बिहिबार, ११ असार २०८३
सरकारले राजनीतिक स्थिरताको लागि काम गरिरहेको छ : मन्त्री सिंह
काठमाडौं । उपप्रधानमन्त्री एवम् शहरी विकास मन्त्री प्रकाशमान सिंहले आउँदै गरेको वर्ष ०८२ सबै नेपालीका लागि अघिल्ला वर्षहरुभन्दा राम्रो होस् भन्दै शुभकामना दिएका छन्।
नेपाल लोकतान्त्रिक आदिवासी जनजाति महासंघ काठमाडौं क्षेत्र नम्बर १ ले आयोजना गरेको नयाँ वर्षको शुभकामना आदान प्रदान एवम् भित्तेपात्रो विमोचन कार्यक्रममा उपप्रधानमन्त्री सिंहले शुभकामना व्यक्त गरेका हुन् ।
‘नयाँ वर्ष सबैका लागि राम्रो होस् । सबै नेपाली आमाबुबा, दाजुभाई तथा दिदीबहिनीहरुमा शुभकामना व्यक्त गर्दछु । सबै जीवन सहज रुपमा अघि बढोस्,’ उनले भने,‘ वितेका वर्षमा आशा गरे अनुसार गर्न नसकेका कामहरु सम्पन्न गर्नका लागि हामी सबैलाई सफता मिलोस् । नेपालको राष्ट्रिय राजनीतिमा स्थीरताका लागि सरकारले काम गरिररहेको छ । जीवन र जिविकोपार्जन सहज बनाउन सरकारले काम गरिररहेको कुरा पनि भन्न चाहन्छु ।’ उनले नयाँ वर्षले सबैमा सकारात्मक सोचको विकास हा्से भन्दै वर्ष ०८२ नेपाल र नेपाली जनताका लागि वर्ष ०८१ भन्दा राम्रो बन्ने विश्वास पनि व्यक्त गरे ।
कार्यक्रममा उपप्रधानमन्त्री सिंहले भित्तेपात्रो विमोचन पनि गरेका थिए । सो अवसरमा उपप्रधानमन्त्री सिंहले आफ्नो निर्वाचन क्षेत्रका कांग्रेस नेता,कार्यकर्ताहरुसँग शुभकामना आदान प्रदान गर्दै सबैमा सुख,शान्ति र समृद्धिको कामना गरे ।
पोखरामा ट्रकले स्कुटरलाई ठक्कर दिँदा बाबुको मृत्यु, छोरी घाइते
पोखरा । पोखरामा बिहीबार ट्रकले स्कुटरलाई ठक्कर दिँदा बाबुको मृत्यु भएको छ भने छोरी घाइते भएकी छिन । पोखरा–९ बसपार्कतर्फ जाँदै गरेको ना ५ ख ६२२२ नम्बरको ट्रकले ग १६ प २०७५ नम्बरको स्कुटरलाई ठक्कर दिदा एक जनाको मृत्यु भएको हो ।
उक्त दुर्घटनामा परेर गम्भीर घाइते भएका स्कुटरमा सवार पोखरा १४ चाउथे निवासी ५३ वर्षीय शिवराज कँडेलको उपचारका क्रममा गण्डकी मेडिकल कलेजमा मृत्यु भएको प्रहरीले जानकारी दिएको छ।
सोहि दुर्घटनामा परेर स्कुटरको चालक समेत रहेकी कंडेलकी छोरी २३ वर्षीया सुस्मिता कँडेलको हात र घुँडामा सामान्य चोट लागेको जिल्ला प्रहरी कार्यालय कास्कीले जानकारी दिएको छ ।
ट्रक र चालकलाई वडा प्रहरी कार्यालय बैदामले नियन्त्रणमा लिएको छ। घटनाबारे थप अनुसन्धान भइरहेको जनाइएको छ।
दुर्गा प्रसाई पक्राउ परेको भन्दै भ्रम नफैलाउन नेपाल प्रहरीको अनुरोध
काठमाडौं । दुर्गा प्रसाई पक्राउ परेको भन्दै भ्रामक समाचार प्रकाशन, प्रसारण नगरिदिन प्रहरी प्रवक्ता प्रहरी नायब महानिरीक्षक दिनेश कुमार आचार्यले अनुरोध गरेका छन् ।
बिहिवार राति प्रेस विज्ञप्ति जारी गर्दै उनले ’दुर्गा प्रसाई पक्राउ’ भन्ने शीर्षकमा विभिन्न समाचारहरू प्रकाशन भएको सन्दर्भमा नेपाल प्रहरीको गम्भीर ध्यानाकर्षण भएको बताएका हुन् ।
विज्ञप्तिमा भनिएको छ, ‘नेपाल प्रहरीको विभिन्न स्रोत उल्लेख गरी ’दुर्गा प्रसाई पक्राउ’ भन्ने शीर्षकमा विभिन्न समाचारहरू प्रकाशन भएको सन्दर्भमा नेपाल प्रहरीको गम्भीर ध्यानाकर्षण भएको छ ।’
उनले विभिन्न आपराधिक घटनामा संलग्न रही फरार रहेका प्रसाई प्रहरीको खोजीको सूचिमा रहेको जानकारी थिए ।
आजको मौसम : देशका अधिकांश भू–भागमा वर्षाको सम्भावना
काठमाडौं । हाल देशमा पश्चिमी वायु तथा स्थानीय वायुको साथै बंगालको खाडीबाट भित्रिरहेको जलवाष्पयुक्त हावाको समेत प्रभाव रहेको छ । जसले गर्दा देशभर आंशिकदेखि साधारणतया बदली भएको जल तथा मौसम विज्ञान विभागले जनाएको छ ।
कोशी, मधेश र बागमती प्रदेशका थोरै स्थानहरूमा तथा बाँकी भू–भागका एक–दुई स्थानमा चट्याङ्गसहित हल्का वर्षा भइरहेको छ ।
विभागका अनुसार आज देशका सातवटै प्रदेशमा वर्षाको सम्भावना रहेको र विशेषगरी पहाडी भू–भागमा वर्षाको सम्भावना रहेको छ ।
कोशी र गण्डकी प्रदेशको एक–दुई स्थानमा मेघगर्जन र चट्याङ्गसहित हल्का वर्षाको सम्भावना रहेको छ । कोशी, गण्डकी र कर्णाली प्रदेशको उच्च पहाडी तथा हिमाली भू–भागका एक–दुई स्थानमा हल्का वर्षा र हिमपातको सम्भावना रहेको विभागले जनाएको छ ।
आज राती भने देशको पहाडी भू–भागमा आंशिक देखि साधारणतया बदली रही बाँकी भू–भागमा आंशिक बदली देखि मौसम मुख्यतया सफा रहनेछ ।
यस्तै मेघगर्जन र चट्याङ्ग, वर्षालगायत हिमपातका कारण स्वास्थ्य, दैनिक जनजीवन, कृषि, सडक तथा हवाई यातायातमा समेत प्रभाव पर्न सक्ने हुँदा त्यसबाट हुन सक्ने असरबाट बच्न आवश्यक उपायहरू तथा सतर्कता अपनाउनुहुन विभागले अनुरोध छ।
एकीकृत समाजवादी कोशीमा महिला नेतृत्व
इटहरी । कोशी प्रदेशकी पूर्व सांसद समेत रहेकी सरिता थापा नेकपा (एकीकृत समाजवादी) पार्टी कोशी प्रदेशको अध्यक्षमा चयन भएकी छिन् । सुनसरीकाे इटहरीमा भएको पहिलाे प्रदेश अधिवेशनबाट अध्यक्ष पदका लागि सर्वसम्मत चयन भएका हुन ।
पार्टीको प्रदेश अध्यक्षमा धर्म निरौला, महेश रेग्मी, केशव विष्टलगायतको दाबीका बिच खड्कालाई अध्यक्ष चयन गरिएको हो ।
केन्द्रीय सदस्य समेत रहेका एकीकृत समाजवादीका नेता ओसिम आलमले खड्का विजयी भएको उल्लेख गरे ।
नेतृत्व चयनका लागि बुधवार निर्वाचन हुने भनिएको थियो । तर, निर्वाचन प्रक्रिया रोकेर नेताहरूले खड्कालाई सर्वसम्मत अध्यक्ष घोषणा गरेका हुन् ।
सुरक्षित पानी र सरसफाइका लागि अन्तर–निकाय समन्वय जरुरी : मन्त्री यादव
काठमाडौं । खानेपानी मन्त्री प्रदीप यादवले खानेपानी, सरसफाइ तथा ढल व्यवस्थापनको क्षेत्रमा दिगो विकास सुनिश्चित गर्न र नागरिकलाई गुणस्तरीय सेवा उपलब्ध गराउन क्षेत्रीय, संस्थागत तथा अन्तर–निकाय समन्वय अपरिहार्य रहेको बताएका छन् ।
बिहीबार खानेपानी मन्त्रालय र अन्तर्राष्ट्रिय संस्था इसिमोडबिच भएको सहकार्य सम्झौता कार्यक्रममा बोल्दै मन्त्री यादवले नेपाल सरकारअन्तर्गतका २२ मन्त्रालयमध्ये खानेपानी मन्त्रालयले अत्यन्तै संवेदनशील र जीवनसँग प्रत्यक्ष सरोकार राख्ने सेवा पु¥याइरहेको उल्लेख गरेका हुन् ।
उनले मन्त्रालयले नीति निर्माणदेखि कार्यान्वयन, अनुगमन, मूल्याङ्कन र समन्वयसम्मका काम सम्हाल्दै आएको जानकारी दिएका छन् ।
उनले भने, ‘नागरिकलाई सुरक्षित पानी र सरसफाइ प्रदान गर्न विभिन्न तह र निकायबिच समन्वय गर्न जरुरी छ । यो सहकार्यले दिगो विकासका लक्ष्यहरू हासिल गर्न महत्वपूर्ण टेवा पु¥याउनेछ ।’
उनले मन्त्रालय र इसिमोडबीचको सहकार्य नेपालको पहाडी तथा तराई क्षेत्रका समुदायहरूमा दिगो, सुरक्षित र गुणस्तरीय पानी तथा सरसफाइ सेवा पु¥याउने साझा उद्देश्यसहित अघि बढेको स्पष्ट पारे ।
साथै, अनुसन्धान, प्रविधिको हस्तान्तरण, क्षमता अभिवृद्धि तथा सूचनाको आदानप्रदानलाई सहकार्यले सघाउने विश्वास व्यक्त गरे ।
मन्त्री यादवले जलवायु परिवर्तन र भूकम्पका असरहरूका कारण हिमालहरू कालो हुँदै गएका र तराई–मधेसमा भूमिगत जलस्रोत घट्दै गएको अवस्थामा सुरक्षित पानीको आपूर्ति एक चुनौतीको रूपमा देखिएको बताए ।
भर्खरै नेपाल र भारत तथा खानेपानी मन्त्रालय र ऊर्जा मन्त्रालयबिच भएका सम्झौताहरूले पनि यस क्षेत्रमा सकारात्मक प्रभाव पार्ने उनको भनाई छ ।
कार्यक्रममा खानेपानी मन्त्रालयकी सचिव ई प्रमिलादेवी शाक्य बज्राचार्यले सहकार्य सम्झौताले सुक्दै गएका पानीका मुहानहरू पुनः सक्रिय गराउने र दीगो पानी व्यवस्थापनतर्फ ठोस योगदान दिने विश्वास व्यक्त गरेका थिए ।
सम्झौतापत्रमा मन्त्रालयका सहसचिव ई. मीना श्रेष्ठ र इसिमोडका महानिर्देशक डा. पेमा ग्याम्त्सोले हस्ताक्षर गरेका थिए ।
कार्यक्रममा मन्त्रालयका सहसचिव ई. रमाकान्त दुवाडि, खानेपानी तथा ढल व्यवस्थापन विभागका महानिर्देशक ई. रामकुमार श्रेष्ठ लगायत इसिमोड र मन्त्रालयका कर्मचारीहरूको उपस्थिति रहेको थियो ।
चट्याङले लागेर २ जनाको मृत्यु
विराटनगर । झापा र मोरङ जिल्लाको २ स्थानहरूमा चट्याङ लागेर २ जनाको मृत्यु भएको छ । कोशी प्रदेश प्रहरी कार्यालय विराटनगरका अनुसार चैत्र २७ गते बिहान ७ बजे पाँचथरको मिक्लाजुङ गाउँपालिका ३ घर भई हाल झापाको गौरादह नगरपालिका ५ बालुबथान बस्दै आएकी ५४ वर्षीय दुध कुमार लावतीलाई भान्सा कोठा छेउमा झरेको चट्याङले लाग्दा उनको घटनास्थलमै मृत्यु भएको हो ।
यसका साथै चैत्र २७ गते दिउँसो साढे १२ बजे वर्षा सँगै परेको चट्याङले लाग्दा साइकल कुदाईरहेका सुनसरीको इटहरी घर भई हाल मोरङको कानेपोखरी गाउँपालिका.१ होक्लाबारी स्थित मामाघरमा आएका १२ वर्षीय बालक आविष्कार बराल घाइते भएका थिए ।
घाइतेको बिराट टिचिङ अस्पताल विराटनगरमा उपचारको क्रममा दिउँसो पौने २ बजे मृत्यु भएको कोशी प्रदेश प्रहरी कार्यालयले जनाएको छ ।
सवारी दुर्घटनामा बाँचेका प्राविधिक ढुंगाना घरमा मृत भेटिए, आत्महत्या गरेको शंका
हेटौंडा । पाँच दिनको अवलोकन भ्रमण सकेएर घर फर्कदैँ गर्दा बस दुर्घटनामा परेर घाइते भएका भीमफेदी गाउँपालिकाका एक कर्मचारी घरमा मृत भेटिएका छन् ।
यही चैत २२ गते शुक्रबार धरान, धनकुटा, कन्यामलगायतका स्थानहरूको अवलोकनका लागि निस्किएको गाउँपालिकाको टोली भ्रमण गरेर बुधबार (हिजो) राति मकवानपुरको भीमफेदी फर्कने क्रममा धरान–चतरा सडकखण्डमा दुर्घटनामा परेको थियो ।
मकवानपुरको बकैया गाउँपालिका–३, चिसापानीमा आइपुगेपछि उक्त टोली सवार बागमती प्रदेश ०६–००१ ख ०२७० नम्बरको बस ओरालोमा चिप्लिएर दुर्घटना भएको थियो । बसमा सवार ३१ जनामध्ये २३ जना घाइते भएका थिए । तिनै घाइतेमध्येका एक थिए, भीमफेदी गाउँपालिकाको पशु विकास शाखाका प्राविधिक विमल ढुंगाना ।
विगत पाँच वर्षदेखि भीमफेदी गाउँपालिकाको पशु शाखा प्राविधिकको रूपमा कार्यरत ढुंगाना पनि गाउँपालिकाको अवलोकन भ्रमणमा निस्किएका थिए । पालिकाको कृषि तथा पशु शाखाको भ्रमण भएका कारण शाखाका कर्मचारी, किसानहरू र केही जनप्रतिनिधि पनि भ्रमणमा थिए । शुक्रबार बिहान गाउँपालिकाबाट निस्किएको टोली मंगलबार नै आइपुग्ने योजनामा थियो ।
तर, उनीहरू सवार बस बाटोमा बिग्रिने, टायर पञ्चर हुनेजस्ता समस्या देखिएपछि फर्कन एक दिन ढिलो भएको थियो । पशु शाखाको व्यवस्थापनमा आयोजना गरिएको अवलोकन भ्रमणको जिम्मा पशु शाखा प्रमुख सरोज ओझाको थियो । सवारीसम्बन्धी कुराहरू थाहा हुने भन्दै प्रमुख ओझाले विमललाई बस रिजर्भ गर्ने जिम्मेवारी थमाएका थिए ।
सोहीअनुरुप विमलले नै रिजर्भ गरेको बसमा पालिकाको टोली भ्रमणमा निकिस्यो । चार दिन कन्यामदेखि धनकुटासम्म घुमेका उनीहरू बुधबार दिउँसो २ बजे गाईघाट आइपुगेका थिए । भीमफेदी गाउँपालिका–२ का वडाध्यक्ष काशीराम बज्युका अनुसार दिउँसो गाईघाटमा खाना खाएपछि मकवानपुर फर्कनका लागि बाटो लागे । साँझ सिन्धुली आइपुगेपछि खाजा खाएर निस्किएका उनीहरू बीच बाटोमै दुर्घटनामा परे ।
दुर्घटनामा केही घाइतेको अवस्था गम्भीर रहेपनि धेरैको अवस्था मध्यमदेखि सामान्य छ । पशु प्राविधिक विमलको अवस्था पनि सामान्य नै थियो । दुर्घटनापछि उपचारका लागि हेटौंडा अस्पताल ल्याइएका उनी सामान्य उपचारपछि बिहीबार (आज) बिहान ३ बजेतिर डिस्चार्ज भए ।
हेटौंडा–१८, हर्नामाडी घर भएका उनी कहिले हर्नामाडी जाने भन्दै थिए त कहिले भीमफेदी नै जाने भन्दै दोमन गरिरहेका थिए । सँगै भ्रमणमा गएका सोही शाखामा कार्यरत रुविन घर्तीका अनुसार, विमलले भीमफेदी जाने भनेपछि सँगै डिस्चार्ज भएका कर्मचारीहरूले पनि सँगै जाने प्रस्ताव राखेका थिए ।
तर उनी कसैलाई नभनी निस्किएकोमा हेटौंडा–२ स्थित संगमचोकतिर हिँडिरहेको भन्ने खबर पाएपछि भीमफेदी गाउँपालिका–९ का वडासदस्य उदयप्रसाद कटुवालको घरमा गएर बस्न सुझाव दिएको रुविनले बताए ।
आफूहरू भने बजारतिरै साथीको कोठामा सुतेको उनको भनाइ छ । वडासदस्य हटुवालले हेटौंडा–११, नवलपुरमा रहेको आफ्नो घरमा बिहानीपख विमललाई लिएर गएका थिए । बिहान अबेरसम्म पनि नउठेपछि थकाइ लागेर सुतिरहेका होलान् भन्ने लागेर घरका मान्छेले त्यति वास्ता गरेनन् । घरको दोस्रो तल्लामा छुट्टै कोठामा सुतेका विमल निकैबेरसम्म पनि नउठेपछि वडासदस्य कटुवालले ढोका ढकढक्याउँदै बोलाए। तर, भित्रबाट कुनै चालचुल भएन ।
भित्र सुनासान नै भएपछि उनले झ्यालबाट चिह्याएर विमल सुतेको कोठामा हेर्दा पंखामा झुण्डिएको अवस्थामा देखे । केहीबेरको हो–हल्लापछि प्रहरी घटनास्थल आइपुग्यो । उनी सुतेको कोठाको ढोका फुटाएर हेर्दा घाँटीमा पासो लगाएर आत्महत्या गरेको अवस्थामा विमल फेला परे । उनी सुतेको कोठामा रहेको कपडा राख्ने दराजबाट टाई र खादा लगायतका सामग्री निकालेर डोरी बनाएर झुण्डिएको मकवानपुर प्रहरीले जनाएको छ ।
घटनास्थलमा चुँडिएको अवस्थामा पेटीसमेत भेटिएको छ । उनले लगाएको पेटीले पासो लगाउने प्रयास गर्दा चुँडिएपछि खादा र टाई जोडेर डोरी बनाएको हुन सक्ने प्रहरीको प्रारम्भिक अनुमान छ । दुर्घटनाबाट ज्यान जोगिएर नयाँ जीवन पाएका उनले किन आत्महत्या गरे होलान् ? परिवार र शुभचिन्तक सबैले अहिले प्रश्न गरिरहेका छन् ।
विमलका छिमेकीका अनुसार भ्रमणमा रिजर्भ गरेर लगिएको बस विमलकै थियो । उनले त्यो बस कहिले किने भन्ने यसभन्दा अघि थाहा नभए पनि घटनापछि उनकै बस रहेछ भन्ने थाहा पाएको उनका एक छिमेकीको भनाइ छ ।
उनले भने, ‘पहिला एउटा स्कारपियो गाडी थियो । सानो एउटा भ्यानजस्तो गाडी पनि थियो । उसले चढ्नेभन्दा पनि भाडामा लगाउँथ्यो क्या र । पछिल्लो समय स्कारपियो बेचेर बस किन्ने भनेको सुनेको थिएँ। किनिसकेका रहेछन्। अहिले दुर्घटना भएपछि पो थाहा भयो ।’
विमल सोही दुर्घटनाकै कारण आत्महत्या गर्ने स्थितिमा पुगेको हुनसक्ने आफन्तहरूले अनुमान गरेका छन् । आफ्नै सवारी क्षति भयो । घाइतेहरूको उपचार गराउनेदेखि मृत्यु भयो भने के गर्ने भन्ने चिन्ता सहन नसकेको हुन सक्ने हेटौँडा अस्पतालमा पोस्टमार्टम रिपोर्ट कुरेर बसिरहेका छिमेकीहरू बताउँछन् ।
यता, सँगै भ्रमणमा गएका साथीहरूले समेत विमलको बस हो भन्ने थाहा पाएका थिएनन् । ‘आफू सामान्य घाइते भए पनि बसमा सवार घाइतेहरूको अवस्थाले विक्षिप्त बनेका देखिनुहुन्थ्यो,’ सँगै भ्रमण गरेर फर्किएका सोही गाउँपालिकाका कृषि प्राविधिक सुदीप पराजुलीले भने, ‘उहाँ निकै अत्तालिएको अवस्था हुनुहन्थ्यो । हामी सबैजना डराएका थियौँ । त्यसैले पनि त्यति ख्याल गरिएन । आज यस्तो घटना सुनेपछि पो उहाँको बस रहेछ भन्ने थाहा पायौँ । त्यतिका दिन भ्रमणमा रहँदा पनि उहाँले कहिल्यै आफ्नो बस भन्नुभएन ।’
विश्वनाथ ढुंगाना र सत्यवती ढुंगानाका कान्छा छोरा हुन् विमल । उनी अविवाहीत हुन् । उनका दाइ कामको सिलसिलामा जिल्ला बाहिर छन् । हाल उनको शव पोस्टमार्टमका लागि हेटौंडा अस्पतालमा राखिएको छ । घटनाबारे थप अनुसन्धान भइरहेको जिल्ला प्रहरी कार्यालय मकवानपुरले जनाएको छ ।
नेपाल बारको अन्तिम परिणाम सार्वजनिक, अध्यक्षमा मिश्र विजयी (सूचीसहित)
काठमाडौं । नेपाल बार एशोसिएशनको नयाँ नेतृत्वमा वरिष्ठ अधिवक्ता प्राध्यापक डा.विजयप्रसाद मिश्र विजयी भएका छन् । नेपाल बार एशोसिएशनको २७ औं केन्द्रीय कार्यसमिति निर्वाचनको अन्तिम मत परिणाम सार्वजनिक गर्दै मिश्र विजयी भएको घोषणा गरिएको हो ।
बृहत् लोकतान्त्रिक, प्रगतिशील, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्राध्यापक डा. मिश्र विजयी भएका हुन् ।
उनी व्यावसायिक कानुन व्यवसायी समूहका वरिष्ठ अधिवक्ता रमनकुमार श्रेष्ठलाई पराजित गर्दै अध्यक्ष बनेका हुन् ।
महासचिवमा पनि डा.मिश्रको समूहमा वरिष्ठ अधिवक्ता केदारप्रसाद कोइरालाले जितेका छन् ।
मुख्य निर्वाचन अधिकृत वरिष्ठ अधिवक्ता रामकृष्ण निरालामा अनुसार मिश्रले ५०५२ र कोइरालाले ५०८७ मत प्राप्त गरेका हुन् ।
मिश्रका निकटतम प्रतिस्पर्धी वरिष्ठ अधिवक्ता श्रेष्ठले २६२१ र कोइरालाका निकटतम प्रतिस्पर्धी अधिवक्ता यज्ञमणि न्यौपानेले २३६७ मत प्राप्त गरेका छन् ।
यस्तो छ अन्तिम परिणाम ।
‘कालोमोसो दलियो’ भनेर गलत प्रचार गरियो, चरित्र हत्या गर्न खोजीयो : प्रमुख कर्ण
जनकपुर । त्रिभुवन विश्वविद्यालय अन्तर्गतको रामस्वरुप रामसागर बहुमुखी क्याम्पसका प्रमुख प्राडा वसन्त कुमार कर्णले आफूमाथि चैत २१ गते भएको ‘कालोमोसो प्रकरण’लाई अतिरञ्जित गरिएको भन्दै घटनाको वास्तविकता सार्वजनिक गरेका छन् ।
जनकपुरधाममा बिहिवार पत्रकार सम्मेलनमार्फत क्याम्पस प्रमुख कर्णले घटनाको पृष्ठभूमि, योजनाबद्ध षड्यन्त्र र आन्तरिक शैक्षिक माफियाहरूको भूमिकाबारे १२ बुँदे विवरण सार्वजनिक गरेका हुन् ।
कर्णले सो दिन बेलुका ४ बजेको समयमा विज्ञान भवनबाट मोटरसाइकलमा बाहिर निस्कने क्रममा आफूलाई लुगामा मसि छर्किएको सामान्य घटनालाई ‘कालोमोसो दलियो’ भनेर अनावश्यकरूपमा प्रचार गरिएको दाबी गरेका छन् । उनले यो प्रकरण योजनाबद्ध रूपमा आफ्नो चरित्र हत्या गर्ने र मानसिक दबाब सिर्जना गरी राजीनामा दिन बाध्य पार्ने षड्यन्त्र रहेको बताए ।
कर्णले भने, ‘त्रिभुवन विश्वविद्यालयको इतिहासमै पहिलोपटक खुल्ला प्रतिस्पर्धाबाट योग्यता आधारित नियुक्ति पाएको म एक जना अल्पसंख्यक समुदायबाट आएको प्रमुख हुँ । मलाई असफल साबित गर्न विगतदेखि नै विभिन्न हतकण्डा अपनाइँदै आएको छ ।’
उनले क्याम्पसमा व्यापक परीक्षा सुधार तथा अनियमितता नियन्त्रणका लागि उठाइएका कदमहरु, सबै कक्षा र प्रशासनिक कोठामा सिसिटिभी जडानले आन्तरिक शैक्षिक माफियालाई असहज बनाएको बताए । सँगै, निजी शिक्षण संस्थाहरूलाई केन्द्र बनाएर परीक्षा केन्द्र सार्ने प्रयासलाई रोक्दा पनि धेरैको स्वार्थमा चोट पुगेको उनले जनाए ।
‘परीक्षा प्रणाली मर्यादित बनाइँदै जाँदा विद्यार्थीहरू अध्ययनमा केन्द्रित भएका छन् । तर, केही शिक्षकहरू भने निजी शिक्षण संस्थालाई प्राथमिकता दिँदै क्याम्पसको पठनपाठन बिथोल्ने प्रयत्नमा लागेका छन्,’ उनले भने ।
कर्णले छात्रसंघ चुनावको टिकट नपाएका केही असन्तुष्ट विद्यार्थी नेताहरू र उमेरहद कटेका नेताहरुको उक्साहटमा सातवटै विद्यार्थी संगठनहरुले तालाबन्दी गरिरहेको र त्यसकै आडमा शैक्षिक वातावरण बिथोल्ने र अव्यवस्था सिर्जना गर्न खोजिएको आरोपसमेत लगाए ।
घटनाका योजनाकार क्याम्पसकै सहायक लेखापाल संजय कुमार दास रहेको बताउँदै कर्णले लेखापाल दासले भ्रष्टाचारबाट आर्जन गरेको सम्पत्तिको संरक्षण गर्न र आफूविरुद्धको अभियानलाई अगाडि बढाउन बाहिरी तत्व र केहि विद्यार्थीहरूलाई समेत प्रयोग गरेको आरोप लगाए । ‘यी सबै प्रयासहरू मलाई मानसिक तनावमा पारेर राजीनामा गराउने योजनाको हिस्सा हुन्,’ कर्णले भने ।
उनले घटनामा संलग्नहरूलाई कानुनी दायरामा ल्याउन सम्बन्धित निकायसँग आग्रह गर्दै क्याम्पसको शैक्षिक मर्यादा र सुधार प्रयासलाई कुनै हालतमा कमजोर नपारिने प्रतिबद्धता जनाए । उनले यस्ता घटनाबाट नडराई अझ दृढताका साथ सुधारको यात्रामा अघि बढ्ने बताए ।
