काठमाडौं । आज नेकपा (माओवादी केन्द्र) र गंगानारायण श्रेष्ठले नेतृत्व गरेको नेपाल समाजवादी पार्टीका बिचमा पार्टी एकीकरण हुने भएको छ । 

सोमबार बिहान ११ः३० बजे ललितपुरको ग्वार्को खरिबोटस्थित कान्तिपुर ब्यांक्वेटमा पार्टी एकीकरण घोषणा सभा राखिएको माओवादी केन्द्रीय कार्यालयले जनाएको छ ।   

घोषणासभा माओवादी केन्द्रका अध्यक्ष पुष्पकमल दाहाल प्रचण्ड लगायतका शीर्ष नेताहरुले सम्बोधन गर्नेछन् ।  

काठमाडौं । प्रधानमन्त्री केपी शर्मा ओलीले गणतन्त्र दिवसलाई जनस्तरमा समेत भव्यरुपमा मनाउन आग्रह गरेका छन् । 

प्रेस चौतारी नेपालका पदाधिकारी र सचिवालय सदस्यसँग सोमबार प्रधानमन्त्री निवास, बालुवाटारमा भएको भेटमा नेकपा (एमाले)का अध्यक्षसमेत रहेका प्रधानमन्त्री ओलीले जनताको सङ्घर्षको प्रतिफलका रुपमा प्राप्त गणतन्त्र दिवसलाई सरकारीस्तरका साथै जनस्तरबाट पनि मनाउन आग्रह गरेका हुन् । 

नेपाल सरकारले यही जेठ १५ गतेको गणतन्त्र दिवस मनाउन प्रधानमन्त्री ओलीको अध्यक्षताका मूल आयोजक समितिको समेत गठन गरेको छ । 

‘गणतन्त्र दिवस, जनताको दिवस हो । यसलाई जातजातिगत विविध बाजागाजा र झाँकीसहित हरेक ठाउँबाट उत्सवका रुपमा मनाउनुपर्छ ।’, प्रधानमन्त्री ओलीले भने, ‘जनताले लडेर ल्याएको सङ्घीय लोकतान्त्रिक गणतन्त्रको सुदृढीकरणका पक्षमा हामी छौँ र यसका लागि सञ्चार क्षेत्रबाट जनताका बीचमा सही सूचना दिएर प्रचारप्रसार गरिनुपर्दछ ।’

सोमबार सम्पन्न एमालेको सचिवालयको बैठकले पनि गणतन्त्र दिवसलाई सांस्कृतिक झाँकीसहित मनाउने निर्णय गरेको थियो । सो निर्णयको कार्यान्वयनका क्रममा सञ्चारमाध्यम र डिजिटल मिडियामा समेत प्रचारप्रसार गर्नुपर्नेमा प्रधानमन्त्री ओलीको जोड दिए । 

उनले आफूलाई देशभक्तहरु प्यारो लाग्ने र देशद्रोही तथा प्रतिक्रियावादीहरु मन नपर्ने स्पष्ट गर्दै जस्तो सुकै प्रतिकूल अवस्थामा पनि सत्य र परिवर्तनका पक्षमा सम्झौता नगर्न आग्रह गरे । 

काठमाडौं । गत चैत १५ गते काठमाडौंको तीनकुनेमा भएको घटना सम्बन्धमा दुर्गा प्रसाईंलगायत ६१ जनाविरुद्ध मुद्दा दर्ता भएको छ । जसमध्ये ११ जनालाई आपराधिक उपद्रवमा मात्रै छुट्टै मुद्दा दायर गरिएको हो ।

प्रहरीले राजावादी आन्दोलनका जनकमान्डर प्रसाईंलाई कर्तव्य ज्यान, संगठित अपराध, राज्यविरुद्धको कसुर र आपराधिक उपद्रवसहितका मुद्दा दर्ता भएको काठमाडौं जिल्ला अदालतले जनाएको छ । 

त्यस्तै, ज्यान मार्ने उद्योग, राज्यविरुद्धको कसुर, संगठित अपराध, आपराधिक उपद्रवसहित पाँच वटा मुद्दामा ५० जनालाई प्रतिवादी बनाइएको हो । 

उक्त प्रदर्शन हिंसात्मक बन्दा दुई जनाको ज्यान गएको थियो। जसमा पत्रकार सुरेस रजकको आन्दोलनकारीले घरमा आगो लगाउँदा र कीर्तिपुरका सविन महर्जनको प्रहरीको गोली लागि ज्यान गएको थियो।

रौतहट ।  सर्लाही प्रहरीले अवैध समान सहितको एक ट्रकलाई नियन्त्रणमा लिएको छ । इलाका प्रहरी कार्यालय कर्मैयाको टोलीले आइतबार बिहान बागमती नगरपालिका १२ चेकपोष्टबाट ट्रकलाई  नियन्त्रणमा लिएको हो । 

सर्लाही प्रहरीका सूचना अधिकारी एवं प्रहरी नायब उपरीक्षक (डिएसपी) सरोज राईका अनुसार बुटवलबाट विराटनगरका लागि छुटेको प्रदेश ३–०१–००५ ख ९४६० नम्वरको ट्रकलाई नियन्त्रणमा लिइएको हो ।

ट्रकमा लोड भएका समानको प्रज्ञापन पत्र नभएको र कतिपय समानको भ्याटबिल समेत नभएको पाइएको उनले जानकारी दिए ।

ट्रकबाट औषधि, मेसिन, हार्डवेयर, जिरा पाउडर, कस्मेटिक, टायर, हेल्मेट, मोटर पार्टस्, ब्याट्री,  र किचेनका समान बरामद भएको उनले उल्लेख गरेका छन । 

बरामद गरिएको ४७ लाख ९७ हजार ५०१ रुपियाँ बराबरको समान र ट्रक राजस्व अनुसन्धान कार्यालय पथलैया बारामा बुुझाइएको जिल्ला प्रहरी कार्यालय सर्लाहीले जनाएको छ ।

काठमाडौं । राष्ट्रिय स्वतन्त्र पार्टी (रास्वपा) को केन्द्रीय समिति बैठक बस्दैछ । बैठक आज दिउँसो २ बजे पार्टी केन्द्रीय कार्यालय वनस्थलीमा बस्ने कार्यवाहक प्रवक्ता मनिष झाले जानकारी दिएका छन् ।

रास्वपाको केन्द्रीय समितिको आकस्मिक भर्चुअल बैठक हिजो ४ बजे बसेको  थियो भने त्यसको निरन्तरता स्वरूप केन्द्रीय समितिको बैठक आज बस्न लागेको हो । 

बैठकमा पार्टी सभापति रवि लामिछानेलाई थुनामै राख्न सर्वोच्चले दिएको आदेश, पछिल्लो राजनीतिक घटनाक्रम, भिजिट भिसामा जानेहरूबाट रकम असुली भएको प्रकरणमा गृहमन्त्री रमेश लेखकसहितको संलग्नता रहेको चर्चालगायत विषयमा छलफल हुनेछ । 

काठमाडौं । त्रिभुवन अन्तर्राष्ट्रिय विमानस्थल अध्यागमन कार्यालयसँग सम्बन्धित पछिल्ला घटनाक्रमबारे सामाजिक सञ्जाल र विभिन्न सञ्चारमाध्यममा आएको समाचारप्रति गम्भीर ध्यानाकर्षण भएको भन्दै गृह मन्त्रालयले स्पष्टिकरण दिएको छ । मन्त्रालयले शनिबार एक प्रेस विज्ञप्ति जारी गर्दै ती समाचारहरू कपोलकल्पित, भ्रामक र आधारहीन भएको दाबी गर्दै खण्डन गरेको हो ।

‘मन्त्रालयको नेतृत्व कुनै पनि गैरकानुनी वा भ्रष्टाचारजन्य कार्यमा संलग्न छैन र भविष्यमा पनि संलग्न हुने छैन,’ विज्ञप्तिमा उल्लेख गरिएको छ । मन्त्रालयले सत्यतथ्य जानकारीका आधारमा मात्र समाचार प्रकाशन तथा प्रसारण गर्न मिडिया हाउस र आम सर्वसाधारणलाई आग्रह गरेको छ ।

विज्ञप्तिमा मन्त्रालयले शान्ति, सुरक्षा र सुशासन कायम गर्न गृह प्रशासन निरन्तर क्रियाशील रहेको जानकारी दिएको छ । साथै, सबै प्रकारका अनियमितता तथा अपराधका घटनामा शून्य सहनशीलताको नीति अवलम्बन गर्दै नीतिगत तथा संस्थागत सुधारको प्रक्रिया अघि बढाइरहेको मन्त्रालयले जनाएको छ ।

यसैबीच, त्रिभुवन विमानस्थल अध्यागमन कार्यालयसम्बन्धी मुद्दामा अख्तियार दुरूपयोग अनुसन्धान आयोगद्वारा छानबिन भइरहेको भन्दै अनुसन्धान पूरा भएपछि सत्यतथ्य बाहिर आउने मन्त्रालयले जनाएको छ । मन्त्रालयले छानबिन प्रक्रियामा आयोगलाई पूर्ण सहयोग गर्ने प्रतिवद्धता समेत व्यक्त गरेको छ ।

एजेन्सी । विश्वको पहिलो रोबोट फाइटिंङ(कुस्ती) प्रतियोगिता चीनमा आयोजना गरिदैछ । पूर्वी चीनको झेजियाङ प्रान्तको हाङझाउ शहरमा आइतबार सुरु हुँदैछ । 

प्रतियोगितामा अत्याधुनिक प्रविधिले सुसज्जित मानवजस्तै रोबोटहरू प्रतियोगितामा उत्रिनेछन् । चाइना मिडिया ग्रुप (सीएमजी) वल्र्ड रोबोट कन्टेस्टः मेक कम्ब्याट एरिना प्रतियोगिताको प्रत्यक्ष प्रशारण समेत गर्ने भएको छ ।

प्रतियोगिता हाङझाउको ओलम्पिक स्पोट्र्स सेन्टरमा आयोजना हुँदैछ। सहभागी ह्युमनोइड रोबोटहरूले सिधा मुक्का, हुक र साइड किक जस्ता फाइटिङ सीपहरू प्रदर्शन गर्नेछन् । त्यो भन्दापनि भुइँमा खसेपछि पनि छिटो उभिन सक्ने उनीहरुको क्षमतालाई विशेष चासो राखिएको छ ।

प्रतियोगितामा मुख्यतया दुई भागहरू हुनेछन–प्रदर्शनी खेलहरू र प्रतिस्पर्धात्मक खेलहरू। कार्यक्रमको पूर्वसन्ध्यामा, विकासकर्ताहरू र रोबोटहरू दुवैले हरेक दिन उच्च तीव्रताको सीप प्रशिक्षण लिइरहेका छन्।

सबै रोबोटहरूले घरेलु रूपमा विकसित मुख्य प्रविधिहरू अपनाउनुपर्नेछ । व्यावसायिक रेफ्री र टिप्पणीकारहरूका अतिरिक्त, सम्बन्धित क्षेत्रका विज्ञहरूलाई रोबोटहरूको हरेक चालको गहन विश्लेषण गर्न प्रतिस्पर्धा स्थलमा आमन्त्रित गरिएको छ ।

धरान । राई समुदायहरूको छाता संस्था किरात राई यायोक्खा धरान वडा नँ. १४ को प्रथम अधिवेशन शुक्रवार सम्पन्न भएको छ । नयाँ नेतृत्व चयनका लागि आयोजित अधिवेशनले अध्यक्षमा कौशिला राईको नेतृत्वमा जम्मा पन्ध्र सदस्यरहेको किराया धरान १४ वडा समिति चयन गरेको हो । 

एक वर्ष अगाडी वडा तदर्थ समितिको रूपमा गठन भएको सोही समितिलाई प्रथम अधिवेशन सम्पन्न गरी पूर्णता दिइएको, चयन भएका समितिका अध्यक्ष कौशिला राईले जानकारी गराए । 

उक्त अधिवेशनको उद्घाटन प्रमुख अतिथि किरात राई यायोक्खाका सुनसरी जिल्ला अध्यक्ष राजेन्द्र राईले गरेका थिए । त्यसैगरी किरात राई यायोक्खा धरान नगर समितिका अध्यक्ष लीला राईको पनि उपस्थिति थियो, लगायत शुभेच्छुकहरू राई जातिको आफ्नो मौलिक भेषभूषामा सजिएर अधिवेशन स्थलमा देख्न सकिथ्यो ।

एजेन्सी । रुसी सेनाले धेरै दिशामा कारबाही जारी राखेको बताएको छ ।  तर युक्रेनले धेरै रुसी आक्रमणहरूलाई विफल पारेको दाबी गरेको छ ।

आफ्नो दैनिक व्रिफिङमा रूसी रक्षा मन्त्रालयले रुसी सेनाले मे १७ देखि २३ सम्म सुमी, खार्किभ र डोनेट्स्कमा छ वटा बस्तीहरू नियन्त्रणमा लिएको जनाएको छ ।

रूसी सेनाले युक्रेनी ट्याङ्कहरू, बख्तरबंद सवारी साधनहरू, तोपखानाहरू, इलेक्ट्रोनिक युद्धका लागि आधार स्टेशनहरू र गोला बारुद डिपोहरू नष्ट गरेको दाबी पनि गरेको छ । 

रूसी वायु रक्षा प्रणालीले रकेट प्रोजेक्टाइल र युक्रेनी सेनाका एक हजार भन्दा बढी ड्रोनहरूलाई रोकेको मन्त्रालयले जनाएको छ।

सोही दिन, युक्रेनी पक्षले अग्रपंक्तिमा १४१ लडाईं भएको जनाएको छ । युक्रेनी हवाई, क्षेप्यास्त्र र तोपखाना बलले धेरै रूसी पक्षहरुलाई आक्रमण गरेको युक्रेनी सशस्त्र बलका जनरल स्टाफले जानकारी दिए ।

युक्रेनी सेनाले खार्किभ, लिमन, टोरेत्स्क, पोकरोभस्क र कुस्र्क जस्ता स्थानहरुमा रुसी आक्रमणहरूलाई विफल पारेको र रुसी ट्याङ्क, बख्तरबंद सवारी साधन, तोपखाना प्रणाली, ड्रोनहरु नष्ट गरेको दाबी गरेको छ ।

शनिबार बिहान युक्रेनको राजधानी किभमा रूसी क्षेप्यास्त्र र ड्रोनले आक्रमण गरेको थियो, शहरभरि विस्फोटको आवाज सुनिएको थियो। हवाई हमलामा कम्तिमा आठ जनाको मृत्यु भएको र विस्फोटका कारण शहरभरि धेरै ठाउँमा आगो लागेको बताइएको छ ।

युक्रेनी वायुसेनाले रुसले किभमा ब्यालिस्टिक क्षेप्यास्त्र आक्रमण गरेको बताएको छ। युक्रेनी मिडियाहरुका अनुसार युक्रेनको आकाशमा ५० वटा आक्रमणकारी ड्रोनहरू पत्ता लागेको र जसमध्ये धेरैजसो किभतर्फ गइरहेका थिए।(सीसीटीभीप्लस)

मुगु । जुम्लाको तिला गाउँपालिका–४, भोटचौरमा शुक्रबार भएको अटो दुर्घटनामा चालकको मृत्यु भएको छ । क.१ ह.३१ नम्बरको अटो दुर्घटना हुँदा ४४ वर्षीय चालक रणबहादुर कुँवरको ज्यान गएको कुडारी प्रहरी चौकीका प्रहरी हवल्दार बैजु महत्तोले जानकारी दिए ।

प्रहरीका अनुसार तातोपानी गाउँपालिका–१ राँकाबाट तातोपानी–७ सर्मीगाउँतर्फ धान बोकेर जाँदै गरेको अटो सडकबाट करिब ६० मिटर तल खसेको थियो । 

दुर्घटनामा गम्भीर घाइते भएका चालक कुँवरलाई तत्काल उपचारका लागि कर्णाली स्वास्थ्य विज्ञान प्रतिष्ठान लगिएको थियो।

तर उपचारका क्रममा शनिबार बिहान ५ बजे उनको मृत्यु भएको जिल्ला प्रहरी कार्यालय जुम्लाले पुष्टि गरेको छ । प्रहरीले दुर्घटनाको कारणबारे थप अनुसन्धान गरिरहेको जनाएको छ ।