छ । 

महाशाखाको पूर्वानुमान अनुसार आज देशभर बाढीको आकस्मिक जोखिम न्यून रहेको छ । यद्यपि, भोलि (आइतबार) भने केही नदीहरूको जलसतह उल्लेख्य रूपमा बढ्न सक्ने प्रक्षेपण गरिएको छ ।  

भोलि कोशी जलाधारअन्तर्गत तमोर (माझिटार र त्रिवेणी) तथा अरुण नदी (तुर्किघाट र सिम्ले) मा जलसतह उल्लेख्य बढ्ने पूर्वानुमान छ । यस्तै, नारायणी जलाधारअन्तर्गत बुढीगण्डकी (आरुघाट) र मर्स्याङ्दी (भकुन्डेबेसी र विमलनगर) तथा महाकाली नदी (दत्तु र पारिगाउँ) मा पनि पानीको बहाव उल्लेख्य बढ्ने महाशाखाले जनाएको छ । 

सप्तकोशी, त्रिशुली, कर्णाली, बाग्मती, पश्चिम राप्ती, बबई तथा कमला लगायतका अन्य प्रमुख नदीहरूमा भने आगामी केही दिनसम्म बहाव सामान्य घटबढमै रहनेछ । महाशाखाले देशभरका अधिकांश स–साना नदीहरूमा समेत बहाव सामान्य रहने र तत्काल आकस्मिक बाढी (फ्ल्यास फ्लड) को ठूलो जोखिम नरहेको स्पष्ट पारेको छ ।

काठमाडौं । जडीबुटी खोज्न हुम्ला-मुगु सीमावर्ती मिमी पाटन पुगेका मुगुका तीन जनाको मृत्यु भएको छ।

जडीबुटी संकलन गर्ने क्षेत्रको सीमा र उपयोगलाई लिएर भएको झडपमा एक जनाको घटनास्थलमै मृत्यु भएको थियो । त्यसपछि सम्पर्कविहीन भएका थप दुई जनाको शव उच्च हिमाली क्षेत्रमा हिउँमुनि फेला परेको हो ।

मुगुम कार्मारोङ गाउँपालिका(९ पापुका २२ वर्षीय गणेशबहादुर बुढाको असोज ११ गते भएको झडपमा मृत्यु भएको थियो। सोही टोलीका ३६ वर्षीय ललितजङ्ग बडुवाल र अंगबहादुर रोकाया भने त्यसपछि सम्पर्कविहीन भएका थिए ।

बडुवालको शव असोज १७ गते हुम्लाको चंखेली गाउँपालिका-२ को सीमाना पर्ने मिमी लेक क्षेत्रमा हिउँले पुरिएको अवस्थामा भेटिएको थियो। रोकायाको शव बुधबार सानो मिमी क्षेत्रमा फेला परेको जिल्ला प्रहरी कार्यालय मुगुले जनाएको छ ।

डिएसपी रविराज थपलियाका अनुसार दुवै शव फेला परेसँगै सम्पर्कविहीन भएका दुई जनाको खोजी कार्य सकिएको छ । बिहीबार बिहान संयुक्त सुरक्षा टोलीले दुवै शव मुगुको छाइलाबाट गाडीमा राखेर जिल्ला अस्पताल मुगुतर्फ ल्याएको छ ।

मृतक तीनै जनासहित पापु र छाइलाका १३ जना असोज १० गते जडीबुटी खोज्न गाउँबाट निस्किएका थिए । झडपपछि १० जना सम्पर्कमा आए पनि बडुवाल र रोकाया बेपत्ता भएका थिए ।

उनीहरूको खोजीका लागि जिल्ला सुरक्षा समितिको निर्णयअनुसार नेपाली सेनाको नेतृत्वमा २० सदस्यीय संयुक्त सुरक्षा टोली परिचालन गरिएको थियो । सेनाका सात, नेपाल प्रहरीका सात र सशस्त्र प्रहरीका छ सदस्य टोली असोज १९ गते घटनास्थलतर्फ गएको थियो ।

अत्यधिक उचाइ, बाक्लो हिउँ, कठिन भूगोल र प्रतिकूल मौसमका बिच सुरक्षाकर्मीले खोजी गरेका थिए। घटनास्थलसम्म पुग्नै कठिन रहेकाले शव खोजी र उद्धारमा चुनौती देखिएको थियो।

मिमी पाटन कुट्की, जटामसीलगायत बहुमूल्य जडीबुटी पाइने उच्च हिमाली क्षेत्र हो। मुगुम कार्मारोङ गाउँपालिका-७, ८ र ९ का स्थानीय लामो समयदेखि यहाँ जडीबुटी संकलन गर्न जाने गरेका छन्।

स्थानीयका अनुसार जडीबुटी संकलन हुने वन क्षेत्रको सीमा र उपयोगलाई लिएर दुई पक्षबिच विगतदेखि नै विवाद रहँदै आएको छ। यस पटकको विवाद झडपमा परिणत हुँदा एक जनाको ज्यान गयो भने बेपत्ता भएका थप दुई जनाको शव पनि हिमालमै भेटिएको हो।

विराटनगर । कोशी प्रदेश सरकारले सामाजिक विकास मन्त्रालयको प्रशासनिक नेतृत्वको जिम्मेवारी मुख्यमन्त्री तथा मन्त्रिपरिषद् कार्यालयका सचिव रामकृष्ण अधिकारीलाई दिएको छ ।

बिहीबार बसेको प्रदेश मन्त्रिपरिषद्को बैठकले अर्को व्यवस्था नभएसम्मका लागि अधिकारीलाई सामाजिक विकास मन्त्रालयको कामकाजसमेत सम्हाल्ने गरी थप जिम्मेवारी तोकेको हो ।

मन्त्रालयको नियमित प्रशासनिक कामकाज सञ्चालनमा सहजता ल्याउन अधिकारीलाई थप जिम्मेवारी दिइएको प्रदेश सरकारले जनाएको छ ।

बैठकले प्रदेश योजना आयोगको वार्षिक प्रतिवेदन प्रदेशसभामा पेश गर्ने निर्णय गरेको छ ।

त्यस्तै, प्रदेश आर्थिक कार्यविधि तथा वित्तीय उत्तरदायित्व ऐन, २०७८ तथा नियमावलीबमोजिम आन्दोलनका क्रममा नष्ट भएका प्रदेशसभा सचिवालयका अचल सम्पत्ति मिनाहा गर्ने निर्णय पनि बैठकले गरेको छ ।

मन्त्रिपरिषद् बैठकले कोशी प्रदेश अपाङ्गता भएका व्यक्तिको अधिकारसम्बन्धी विधेयक तर्जुमाका लागि सैद्धान्तिक स्वीकृति प्रदान गरेको छ ।

स्वास्थ्य मन्त्रालयअन्तर्गतका निकायका लागि अस्थायी दरबन्दी स्वीकृत गर्ने निर्णयसमेत बैठकले गरेको छ । 

काठमाडौं । पूर्वराष्ट्रपति विद्यादेवी भण्डारीले नेकपा (एमाले) को वरिष्ठ उपाध्यक्ष पदको सपथ लिएकी छिन् । 

बिहीबार पार्टीको कार्यालय च्यासलमा आयोजित एक कार्यक्रमकाबीच भण्डारीलाई अध्यक्ष केपी शर्मा ओलीले सपथ गराएका हुन् । 

असोज ५ देखि ८ गतेसम्म बसेको एमाले केन्द्रीय कमिटी बैठकले उनलाई वरिष्ठ नेतामा मनोनीत गरेको थियो । 

भण्डारीले बरिष्ठ नेताको पदमा शपथ ग्रहण गरेपछि स्थायी कमिटी बैठक औपचारिक रूपमा सुरु भएको छ ।

काठमाडौं । नेपाली कांग्रेसको १५औँ महाधिवेशनअन्तर्गत नयाँ केन्द्रीय नेतृत्व चयनका लागि आज बिहीबार मतदान हुँदैछ। कांग्रेसको नयाँ नेतृत्व चयनका लागि बिहान १० बजेदेखि मतदान सुरु हुने भएको हो।

महाधिवेशनमा सहभागी ७ हजार २५५ जना महाधिवेशन प्रतिनिधिले कांग्रेसको २९७ सदस्यीय केन्द्रीय कार्यसमिति चयन गर्न मतदान गर्नेछन्। सभापतिसहित पदाधिकारी र केन्द्रीय सदस्यका लागि उम्मेदवारी दिएका नेताहरूको अन्तिम नामावली निर्वाचन समितिले बुधबार साँझ सार्वजनिक गरिसकेको छ।

यसअघि निर्वाचन समितिले बिहान ७ बजेदेखि मतदान सुरु गर्ने कार्यतालिका सार्वजनिक गरेको थियो। तर भारी वर्षा तथा केही प्राविधिक कारणले मतदानको समय तीन घण्टा पछि सारिएको निर्वाचन समितिले जनाएको छ।

केन्द्रीय निर्वाचन समितिका संयोजक एवं वरिष्ठ अधिवक्ता प्रेमबहादुर खड्काका अनुसार मतदान बिहान १० बजेदेखि साँझ ६ बजेसम्म हुनेछ। मतदानका लागि महाधिवेशन प्रतिनिधिको प्रदेश तथा प्रतिनिधित्वका आधारमा छुट्टाछुट्टै मतदान केन्द्रको व्यवस्था गरिएको छ।

निर्वाचन समितिले सार्वजनिक गरेको संशोधित निर्वाचन कार्यतालिकाअनुसार बागमती प्रदेशका प्रतिनिधिले राष्ट्रिय सभा गृहमा रहेको मतदान केन्द्र ‘क’ बाट मतदान गर्नेछन्। खुलामञ्चलाई मतदान केन्द्र ‘ख’ तोकिएको छ। खुलामञ्चमा रहेको कोशी प्रदेश र तराई–मधेस समूहका प्रतिनिधिका लागि मतदान केन्द्र तोकिएको छ।

त्यस्तै खुलामञ्चमा रहेको गण्डकी प्रदेशका प्रतिनिधिले हिमाली हल बाट मतदान गर्ने व्यवस्था गरिएको छ। खुलामञ्चमा रहेको मधेश प्रदेशका प्रतिनिधिका लागि तराई–मधेस हल तोकिएको छ।

लुम्बिनी प्रदेश, कर्णाली प्रदेश, सुदूरपश्चिम प्रदेश, नेपाली जनसम्पर्क समिति तथा भ्रातृ संस्थातर्फका प्रतिनिधिले खुलामञ्चमा रहेको पहाड हल बाट मतदान गर्नेछन्।

निर्वाचन समितिले मतदानस्थलमा प्रवेश गरेपछि प्रतिनिधिहरूलाई आफूलाई तोकिएको प्रदेश तथा समूहको मतदान केन्द्रमा गई मतदान गर्न आग्रह गरेको छ। मतदान गर्नुअघि प्रतिनिधिको परिचयपत्र तथा मतदाता नामावली रुजु गरिनेछ।

निर्वाचन समितिका अनुसार मतदानस्थलमा मोबाइल फोनलगायत निर्वाचन आचारसंहिताले निषेध गरेका सामग्री लिएर प्रवेश गर्न पाइने छैन। प्रतिनिधिले निर्वाचन समितिले तोकेको प्रक्रिया पूरा गरेपछि मात्र मतदान गर्न पाउनेछन्।

कांग्रेसको १५औँ महाधिवेशनअन्तर्गत केन्द्रीय कार्यसमितिको निर्वाचनका लागि उम्मेदवारी दर्ता, दाबी–विरोध तथा उम्मेदवारी फिर्ताको प्रक्रिया पूरा भइसकेको छ। त्यसपछि निर्वाचन समितिले उम्मेदवारहरूको अन्तिम नामावली प्रकाशन गरेको हो।

अब मतदानबाट सभापति, उपसभापति, महामन्त्री, सहमहामन्त्रीसहित विभिन्न पदका केन्द्रीय सदस्य निर्वाचित हुनेछन्। नयाँ नेतृत्व चयनका लागि हुने मतदानपछि मतगणना सुरु गरिने निर्वाचन समितिले जनाएको छ।

मतदान केन्द्र र प्रतिनिधि समूह

राष्ट्रिय सभा गृह, मतदान केन्द्र ‘क’

बागमती प्रदेश

मतदान केन्द्र ‘ख’ खुलामञ्चमा

कोशी प्रदेश तथा तराई–मधेस समूह

हिमाली हल

गण्डकी प्रदेश

तराई–मधेस हल

मधेश प्रदेश

पहाड हल

लुम्बिनी प्रदेश, कर्णाली प्रदेश, सुदूरपश्चिम प्रदेश, नेपाली जनसम्पर्क समिति तथा भ्रातृ संस्थातर्फका प्रतिनिधि

मतदान सकिएपछि मतगणना सुरु हुनेछ भने मतगणना सम्पन्न भएपछि निर्वाचन परिणाम सार्वजनिक गरिने निर्वाचन समितिले जनाएको छ।

झापा । झापाको अर्जुनधारा–११ स्थित नयाँ बसपार्क क्षेत्रमा गैरकानुनी रूपमा उत्पादन तथा बिक्रीका लागि राखिएको १ हजार १ सय बोतल अमिलो बरामद गरी नष्ट गरिएको छ ।

झापाका सहायक प्रमुख जिल्ला अधिकारी सहदेव रायमाझीको नेतृत्वमा बुधबार गरिएको बजार अनुगमनका क्रममा ‘श्रीराम अमिलो भण्डार’बाट उक्त परिमाणको अमिलो बरामद गरिएको हो । गोदामबाट २१ कार्टुनमा राखिएका १ हजार १ सय बोतल अमिलो बरामद गरी स्थानीय प्रहरी तथा स्थानीयवासीको रोहबरमा नष्ट गरिएको अनुगमन टोलीले जनाएको छ ।

कागतीको अमिलोका नाममा काभ्रेको अमिलो उद्योगको स्टिकर प्रयोग गरी बिर्तामोड–११ नयाँ बसपार्कमा उद्योग सञ्चालनमार्फत उत्पादन तथा बिक्री–वितरण गर्दै आएको पाइएपछि सञ्चालक उमेशराज कार्कीलाई समेत कारबाही गरिएको सहायक प्रमुख जिल्ला अधिकारी रायमाझीले बताए । उनका अनुसार गुणस्तर तथा सुरक्षासम्बन्धी मापदण्ड पूरा नगरी बिक्री–वितरण भइरहेको पाइएपछि उक्त सामग्री बरामद गरी नष्ट गरिएको हो ।

अनुगमन टोलीले बिर्तामोड, अर्जुनधारा र कनकाई नगरपालिका क्षेत्रका विभिन्न किराना तथा खाद्य पसलको समेत निरीक्षण गरेको थियो । कनकाईस्थित ‘अतिथि किराना पसल’बाट अखाद्य वस्तु बरामद गरी नष्ट गर्नुका साथै सञ्चालकलाई कारबाही गरिएको रायमाझीले जानकारी दिए । 

खाद्य अधिकृत सागरराज पोखरेलका अनुसार अतिथि किराना पसलबाट मरिचको धुलो, जौको पीठो, सब्जी मसला, मकैको चामल, कुरुमकुरुम चिउरालगायत अखाद्य वस्तु बरामद गरिएको थियो । 

अनुगमन टोलीले मंगलबार बिर्तामोड–२, चारपाने चोकस्थित सन्तोष खाजा घरमा समेत अनुगमन गरेको थियो । सो क्रममा अखाद्य वस्तु भेटिएपछि सामग्री नष्ट गर्नुका साथै जरिवाना गरिएको अनुगमन समितिका अधिकृत यदुनन्दन दाहालले बताए ।

बजार अनुगमन टोलीमा घरेलु तथा साना उद्योग कार्यालय भद्रपुरका नायब सुब्बा सुरेश गौतम, खाद्य तथा गुण नियन्त्रण कार्यालयका खाद्य अधिकृत पोखरेल, जिल्ला प्रशासन कार्यालय झापाका अधिकृत दाहाल, उपभोक्ता जागरण अभियान बिर्तामोडका अध्यक्ष राजकुमार ओली तथा प्रहरी प्रतिनिधिलगायत सहभागी थिए ।

अनुगमन टोलीले उपभोक्ताको स्वास्थ्यमा प्रत्यक्ष असर पार्न सक्ने अखाद्य तथा अवैध खाद्य वस्तुको बिक्री–वितरण रोक्न बजार अनुगमनलाई निरन्तरता दिने जनाएको छ । टोलीले बुधबार कनकाई नगरपालिका क्षेत्रका न्यु संगीता ज्वेलर्स, गोर्खा सपिङ कम्प्लेक्स, पाथिभरा देवी ज्वेलर्स र महालक्ष्मी डेरी पसलमा समेत अनुगमन गरेको छ ।

काठमाडौँ । नेपाली कांग्रेसको १५औँ महाधिवेशन अन्तर्गत बन्द सत्रमा उपसभापति विश्वप्रकाश शर्माले पेश गरेको समसामयिक विषयसम्बन्धी प्रस्ताव पनि पारित भएको छ ।

शर्माले प्रस्तुत गरेको प्रस्तावमा लोकतान्त्रिक संस्कृतिमा भइरहेको क्षयलगायत समसामयिक राजनीतिक विषयलाई समेटिएको छ । बन्दसत्रले उक्त प्रस्ताव पारित गरेको हो ।

प्रस्ताव पारित भएपछि शर्माले कांग्रेसको बन्दसत्रलाई खुला संसारले सुन्ने गरी प्रस्तुत गरिएको भन्दै यसलाई पनि ऐतिहासिक विषयका रूपमा व्याख्या गरे । 

‘बन्दसत्र पनि खुला संसारले सुन्नेगरी पेश गरेका छौँ। यो पनि ऐतिहासिक हो,’ उनले भने ।

उनले कांग्रेसले हार र जित दुवै अवस्थामा जनताको कुरा सुन्ने संस्कार विकास गर्नुपर्ने बताए । ‘कांग्रेस सुन्न चाहन्छ, हार्दा र जित्दा पनि हाँस्छ। यस्तो कांग्रेस बनाउन खोजेको हो,’ उनले भने ।

शर्माले कांग्रेसलाई गुनासो गर्नेभन्दा आशा, विश्वास र भरोसा गर्न सकिने पार्टीका रूपमा विकास गर्नुपर्ने बताए । 

‘उत्तर भएको कांग्रेस, भएको कांग्रेस, गुनासो होइन, आशा र विश्वास र भरोसा गर्ने कांग्रेस हो। अब निराशा होइन, यस्तो कांग्रेस बनाउने हो,’ उनले भने ।

महाधिवेशनबाट कसले कुन पद जित्छ भन्ने विषयमा मात्रै केन्द्रित नहुन प्रतिनिधिहरूलाई आग्रह गर्दै शर्माले कांग्रेसको मूल उद्देश्य पार्टीलाई लोकतान्त्रिक मूल्य र संस्कृतिअनुसार अघि बढाउनु रहेको बताए ।

‘कसले के पद जित्छ, लान्छ भनेर नलाग्नुस्,’ उनले भने, ‘लोकतान्त्रिक संस्कृतिको क्षयलाई हामीले उठाउने छौँ ।’

उनले कांग्रेसभित्र लोकतान्त्रिक संस्कृतिलाई थप बलियो बनाउँदै पार्टीलाई जनताले सुन्ने, विश्वास गर्ने र भरोसा गर्ने राजनीतिक शक्तिका रूपमा अघि बढाउनुपर्नेमा जोड दिए ।

काठमाडौं । नेपाली कांग्रेसको १५औँ महाधिवेशनअन्तर्गत सहमहामन्त्रीका विभिन्न समूहमा उम्मेदवारी दिएका उम्मेदवारहरूको प्रथम नामावली सार्वजनिक भएको छ । निर्वाचन समितिले सार्वजनिक गरेको विवरणअनुसार सहमहामन्त्रीका लागि विभिन्न समूहबाट उम्मेदवारी परेको छ ।

खुला सहमहामन्त्रीका दुई पदका लागि १० जना उम्मेदवार छन्। अजयबाबु शिवाकोटी, अमृतकुमार अर्याल, देवेन्द्रराज कण्डेल, दिनेश कोइराला, डिल्लीराम सुवेदी, विकास कोइराला, विमलराज क्षेत्री, रमेशप्रसाद धमला, रामहरि खतिवडा र राजीव ढुंगाना खुलातर्फ प्रतिस्पर्धामा छन् ।

महिला सहमहामन्त्रीको एक पदका लागि नानुमैया बास्तोला र प्रतिमा गौतम उम्मेदवार छन् ।

आदिवासी जनजाति सहमहामन्त्रीको एक पदका लागि ओमबहादुर घर्ती मगर, तारामान गुरुङ, दिलमान पाख्रिन, प्रशान्तमानसिंह मास्के र बहादुरसिंह लामा तामाङ प्रतिस्पर्धामा छन् ।

दलित सहमहामन्त्रीको एक पदका लागि नरेन्द्र पासवान, प्रकाश रसाइली ‘स्नेही’, मानबहादुर नेपाली र लक्ष्मी परियार उम्मेदवार छन् ।

मधेशी सहमहामन्त्रीको एक पदका लागि अजयकुमार चौरसिया, अभिषेक प्रताप शाह, किरण यादव, नगिना यादव, मनिषकुमार मिश्र, महेन्द्र यादव, मुक्ता कुमारी यादव र रामपल्टन शाहबीच प्रतिस्पर्धा हुँदैछ ।

खसआर्य सहमहामन्त्रीको एक पदका लागि जगदिश्वर नरसिंह केसी, मनोजमणि आचार्य र शुभराम बस्नेत उम्मेदवार छन् । थारु सहमहामन्त्रीको एक पदका लागि तेजुलाल चौधरी, योगेन्द्र चौधरी र सुरेन्द्रप्रसाद चौधरी प्रतिस्पर्धामा छन् ।

मुस्लिम सहमहामन्त्रीको एक पदका लागि अतहर कमाल मुसलमान, अब्दुल सत्तार र डा. मो. फिरदौश आलम उम्मेदवार छन् । पिछडिएको क्षेत्रबाट सहमहामन्त्रीको एक पदका लागि जीवनबहादुर शाही, कर्णबहादुर बुढा, जनकराज गिरी, रामबहादुर विष्ट, नारायणप्रसाद भट्टराई, मिनबहादुर भाम र राजन कुँवर प्रतिस्पर्धामा छन् ।

त्यस्तै, अल्पसङ्ख्यक वा अपांगता समूहबाट सहमहामन्त्रीको एक पदका लागि आङगेलु शेर्पा, नगेन्द्रकुमार कुमाल, बाबुकृष्ण सापकोटा र योगेश गौचन थकाली उम्मेदवार छन् ।

यसरी सहमहामन्त्रीका १० पदका लागि कुल ४९ जना उम्मेदवारबिच प्रतिस्पर्धा हुने भएको छ । सबैभन्दा धेरै उम्मेदवारी खुलातर्फ दुई पदका लागि १० जना र मधेशीतर्फ एक पदका लागि आठ जनाको परेको छ ।

निर्वाचन समितिले सार्वजनिक गरेको प्रथम नामावलीमाथि दाबी–विरोध तथा आपत्तिको प्रक्रिया पूरा गरेपछि अन्तिम नामावली सार्वजनिक गर्नेछ । कांग्रेसको १५औँ महाधिवेशनमा नयाँ नेतृत्व चयनका लागि ७ हजारभन्दा बढी महाधिवेशन प्रतिनिधि सहभागी हुँदै छन् ।

काठमाडौं । नेपाली कांग्रेसका सभापति गगनकुमार थापाले १५औँ महाधिवेशनमा सभापति पदका लागि उम्मेदवारी दर्ता गराएका छन् । 

थापाले मंगलबार साँझ काठमाडौंस्थित राष्ट्रिय सभागृहमा पुगेर सभापति पदमा उम्मेदवारी दर्ता गराएका हुन्।

यसअघि उम्मेदवारी दर्ताका लागि साँझ ६ बजेसम्मको समय तोकिएको थियो। वर्षाका कारण केही आकांक्षी उम्मेदवारी दर्ताबाट छुट्न सक्ने भन्दै निर्वाचन समितिले समय थप गरी बेलुकी ७ बजेसम्म पु¥याएको छ ।