रौतहट । पर्सा प्रहरी कार्यालय नजिकमा भएको प्रदर्शनको समाचार सङ्कलन गर्ने क्रममा तीन जना पत्रकार घाइते भएका छन ।

हिन्दुवादीहरूले गरेको प्रदर्शनको समाचार सङ्कलन गरिरहेका पत्रकार एभी न्युज टिभीका अर्जुन गुप्ता, मध्य नेपाल सन्देशका अनिल ओझा र चन्द्रसूर्य वाणीका धिरेन्द्र तिवारी घाइते भएका हुन् ।

गुप्ताको टाउको फुटेको छ भने ओझा र तिवारीको खुट्टामा गम्भीर चोट लागेको छ । जिल्ला प्रहरी कार्यालय पर्सा अगाडि धर्नामा बसेका हिन्दुवादीहरूलाई हटाउने क्रममा प्रहरीले लाठीचार्ज गर्दा पत्रकारहरू  घाइते भएका छन् । घाइते तीन जना पत्रकारको नारायणी अस्पतालमा उपचार भइरहेको छ ।

प्रहरीले धार्मिक सद्‍भाव बिगार्ने कार्यमा संलग्न रहेको आरोपमा चार जनालाई पक्राउ गरेको थियो । उनीहरूको बिना सर्त रिहाइको माग गर्दै प्रदर्शन भएपछी  प्रहरीले हटाउने क्रममा लाठीचार्ज गरेको जनाएको छ ।

यता नेपाल पत्रकार महासङ्घ पर्साले समाचार सङ्कलन गर्ने क्रममा आक्रमण गरी पत्रकारहरूलाई घाइते बनाउने दोषीहरूलाई कारबाहीको माग गरेको छ ।

काठमाडौं । हाल देशमा मूख्यतया स्थानीय वायुको प्रभाव रहेको जल तथा मौसम विज्ञान विभागले जनाएको छ ।

त्यसकारण कोशी, बागमती, गण्डकी र लुम्बिनी प्रदेशका पहाडी भूभागका एक–दुई स्थानमा चट्याङ्गसहित हल्का वर्षा भइरहेको छ । 

विभागका अनुसार आज दिउँसो देशका पहाडी भूभागका थोरै स्थान र बाँकी भूभागका एक–दुई स्थानमा चट्याङ्गसहित हल्का वर्षाको सम्भावना रहेको छ । अपाह्नपछि काठमाडौंमा पनि वर्षाको सम्भावना रहेको जनाएको छ । 

आज दिउँसो, देशको पहाडी भू–भागमा आंशिकदेखि साधारणतया बदली रही बाँकी भू–भागमा मूख्यतया सफादेखि आंशिक बदली रहनेछ । 

देशको उच्च पहाडी तथा हिमाली भूभागमा हल्का वर्षा र हिमपातको सम्भावना रहेको विभागले जनाएको छ । 

आज राती, कोशी प्रदेशलगायत देशका पहाडी भू–भागमा आंशिकदेखि साधारणतया बदली रही बाँकी भू–भागमा मूख्यतया सफादेखि आंशिक बदली रहनेछ ।

यस्तै, मेघगर्जन र चट्याङ्ग, वर्षालगायत हिमपातका कारण दैनिक जनजीवन, कृषि, स्वास्थ्य, सडक तथा हवाई यातायातमा समेत प्रभाव पर्न सक्ने हुँदा त्यसबाट हुन सक्ने असरबाट बच्न आवश्यक उपायहरू तथा सतर्कता अपनाउनुहुन विभागले अनुरोध गरेको छ।

एजेन्सी । युद्धग्रस्त सुडानमा बिग्रँदै गएको मानवीय अवस्थाको बारेमा चिन्ता बढ्दै गएको छ। सुडान सेना र अर्धसैनिक ¥यापिड सपोर्ट फोर्सेस (आरएसएफ) बीच वार्ता गर्न अनिच्छुक रहेकाले समस्या जटिल बन्दै गएको हो । 

सुडान सेना र अर्धसैनिक ¥यापिड सपोर्ट फोर्सेस (आरएसएफ) बीच सन् २०२३ अप्रिलमा सुरु भएको युद्धले सुडान टुक्रिएको छ र अनिकालको सङ्घारमा पुगेको हो ।

दुई वर्षअघि राजधानी खार्तुममा भएको द्वन्द्वपछि देशका अन्य क्षेत्रहरू थप विनाशकारी द्वन्द्वमा फसेको छ। द्वन्द्वमा कम्तिमा २९,७०० जनाको मृत्यु भएको छ र लगभग १ करोड ३० लाख मानिसहरू विस्थापित भएका छन् । संयुक्त राष्ट्र संघले ‘औद्योगिक अनुपातको मानवीय संकट’ भनेर व्याख्या गरेको छ ।

मार्चको अन्त्यतिर, सुडानी सेनाले संकट सुरु भएदेखि नै अर्धसैनिक समूहको नियन्त्रणमा रहेको खार्तुम अन्तर्राष्ट्रिय विमानस्थल, साथै दक्षिणी खार्तुममा रहेको पछिल्लो प्रमुख गढको मुख्य शिविरको नियन्त्रण लिएको घोषणा गरेको छ । 

संयुक्त राष्ट्रसंघको तथ्याङ्क अनुसार, जारी द्वन्द्वले सुडानी जनसङ्ख्यालाई अभूतपूर्व मानवीय संकटमा डुबाएको छ । लगभग ३ करोड मानिसहरूलाई तत्काल सहयोगको आवश्यकता औंल्याइएको छ ।

जारी लडाईंले देशको पूर्वाधारमा ठूलो क्षति पुर्याइसकेको छ । धेरै क्षेत्रहरूमा, बिजुली, पानी आपूर्ति, ग्यास र सञ्चार जस्ता आवश्यक सेवाहरू अवरुद्ध भएका छन् । खाद्यान्न, औषधि र इन्धनको अभावले संकटलाई अझ जटिल बनाएको छ।

विगत दुई वर्षमा, धेरै विद्युत् केन्द्रहरू, सबस्टेशनहरू, र प्रसारण नेटवर्कहरू नष्ट भएका छन्, जसले सुडानको विद्युत् उत्पादन र वितरण प्रणालीलाई गम्भीर असर पारेको छ।

यसका साथै, द्वन्द्व सुरु भएदेखि नै सुडानको सबैभन्दा ठूलो तेल प्रशोधन केन्द्रलाई बारम्बार लक्षित गर्दा बन्द गर्न बाध्य पारिएको छ । जसले गर्दा इन्धन आपूर्तिमा ठूलो खाडल सिर्जना भएको छ। धेरै क्षेत्रहरूले पेट्रोल र डिजेलको गम्भीर अभावको सामना गरिरहेका छन् । जसले गर्दा दैनिक जीवन र आर्थिक गतिविधिहरू दुवैमा बाधा पुगेको छ।

निरन्तर बिजुली अभावका साथै, सुडानका धेरै क्षेत्रहरूले गम्भीर पिउने पानीको संकटको सामना गरिरहेका छन्। धेरै शहरहरूमा पानी आपूर्ति स्टेशनहरू र पाइपलाइनहरू नष्ट भएका छन्, र मर्मतसम्भार आपूर्ति र कर्मचारीहरूको गम्भीर अभाव छ।

यसबाहेक, देशका धेरै भागहरूमा ढल प्रशोधन प्रणाली गम्भीर रूपमा क्षतिग्रस्त भएको छ । जसले गर्दा पानीका स्रोतहरू दूषित भएका छन्, । यसले हैजा, मलेरिया र झाडापखाला जस्ता संक्रामक रोगहरूको व्यापक बृद्धि भएको छ । (सीसीटीभीप्लस)

इटहरी । सुनसरीको देवानगञ्ज गाउँपालिकामा नयाँ वर्षकै दिन साँझ गोली चल्यो । 

सोमवार साँझ चलेको गोली लागेर देवानगञ्ज गाउँपालिका–७ का २१ वर्षीय शिवकुमार मेहता गम्भीर घाइते भएका छन् । 

सुनसरी प्रहरीका अनुसार आर्थिक लेनदेनको विषयलाई लिएर दोहोरो गोली हानाहान भएको प्रारम्भिक अनुसन्धानका क्रममा देखिन्छ । 

सुनसरीका प्रहरी प्रमुख एसपी सुमनकुमार तिम्सिनाले भने,‘घटनामा ६ जनाको संलग्नता देखिन आएको छ । जसमा तीन जना फरार रहेकाले खोजी कार्य तीव्र बनाइएको छ ।’

उनका अनुसार गम्भीर घाइते बनेका शिवकुमार सहित तीन जना प्रहरीको नियन्त्रणमा रहेका छन् र घटनास्थलबाट गोलीका खोकाहरु समेत प्रहरीले सङ्कलन गरेको छ । 

यस्तै रविन कुमार यादव र पिन्टु यादव पनि प्रहरीको नियन्त्रणमा रहेका छन् । गम्भीर घाइते बनेका मेहताको विराटनगरस्थित नोबेल मेडिकल कलेजमा उपचार भइरहेको छ । 

यसै गरी रविन कुमारको नाकको टुप्पामा गोली लागेको छ भने पिन्टुको अवस्था सामान्य रहेको प्रहरीले जनाएको छ ।

जनकपुर । नयाँ वर्ष २०८२ को दोस्रो दिन आज तराई मधेशमा जुडशीतल पर्व मनाइँदैछ ।  शुद्धता, शान्ति, प्रकृतिप्रेम र सामाजिक सद्‍भावको प्रतीक रहेको जुडशीतल पर्व आज मनाइँदैछ । जुडशीतलमा शीतल जल (चिसो पानी) ले घर, तुलसी चौरा, बोटबिरुवा र मान्छेको शुद्धीकरण गरिन्छ । 

आजको दिन घरका ठुलाबडाले आफूभन्दा साना घरका सम्पूर्ण सदस्यहरूको टाउकोमा शीतल जल खन्याएर आशीर्वाद दिने परम्परा रहेको छ । यसले आदर, सम्मान र प्रेमको भावना बढाउने मान्यता रहिआएको छ । आजको दिन विभिन्न किसिमको तरुवा खाने मुख्य चलन रहेको छ ।

घर, आँगन र खेतमा रहेका बोट, बिरुवा र रुखमा आजको दिन पानी हालिन्छ । प्रकृतिलाई सम्मान र प्रकृतिसँगको अटुट सम्बन्धलाई जुडशितलले दर्शाउछ । तराईका क्षेत्रहरूमा आज हिलो खेल्ने परम्परा पनि रहिआएको छ । यसले माटोसँगको सम्बन्ध र शीतलता प्रदान गर्ने जन विश्वास रहेको छ ।

जुडशितलको अवसरमा मधेश प्रदेश सरकारले प्रदेशभरि सार्वजनिक विदा दिएको छ ।

काठमाडौं । हाल देशमा पश्चिमी तथा स्थानीय वायुको प्रभाव रहेको छ । हाल कोशी प्रदेशमा आंशिकदेखि साधरणतया बदली रही बाँकी भू–भागमा मूख्यतया सफादेखि आंशिक बदली रहेको छ । 

जल तथा मौसम विज्ञान विभागका अनुसार आज कोशी प्रदेशलगायत देशको पहाडी भू–भागमा आंशिकदेखि साधारणतया बदली रही बाँकी भू–भागमा आंशिक बदली रहनेछ ।  

कोशी, मधेशलगायत देशका पहाडी भू–भागका थोरै स्थानहरू र बाँकी भू–भागका एक–दुई स्थानमा मेघगर्जन र चट्याङ्गसहित हल्का वर्षाको सम्भावना रहेको मौसम विभागले जनाएको छ । 

विभागका अनुसार देशको उच्च पहाडी तथा हिमाली भू–भागका एक–दुई स्थानमा हल्का वर्षा र हिमपातको सम्भावना रहेको छ ।

यसैगरी आज राती, कोशी प्रदेशलगायत देशका पहाडी भू–भागमा आंशिक बदली रहनेछ । कोशी प्रदेशलगायत गण्डकी प्रदेशको पहाडी भू–भागका एक–दुई स्थानमा मेघगर्जन र चट्याङ्गसहित हल्का वर्षाको सम्भावना रहेको छ । कोशी र गण्डकी प्रदेशको उच्च पहाडी तथा हिमाली भू–भागका एक–दुई स्थानमा हल्का वर्षा र हिमपातको सम्भावना रहेको छ।

इलाम । नयाँ बर्ष २०८२ मनाउन परराष्ट्रन्त्री आरजु राणा देउवासहित १२ देशका राजदुत इलाम पुगेका छन् ।

परराष्ट्रमन्त्री सहित १२ देशका राजदुत पर्यटकीय नगरी सूर्योदय नगरपालिका पुगेका हुन् । उनीहरुले कन्यामको चिया बगानमा जातिय पहिरन लगाएर घोड सवार गरी फोटोहरु खिचेका थिए । त्यस्तै अन्तुमा चियाबारी घुम्नुका साथै चियाको स्वाद पनि लिएका छन् ।

परराष्ट्र मन्त्रालय र पर्यटन बोर्डले पूर्वको पर्यटकीय गन्तव्य इलामको कन्याम र श्रीअन्तु डाँडाको प्रवद्र्धनको लागि संयुक्त रुपमा नयाँ बर्षको अवसरमा परराष्ट्रमन्त्रीले रिट्रटको आयोजना गरेकी हुन् ।

मन्त्री देउवासहित राजदूतहरुले विभिन्न जातजातिका साँस्कृतिक पहिरन लगााएर कन्याममा फोटोसुट समेत गरे । होमस्टे एशोसिएसन तथा समुदायले रैथाने लाप्चा संस्कृतिको माला लगाएर मन्त्री देउवा र विभिन्न राष्ट्रका डेलिगेट्सलाई स्वागत गरेका छन् ।

‘डिप्लोम्याटिक रिट्रिट’ नाम दिइएको कार्यक्रममा सहभागी परराष्ट्र मन्त्रीसहितको राजदूतको टोलीलाई नगर प्रमुख रणबहादुर राई, उपप्रमुख दुर्गाकुमार बराल, प्रमुख प्रशासकिय अमृत राई सहित सुर्योदय नगरपालिकाका जनप्रतिनिधिहरुले स्वागत गरेका थिए ।

राजदुतहरुले कन्याममा झाँक्री र साकेला नृत्यको मनोरञ्जन लिदै घोडचढी र चियाबारी भित्रको पदयात्राको मनोरञ्जन लिए । सोमबार(आज)अन्तुडाँडाबाट सुर्योदयको दृश्यावलोकन, अन्तुपोखरीमा वोटिङ, टि टेस्टिङ, टि प्लकिङ र फिसिङ कार्यक्रममा सहभागी भइरहेका छन् ।

रौतहट । पर्सा प्रशासनले वीरगन्जमा लगाएको कर्फ्यु हटाएर निषेधाज्ञा जारी गरेको छ । जिल्ला प्रशासन कार्यालय एक सूचना जारी गर्दै सोमवार देखि अर्को आदेश नभएसम्मका लागि निषेधाज्ञा जारी गरेको उल्लेख गरेको छ ।

कुनै किसिमको भेला गर्न, सभा, जुलुस तथा  प्रदर्शन गर्न नपाउने गरि निषेधाज्ञा जारी गरेको जिल्ला प्रशासन कार्यालय पर्साका प्रशासकीय अधिकृत दीपक पटेलले बताए ।

स्थानीय प्रशासन ऐन, २०२८ को दफा ६ (३ क ) बमोजिम निषेधाज्ञा जारी भएको उनले जानकारी दिए । उनका अनुसार सर्वपक्षीय बैठकले शनिवार साँझ देखि लागु गरिएको कर्फ्यु आदेश निरन्तरता दिइरहनु पर्ने नदेखिएकाले केही क्षेत्र र समयका लागि छुट दिने र कर्फ्युको साटो निषेधाज्ञा जारी गर्ने निर्णय गरेको थियो ।

सोही अनुसार निषेधाज्ञा जारी भएको र उक्त आदेशलाई उल्लङ्घन गर्नेलाई नियन्त्रणमा लिई कानुन बमोजिम कारबाही गरिने पर्साका प्रशासकीय अधिकृत पटेलले बताए ।

पूर्वमा बाइपास रोड, पश्चिममा सिर्सया पुल, उतरमा गण्डक चौक र दक्षिणमा शंकराचार्य गेट सम्म निषेधाज्ञा जारी भएको पर्सा प्रशासनले जनाएको छ ।

सर्वदलीय बैठकमा पाँच बुँदे सहमति

जिल्ला प्रशासन कार्यालय पर्सामा बसेको सर्वदलीय बैठकले पाँच बुँदे सहमति गरेको छ। बैठकमा प्रशासन, राजनीतिक दल, धार्मिक प्रतिनिधि, नागरिक समाज र सुरक्षा निकायका प्रतिनिधिहरूले सहभागी थिए ।

बैठकमा दोषीमाथि कारबाही, घाइतेको उपचार, धार्मिक सद्‍भाव कायम राख्ने, हतियार प्रदर्शन निषेध गर्ने र धार्मिक संस्थाहरूको अनुगमन गर्ने जस्ता महत्वपूर्ण निर्णयहरूमा सहमति जनाएका छन्।

हनुमान जयन्तीको अवसरमा आयोजित शोभा यात्राका क्रममा उत्पन्न भएको दुई पक्षबिचको झडपलाई लिएर झडपश्चात् वीरगन्जमा उत्पन्न तनावपूर्ण अवस्था सहमतिपछि क्रमशः सामान्य बन्दै गएको छ ।  

काठमाडौँ । आज नव वर्ष अर्थात् विक्रम संवत् २०८२ साल वैशाख १ गते देशभर एकआपसमा शुभकामना आदानप्रदान गरी उत्साहका साथ मनाइँदैछ ।

नेपालमा विक्रम संवत्ले सांस्कृतिक र औपचारिक मान्यता पाएको छ । त्यसअनुसार वैशाख १ गते नयाँ वर्षकोरुपमा मनाइन्छ ।

आज सूर्य मीन राशिबाट मेष राशिमा प्रवेश गरेको दिन अर्थात् मेष सङ्क्रान्तिका दिन नयाँ वर्षको पहिलो दिन मान्ने प्रचलन छ । सौरमान र चान्द्रमानको समन्वय पनि यो संवत्मा भएको छ । कलि युग सुरु भएको तीन हजार ४४ वर्षपछि विक्रम संवत् सुरु भएको हो ।

हरेक व्यक्तिले आज गत वर्ष गरेका कामको सफलता/असफलता मूल्याङ्कन गरी असफलता दोहोरिन नदिने र सफलता प्राप्त गर्न योजना निर्माण एवं सङ्कल्प गर्दछन्।

आज बिहानै नुहाउने, घरकोठा–आँगन सफा गर्ने, मठ मन्दिरमा गई पूजा आराधना एवं दर्शन गर्ने, मीठोमीठो खाने, साथीसङ्गी तथा इष्टमित्रसँग भेटघाट गरी एक आपसमा शुभकामना आदानप्रदान गर्ने गरिन्छ। विश्वका जुनसुकै कुनामा बस्ने नेपालीले वैशाख १ गतेलाई नयाँ वर्षका रूपमा मनाउँछन्।

बैशाख १ गते नव वर्ष मान्ने चलन नेपालमा मात्र नभई भारत, बङ्गलादेश र श्रीलङ्कासहित एसियाका केही अन्य देशमा पनि आजको दिन नयाँ वर्ष मनाइन्छ ।

बराहक्षेत्र (सुनसरी)। जनता समाजवादी पार्टी बराहक्षेत्र नगर समितिको आयोजनामा  नयाँ वर्ष २०८२ सालको अवसरमा शुभकामना आदान प्रदान तथा पार्टी निकटका विद्यार्थीहरूलाई सम्मान कार्यक्रम सम्पन्न गरेको छ । 

गत चैत्र ५ गते स्ववियु निर्वाचनमा जनता समाजवादी पार्टीको विद्यार्थी भातृ संगठन समाजवादी विद्यार्थी युनियन सप्तकोशी बहुमुखी क्याम्पस बराहक्षेत्र मा प्रत्यक्ष तर्फ सहभागी उमेदवार र समानुपातिक निर्वाचित सदस्यहरूलाई सो कार्यक्रममा खादा-माला र प्रमाणपत्र प्रदान गरि निर्वाचनमा सहभागी विद्यार्थीहरूलाई सम्मान गरेको हो ।

सम्मान कार्यक्रम मा स्वबियु निर्वाचन मा समानुपातिक तर्फ बाट निर्वाचित सदस्य अतीत निरौला र प्रत्यक्ष तर्फका प्रत्याशीहरू अध्यक्ष पदका उमेदवार नीरमाया राई, सचिव पदका उमेदवार बद्रीनाथ गौतम साथै सदस्यहरू मा समीक्षा राई, दीपक पहाडी पोख्रेल, रोशन धामी, रिया शाह, सुम्निमा राई लाई सम्मान गरिएको थियो। चुनावको अन्तिम मत परिणाम अनुसार समाजवादी विद्यार्थी युनियन सप्तकोशी बहुमुखी क्याम्पस इकाइ समितिले समानुपातिक तर्फ १ सदस्य निर्वाचित भएको छ भने क्याम्पसको तेस्रो विद्यार्थी संगठनका रूपमा स्थापित भएकोछ । 

कार्यक्रमका प्रमुख अतिथि जनता समाजवादी पार्टी १ नं. प्रदेश समिति सदस्य मनोज प्रधान, विशिष्ट अतिथि पार्टी सुनसरी जिल्ला समिति कोषाध्यक्ष तथा बराहक्षेत्र नगर कार्यपालिका सदस्य दुर्गा गुरुङ, अतिथिहरू जिल्ला सदस्य तथा बराहक्षेत्र नगर इन्चार्ज मणि प्रसाद राई, पूर्व नगर अध्यक्ष नरेश कुमार राई,जिल्ला सदस्य धन राज राई लगायतको उपस्थिति रहेको थियो।

उक्त कार्यक्रम जनता समाजवादी पार्टी बराहक्षेत्र नगर अध्यक्ष जे.वि. हाङ्ग राईको अध्यक्षतामा भए को थियो भने कार्यक्रम सञ्चालन नगर सचिव भूपेन्द्र राजधामी र उपसचिव देव राम राई ले गर्नु भए को थियो।