काठमाडौं । फिफा विश्वकप २०२६ अन्तर्गत समूह ‘सी’ को खेलमा ब्राजिल र मोरक्कोले बराबरी खेलेका छन् । शनिबार न्यु जर्सीस्थित न्युयोर्क-न्यु जर्सी स्टेडियममा भएको खेलमा ब्राजिलले मोरक्कोसँग १–१ को बराबरी खेलेका हुन् ।

खेलको २१औँ मिनेटमा मोरक्कोका मिडफिल्डर इस्माइल साइबारीले गोल गर्दै १-० को अग्रता दिलाएका थिए ।  ब्राजिलले खेलको ३२ औं मिनेटमा स्टार स्ट्राइकर भिनिसियस जुनियरले गोल गर्दै खेललाई १-१ को बराबरी बनाएका थिए । 

पहिलो खेलमा दुवै टोलीले एक–एक अंक जोडेका छन् । ब्राजिलले आफ्नो दोस्रो खेलमा हाइटीसँग प्रतिस्पर्धा गर्नेछ । 

काठमाडौं । फिफा विश्वकप २०२६ अन्तर्गत समूह चरणको बहुप्रतिक्षित खेलमा आइतबार प्रतियोगिताको सबैभन्दा सफल टोली ब्राजिल र अफ्रिकन जायन्ट मोरक्को आमने–सामने हुँदैछन् । न्यु जर्सीस्थित मेटलाइफ रंगशालामा हुने खेल नेपाली समयअनुसार बिहान ३ः४५ बजे हुनेछ ।

गत संस्करण कतार विश्वकपमा ब्राजिलको यात्रा क्वार्टरफाइनलसम्म पुगेर रोकिएको थियो । टोली क्रोएसियाविरुद्ध शतब्ध बन्यो । त्यसको चार वर्षअघि रसियामा पनि ब्राजिल अन्तिम आठमै रोकिएको थियो । यसपाली ब्राजिल विगतका संस्करणमा गरेका गल्ती सच्याउन चाहन्छ ।

उता एट्लास लायन्स भनेर चिनिने मोरक्कोसँग गत संस्करण गरेको ऐतिहासिक प्रदर्शन दाहोर्याउने चुनौती छ । कतारमा टोलीले सेमिफाइनलसम्मको यात्रा गरेको थियो ।

गत वर्ष ब्राजिलियन फुटबलको इतिहास फेरिएको थियो । जतिबेला महासंघले इटालियन कार्लो एन्सिलोटीलाई मुख्य प्रशिक्षकको जिम्मेवारी दिएको थियो ।

तीन दशकको आफ्नो व्यावसायिक प्रशिक्षण करिअरमा ६७ वर्षीय एन्सिलोटीले भएजति सबै उपाधि जितेका छन् । अहिले उनी आफ्नो प्रशिक्षण करिअरलाई पूर्णता दिन ब्राजिल आएका छन् ।

विश्वकपका सबै संस्करणमा सहभागिता जनाएको ब्राजिलले ११४ मध्ये ७४ खेलमा विजयी हासिल गरेको छ । यसबीच ब्राजिलले पाँचपटक प्रतिष्ठित ट्रफी चुम्यो । यद्यपि २४ वर्ष भइसक्यो, ब्राजिलले विश्वकपको उपाधि जित्न सकेको छैन् ।

ब्राजिलले यसअघि पनि २४ वर्षको पखाईपछि आफ्नो चौथो विश्वकप उपाधि उचालेको थियो । सन् १९७० मा ब्राजिलले आफ्नो तेस्रो उपाधि चुमेको थियो । त्यसपछि चौथोपटक च्याम्पियन हुन ब्राजिलले १९९४ सम्म कुर्नुपर्यो । त्यो पनि अमेरिकाको माटोमा । यसपाली त्यही संयोग जुरेको छ ।

विश्वकप इतिहासमा ब्राजिलले आठमध्ये सातपटक अफ्रिकन राष्ट्रलाई हराएको छ । ब्राजिलले एक मात्र हार गत संस्करण क्यामरुनसँग बोहोरेको हो । क्यामरुनले समूह चरण्मा ब्राजिललाई १–० ले हराएको थियो । मोरक्को ब्राजिललाई हराउने दोस्रो अफ्रिकन राष्ट्र बन्न चाहन्छ ।

चार वर्षअघि मोरक्कोले विश्वकपको सेमिफाइनलमा पुग्ने पहिलो अफ्रिकी टोली बनेर इतिहास रचेको थियो ।

सातौं विश्वकप अनुभव लिइरहेको मोरक्कोलाई यसपाली प्रतियोगिताकै सबैभन्दा ठूलो ‘डार्क हर्स’का रुपमा हेरिएको छ । मोरक्कोले आफ्नो सुरुआती तीन सहभागिता उत्तर अमेरिकामै जनाएको थियो ।

मेक्सिको (१९७० र १९८६) अनि अमेरिका १९९४ मा मोरक्कोले प्रतिनिधित्व गरेको थियो । मेडन अनुभवमा समूह चरणबाटै बाहिरिएको मोरक्कोले १९८६ मा अन्तिम १६ सम्मको यात्रा गरेको थियो । 

अमेरिका १९९४ मोरक्कोका लागि विर्सनलायक रह्यो । टोलीले समूहका तीनवटै खेलमा एक गोलको अन्तरले पराजय बेहोर्यो ।

एट्लास लायन्सले पछिल्ला वर्षहरुमा आफूलाई शक्तिशाली फुटबल राष्ट्रका रुपमा उभ्याएको छ । सन् २०२३ यता मोरक्कोले ४५ खेलमा ३३ जित हासिल गर्दा १० बराबरी र दुईमा हार आत्मसात गरेको छ । अहिले त मोरक्को फिफा वरीयताको सातौं स्थानमा छ । नेदरल्यान्ड्स, बेल्जियम र जर्मनीभन्दा पनि अगाडि ।

ब्राजिलसँगको पछिल्लो तीन भेटमध्ये एकमा मोरक्कोले जित हासिल गरेको छ । २०२३ मा सम्पन्न मैत्रीपूर्ण खेलमा ब्राजिल २–१ ले स्तब्ध भएको थियो ।

ब्राजिलका उच्च गोलकर्ता नेइमार अझै पनि ‘काल्फ इन्जुरी’को समस्यासँग जुधिरहेका छन् । उनी आइतबारको खेलमा उपस्थित नहुने सम्भावना बलियो छ । 

स्कटल्यान्ड र हाइटीमा विश्वकपको उत्साह

उत्तर अमेरिकी राष्ट्र हाइटी ५२ वर्षपछि विश्वकपमा फर्किएको छ । यसपाली आफ्नै महादेशमा भइरहेको विश्वकपमा हाइटीको एउटै लक्ष्य हुनेछ, त्यो हो पहिलो अनुभवलाई सुधार्ने । जर्मनी १९९४ मा हाइटीले तीनवटै खेलमा हार बेहोर्दा कूल १४ गोल खाएको थियो ।

कोनकाकाफ छनोटको १० मध्ये ६ खेलमा हाइटीले विजयी हासिल गरेको थियो । नोभेम्बरमा कोस्टा रिकालाई १–० र निकारागुवालाई २–० ले हराउँदै हाइटी विश्वकपमा फर्किएको हो ।

विश्वकप २०२६ का ४८ राष्ट्रमध्ये हाइटी फिफा वरीयतामा पुछारबाट दोस्रो स्थानमा छ । विश्वकपअघि हाइटीले पुछारको न्युजिल्यान्डमाथि ४–० को रवाफिलो जित हासिल गर्यो ।

स्कटल्यान्ड आफ्नो नवौं विश्वकप अनुभव लिँदैछ । पछिल्लोपटक स्कटल्यान्डले १९९८ फ्रान्स विश्वकप खेलेको थियो ।

युइएफए छनोटमा ६ मध्ये चार खेल जितेको स्कटल्यान्डलाई मोरक्को र नर्वेसँगै ‘डार्क हर्स’का रुपमा हेरिएको छ । स्कट म्याकटोमिने र एन्डी रोबर्टसन जस्ता विश्व फुटबलका चर्चित खेलाडी रहेको स्कटल्यान्ड बढीमा दोस्रो स्थान हासिल गर्ने लक्ष्यमा हुनेछ ।

विश्वकपअघि स्कटल्यान्डले १० खेलाडीमा समेटिएको कोरासाओलाई ४–१ ले हराएको थियो । त्यसपछि स्कटल्यान्डले बोलिभियालाई ४–० ले हरायो ।

अहिलेसम्म समूह चरण पार गर्न नसकेको स्कटल्यान्डसँग यसपाली नकआउट पुग्ने राम्रो अवसर छ । खेल नेपाली समयअनुसार आइतबार बिहान ६ः४५ बजे हुनेछ ।

एजेन्सी । फिफा विश्वकपको गाडीमा तोडफोड भएपछि इङ्गल्याण्डको प्रशिक्षण उपकरणहरू क्यान्सस सिटी आइपुग्नुअघि नै चोरी भएको स्थानीय प्रहरीले पुष्टि गरेको छ । घटना फ्लोरिडामा रहेको इङ्गल्याण्डको पूर्वअभ्यास क्याम्पबाट स्वोप सकर भिलेजमा उपकरणहरू ढुवानी गर्ने क्रममा भएको थियो । जहाँ शनिबार क्यान्सास सिटीमा प्रशिक्षणको लागि टोली आइपुग्नु अघि सेटअप पूरा गर्ने उद्देश्य राखिएको थियो । तर धुवानी गरिरहेको गाडीमा तोडफोड भएपछि उपकरण पनि चोरी भएको जनाइएको छ । 

अधिकारीहरूले घटनाको थप अनुसन्धान भइरहेको बताएका छन्। ‘हामी आज साँझ हराएको सामानहरू सहित क्यान्सास सिटी आइपुगेको टोलीको गाडीबाट उपकरणहरूको सम्भावित चोरीको अनुसन्धान गरिरहेका छौं,’ रोयटर्सले उद्धृत गरेको प्रहरीले जनाएको छ।

‘अनुसन्धान जारी छ। थप अनुसन्धानको लागि दुई जनालाई हिरासतमा लिइएको छ,’ रोयटर्सले उद्धृत गरेको बेलायती मिडियाका अननुसार चोरी भएको विश्वास गरिएका वस्तुहरूमध्ये बल र बुटहरू पनि थिए।

इङ्गल्याण्डले फिफा विश्वकप २०२६ को समूह एल मा प्रतिस्पर्धा गर्दैछ । जहाँ क्रोएसिया, घाना र पानामा छन् । 

थोमस टुचेलको टोलीले कप्तान ह्यारी केनको नेतृत्वमा २६ सदस्यीय टोली प्रतियोगिताका लागि तयारी गरिरहेको छ । (एएनआइ)

काठमाडौं । फिफा विश्वकप २०२६ अन्तर्गत समूह ‘बी’ को उद्घाटन खेलमा सह–आयोजक क्यानडाले बोस्निया–हर्जेगोभिनासँग १–१ गोलको बराबरी खेल्दै विश्वकप इतिहासमा पहिलो पटक अंक हासिल गरेको छ।

टोरन्टोस्थित खचाखच भरिएको रंगशालामा शनिबार बिहान सम्पन्न खेलमा बोस्नियाले पहिलो हाफमा अग्रता बनाए पनि क्यानडाले दोस्रो हाफमा उत्कृष्ट पुनरागमन गर्दै हार टार्न सफल भयो।

खेलको २१औँ मिनेटमा जोभो लुकिकले कर्नरबाट आएको बललाई गोलमा परिणत गर्दै बोस्नियालाई अग्रता दिलाएका थिए। अन्तर्राष्ट्रिय फुटबलमा उनको यो पहिलो गोल समेत बनेको थियो। पहिलो हाफभरि बोस्नियाले खेलमा पकड जमाएको देखिएको थियो भने क्यानडाले घरेलु समर्थकको साथ पाए पनि अपेक्षित प्रदर्शन गर्न सकेन।

दोस्रो हाफमा भने क्यानडा थप आक्रामक रूपमा प्रस्तुत भयो। ५३औँ मिनेटमा रिची लारियाको प्रहारलाई बोस्नियाका डिफेन्डर सियाड कोलासिनाकले गोललाइनबाट क्लियर गर्दै टोलीलाई संकटबाट जोगाए। तर खेलको ७८औँ मिनेटमा वैकल्पिक खेलाडीका रूपमा मैदान छिरेका साइल लारिनले उत्कृष्ट गोल गर्दै खेललाई बराबरीमा ल्याए।

लारिनको गोलले खेलमा नयाँ ऊर्जा थप्नुका साथै उनलाई घरेलु मैदानमा क्यानडाका लागि विश्वकप गोल गर्ने पहिलो खेलाडीको रूपमा इतिहासमा स्थापित गरायो। 

अतिरिक्त समयको ६ मिनेटमा दुवै टोलीले विजयी गोलको प्रयास गरे पनि कुनै टोलीले सफलता हात पार्न सकेन र खेल १–१ को बराबरीमा समाप्त भयो। यससँगै १९८६ र २०२२ विश्वकपमा खेलेका सबै खेल गुमाएको क्यानडाले विश्वकप इतिहासमा पहिलो पटक अंक बटुल्न सफल भएको छ।

यो खेलसँगै समूह ‘बी’ का क्यानडा र बोस्निया एन्ड हर्जगोभिना दुवैले पहिलो खेलपछि एक–एक अंक जोडेका छन् । यस समूहमा स्विट्जरल्यान्ड र कतार पनि छन्।

काठमाडौँ । फिफा विश्वकप फुटबल २०२६ को दोस्रो खेलमा दक्षिण कोरियाले चेक रिपब्लिकलाई हराएको छ । शुक्रबार बिहान भएको समूह ए को खेलमा कोरियाले चेक रिपब्लिकलाई २–१ ले हराएको हो ।

स्टाडियो ग्वाडालाजारामा भएको खेलमा चेकले ५९औं मिनेटमा अग्रता लिएको थियो । चेकका लागि लाडिस्लाभ क्रेज्चीले हेडबाट गोल गरेका थिए । दक्षिण कोरियाका लागि ६७ औं मिनेटमा ह्वाङ इन बेमले गोल फर्काउँदै बराबरी गरेका थिए । 

त्यसपछि ८० औँ मिनेटमा ओ ह्युन ग्यूले गोल गर्दै टोलीलाई २–१ ले जिताएका हुन् । उनले बेओमको पासमा गोल गरेका हुन् ।

जितसँगै दक्षिण कोरियाले तीन अंक बटुलेको छ र समूह ए को दोस्रो स्थानमा उक्लेको छ । यता यसै समूहको उद्घाटन खेलमा मेक्सिकोले दक्षिण अफ्रिकालाई हराउँदै सुखद् शुरूवात गर्दै तीन अंक लिएको छ । यि नतिजाले दक्षिण कोरियासँगै मेक्सिकोको नकआउट चरण प्रवेश गर्ने सम्भावना बलियो भएको छ ।

मेक्सिकोले दक्षिण अफ्रिकालाई २–० गोलअन्तरले पराजित गरेको हो । 

काठमाडौं । फिफा विश्वकप २०२६ को उद्घाटन खेलमा मेक्सिकोले दक्षिण अफ्रिकालाई २-० ले पराजित गरेको छ । मेक्सिको सिटी रंगशालामा भएको समूह ‘ए’ को खेलमा मेक्सिकोले दक्षिण अफ्रिकालाई २-० ले पराजित गरेको हो ।

 खेलमा जुलियन क्विन्योनेस र राउल हिमेनेजले गोल गरेका थिए । खेलको नवौँ मिनेटमा जुलियन क्विन्योनेसले पहिलो गोल गरेका थिए ।

खेलमा दक्षिण अफ्रिकाका दुई र मेक्सिकोका एक खेलाडीले रातो कार्ड पाएका थिए । खेलको दोस्रो हाफको सुरुवातमै दक्षिण अफ्रिकाका मिडफिल्डर स्पेफेलो याया सिथोलेले मेक्सिकोका ब्रायन गुटियरेजलाई गोल गर्ने क्रममा लडाएपछि रातो कार्ड पाएका थिए ।

काठमाडौं । विश्व फुटबलको सबैभन्दा ठूलो उत्सव फिफा विश्वकप २०२६ आजबाट सुरु हुँदैछ । उद्घाटन खेलमा सह–आयोजक मेक्सिकोले दक्षिण अफ्रिका सँग मेक्सिको सिटीस्थित स्टेडियममा प्रतिस्पर्धा गर्नेछ । नेपाली समयअनुसार यो खेल शुक्रबार बिहान करिब १२ः४५ बजे सुरु हुनेछ । यसपटकको विश्वकप इतिहासकै सबैभन्दा ठूलो संस्करणका रूपमा आयोजना हुँदैछ । प्रतियोगितामा ४८ टोली, १०४ खेल र क्यानडा, मेक्सिको तथा संयुक्त राज्य अमेरिकाका १६ शहर आयोजकका रूपमा रहेका छन् । उद्घाटन खेलसँगै एक महिनाभन्दा बढी समयसम्म चल्ने विश्व फुटबल महोत्सवको औपचारिक सुरुआत हुनेछ ।

घरेलु समर्थकमाझ खेल्ने अवसर पाएको मेक्सिको विजयी सुरुआत गर्ने लक्ष्यमा छ । रोचक पक्ष के छ भने, यो खेल सन् २०१० को विश्वकप उद्घाटन खेलको पुनरावृत्ति जस्तै बनेको छ । दक्षिण अफ्रिकामा भएको त्यस विश्वकपको पहिलो खेलमा घरेलु टोली दक्षिण अफ्रिकाले सिफिवे शाबालालाको गोलमार्फत अग्रता लिए पनि मेक्सिकोका कप्तान राफायल मार्केजले बराबरी गोल गर्दै खेल १–१ मा टुंगिएको थियो ।

यसपटक मार्केज खेलाडीका रूपमा होइन, मेक्सिकोका मुख्य प्रशिक्षक जाभियर अगुइरेका सहायक प्रशिक्षकका रूपमा टोलीसँग छन् । मेक्सिकोका प्रशिक्षक अगुइरेले घरेलु मैदानमा विश्वकप खेल्नु आफ्ना खेलाडीका लागि विशेष प्रेरणाको स्रोत भएको बताएका छन् । उनले आफूले ५० वर्षको फुटबल यात्रामा विश्वकप घरेलु मैदानमा खेल्नुजत्तिको रोमाञ्चक अनुभव नपाएको उल्लेख गर्दै खेलाडीहरू पनि यो अवसरलाई विशेष रूपमा महसुस गरिरहेको बताए । टोली परिवारझैँ एकताबद्ध बनेको र त्यसले उत्कृष्ट प्रदर्शन गर्न सहयोग गर्ने उनको विश्वास छ ।

यता दक्षिण अफ्रिका अफ्रिकी छनोटको समूह ‘सी’ विजेता बनेर विश्वकपमा पुगेको हो । टोलीका प्रशिक्षक हुगो ब्रुस ले मेक्सिको समूहकै बलियो टोली भए पनि आफ्ना खेलाडीले अन्तिम मिनेटसम्म प्रत्येक बलका लागि संघर्ष गर्ने बताएका छन् ।

दक्षिण अफ्रिकाका मिडफिल्डर टेबोहो मोक्वेना ले उद्घाटन खेलप्रति टोली निकै उत्साहित रहेको प्रतिक्रिया दिएका छन् । विश्वकपमा खेल्नु प्रत्येक खेलाडीको सपना भएको भन्दै उनले स्वदेशका समर्थकका लागि उत्कृष्ट प्रदर्शन गर्ने लक्ष्य रहेको बताए । दक्षिण अफ्रिकाको खेलअघि सुखद खबर पनि पाएको छ । ह्यामस्ट्रिङ चोटबाट पीडित लेफ्ट–ब्याक अउब्रे मोडिबा पूर्ण रूपमा फिट हुने अपेक्षा गरिएको छ ।

मेक्सिकोको टोलीबाट रान्गेल, गालार्डो, भास्केज, मोन्टेस, रेयेस, गुटिएरेज, लिरा, फिडाल्गो, किनोनेस, अल्भाराडो र जिमेनेजले खेल्नेछन भने दक्षिण अफ्रिकाको टोलीबाट विलियम्स, मुदाउ, ओकोन, म्बोकाजी, मडिबा, मोक्वेना, सिथोले, माथोहो, मोरेना, फोस्टर र अपोलिसले खेल्ने तालिका तय भएको छ ।

भरिभराउ रंगशाला, विश्वभरका करोडौं दर्शक र नयाँ इतिहास लेखिने अपेक्षाबीच मेक्सिको सिटीमा आजबाट विश्व फुटबलको सबैभन्दा ठूलो प्रतियोगिताको पर्दा उठ्दैछ । मेक्सिकोले घरेलु समर्थकसामु विजयी सुरुआत गर्ने प्रयास गर्नेछ भने दक्षिण अफ्रिकाले प्रतियोगिताको पहिलो खेलमै उल्टो नतिजा निकाल्ने लक्ष्य राखेको छ ।

काठमाडौं । एसियन गेम्स छनोटको फाइनल खेलमा आज (सोमबार) नेपाल र हङकङ भिड्दै छ । नेपाली समय अनुसार आज दिउँसो १२ः१५ बजे सिंगापुर नेसनल क्रिकेट ग्राउन्डमा सुरु हुनेछ । हिजो भएको खेलमा नेपालले ओमानलाई ८ विकेटले हराउँदै फाइनल प्रवेश गरेको थियो । 

सेमिफाइनलमा खेलमा जितका लागि ओमानले दिएको ९५ रनको सामान्य लक्ष्य पछ्यको नेपालले ९.२ ओभरमा २ विकेट गुमाएर पूरा गरेको थियो । नेपालका लागि लोकेश बमले सर्वाधिक ४४ रन बनाएका थिए । यस्तै ओपनर कुशल भुर्तेलले २० र रोहित पौडेलले अविजित २१ रन बनाए । बलिङतर्फ ओमानका समिर ओथामनले २ विकेट लिए ।

ओमानका लागि कप्तान सफियान मोहम्मदले सर्वाधिक ३८, जुबिर अली अकबरले २२ र अबदुल्जाली खानले १६ रन बनाएका थिए । 

काठमाडौँ । आगामी फिफा विश्वकप २०२६ लाई अझ तीव्र, अनुशासित र प्रतिस्पर्धात्मक बनाउन अन्तर्राष्ट्रिय फुटबल महासंघ (फिफा) र अन्तर्राष्ट्रिय फुटबल नियम बोर्डले खेलको गति बढाउने र समय खेर फाल्ने प्रवृत्ति नियन्त्रण गर्ने उद्देश्यसहित नयाँ नियमहरू लागू गरेका छन्।

फिफाका अनुसार पछिल्ला अन्तर्राष्ट्रिय खेलहरूमा देखिएको ढिलाइ, नाटकीय रूपमा समय बर्बाद गर्ने रणनीति र खेलको गति घटाउने प्रवृत्तिलाई रोक्न यी नियमहरू ल्याइएको हो। यी परिवर्तनहरू विश्वकप २०२६ देखि नै लागू हुनेछन्।

खेलमा अब सबैभन्दा चर्चित परिवर्तनमध्ये एक ५ सेकेन्डको नियम हो, जसअनुसार थ्रो–इन र गोल–किक गर्दा खेलाडीले अनावश्यक ढिलाइ गरेमा रेफ्रीले स्पष्ट रूपमा ५ सेकेन्डको काउन्टडाउन गर्नेछन्। निर्धारित समयभित्र पुनः खेल सुरु नगरेमा थ्रो–इन भए विपक्षी टोलीलाई बल दिइनेछ भने गोल–किकमा ढिलाइ भए विपक्षीलाई कर्नर किक प्रदान गरिनेछ। यसले खेलको गति तीव्र बनाउन मद्दत गर्ने अपेक्षा गरिएको छ।

त्यस्तै, प्रतिस्थापन प्रक्रियालाई पनि कडाइ गरिएको छ । अब मैदान छोड्ने खेलाडीले १० सेकेन्डभित्र मैदान बाहिर निस्कनुपर्नेछ। यदि ढिलाइ गरेमा नयाँ खेलाडी तुरुन्त मैदान प्रवेश गर्न पाउने छैन र सम्बन्धित टोलीले करिब १ मिनेटसम्म १० खेलाडीमा खेल्नुपर्ने अवस्था आउनेछ। यसलाई समय बर्बादी रोक्ने महत्वपूर्ण कदमका रूपमा हेरिएको छ।

चोटपटक वा उपचारका क्रममा हुने ढिलाइलाई पनि नियन्त्रण गर्न नयाँ व्यवस्था गरिएको छ । मेडिकल स्टाफलाई बोलाएर मैदानमा उपचार गरिएका खेलाडीले खेल पुनः सुरु भएपछि कम्तीमा ६० सेकेन्डसम्म मैदान बाहिर बस्नुपर्नेछ। यस नियमको उद्देश्य नाटकीय चोट देखाएर खेल रोकिने प्रवृत्ति कम गर्नु हो । 

अनुशासनका विषयमा पनि फिफाले कडा कदम चालेको छ । अब खेलाडीहरूले विवादका क्रममा हात वा जर्सीले मुख छोपेर रेफ्रीसँग बहस गरेमा सिधै रातो कार्ड देखाइनेछ । त्यस्तै, रेफ्रीको निर्णयप्रति असन्तुष्टि जनाउँदै मैदान छाड्ने वा अन्यलाई उक्साउने खेलाडी तथा अधिकारीहरूलाई पनि कडा कारबाही हुने व्यवस्था गरिएको छ ।

भिडियो असिस्टेन्ट रेफ्रीको अधिकार पनि विस्तार गरिएको छ। अब भिएआरले गलत तरिकाले दिइएका कर्नर किक, दोस्रो पहेँलो कार्डसम्बन्धी निर्णय तथा केही स्पष्ट त्रुटिहरूको समीक्षा गर्न सक्नेछ ।

यसले खेलमा निर्णय प्रक्रियालाई अझ पारदर्शी र निष्पक्ष बनाउने अपेक्षा गरिएको छ।

काठमाडौं । एसियन गेम्स पुरुष क्रिकेट छनोट प्रतियोगिता खेलमा नेपाल फाइनलमा प्रवेश गरेको छ । 

आज संगापुरमा नेसनल क्रिकेट मैदानमा भएको पहिलो सेमिफाइनलमा ओमानलाई आठ विकेटले हराउँदै नेपाल फाइनलमा पुगेको हो । 

ओमानले दिएको ९५ रनको लक्ष्य नेपालले २ विकेटको क्षतिमा ६४ बल बाँकी हुँदै ९.२ ओभरमा पछ्याएको हो । 

नेपालका लागि लोकेस बमले सर्वाधिक ४४ रन बनाए । रोहित पौडेलले २० बलमा २१ रन बनाए । ओपनर कुशल भुर्तेलले २० रन र आशिफ शेख १ रनमा आउट भए ।

टस जितेर सुरुमा ब्याटिङ गरेको ओमानलाई नेपालले १९ ओभर ४ बलमा ९४ रन बनाउँदा अलआउट गरेको थियो ।

काठमाडौं । एसियन गेम्स पुरुष क्रिकेट छनोट प्रतियोगिता खेलमा नेपाल फाइनलमा प्रवेश गरेको छ । 

आज संगापुरमा नेसनल क्रिकेट मैदानमा भएको पहिलो सेमिफाइनलमा ओमानलाई आठ विकेटले हराउँदै नेपाल फाइनलमा पुगेको हो । 

ओमानले दिएको ९५ रनको लक्ष्य नेपालले २ विकेटको क्षतिमा ६४ बल बाँकी हुँदै ९.२ ओभरमा पछ्याएको हो । 

नेपालका लागि लोकेस बमले सर्वाधिक ४४ रन बनाए । रोहित पौडेलले २० बलमा २१ रन बनाए । ओपनर कुशल भुर्तेलले २० रन र आशिफ शेख १ रनमा आउट भए ।

टस जितेर सुरुमा ब्याटिङ गरेको ओमानलाई नेपालले १९ ओभर ४ बलमा ९४ रन बनाउँदा अलआउट गरेको थियो ।