ताप्लेजुङ । ताप्लेजुङको मेरिङदेन गाउँपालिका–३ दोभान बजारमा बिहीबार दिउँसो आगलागी हुँदा १० घर जलेर नष्ट भएका छन् । आगलागीबाट १७ घरपरिवार विस्थापित भएका छन् ।

जिल्ला प्रहरी कार्यालय ताप्लेजुङका अनुसार आज दिउँसो भएको आगलागीमा लाक्पाचुङ शेर्पा र भीम लिम्बूका दुई–दुईवटा घर जलेर नष्ट भएका छन् । 

त्यस्तै चन्द्रप्रसाद पौडेल, यामबहादुर आङबुहाङ, घनश्याम खरेल, राजु शेर्पा, शुक्रवीर लिम्बू र राजेन्द्र पौडेलको एक–एकवटा घर जलेका छन् ।

आगलागीका कारण भीम लिम्बूको घरमा बस्दै आएका अनिता विक, सुमन लिम्बू, लाक्पा शेर्पा, आरती लिम्बू र श्याम चोङवाङको धनमालसमेत जलेर नष्ट भएको प्रहरीले जनाएको छ ।

जिल्ला प्रहरी कार्यालय ताप्लेजुङका प्रहरी नायब उपरीक्षक कमल बजगाईंले आगलागीबाट भएको क्षतिको विस्तृत विवरण आउन बाँकी रहेको जानकारी दिए । 

आगलागीको कारणसमेत खुल्न सकेको छैन । आगलागी नियन्त्रणमा स्थानीयवासी, सुरक्षाकर्मी तथा उपलब्ध साधनको प्रयोग गरिएको थियो ।

इनरुवा । पूर्वी पहाडि तथा तराईका जिल्लामा भएको लगातार बर्षाका कारणले कोशी नदीमा कोशी ब्यारेज भएर वग्ने पानीको बहावमा बृद्धि भएको छ । बिहीबार साँझ ५ः १५ बजे गरिएको मापन अनुसार कोशी ब्यारेज भएर वग्ने पानीको बहाव १ लाख ८५ हजार १३० क्युसेक प्रतिसेकेण्ड रहेको छ ।

पानीको बहाव उच्च भएपछि कोशी ब्यारेजका मुल ५२ वटा र नहरको ४ वटा गरेर कुल ५६ वटा ढोकामध्ये २३ वटा ढोका खुल्ला गरिएको सुनसरीका प्रहरी नायव उपरीक्षक चन्द्रबहादुर खड्काले जानकारी दिए । 

पानीको बहावबढेसंगै कोशी ब्यारेजमा खतराको सङ्केत स्वरुप रातो बत्ति बालिएको छ, भने रातो झण्डा समेत फहराइएको कोशी ब्यारेज कन्ट्रोल रुमले जनाएको छ । 

नदीमा पानीको बहाव अझै बढ्न सक्ने अनुमान सहित जलस्तरको अवस्था निरन्तर अनुगमन भइरहेको कन्ट्रोल रुमले जनाएको छ । 

नदीको बहाव बढेसँगै कोशी आसपासका तटीय क्षेत्र तथा जोखिमयुक्त बस्तीका बासिन्दालाई उच्च सतर्कता अपनाउन जिल्ला प्रशासन कार्यालय सुनसरीले आग्रह गरेको सुनसरीका प्रमुख जिल्ला अधिकारी इश्वरी प्रसाद अर्यालले जानकारी दिए । 

नेपाल मौसम विज्ञान विभागद्वारा जारी विशेष मौसमी बुलेटिनअनुसार आगामी असोज ९ गते शुक्रबारदेखि असोज ११ गते आइतबारसम्म कोशी प्रदेशका केही स्थानमा मेघगर्जन, चट्याङ र हावाहुरी सहित वर्षाको सम्भावना रहेको छ ।

सुर्खेत । डोल्पा भ्रमणका लागि पुगेका १०२ जना पर्यटकको सुरक्षालाई लिएर जिल्ला प्रशासन कार्यालयले सम्बन्धित निकाय तथा सरोकारवालालाई आवश्यक सहजीकरण र सहयोग गर्न आग्रह गरेको छ ।

जिल्ला प्रशासन कार्यालय डोल्पाका अनुसार असोज ८ गतेसम्म शे–फोक्सुण्डो राष्ट्रिय निकुञ्जमा प्रवेश गरेका १०२ जना पर्यटक जिल्लाका विभिन्न क्षेत्रमा पदयात्रामा छन् । उनीहरू हालसम्म डोल्पाबाट बाहिरिएको जानकारी प्राप्त नभएपछि सम्भावित जोखिमलाई मध्यनजर गर्दै प्रशासनले सबै पक्षलाई सतर्क रहन आग्रह गरेको हो ।

प्रमुख जिल्ला अधिकारी जुनु हमालका अनुसार डोल्पामा पदयात्राका लागि पुगेका पर्यटकमध्ये तीन जना नेपाली र ९९ जना विदेशी नागरिक छन् । उनीहरू शे–फोक्सुण्डो राष्ट्रिय निकुञ्जलगायत डोल्पाका विभिन्न पर्यटकीय क्षेत्रमा भ्रमण गरिरहेका छन् ।

‘डोल्पाका विभिन्न स्थानमा पदयात्राका लागि आएका १०२ जना पर्यटक हालसम्म जिल्लाबाट बाहिरिएको जानकारी आएको छैन,’ प्रमुख जिल्ला अधिकारी हमालले भनिन्, ‘प्रतिकूल मौसमका कारण पर्यटकलाई कुनै समस्या नहोस् भन्ने उद्देश्यले सम्बन्धित सबैलाई आफ्नो क्षेत्रबाट आवश्यक सहयोग र सहजीकरण गर्न आग्रह गरेका छौँ।’

हाल डोल्पामा मौसम प्रतिकूल बन्दै गएकाले उच्च हिमाली तथा पदयात्रा क्षेत्रमा रहेका पर्यटक जोखिममा पर्न सक्ने प्रशासनको भनाइ छ । 

मौसममा अचानक परिवर्तन हुँदा हिमपात, चिसो, वर्षा तथा पदमार्ग अवरुद्ध हुनेलगायतका समस्या आउन सक्ने भएकाले पर्यटकको अवस्थाबारे नियमित जानकारी लिनुपर्ने आवश्यकता देखिएको छ ।

प्रशासनले जिल्लाका स्थानीय तह, सुरक्षा निकाय, पर्यटनसँग सम्बन्धित निकाय, होटल तथा व्यवसायी र स्थानीयवासीलाई पदयात्रा क्षेत्रमा रहेका पर्यटकको अवस्थाबारे जानकारी लिन तथा आवश्यक परे उद्धार र सुरक्षाका लागि सहजीकरण गर्न आग्रह गरेको छ ।

शे–फोक्सुण्डो राष्ट्रिय निकुञ्ज डोल्पाको प्रमुख पर्यटकीय गन्तव्य हो । फोक्सुण्डो ताल, शे गुम्वा, उपल्लो डोल्पाका विभिन्न हिमाली बस्ती तथा पदमार्गमा वर्षेनी स्वदेशी तथा विदेशी पर्यटक पुग्ने गरेका छन् ।

मौसम प्रतिकूल बन्दै गएपछि पदयात्रामा रहेका पर्यटकलाई सुरक्षित स्थानमा राख्ने तथा उनीहरूको अवस्थाबारे नियमित सूचना लिने कामलाई प्राथमिकता दिनुपर्ने प्रशासनले जनाएको छ ।

प्रशासनका अनुसार हालसम्म १०२ जना पर्यटक डोल्पाबाट बाहिरिएको विवरण प्राप्त नभएकाले उनीहरू कुन–कुन क्षेत्रमा छन् भन्ने विषयमा आवश्यक समन्वय र जानकारी लिने काम भइरहेको छ ।

प्रतिकूल मौसम लम्बिएमा पदयात्रामा रहेका पर्यटकलाई थप समस्या हुनसक्ने भएकाले सम्बन्धित निकायलाई आ–आफ्नो क्षेत्रबाट सुरक्षा तथा उद्धारमा सहयोग गर्न प्रशासनले आग्रह गरेको हो ।

झापा । झापाको काँकरभिट्टामा अपहरण तथा शरीर बन्धक मुद्दाको अनुसन्धानका क्रममा गाडिएको अवस्थामा मानव कंकाल फेला परेको छ । घटनामा संलग्न रहेको आरोपमा प्रहरीले दुई जनालाई पक्राउ गरेको छ । 

जिल्ला प्रहरी कार्यालय झापाका सूचना अधिकारी तथा प्रहरी नायव उपरीक्षक (प्रनाउ) रञ्जन अवाका अनुसार ललितपुर साविक मिखेल हाल महाङ्काल गाउँपालिका–१ स्थायी ठेगाना भएका दिलनाथ बजगाईं २०८१ कात्तिक २९ गतेदेखि झापाको मेचीनगर नगरपालिका–६ काँकडभिट्टाबाट बेपत्ता भएका थिए । उनी हराएको भन्दै उनकी श्रीमती तुलसा बुढा बजगाईंले प्रहरीमा निवेदन दिएकी थिइन् ।

निवेदनका आधारमा अनुसन्धान अघि बढाउने क्रममा बजगाईंसँगै हिँड्ने गरेका उनका नजिकका साथी म्याग्दी घर भई हाल मेचीनगर–१० बस्ने ४५ वर्षीय ‘राम’ भन्ने गुप्तबहादुर सिंहमाथि शंका लागेपछि प्रहरीले सोधपुछ गरेको थियो । 

सोधपुछका क्रममा सिंहले देखाएको स्थान मेचीनगर–७ भान्सा खोला (गैरीगाउँ) स्थित जयप्रसाद तिवारीको जग्गामा आफैँले सञ्चालन गरेको बंगुर फर्मभित्र उत्खनन गर्दा मानव आकृति देखिने कंकाल फेला परेको प्रनाउ अवाले जानकारी दिए । प्रहरी टोलीले स्थानीय नागरिक तथा जनप्रतिनिधिको रोहबरमा जेसिबी प्रयोग गरी उत्खनन गरेको थियो ।

बरामद गरिएको कंकाल परीक्षणका लागि प्रादेशिक अस्पताल भद्रपुर झापा पठाइएको छ । उक्त कंकाल बेपत्ता दिलनाथ बजगाईंकै हो वा होइन भन्ने यकिन गर्न शव परीक्षण पश्चात् नमुना परीक्षणका लागि केन्द्रीय प्रहरी विधि विज्ञान प्रयोगशाला पठाइने प्रक्रिया भइरहेको प्रहरीले जनाएको छ । 

उक्त घटनामा संलग्न रहेको आरोपमा प्रहरीले गुप्तबहादुर सिंहका साथै भारतको अलेपुर विरपारा घर भई हाल मेचीनगर–८ बस्ने ४९ वर्षीय संजय लामालाई समेत पक्राउ गरी थप अनुसन्धान अघि बढाएको छ ।

काठमाडौं । पाकिस्तानले अफगानिस्तानका विभिन्न १० स्थानमा ड्रोन र हवाई आक्रमण गरेको दाबी गरेको छ । इस्लामाबादले यसलाई अफगानिस्तानबाट आएको भनिएको ड्रोन आक्रमणको प्रयासको जवाफ भएको जनाएको छ ।

पाकिस्तानी सञ्चारमन्त्री अताउल्लाह तारारका अनुसार पाकिस्तानले ‘आत्मरक्षाको सार्वभौम अधिकार’ प्रयोग गर्दै ड्रोन प्रक्षेपण र भण्डारणका लागि प्रयोग गरिएका भनिएका १० स्थानमा लक्षित हवाई तथा ड्रोन आक्रमण गरेको हो । उनले ती आक्रमण ‘सुनियोजित, सटीक, सीमित र सैन्य लक्ष्यमा मात्रै केन्द्रित’ रहेको दाबी गरेका छन् ।

यो आक्रमण केही दिनअघि पाकिस्तानले अफगानिस्तानका कुनार र पक्तिका प्रान्तमा गरेको हवाई आक्रमणपछि भएको हो । अफगानिस्तानले त्यसबेला तीन सर्वसाधारणको मृत्यु भएको र चार जना घाइते भएको जनाएको थियो ।

अफगान सरकारका प्रवक्ता जबिहुल्लाह मुजाहिदले पाकिस्तानले नागरिक बस्तीलाई निशाना बनाएको आरोप लगाउँदै यसलाई ‘आक्रमण र अपराधको पुनरावृत्ति’ भनेका छन् । उनले पाकिस्तानले आफ्नै आन्तरिक सुरक्षा समस्याबाट ध्यान मोड्न यस्तो कदम चालेको दाबी गर्दै ‘उचित जवाफ दिने’ चेतावनी दिएका छन् ।

स्थानीय सञ्चारमाध्यम टोलोन्युजका अनुसार यसअघि पाकिस्तानी लडाकु विमानले पक्तिकाको बर्माल जिल्ला र कुनारका विभिन्न क्षेत्रमा आक्रमण गरेका थिए । संयुक्त राष्ट्रसंघीय अफगानिस्तान सहायता नियोगका अनुसार सन् २०२६ को अप्रिलदेखि जुनसम्म सीमापार सशस्त्र हिंसाबाट अफगानिस्तानमा ३९९ जना सर्वसाधारण प्रभावित भएका छन् । यस अवधिमा ५७ जनाको मृत्यु र ३४२ जना घाइते भएका थिए, जसमा ४० महिला र ११२ बालबालिका रहेका छन् ।

संयुक्त राष्ट्रसंघीय अफगानिस्तान सहायता नियोगले उक्त अवधिमा अफगानिस्तानभित्र अभिलेख गरिएका सबै सीमापार नागरिक क्षतिलाई पाकिस्तानी सुरक्षा बलसँग सम्बन्धित रहेको जनाएको छ । पक्तिया, पंक्तिका र कुनार हवाई आक्रमणबाट सबैभन्दा बढी प्रभावित प्रान्तमध्ये रहेका छन् । पाकिस्तान र अफगानिस्तानबीच पछिल्ला दिनहरूमा सीमापार तनाव लगातार बढ्दै गएको छ । एएनआई

ताप्लेजुङ । तीनजुरे, मिल्के र जलजले क्षेत्रको मुख्य आकर्षण गुफा पोखरी पुगेपछि हिमाली दृश्य र गुराँस वनको सौन्दर्यले मन हर्ष विभोर हुन्छ । समुद्री सतहबाट २,८९० मिटर उचाइमा रहेको यो स्थानको चर्चित पोखरीकै नाममा गुफा पोखरी नामकरण भएको हो ।

तीनजुरे, मिल्के र जलजलेको संगम गुफा पोखरी तेह्रथुम र सङ्खुवासभा जिल्लाको पनि मिलनबिन्दु हो । ताप्लेजुङका पश्चिमी गाउँ, तेह्रथुमका उत्तरी र सङ्खुवासभाका दक्षिणी गाविसवासी यही पोखरी मार्ग हुँदै आवतजावत गर्छन् ।

हिउँदमा हिउँले पोखरी नै जम्छ । अधिक हिमपात हुने गुफा पोखरीमा पुस र माघ महिना हिउँ खेल्न सुनसरीको इटहरी, धरान, धनकुटा, तेह्रथुमको वसन्तपुर, सङ्खुवासभाको खाँदबारीदेखिका युवाको जमघट भइरहन्छ ।

गुफा पोखरीसँग जोडिएको मेन्छेम डाँडा अर्को विशेषताले भरिएको छ । ताप्लेजुङको पाथीभरा देवीको दर्शन गर्न यो स्थानबाट सूर्योदयको दृश्य देख्न सकिन्छ । गुफा पोखरी पुगेका अधिकांश युवायुवती बिहान ३ बजे नै सूर्योदयको दृश्य अवलोकन गर्न मेन्छेम डाँडा पुगिसकेका हुन्छन् । 

गुफा पोखरी जोड्ने मोटर बाटो निर्माण पूरा भएको छ । इटहरी-धरान हुँदै ताप्लेजुङको मैवाखोला गाउँपालिका दैनिक बस सञ्चालनमा रहेको छ ।

काठमाडौं । परराष्ट्रमन्त्री शिशिर खनालले संयुक्त राष्ट्रसंघको ८१औँ महासभाका अवसरमा बुधबार न्यूयोर्कमा भारतका विदेशमन्त्री डा. एस. जयशंकरसँग भेटवार्ता गरेका छन् । भेटका क्रममा परराष्ट्रमन्त्री खनालले नेपालमा हालै आएको विनाशकारी बाढीपछि भारत सरकार र भारतीय जनताले व्यक्त गरेको ऐक्यबद्धता तथा तत्काल उपलब्ध गराएको महत्वपूर्ण सहयोगप्रति धन्यवाद व्यक्त गरे ।

भेटमा दुवै मन्त्रीले नेपाल–भारत सम्बन्धका विविध पक्ष तथा आपसी हितका विषयमा विचार आदानप्रदान गरेका थिए । नेपाल र भारतबीच लामो समयदेखि कायम रहेको घनिष्ठ तथा मैत्रीपूर्ण सम्बन्धलाई थप सुदृढ गर्दै द्विपक्षीय सहकार्यलाई अघि बढाउने विषयमा दुबै मन्त्रीले जोड दिएका थिए ।

काठमाडौं । काठमाडौंको त्रिपुरेश्वरस्थित राहदानी विभाग अगाडि भएको सवारी आगजनीको घटनामा मृत्य हुनेको पहिचान खुलेको छ । 

मृतक चालक मकवानपुरको इन्द्रसरोवर गाउँपालिका–३ का अर्जुन दोङ तामाङ रहेको खुलेको उपत्यका ट्राफिक प्रहरी कार्यालयका प्रवक्ता एसपी नरेशराज सुवेदीले जानकारी दिए । 

उनले भने, ‘मकवानपुरको इन्द्रसरोबर गाउँपालिका वडा नम्बर ३ का अर्जुन दोङ तामाङ भन्ने खुलेको छ ।’ 

भक्तपुरबाट थानकोटतर्फ जाँदै गरेको रिद्धिसिद्धी यातायातको बा ५ ख ४२७४ नम्बरको बसमा दिउँसो करिब साढे १२ बजे आगलागी भएको थियो । 

आगलागीमा परी घाइते भएका चालकको कीर्तिपुर अस्पतालमा मृत्यु भएको छ । 

प्रारम्भिक अनुसन्धानका क्रममा चालक तामाङले आफ्नै नामको नभई अन्य व्यक्तिको नाममा जारी भएको सवारी चालक अनुमतिपत्र (लाइसेन्स) प्रयोग गरेको खुलेको एसपी सुवेदीले जानकारी दिए । उनको आधिकारिक लाइसेन्स जारी भएको विवरणसमेत फेला पार्न नसकेको उनले बताए । 

एसपी सुवेदीका अनुसार उनले यातायात समिति लगायत विभिन्न निकायमा पेस गरेका कागजातमा समेत फरक–फरक व्यक्तिको नाममा रहेको लाइसेन्स दुरुपयोग गरेको देखिएको छ ।

एसपी सुवेदीले भने, ‘उहाँको अहिलेसम्म बुझ्दा अरू व्यक्तिकै नामको लाइसेन्स दुरुपयोग गर्नुभएको रहेछ । उहाँको आधिकारिक व्यक्तिगत लाइसेन्स अहिलेसम्म हामीले फेला पार्न सकेका छैनौँ । लाइसेन्सको विवरण हेर्दाखेरि अहिलेसम्म उहाँको लाइसेन्स जारी भएको हामीले फेला पार्न सकेका छैनौँ ।’

मृतकको शव पोस्टमार्टमलगायतका कानुनी प्रक्रिया पूरा गरेपछि थप अनुसन्धान अघि बढाइने एसपी सुवेदीले जानकारी दिए ।

काठमाडौं । त्रिपुरेश्वरमा सोमबार बसमा आगलागी हुँदा जलेर मृत्यु भएका व्यक्तिको पहिचान अझै खुल्न सकेको छैन् । 

काठमाडौं उपत्यका ट्राफिक प्रहरी कार्यालयका सूचना अधिकारी नरेशराज सुवेदीका अनुसार चालकको मृत्यु भइसकेकाले उनको पहिचना र बतनबारे आवश्यक अनुसन्धान भइरहेको छ । 

‘मृतकका आफन्तहरु पनि सम्पर्क आउनुभएको छैन् । हिजो सम्पर्कमा आउनुभएका व्यक्तिहरुपनि आज सम्पर्कविहीन हुनुहुन्छ । हामी निरन्तर अध्ययनमा छौं, आज दिनभरमा पहिचान पत्ता लगाउने छौं,’ सुवेदीले भने । 

जलेका व्यक्तिको साथमा रहेको लाइसेन्सको आधारमा प्रहरीले उनी काभ्रेका २५ वर्षीय दावा लामा रहेको भएपनि दावा लामा भन्ने व्यक्तिले आफू सकुशल रहेको सार्वजनिक भएपछि प्रहरीले अनुसन्धानलाई थप तिब्र बनाएको छ ।

सामाजिक संजालमा आफूलाई दावा लामा भन्ने व्यक्तिलाई प्रहरीले उपत्यका ट्राफिक प्रहरी कार्यालय रामशाहपथ बोलाएको साथै बससँग सम्बन्धित व्यक्तिहरुको पनि खोजी भइरहेको प्रहरीले जनाएको छ ।

रिद्धिसिद्धी यातायातको बा ५ ख ४२७४ नम्बरको बसमा सोमबार दिउँसो त्रिपुरेश्वर बस स्टप नजिक आगलागी भएको थियो ।

बसमा आगो लाग्नुअघि चालक र ट्राफिक प्रहरीबीच विवाद भएको थियो । चालकले बोकेको लाइसेन्सका आधारमा प्रहरीले मिडियामा सूचना दिएको थियो तर लाइसेन्स दुरुपयोगको भएको अनुमान गरिएको छ ।

आगलागीमा घाइते भएका चालकको सोमबार साँझ नै कीर्तिपुर अस्पताल (बर्न अस्पताल)मा उपचारका क्रममा निधन भएको प्रहरीले जनाएको छ । 

काठमाडौं । भोटेकोशी तथा त्रिशूली नदीमा आएको बाढी र त्यसपछिको पहिरोबाट नेपालको पर्यटन क्षेत्रमा ५२ अर्ब ६७ करोड ४५ लाख ७६ हजार ५०० रुपैयाँ बराबरको प्रारम्भिक आर्थिक क्षति भएको प्रतिवेदन पेश गरिएको छ । क्षतिग्रस्त पर्यटन क्षेत्रको पुर्नरुत्थान तथा भविष्यमा हुने विपद्का लागि पूर्वतयारीलाई व्यवस्थित बनाउन पुर्नरुत्थानको मस्यौदा तयार गर्ने जिम्मेवारीसमेत सम्बन्धित समितिलाई दिइएको छ ।

संस्कृति, पर्यटन तथा नागरिक उड्डयन मन्त्रालयमा सोमबार आयोजित पर्यटन क्षेत्रमा परेको प्रभाव तथा पुनरुत्थानसम्बन्धी प्रतिवेदन प्रस्तुति तथा छलफल कार्यक्रममा नेपाल पर्यटन बोर्डको द्रूत प्रतिक्रिया टोली (क्यूआरटी) का संयोजक तथा बोर्डका कार्यकारी सदस्य सहदेव धमलाले प्रारम्भिक प्रतिवेदन प्रस्तुत गरेका हुन् ।

कार्यक्रम संस्कृति, पर्यटन तथा नागरिक उड्डयन मन्त्री खड्गराज पौडेल ‘गनेस’को उपस्थितिमा सम्पन्न भएको थियो । कार्यक्रममा मन्त्रालयका सचिव मुकुन्द निरौला, सहसचिव तथा शाखा प्रमुखहरू, नेपाल पर्यटन बोर्डका प्रतिनिधि तथा निजी क्षेत्रका प्रतिनिधिहरूको सहभागिता थियो ।

प्रतिवेदनअनुसार बाढी तथा पहिरोबाट विशेष गरी रसुवा, नुवाकोट, धादिङ र गोरखा लगायतका क्षेत्रमा पर्यटन पूर्वाधार, होटेल तथा पर्यटन व्यवसाय, यातायात पहुँच, पदमार्ग र पर्यटक व्यवस्थापनमा ठुलो क्षति पुगेको छ ।

क्षेत्रगत रूपमा सबैभन्दा बढी क्षति होटेल व्यवसायमा भएको प्रारम्भिक आकलन गरिएको छ । होटेल क्षेत्रमा १९ अर्ब ५६ करोड ४ लाख ४८ हजार रुपैयाँ, वैदेशिक पर्यटन आम्दानीमा १४ अर्ब ६० करोड २४ लाख ६४ हजार रुपैयाँ तथा मानवबल एवं पर्यटक व्यवस्थापनमा १२ अर्ब २६ करोड ८४ लाख २४ हजार ५०० रुपैयाँ बराबरको क्षति भएको प्रतिवेदनमा उल्लेख छ ।

त्यस्तै, सम्पदा तथा पर्यटन पूर्वाधारतर्फ १ अर्ब ६६ करोड ४० लाख रुपैयाँ, सवारीसाधनतर्फ १ अर्ब ५१ करोड ४० लाख ८० हजार रुपैयाँ, रेस्टुरेन्टतर्फ १ अर्ब ३८ करोड ५० लाख २० हजार रुपैयाँ र लाङटाङ क्षेत्रमा व्यावसायिक कारोबारतर्फ १ अर्ब २७ करोड ६४ लाख ४० हजार रुपैयाँ बराबरको क्षति भएको आकलन गरिएको छ ।

आन्तरिक पर्यटन राजस्वमा १९ करोड ८७ लाख रुपैयाँ, राफ्टिङ तथा क्याम्पिङ साइटमा १५ करोड ५० लाख रुपैयाँ र ट्रेकिङ ट्रेलमा ५ करोड रुपैयाँ बराबरको प्रारम्भिक क्षति भएको प्रतिवेदनमा उल्लेख छ ।

बाढी तथा पहिरोमा १ हजार ११७ जना नेपाली तथा विदेशी नागरिक प्रभावित तथा सम्पर्कविहीन भएको प्रतिवेदनमा उल्लेख छ । तीमध्ये ३१० जनाको सकुशल उद्धार गरिएको छ भने १३ जना सम्पर्कमा आएका छन् । हालसम्म ७९४ जना सम्पर्कविहीन रहेकोमा ६०६ जना विदेशी र १८८ जना नेपाली रहेको जनाइएको छ । उद्धार गरिएकामध्ये २५८ पुरुष र ५२ महिला छन् ।

घटना भएको करिब एक घण्टाभित्रै पर्यटक प्रहरी, ट्राभल तथा ट्रेकिङ कम्पनी र कैलाश–मानसरोवर टुर अपरेटरहरूसँग समन्वय गरी खोज तथा उद्धार कार्य सुरु गरिएको नेपाल पर्यटन बोर्डका वरिष्ठ निर्देशक हिक्मत सिंह ऐरले जानकारी गराएका हुन् । 

प्रतिवेदनमा विपद्पछिको पर्यटन पुनरुत्थानलाई क्षतिग्रस्त संरचनाको पुनर्निर्माणमा मात्र सीमित नगरी भविष्यमा देखिन सक्ने जलवायुजन्य जोखिमलाई समेत ध्यानमा राखेर सुरक्षित तथा दिगो पर्यटन प्रणाली विकास गर्नुपर्नेमा जोड दिइएको छ ।

बोर्डका वरिष्ठ निर्देशक ऐरले रसुवा क्षेत्रलाई दीर्घकालीन रूपमा ‘क्लाइमेट हेरिटेज’ का रूपमा विकास गर्ने अवधारणा अघि सारिएको जानकारी दिए । उनले संकटका समयमा प्रभावकारी समन्वय र शीघ्र प्रतिकार्यका लागि बोर्डमा २४ सै घण्टा सञ्चालन हुने क्राइसिस सेल तथा क्यूआरटीलाई निरन्तरता दिनुपर्ने र त्यसका लागि वार्षिक १ देखि ५ करोड रुपैयाँसम्म बजेट व्यवस्था गर्नुपर्ने सुझाव दिए ।