आइतबार, १४ भदौ २०८३
गाजा खेतीमा प्रहरीको कडाई, गाँजा नष्ट अभियानमा प्रहरीले बढायो सक्रियता
धरान । अवैध रूपमा गाँजा नियन्त्रणमा प्रहरीले सक्रियता देखाएको छ। धनकुटा जिल्ला को महालक्ष्मी नगरपालिका ,शहिदभुमि गाउपालिका र पाख्रिवास नगरपालिकाका विभिन्न क्षेत्रमा अवैध रूपमा लगाइएको गाजा धनकुटा प्रहरीले नष्ट गरेको हो । चालु आर्थिक वर्षको कार्तिक अन्तिम सम्म जिल्ला प्रहरी कार्यालय धनकुटाले ५८ रोपनी जग्गामा गरिएको १ लाख ८७ हजार गाजाको बोट नष्ट गरेको हो ।
बेर्ना तथा गाँजाको बोट पूर्ण रूपमा नष्ट गर्ने तथा तयारी अवस्थामा रहेको गाजा नियन्त्रण मा समेत प्रहरीले कडाई गरेको जिल्ला प्रहरी कार्यालय धनकुटाले जनाएको छ ।
स्थानको पहिचान गरी धनकुटाका विभिन्न स्थानमा त्यहाँका स्थानीय तहसँग समन्वय गरेर फँडानीलाई तिब्रता दिएको हो । हुन त यो अभियान विगत केही वर्ष अगाडिको देखी नै हो । प्रहरीले चलाएको अभियानले खासै सार्थकता पाएको भने छैन । तर यस वर्ष भने जिल्ला प्रहरी कार्यालयले स्थानीय तहसँगै समन्वय गरेर आफ्ना मातहतका प्रहरी परिचालन गरी गाँजा खेती नष्ट गर्न थालेको हो ।
अभियान अन्तर्गत प्रहरीले सहीदभूमि गाउँपालिकाको आँखीसल्लाह, आँखुटार, त्रिवेणी, साँगुरीगढी गाउँपालिकाको मुक्तेन, आहाले, चाँदीबजार, गोलखाँडी लगायतका क्षेत्रमा गरिएका गाँजा खेती नष्ट गर्ने काम गरिएको जिल्ला प्रहरी कार्यालय धनकुटाका प्रमुख एसपी श्यामसिंह चौधरीले जानकारी दिए ।
अभियान अन्तर्गत प्रहरीले यही आर्थिक वर्षको श्रावण महिनामा मात्रै ५८ रोपनी जग्गामा गरिएको १ लाख ८७ हजार गाजाको बोट नष्ट गरेको थियो । सो अवधिमा ६५ जना प्रहरी परिचालन गरिएको जिल्ला प्रहरी कार्यालयले जनाएको छ । गत श्रावण १३ गते धनकुटामा रहेका विभिन्न ठाउँमा १५ रोपनी जग्गामा लगाइएको २५ हजार ७ सय गाँजाको बोट नष्ट गरेको थियो ।
नष्ट गर्ने काममा सो बेला १८ जना प्रहरी खटाइएको थियो । यसैगरि श्रावण १४ गते ८ रोपनी जग्गामा लगाइएको २६ हजार बोट प्रहरीले नष्ट गरेको थियो । अभियानमा १७ प्रहरी जवान खटाइएको थियो । यसैगरि श्रावण १७ गते २५ रोपनी जग्गमा लगाइको ४० हजार गाँजा नष्ट गरिएको थियो । यस बेला १५ पहरी परिचालन गरिएको थियो भने श्रावण १८ गते १० रोपनी जग्गामा लगाइएको १७ हजार गाँजाको बोट नष्ट गरिएको थियो । सो बेला १५ जना प्रहरी परिचालन गरिएको कार्यालयले जनाएको छ ।
यसैगरी सोही वर्षको असोज महिनामा समेत प्रहरीको अभियान अन्तर्गत उल्लेख्य रूपमा गाजाको बोट नष्ट गरेको थियो । जिल्ला प्रहरी कार्यालय धनकुटाका अनुसार असोज महिनामा ३९।५ रोपनी जग्गामा लगाइएको २३ हजार ९ सय ८० वटा गाँजाको बोट नष्ट गरेको थियो । नष्ट गर्ने क्रममा ६५ जना प्रहरी परिचालन गरिएको प्रहरीले जनाएको छ ।
प्रहरीका अनुसार असोज २१ गते १६।५ रोपनीमा लगाएको ९ हजार ९ सय गाँजाको बोट नष्ट गरिएको थियो । सो बेला ३३ जना प्रहरी परिचालन गरिएको थियो । यस्तै असोज २२ गते २३ रोपनीमा लगाइएको १४ हजार ८० वटा गाँजाको बोट नष्ट गरिएको थियो । सो बेला ३० जना प्रहरी परिचालन गरिएको थियो ।
प्रहरीले अभियानलाई तिब्रता दिएसँगै कार्तिक महिनामा भने सबैभन्दा बढी गाँजाको बोट नष्ट गर्न सफल भएको थियो । जिल्ला प्रहरी कार्यालय धनकुटाका अनुसार कार्तिक महिनामा धनकुटाका विभिन्न स्थानमा १ सय २९ रोपनी जग्गामा लगाइएको ९७ हजार ७ सय ५० वटा गाँजाका बोट नष्ट गरिएको थियो । यसमा ८६जना प्रहरी परिचालन गरिएको थियो ।
जस अनुसार कार्तिक ८ गते ३ रोपनी जग्गामा लगाइएको ७ हजार गाँजाको बोट ४ जना प्रहरीबाट गरिएको थियो । यस्तै कार्तिक २१ गते १६ रोपनीमा लगाइएको ४ हजार ५ सय गाँजाको बोट ७ जना प्रहरीद्वारा नष्ट गरिएको थियो । त्यसैगरि कार्तिक २२ गते ७ रोपनी जग्गामा लगाइएको १५ हजार बोट, २३ गते २६ रोपनी जग्गामा लगाइएको २४ हजार ४ सय बोट, कार्तिक २५ गते ३२ रोपनीमा लगाइएको १३ हजार १ सय बोट, २६ गते ३० रोपनी जग्गामा लगाइएको १४ हजार ६ सय बोट र २७ गते १ रोपनी जग्गामा लगाइएको १ सय ५० बोट नष्ट गरिएको थियो ।
‘डोरी’ मा अभिनेत्री अञ्जना बराइली अनुबन्ध, मङ्सिर दोस्रो साता फ्लोरमा जाने
काठमाडौँ । मङ्सिर दोस्रो साता फ्लोरमा जाने तयारीमा रहेको नेपाली चलचित्र ‘डोरी’मा अभिनेत्री अञ्जना बराइली अनुबन्ध भएकी छन् ।
प्रमुख भूमिकामा अभिनय गरेको पहिलो चलचित्र ‘महापुरुष’, दोस्रो चलचित्र ‘पुजार सार्की’ पछि ‘अल टाइम रेकर्ड ब्रेकर’ चलचित्र ‘पूर्ण बहादुरको सारङ्गी’बाट व्यापक तारिफ पाएकी अञ्जनाले ‘डोरी’मा पनि प्रमुख भूमिकामा अभिनय गर्ने निर्देशक अरुण लामाले बताए ।
अञ्जनासँगै यस चलचित्रमा अभिनेता प्रकाश घिमिरे पनि अनुबन्ध भएका छन् । जी सेवेन प्रोडक्सनको ब्यानरमा निर्माण हुने यस चलचित्रमा यसअघि कलाकारहरू प्रवीण खतिवडा, शिशिर बाङ्गदेल, कविता आले, राज पौडेल, विशाल राई, मिलन राई, नूतन, र वीरेन्द्र सिंह कुशवाहा लगायत प्रवेश गरेका थिए । हरर, थ्रिलर, एक्सन र कमेडीको मिश्रणमा निर्माण हुन लागेको यस चलचित्रलाई अरुण लामाले निर्देशन गर्नेछन् ।
‘डोरी’को कथा परिवारको आर्थिक बोझ हल्का गर्न जीवनका जोखिमपूर्ण निर्णयहरू लिने एउटा जीवनको गहिरो दुष्चक्रमा फसेको सङ्घर्षशील युवाको वरिपरि घुम्ने निर्देशकले जनाए । उनका अनुसार चलचित्रमा हाँसो, त्रास, र असफलतासहितको सङ्घर्षलाई रोचक तरिकामा प्रस्तुत गरिने छ ।
चलचित्रको लेखन निर्देशक अरुण लामाले नै गरेका छन् भने मनोज पण्डितले ‘स्क्रिप्ट डक्टरिङ’ गरेका छन् । यसका निर्माताको नाम ‘मिस्टर एक्स’ रहेको जनाइएको छ भने कार्यकारी निर्माता राज थापा रहेका छन् ।
यसमा सङ्गीत राजनराज सिवाकोटी, सिनेमाटोग्राफी सौरभ लामा र एक्सन निर्देशन राजु तामाङले गर्नेछन् । ‘डोरी’ आगामी वर्ष सन् २०२५ मा रिलिज लक्ष्य राखिएको छ ।
कीर्तिपुर नगरपालिकामा यौनिक तथा लैङ्गिक अल्पसङ्ख्यकको उम्मेदवारी
कीर्तिपुर । मङ्सिर १६ गते हुन लागेको स्थानीय तह उपनिर्वाचनमा तेस्रोलिङ्गी महिला दीपक महर्जन (हनि) र राजीव महर्जन (मौनी)को उम्मेदवारी घोषणा भएको छ।
उपेन्द्र यादव नेतृत्वको जनता समाजवादी पार्टी नेपाल (जसपा) ले कीर्तिपुर नगरपालिकाको मेयरमा तेस्रोलिङ्गी महिला हनि र वडा नं ४ को वडा अध्यक्षमा मौनीलाई उम्मेदवार बनाउने घोषणा गरेको हो।
यौनिक तथा लैङ्गिक अल्पसङ्ख्यक समुदायको अधिकारका लागि वकालत गर्दै आएको मायाको पहिचान नेपालको पहलमा हनि मेयर र मौनी वडा अध्यक्ष पदमा उम्मेदवार बन्न सफल भएका हुन्। मायाको पहिचान नेपालले राजनीतिमा यौनिक तथा लैङ्गिक अल्पसङ्ख्यक समुदायको सहभागिता र प्रतिनिधित्वबारे गरेको छलफलमा हनि र मौनीले उम्मेदवार बन्ने चाहना व्यक्त गरेका थिए।
मायाको पहिचान नेपालको कार्यालयमा शनिवार पत्रकार सम्मेलन गरेर हनि र मौनीले उम्मेदवारी घोषणा गरे।
कार्यक्रममा जसपा नेपालका उपाध्यक्ष विद्युत् बज्राचार्यले राज्यको ध्यान नगएको अवस्थामा पार्टीको ध्यान जानु पर्छ भनेर तेस्रोलिङ्गीलाई उम्मेदवार बनाउने घोषणा गरेको बताए। उनले कीर्तिपुर नगरको मेयर र वडा अध्यक्षमा पार्टीका उम्मेदवारलाई निर्वाचित गराउन सिङ्गो पार्टी लागेको बताए।
जसपा नेपालका केन्द्रीय सदस्य राजन केसी, सन्तोष सिलवाल, विना सिन्हा, केन्द्रीय निर्वाचन प्रतिनिधि मनोज वर्मा, केन्द्रीय पहिचान विभागका प्रतिनिधि विकास कान्छा ब्लोन, नेवा प्रदेश सदस्य राकेश श्रेष्ठ, मायाको पहिचान नेपालका सचिव सुरेन्द्र पाण्डे, नेपालमा दोस्रो पटक भएको मिस्टर गे हेन्डसमका उपाधि विजेता मनिन्द्र सिंह दनुवार लगायतले कीर्तिपुर नगरको पहिचानसँगै विकासका कामलाई अगाडी बढाउन पार्टीका उम्मेदवारको ठुलो भूमिका रहने विश्वास व्यक्त गरे।
मेयरका उम्मेदवार हनिले जसपा नेपालले उम्मेदवार बनाएकोमा गर्व लागेको बताए। उनले दबिएर बस्नुपर्ने अवस्थामा रहेका यौनिक तथा लैङ्गिक अल्पसङ्ख्यक समुदायको समस्या समाधानसँगै कीर्तिपुरको विकासमा महत्त्वपूर्ण योगदान गर्ने बताए।
सबै खाले शोषण, उत्पीडन र विभेदको अन्त्य गर्न सधैँ सङ्घर्षरत रहने शपथ खाएका हनिले मेयर पदमा उम्मेदवारी दर्ता गराउने बताए। कीर्तिपुर नगरपालिकामा तेस्रोलिङ्गी महिलाले पहिलो पटक उम्मेदवारी दिन लागेका हुन्।
देशभरका स्थानीय तहको नेतृत्वमा पुरुष र महिला मात्र छन्। कीर्तिपुर नगरमा पहिलो पटक तेस्रोलिङ्गी महिलाले उम्मेदवारी घोषणा गरे लगत्तै नगरवासीमा चासो बढेको छ। हनिले हाम्रो सपनाको सहर, कीर्तिपुर नगर नारा राखेर आफ्ना प्रतिबद्धता पनि सार्वजनिक गरेकी छन्।
सुनचाँदीको मूल्य घट्यो
काठमाडौँ । साताको पहिलो कारोबार दिन अर्थात् आइतवार नेपाली बजारमा सुनको मूल्य घटेको छ । नेपाल सुनचाँदी व्यवसायी महासङ्घका अनुसार आज सुन तोलामा एक सय रुपैयाँले घटेर तोलाको एक लाख ६० हजार रुपैयाँमा कारोबार भइरहेको छ ।
यसअघि शुक्रवार सुन तोलाको एक लाख ६० हजार एक सय रुपैयाँमा कारोबार भएको थियो ।
त्यस्तै आज चाँदीको मूल्य पनि घटेको छ । आज चाँदी प्रतितोला ५ रुपैयाँले घटेर तोलाको १९ सय ५ रुपैयाँमा कारोबार भइरहेको महासङ्घले जनाएको छ ।
रास्वपाले दोस्रो चरणको आन्दोलन घोषणा गर्दै
काठमाडौँ । राष्ट्रिय स्वतन्त्र पार्टी (रास्वपा)ले दोस्रो चरणको आन्दोलन घोषणा गर्दै छ । आइतवार पार्टी कार्यालय वनस्थलीमा ३ बजे पत्रकार सम्मेलनको आयोजना गरी दोस्रो चरणको आन्दोलनको घोषणा गर्ने रास्वपा कार्यवाहक प्रवक्ता मनिष झाले जानकारी दिए । 
गत कार्तिक २८ गते गर्ने भनिएको पत्रकार सम्मेलन स्थगित भएसँगै रास्वपाले आज पत्रकार सम्मेलन गर्ने भएको हो । सहकारीको रकम ठगी, संगठित अपराध र सम्पत्ति शुद्धिकरण कसुरमा पार्टी सभापति समेत रहेका रवि लामिछानेमाथि अनुसन्धान जारी छ। यसबिचमा रास्वपाले लामिछानेलाई राज्यले प्रतिशोधका लागि पक्राउ गरेको भन्दै पक्राउको विरोधमा आन्दोलन गर्दै आइरहेको थियो।
उक्त कारबाही सत्तारूढ राजनीतिक दलहरूले रास्वपाको बढ्दो प्रभाव र जनसमर्थनलाई दबाउन गरेको सुनियोजित षड्यन्त्र रहेको रास्वाको ठम्याइ छ।
एभरेस्ट कलरले पारित गर्यो आइपिओ निष्कासन प्रस्ताव
काठमाडौँ । रँग उत्पादन गर्ने कम्पनी एभरेस्ट कलर लिमिटेडको पहिलो साधारणसभाले सर्वसाधारणलाई चुक्ता पूँजीको १५ प्रतिशत साधारण सेयर निष्कासन गर्ने प्रस्ताव पारित गरेको छ । कम्पनीको शनिवार सम्पन्न साधारणसभाले संस्थापक सेयरधनीका तर्फबाट संचालक समितिमा प्रतिनिधित्व गर्ने ५ जना संचालकको पनि चयन गरेको छ ।
अन्य कलर उधोग भन्दा पृथक् ढँगले, स्वदेशी युवाहरूको लगानीमा गुणस्तरीय एभरेस्ट कलर उपभोग गरेर आयात प्रतिस्थापन गर्ने, रोजगारीको श्रृजना गर्ने र आन्तरिक राजस्वमा योगदान पु¥याउने उद्देश्य लिएर १४ वर्ष अघि एभरेस्ट कलर कम्पनी स्थापना भएको हो । कम्पनीको अधिकृत पुँजी ३० करोड रुपैयाँ र जारी पुँजी २६ करोड रुपैयाँ छ । त्यसमध्ये संस्थापक सेयरधनीले २२ करोड १० लाख रुपैयाँ चुक्ता गरिसकेका छन् । सर्वसाधारणलाई १५ प्रतिशत सेयर निष्कासन गरेपछि कम्पनीको चुक्ता पुँजी २६ करोड रुपैयाँ पुग्ने छ ।
साधारणसभाले सरोज लुईटेल, राजनलाल श्रेष्ठ, महेश्वर खनाल, रोजीना श्रेष्ठ र आत्माराम ढुँगानालाई संस्थापक सेयरधनीका तर्फबाट संचालकमा निर्बाचित गरेको छ । कम्पनीमा सर्वसाधारण सेयरधनीका तर्फबाट एक जना र अर्का एक स्वतन्त्र संचालक समेत ७ जनाको संचालक समिति रहने व्यवस्था छ । निर्वाचित संचालकहरुलाई निर्वाचन अधिकृत अधिवक्ता लीलानाथ घिमिरेले प्रमाणपत्र हस्तान्तरण गरेका थिए ।
एभरेस्ट कलर ५ महिनाअघि प्राइभेट लिमिटेड कम्पनीबाट पब्लिक लिमिटेडमा रूपान्तरण भएको थियो । कम्पनीले १४ वर्षदेखि बहुराष्ट्रिय कम्पनी सरह उच्च गुणस्तरीय कलरहरू उपलब्ध गराउने नेपाली कम्पनीको रूपमा परिचित रहँदै आएको छ । स्वदेशी युवाहरू सँगठीत भई सहकारी मोडलमा एभरेष्ट कलर सुरु गरेका थिए । कम्पनीले नेपाली हावापानी सुहाउदो उच्च गुणस्तरका प्रिमियमदेखि ईकोनोमी ब्रान्डका विभिन्न प्रकारका रंगहरू उपलब्ध गराइरहेको छ ।
अन्तरराष्ट्रिय गुणस्तर व्यवस्थापन प्रमाणीकरण प्रमाण पत्र आइएसओ ९०००१ः२०१५ प्राप्त गरिसकेको एभरेस्ट कलरले कुशल व्यवस्थापनको साथै उत्पादनहरूको गुणस्तर, वातावरण प्रभाव प्रतिको दायित्व, कार्यस्थलमा स्वास्थ्य र सुरक्षा आदिलाई मनन गरी अन्तरराष्ट्रिय स्तरको प्रविधि तथा अत्याधुनिक मेसिनबाट उत्पादन तथा ल्याब टेस्ट गरी नेपाली बजारमा रंगहरू वितरण गरिरहेको छ ।
आजदेखि उपनिर्वाचन आचारसंहिता लागु
काठमाडौँ । यही मंसिर १६ गते हुने स्थानीय तह उपनिर्वाचनका लागि आजदेखि निर्वाचन आचारसंहिता लागु भएको छ ।
निर्वाचन आयोगले आइतवार देखि उपनिर्वाचन हुने सम्बन्धित जिल्लाभित्र सार्वजनिक पदधारण गरेका व्यक्ति, निकाय तथा अधिकारीलाई निर्वाचन सम्पन्न नभएसम्म आचारसंहिता लागु गर्ने निर्णय गरेको आयोगका सहसचिव एवं प्रवक्ता नीता पोखरेल अर्यालले जानकारी दिएकी हुन् ।
नेपाल सरकार र मन्त्री, प्रदेश सरकार र प्रदेशमन्त्री, संवैधानिक निकाय र सोका पदाधिकारी, नेपाल सरकार वा प्रदेश सरकारका निकाय र सोका पदाधिकारी, स्थानीय कार्यपालिका र सोका सदस्य, सङ्घ, प्रदेश र स्थानीय तहका कर्मचारी, सुरक्षा निकाय, सुरक्षाकर्मी तथा कर्मचारी, सरकारी, अर्धसरकारी तथा सार्वजनिक संस्थाको कार्यालय र कर्मचारीलाई आचारसंहिता लाग्ने आयोगले जनाएको छ ।
आयोगका अनुसार राजनीतिक दल तथा राजनीतिक दलको भ्रातृ सङ्गठन, उम्मेदवार तथा सम्बन्धित व्यक्ति, राजनीतिक दल तथा उम्मेदवारको मतदान प्रतिनिधि तथा मतगणना प्रतिनिधि, सार्वजनिक पदधारण गरेको व्यक्ति, अनुगमन समितिका पदाधिकारी तथा अनुगमनकर्ता, पर्यवेक्षण संस्था तथा पर्यवेक्षक, सञ्चार प्रतिष्ठान, सोका कर्मचारी तथा सञ्चारकर्मी, निजी तथा गैरसरकारी संस्था, सोका पदाधिकारी तथा कर्मचारी र विद्यालय, महाविद्यालय वा विश्वविद्यालय, सोका शिक्षक तथा कर्मचारीको हकमा पनि आचारसंहिता लागु हुने छ ।
यसैगरी, मतदाता, विकास साझेदार संस्था, सरकारी वा अर्धसरकारी निकायबाट सञ्चालित परियोजना तथा परियोजनाका कर्मचारी, मतदाता शिक्षा कार्यक्रम सञ्चालन गर्ने संस्था तथा सो संस्थाका कर्मचारी, निजी क्षेत्रका बैंक तथा वित्तीय संस्था, सहकारी संस्था, व्यापारिक तथा औद्योगिक क्षेत्र, सोका पदाधिकारी, कर्मचारी तथा कामदार, वस्तु वा सेवा प्रदायक व्यावसायिक संस्थाका पदाधिकारी, कर्मचारी तथा कामदार र आयोगले तोकेका अन्य निकाय वा व्यक्तिले आचारसंहिताको पालना गर्नुपर्ने छ ।
आचारसंहिता लागु भएको जिल्लाका निर्वाचन हुने स्थानीय तहबाहेक अन्य क्षेत्रमा निर्वाचन आचारसंहिताले निषेध गरेका कार्य गर्नु÷गराउनु परेमा निर्वाचन आयोगलाई पूर्वजानकारी दिई निकास भएबमोजिम गर्न सकिने आयोगले जनाएको छ ।
आचारसंहिता विपरीतका कार्य भए/गरेको पाइएमा वा हुन सक्ने पर्याप्त आधार र कारण देखिएमा मौखिक, लिखित, सामाजिक सञ्जाल, विद्युतीय माध्यम वा अन्य कुनै तरिकाले उजुरी दिन पनि आयोगले आग्रह गरेको छ । आचारसंहिता उल्लङ्घन भएको पाइए कारबाही हुनेछ ।
प्रदेश नं १ पुनः नामाकरण संयुक्त सङ्घर्ष समितिको निर्णय समर्थन गर्ने : जसपा
धरान I जनता समाजवादी पार्टी किराँत राष्ट्रिय समितिले प्रदेश नं १ पुनः नामाकरण संयुक्त सङ्घर्ष समितिको निर्णय समर्थन गर्ने भएको छ । जसपा किराँत राष्ट्रिय समितिको आज धरानमा रमेश राईको अध्यक्षतामा बसेको बैठकले उक्त निर्णय गरेको हो ।
बैठकको निर्णय सार्वजनिक गर्दै आफ्नो मातहतको सम्पूर्ण समिति नेता, पदाधिकारी, कार्यकर्ता, शुभचिन्तक, समर्थक तथा प्रदेशवासीहरूलाई प्रदेश नं. १ को नाम पहिचानको आधारमा नामाकरण गराउन भौतिक उपस्थितिको लागि जसपा किरात राष्ट्रिय समितिले हार्दिक अपिल गरेको छ ।
२०७९ फागुन १७ गते प्रदेश सभाको बसेको बैठकले ‘कोशी प्रदेश’ नामकरण गरेको थियो । उक्त नामकरण पहिचानको आधारमा नभएकोले पहिचानमा आधारित नाम हुनुपर्ने माग गर्दै ४२ घटक समूहका पहिचान पक्षधर संघ-संस्था तथा राजनीतिक दलको सहभागितामा प्रदेश नं १ पुनः नामाकरण संयुक्त सङ्घर्ष समितिको गठन भएको थियो ।
उक्त संयुक्त सङ्घर्ष समितिको बैठक २०८१ असार १ गते बसेको बैठकले भोलि मंसिर २ गते देखी कोशी प्रदेशको नाम खारेजीगरी पहिचानको आधारमा पुनः नामाकरण गर्ने माग राखी आन्दोलन गर्ने निर्णय गरेको थियो । उक्त निर्णयलाई जसपा किरात राष्ट्रिय समितिले पूर्ण समर्थन गर्ने निर्णय गरेको हो।
उपनिर्वाचनका लागि आचारसंहिता तयार : कसलाई लागु हुन्छ ?
काठमाडौँ । आउँदो उपनिर्वाचनका लागि आइतवार देखि आचारसंहिता लागु हुने भएको छ । उपनिर्वाचन हुने सम्बन्धित जिल्लाभित्रका व्यक्ति, निकाय तथा अधिकारीलाई निर्वाचन आचारसंहिता लागु हुनेछ ।
चुनाव सम्पन्न नहुन्जेल सम्म आचारसंहिता लागु हुने निर्वाचन आयोगले जनाएको छ । ‘निर्वाचन आचारसंहिता लागु भएको जिल्लाको निर्वाचन हुने स्थानीय तहबाहेक अन्य क्षेत्रमा निर्वाचन आचारसंहिताले निषेध गरेका कार्य गर्नु गराउनुपरेमा निर्वाचन आयोगलाई पूर्वजानकारी दिई निकास भएबमोजिम गर्न सकिनेछ,’ आयोगका प्रवक्ता नीता पोखरेल अर्यालले शनिवार जारी गरेको विज्ञप्तिमा उल्लेख छ ।
स्थानीय तहका रिक्त ४२ पदका निम्ति यही मंसिर १६ गते उपनिर्वाचन हुँदै छ । आइतवार उमेदवारको मनोनयनपत्र दर्ता गरिने आयोगको कार्यतालिका छ ।
आयोगका अनुसार नेपाल सरकार र नेपाल सरकारका मन्त्री, प्रदेश सरकार र प्रदेश सरकारका मन्त्रीलाई निर्वाचन आचारसंहिता लागु हुनेछ ।
यस्तै, संवैधानिक निकाय र सो निकायका पदाधिकारी, नेपाल सरकार वा प्रदेश सरकारका निकाय र सो निकायका पदाधिकारी, स्थानीय कार्यपालिका र सोका सदस्य, संघ, प्रदेश र स्थानीय तहका कर्मचारी, सुरक्षा निकाय, सुरक्षाकर्मी तथा कर्मचारीलाई निर्वाचन आचारसंहिता लागु हुनेछ ।
यसैगरी, सरकारी, अर्धसरकारी तथा सार्वजनिक संस्थाको कार्यालय र कर्मचारी, राजनीतिक दल तथा राजनीतिक दलका भातृ संगठन, उमेदवार तथा सम्बन्धित व्यक्ति, राजनीतिक दल तथा उमेदवारको मतदान प्रतिनिधि तथा मतगणना प्रतिनिधि, सार्वजनिक पद धारण गरेको व्यक्ति, अनुगमन समितिका पदाधिकारी तथा अनुगमनकर्तालाई आचारसंहिता लागु हुनेछ ।
पर्यवेक्षण संस्था तथा पर्यवेक्षक, सञ्चार प्रतिष्ठान, सोका कर्मचारी तथा सञ्चारकर्मी, निजी तथा गैरसरकारी संस्था, सोका पदाधिकारी तथा कर्मचारी, विद्यालय, महाविद्यालय वा विश्वविद्यालय, सोका शिक्षक तथा कर्मचारी, मतदाता, विकास साझेदार संस्थालाई पनि निर्वाचन आचारसंहिता लागु हुनेछ ।
सरकारी वा अर्धसरकारी निकायबाट सञ्चालित परियोजना तथा परियोजनाका कर्मचारी, मतदाता शिक्षा कार्यक्रम सञ्चालन गर्ने संस्था तथा सो संस्थाका कर्मचारी, निजी क्षेत्रका बैंक तथा वित्तीय संस्था, सहकारी संस्था, व्यापारिक तथा औद्योगिक क्षेत्र, सोका पदाधिकारी, कर्मचारी तथा कामदार, वस्तु वा सेवाप्रदायक व्यावसायिक संस्थाका पदाधिकारी, कर्मचारी तथा कामदार, आयोगले तोकेका अन्य निकाय वा व्यक्तिलाई समेत निर्वाचन आचारसंहिता लागु हुने आयोगले जानकारी गराएको छ ।
‘निर्वाचन आचारसंहिता लागु भएको जिल्लाको निर्वाचन हुने स्थानीय तहबाहेक अन्य क्षेत्रमा निर्वाचन आचारसंहिताले निषेध गरेका कार्य गर्नु गराउनुपरेमा निर्वाचन आयोगलाई पूर्वजानकारी दिई निकास भएबमोजिम गर्न सकिनेछ,’ आयोगका प्रवक्ता अर्यालले जारी गरेको विज्ञप्तिमा उल्लेख छ ।
रबिनको ‘तिमी हिँड्ने बाटो’ मा बिना राउत
काठमाडौँ । मोडल बिना राउतको अभिनय रहेको तिमी हिँड्ने बाटो बोलको गीतको भिडियो सार्वजनिक भएको छ । भिडियोमा बिनाका प्रेमीका रूपमा गायक रबिन बर्तौलाले अभिनय गरेका छन् । सार्वजनिक गीतका शब्द सङ्गीतकार अर्जुन पोखरेलले सिर्जना गरेका हुन् ।
पुरुषोत्तम सुवेदीको एरेन्ज रहेको सार्वजनिक गीतमा नरेश बिबिसीको मिक्सिगं तथा मास्टरिगं रहेको छ भने भिडियोको कोरियोग्राफी तथा निर्देशन केशवराज भट्टले गरेका हुन् ।
विशाल थापाको छायाङ्कन रहेको भिडियोको सम्पादन राकेश दाहालले गरेका हुन् । भिडियो गायक रबिन बर्तौलाको अफिसियल च्यानल रबिन बर्तौलामार्फत बजारमा आएको छ ।
भिडियो हेर्नको लागि लिङ्क क्लिक गर्नुहोस्
<iframe width="100%" height="315" src="https://www.youtube.com/embed/W13sECyuM-k?si=3eHfsp_0asB0Pus4" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>
