धरान । जनता समाजवादी पार्टी (जसपा) १ नं. प्रदेश समितिको प्रथम पूर्ण बैठक सम्पन्न भएको छ । धरान–१५ स्थित छथरे समाजको सामुदायिक भवनमा पौष २३ र २४ गते दुई दिनसम्म चलेको उक्त बैठकले आगामी निर्वाचन केन्द्रित रणनीति तय गर्नुका साथै राष्ट्रिय समिति र जनवर्गीय संगठनका नेतृत्वदायी जिम्मेवारी बाँडफाँड गरेको छ ।

बैठकको निर्णयअनुसार लिम्बुवान राष्ट्रिय समितिको इन्चार्जमा डिल्ली सुब्बा र सहइन्चार्जमा आईतमान सम्बाहाम्फे चयन भएका छन् । किरात राष्ट्रिय समितिको इन्चार्जमा गणेश खालिङलाई दिइएको छ भने दीपचन्द्र राई सहइन्चार्ज तोकिएका छन् । त्यस्तै कोचिला राष्ट्रिय समितिको इन्चार्जमा महमत नसरुलले पाएका छन् भने शेर्पालुङ राष्ट्रिय समितिको इन्चार्जमा दिनेश राई नियुक्त भएका छन् ।

यसैगरी समाजवादी महिला संगठनको इन्चार्जमा मीरा कार्की, प्रचारप्रसार विभाग प्रमुखमा सुमन राई चयन भएका छन् । समाजवादी विद्यार्थी युनियनको इन्चार्जमा रञ्जित राई तथा समाजवादी युवा संघको १ नं. प्रदेश इन्चार्जमा जीवन सुच्चालाई जिम्मेवारी दिइएको प्रचारप्रसार विभाग प्रमुख सुमन राईले जानकारी दिए । बैठकले सल्लाहकार समितिका लागि साजन राईलाई मनोनयन गरेको छ ।

बैठकले जनता समाजवादी पार्टी, राष्ट्रिय मुक्ति पार्टी र नागरिक उन्मुक्ति पार्टीबीच गठन भएको संयुक्त चुनावी मोर्चा ‘राष्ट्रिय अग्रगामी गठबन्धन’ लाई सशक्त बनाउने उद्देश्यले प्रदेश तहमा समन्वय गर्नका लागि प्रदेश समिति अध्यक्षको संयोजकत्वमा समन्वय समिति गठन गर्ने निर्णय गरेको छ । साथै ताप्लेजुङस्थित मुकुम्लुङ बचाउ तथा नो केबलकार आन्दोलनलाई सफल पार्न १ नं. प्रदेशअन्तर्गतका सबै राष्ट्रिय समितिहरूलाई भौतिक तथा आर्थिक सहयोग सहित परिचालनको जिम्मेवारी प्रदान गरिएको छ ।

बैठकमा पार्टी केन्द्रीय कार्यकारिणी समिति सदस्य तथा १ नं. प्रदेश इन्चार्ज रमेश राईको समेत उपस्थिति रहेको थियो । भेलालाई सम्बोधन गर्दै राईले आगामी फाल्गुन २१ गते हुने निर्वाचनमा पार्टीको पक्षमा नतिजा सुनिश्चित गर्न योजनाबद्ध ढंगले अघि बढ्न आग्रह गरे । उनले भने, “अब नेपालमा कुनै पनि शक्ति, नयाँ होस् वा पुरानो, संघीय लोकतान्त्रिक गणतन्त्र र संघीयतालाई उल्ट्याउन सक्दैन।” र, संघीय संरचनाहरू पहिचानका आधारमा नामकरण हुनुपर्ने धारणा राख्दै उनले पूर्ण समानुपातिक समावेशिताका माग पूरा गर्न संगठितहुन  आवश्यक रहेको बताए ।

महिला सहभागिताको सन्दर्भमा उदाहरण प्रस्तुत गर्दै राईले भने, “हिजो महिलाको उपस्थितिका लागि नेताहरूलाई आग्रह गर्नुपर्ने अवस्था थियो, आज नीति र कानुनमै व्यवस्था भएको छ। तर यो पर्याप्त छैन।” राज्यमा विद्यमान सबै प्रकारका उत्पीडन अन्त्यका लागि संवैधानिक तथा कानुनी सुनिश्चितता आवश्यक रहेको उल्लेख गर्दै उनले यही उद्देश्यका साथ जसपा स्थापना भएको दाबी गरे ।

त्यसैगरी जसपा केन्द्रीय कार्यकारिणी समिति सदस्य, १ नं. प्रदेश सभा सदस्य तथा पूर्व स्वास्थ्य मन्त्री निर्मला तावा लिम्बुले पार्टीले महिलाको नेतृत्व विकासमा प्रभावकारी भूमिका खेलिरहेको बताइन् । उनले भनिन्, “अन्य दलको तुलनामा हाम्रो पार्टीले बढी महिला नेतृत्व उत्पादन गरेको छ, त्यसैले भोलिका लैङ्गिक विभेदविरुद्ध हाम्रो आवाज अझ बलियो हुनेछ।” महिलालाई व्यक्तिगत कारण देखाएर पछि नहट्न पनि उनले आग्रह गरिन् ।

बैठकलाई सम्बोधन गर्दै केन्द्रीय कार्यकारिणी समिति सदस्य भिम राईले समसामयिक राजनीतिप्रति चिन्ता व्यक्त गरे । उनले भने, “आज राजनीतिलाई केवल मनोरञ्जनका रूपमा लिने प्रवृत्ति बढेको छ, तर यसलाई गम्भीर जिम्मेवारीका रूपमा लिन जरुरी छ।”  संवेदनशील विषयमा अहिलेका नयाँ दलहरुले मनोरञ्जनक तरिकाले विभिन्न विचारहरु आएको सुन्न पाईन्छ यस्ता अभिव्यक्ति आउनु चिन्ताजनक भएको उनको भनाइ थियो ।

उक्त दुई दिनसम्म सञ्चालन भएको समितिको बैठक गणेश राईको अध्यक्षतामा सम्पन्न भएको थियो भने बैठकको सञ्चालन समितिका मुख्य सचिव नगेन्द्र पारघरी लिम्बुले गरेका थियो।

काठमाडौं । ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री पदबाट राजीनामा दिएका कुलमान घिसिङले आफ्नो निर्णय भाग्ने वा जिम्मेवारीबाट पन्छिने नभई आत्मसम्मान, नैतिकता र जनताप्रतिको प्रतिबद्धताको निरन्तरता भएको स्पष्ट पारेका छन्।

जेनजी आन्दोलनपछि गठन भएको सरकारमा ११५ दिन जिम्मेवारी सम्हालेका घिसिङले राजीनामापछि पत्रकार सम्मेलन गर्दै उनले कुर्सीभन्दा माथि आत्मसम्मान र सरकारभन्दा ठूलो जनता रहेको बताए ।

‘मैले लिएको राजीनामाको निर्णय न त भाग्ने निर्णय हो, न त जिम्मेवारीबाट विमुख हुने प्रयास। यो मेरो आत्मसम्मान, नैतिकता, सिद्धान्त र जनताप्रतिको प्रतिबद्धताको निरन्तरता हो,’ उनले भने, ‘पदमा रहँदा मात्रै होइन, पदबाट बाहिर रहेर पनि देश र जनताको पक्षमा उभिनु नै साँचो कर्तव्य ठानेको छु । म मान्छु—पदभन्दा ठूलो मूल्य हुन्छ, सिद्धान्त। कुर्सीभन्दा माथि हुन्छ, आत्मसम्मान। र, सरकारभन्दा ठूलो हुन्छ, जनता।’

प्रधानमन्त्रीको आग्रह र जेनजी आन्दोलनको चाहनाअनुसार मन्त्री बनेको उल्लेख गर्दै उनले आफूलाई विश्वास गर्ने प्रधानमन्त्री र परिवर्तनको पक्षमा उभिएका युवाप्रति आभार प्रकट गरे। उज्यालो नेपाल पार्टी र राष्ट्रिय स्वतन्त्र पार्टीबीच सहमति भए पनि हालसम्म कुनै दलको औपचारिक सदस्यता नलिएको उनले स्पष्ट पारे।

राजीनामापछि ‘आफ्नो मान्छे’ नियुक्त गर्न दबाब दिएको भन्ने आरोपलाई उनले नियोजित भ्रमको संज्ञा दिँदै खण्डन गरे। अन्तरिम तथा चुनावी सरकारमा पदमै रहेर निर्वाचन लडिएको इतिहास स्मरण गराउँदै उनले आफ्नो निर्णयलाई अस्वाभाविक नठान्न आग्रह गरे।

घिसिङले मन्त्रीको कार्यकाल छोटो भए पनि नीतिगत सुधारको बलियो जग बसालिएको दाबी गरे। सर्लाही र रौतहटमा ५०० डिप ट्युबेलमार्फत २२ हजार ५०० हेक्टर जमिनमा सिँचाइ विस्तार, रानीजमरा कुलरिया लगायत आयोजनामा कृषकको लगानी सुनिश्चित गर्ने तयारी, नेपाल–भारत अन्तरदेशीय प्रसारण लाइनमार्फत थप ५ हजार मेगावाट विद्युत आयात–निर्यातको वातावरण निर्माण, तथा बंगलादेशतर्फ विद्युत निर्यात विस्तारलाई उनले महत्वपूर्ण उपलब्धि रूपमा प्रस्तुत गरे।

त्यस्तै, वर्षौंदेखि अलपत्र परेका रुग्ण ठेक्काहरू तोडेर पुनः निर्माण प्रक्रिया अघि बढाइएको, सुनकोशी–मरिन, कन्काई पुल, हुलाकी राजमार्ग, कमला पुलजस्ता आयोजनाले गति लिएको, तथा बञ्चरेडाँडा फोहोर व्यवस्थापन, मेलम्ची पानी, कोदारी नाका र बीपी राजमार्ग सञ्चालनमा आएको उल्लेख गरे।

मनसुनजन्य विपद् व्यवस्थापनमा राज्यको उपस्थिति कागजमै सीमित नरहेको दाबी गर्दै उनले समयमै सूचना, पूर्वतयारी र हस्तक्षेपका कारण ठूलो क्षति टरेको बताए।

घिसिङले आफू पदबाट बाहिरिए पनि राष्ट्रको हित, जनताको पक्ष र सत्यको बाटोबाट नहट्ने उद्घोष गर्दै उज्यालो नेपाल निर्माणका लागि सशक्त रूपमा राजनीतिक यात्रामा होमिने घोषणा गरे।

काठमाडौं । संयुक्त राज्य अमेरिकाले पर्यटक तथा व्यवसायिक प्रयोजनका लागि जारी हुने बी १÷बी २ भिसामा नयाँ ‘भिसा बन्ड’ व्यवस्था लागू गरेको छ । अमेरिकी विदेश मन्त्रालयले जनवरी मंगलबार जारी गरेको पछिल्लो अपडेट अनुसार यो व्यवस्था अमेरिकी आप्रवासन ऐनको धारा २२१(न) (३) तथा अस्थायी अन्तिम नियम अन्तर्गत पाइलट कार्यक्रमका रूपमा कार्यान्वयनमा ल्याइएको हो ।

नयाँ व्यवस्थाअनुसार तोकिएका देशका नागरिक वा राष्ट्रियताका व्यक्तिहरू, जो बी १÷बी२ भिसाका लागि अन्य सबै हिसाबले योग्य ठहरिन्छन, उनीहरूले ५ हजार, १० हजार वा १५ हजार अमेरिकी डलर बराबरको धरौटी (बन्ड) राख्नुपर्नेछ । धरौटीको रकम भिसा अन्तर्वार्ताका क्रममा कन्सुलर अधिकृतले निर्धारण गर्नेछन् । भिसा बन्ड राख्नका लागि आवेदकले अमेरिकी गृह सुरक्षा विभागको फर्म समेत बुझाउनुपर्नेछ । साथै, आवेदकले अमेरिकी कोष विभागको अनलाइन भुक्तानी प्रणाली मार्फत बन्डको रकम तिर्न सहमति जनाउनुपर्ने व्यवस्था गरिएको छ । यो नियम भिसा आवेदन कहाँबाट दिइएको हो भन्ने कुरासँग असम्बन्धित रूपमा लागू हुने जनाइएको छ ।

अधिकारीहरूले भिसा बन्ड तिरेको आधारमा भिसा स्वीकृत हुन्छ भन्ने ग्यारेन्टी नहुने स्पष्ट गरेका छन् । कन्सुलर अधिकृतको निर्देशनबिना शुल्क तिरेको अवस्थामा उक्त रकम फिर्ता नहुने पनि उल्लेख गरिएको छ ।

धरान ।  संयुक्त पहिचानवादी मोर्चाका केन्द्रीय नेता नन्दु याम्फु जनता समाजवादी पार्टी (जसपा) मा प्रवेश गरेका छन् । जनता समाजवादी पार्टी १ नं. प्रदेश समितिको आजदेखि धरानमा सुरु भएको प्रथम पूर्ण बैठकको अवसरमा पार्टी केन्द्रीय कार्यकारिणी समिति सदस्य तथा १ नं. प्रदेश इन्चार्ज रमेश राईले याम्फुलाई पार्टीमा स्वागत गर्दै औपचारिक रूपमा प्रवेश गराएका हुन् ।

कार्यक्रममा १ नं. प्रदेशसभा सदस्य तथा पूर्व स्वास्थ्य मन्त्री एवं पार्टी केन्द्रीय कार्यकारिणी समिति सदस्य निर्मला तावा, केन्द्रीय कार्यकारिणी समिति सदस्यहरू भिम राई, गोपाल राई, चन्द्रकुमारी कार्की, मान बहादुर राई लगायतका नेताहरूले खादा ओढाई याम्फुलाई स्वागत गरेका थिए ।

पार्टी प्रवेश पश्चात बोल्दै याम्फुले संयुक्त पहिचानवादी मोर्चाका संयोजक राष्ट्रिय तथा अन्तर्राष्ट्रिय रूपमा अध्यापन गराउने व्यक्ति भएको र पहिचानको आन्दोलनका लागि केही सकारात्मक योगदान गर्लान् भन्ने विश्वासका साथ आफूले साथ दिएको बताए । तर अन्ततः पहिचान विरोधी र संघीयता विरोधी पार्टी रास्वपातर्फ आन्दोलनलाई विसर्जन गराएकोले  आफूले पुरानै राजनीतिक घर फर्किने निर्णय गरेको उनको भनाइ थियो ।

उनले भने, “मोर्चाका साथीहरू कहिले यता त कहिले उता ढुङ्गाजस्तै लडिरहेका छन्, कहाँ अडिन्छन् भन्ने थाहा छैन । मेरो लागि विचार प्रधान हो । त्यसैले जनता समाजवादी पार्टी मेरो पुरानै घर हो, विचार बोक्ने पार्टी हो । अब मेरो उमेर, योग्यता र क्षमताअनुसार पार्टीले जुन तहमा जिम्मेवारी दिनुहुन्छ, त्यसै तहबाट बाँकी आन्दोलन र मेरो राजनीतिक यात्रालाई अघि बढाउन चाहन्छु ।”

जनता समाजवादी पार्टी १ नं. प्रदेश समितिको प्रथम पूर्ण बैठक आज पौष २३ गतेदेखि सुरु भई भोलि पौष २४ गतेसम्म सञ्चालन हुने जनाएको छ । भोलिको बैठकमा प्रस्तुत प्रस्तावहरूमाथि व्यापक छलफल गरी बैठक समापन गरिने प्रदेश समिति उपाध्यक्ष मिरा कार्कीले जानकारी दिइन् ।

रौतहट । धनुषा घटनालाई लिएर वीरगञ्जमा उत्पन्न तनाव न्यूनीकरण गर्न जिल्ला प्रशासन कार्यालय पर्सामा आयोजित सर्वपक्षीय बैठक मंगलवार सम्पन्न भएको छ ।
प्रमुख जिल्ला अधिकारी भोला दाहालको अध्यक्षतामा बसेको उक्त बैठकले जिल्लामा शान्ति सुरक्षा कायम गर्न र सामाजिक सद्भाव जोगाउन विभिन्न महत्त्वपूर्ण निर्णयहरू गरेको छ ।
बैठकले सामाजिक र धार्मिक सद्भावलाई दीर्घकालीन रूपमा कायम राख्न एक ’स्थायी सद्भाव संयन्त्र’ गठन गर्ने निर्णय गरेको छ । यस संयन्त्रले आगामी दिनमा हुनसक्ने सम्भावित विवादहरूलाई समाधान गर्न र आपसी भाइचारा बलियो बनाउन काम गर्नेछ ।
बैठकका मुख्य निर्णयहरू यस प्रकार छन् :
१. अनुमति अनिवार्यः अबदेखि कुनै पनि किसिमका जुलुस, प्रदर्शन वा सार्वजनिक कार्यक्रम आयोजना गर्न अनिवार्य रूपमा जिल्ला प्रशासन कार्यालयको पूर्व अनुमति लिनुपर्नेछ,
२. कानुनी कारबाहीः सामाजिक सञ्जाल वा अन्य कुनै माध्यमबाट धार्मिक द्वेष फैलाउने, भ्रामक सूचना सम्प्रेषण गर्ने वा हिंसाका लागि दुरुत्साहन गर्ने व्यक्ति तथा समूहलाई पहिचान गरी कानुनी दायरामा ल्याउन स्थानीय प्रशासन सक्रिय रहनेछ,
३. मिडियाको भूमिकाः सञ्चारकर्मीहरूलाई धार्मिक र सामाजिक सद्भावमा खलल नपुग्ने गरी जिम्मेवारीपूर्वक र सन्तुलित समाचार सम्प्रेषण गर्न अनुरोध गरिएको छ,
प्रमुख जिल्ला अधिकारी दाहालले सर्वपक्षीय बैठकका निर्णयहरूको कार्यान्वयनबाट वीरगञ्जको स्थिति छिट्टै सामान्य हुने विश्वास व्यक्त गरेका छन । उनले सम्पूर्ण नगरवासीहरूलाई संयम अपनाउन र परापूर्वकालदेखि चल्दै आएको सामाजिक सद्भाव कायम राख्न विशेष अपिल समेत गरेका छन ।
यसैबीच, सुरक्षा अवस्थालाई मध्यनजर गर्दै प्रशासनले वीरगञ्जमा जारी गरेको कफ्र्युको अवधि आज साँझ ६ बजेसम्मका लागि लम्ब्याएको छ। प्रशासनले कफ्र्युको समयमा घरबाहिर ननिस्कन र सुरक्षाकर्मीलाई सहयोग गर्न आग्रह गरेको छ ।

काठमाडौं । नेकपा(एमाले)को मंगलबार बसेको सचिवालय बैठकले विभिन्न निर्णयहरु गरेको छ । बैठकले प्रदेश र निर्वाचनको संयोजक तोक्नुका साथै राष्ट्रियसभा निर्वाचनमा चुनावी तालमेल गर्नेबारे अध्यक्ष केपी शर्मा ओलीलाई जिम्मेवारी दिएको छ ।

एमाले उपमहासचिव लेखराज भट्टका अनुसार निर्वाचन परिचालन कमिटी गठन गरेको र त्यसको जिम्मेवारी उपाध्यक्ष रामबहादुर थापा ‘बादल’लाई संयोजक तोकेको छ । जसमा विष्णु रिमाल, छविलाल विश्वकर्मा, राजन भट्टराई, हिक्मत कार्की, रमेश बडाल र भीष्म अधिकारी सदस्य रहेका छन् ।

त्यस्तै, कांग्रेस र नेकपाबीच छलफल गर्ने र हरेक प्रदेशमा एकजना पर्ने गरी सात सीट माग गरेको उपमहासचिव भट्टले जानकारी दिए । कांग्रेससँग छलफल गर्ने र उम्मेदवारको टुंगो लगाउने जिम्मा पनि बैठकले अध्यक्षलाई नै दिएको उनले जानकारी दिए ।

बैठकले अध्यक्ष ओलीकै नेतृत्वमा घोषणा पत्र समिति समेत गठन गरेको छ। समितिमा उपाध्यक्ष रामबहादुर थापा बादल, विष्णु पौडेल, महामसचिव शंकर पोखरेल तथा केन्द्रीय सदस्य प्रदीप ज्ञवाली र पूर्वउपमहासचिव विष्णु रिमाल सदस्य छन् ।

काठमाडौं । नेपाल जेनजी फ्रन्टकी संयोजक रक्षा बमले पछिल्ला तीन महिना आफ्नो जीवनका लागि तीन दशक बराबरको अनुभव जस्तै भएको बताएकी छन् ।
नेपाल उद्योग वाणिज्य महासंघले बुधबार आयोजना गरेको ‘शान्ति, स्थायित्व र समृद्धिका लागि सहकार्य’ विषयक संवाद कार्यक्रममा बोल्दै संयोजक बमले जेनजी आन्दोलनपछि जानी–नजानी आफूहरू राजनीतिक परिवेशमा प्रवेश गर्नुपरेको उल्लेख गरिन् ।

उनले विभिन्न राजनीतिक घटनाक्रममा आफ्नो सहभागिता देखिएको भन्दै ती अनुभवबाट धेरै कुरा सिक्न पाएको अनुभूति व्यक्त गरिन् ।
उनले भनिन्, ‘मलाई यो तीन महिना तीन दशक जस्तो महशुस भएको छ । जानी नजानी आन्दोलनले गर्दाखेरी हामी एउटा राजनीतिक परिवेशमा आउनु परेको छ । राजनीतिक धेरै घटनाक्रममा हाम्रो सहभागिता रहेको देखिएको छ । त्यसैले यो तीन महिना मेरो लागि तीन दशक हो । सिक्नुपर्ने कुराहरु सिके जस्तो मलाई महशुस हुन्छ । जिन्दगी भनेको साझा धरातलहरु खोज्ने र त्यसैलाई सन्तुलन गर्दै जाने रहेछ ।’
कार्यक्रममा उनले देशमा शान्ति, समृद्धि र सुखी नेपालीको चाहना सबैको साझा आकांक्षा भएको बताइन् । देश भ्रष्टाचारमुक्त हुनुपर्ने, भ्रष्टाचार निषेध हुनुपर्ने र सुशासन स्थापित हुनुपर्ने आवश्यकता औंल्याउँदै उनले यो चाहना देशका सबै सरोकारवालाको भएको उल्लेख गरिन् ।

तर यति हुँदाहुँदै पनि देशमा भ्रष्टाचार र कुशासन व्याप्त रहेको भन्दै उनले यसको कारणबारे गम्भीर आत्ममूल्यांकन आवश्यक रहेको बताइन् ।
उनले भनिन्, ‘देशमा शान्ति, समृद्धि, सुखी नेपालीको चाहना सबैको साझा आकांक्षा हो । देश भ्रष्टाचार मुक्त हुनुपर्छ, भ्रष्टाचार निषेध हुनुपर्छ र सुशासन आउनुपर्छ भन्ने चाहना हो । देशका हरेक साझेदारहरुको चाहना यही हो । यो हुँदै गर्दा पनि देशमा भ्रष्टाचार व्याप्त छ, कुशासन किन छ भन्ने मुख्य प्रश्न हो । देशमा किन भ्रष्टाचार छ त यो आफैंलाई प्रश्न गर्नुपर्ने छ ।’

काठमाडौं । राष्ट्रिय स्वतन्त्र पार्टीकी नेतृ तोसिमा कार्कीले पार्टीको समानुपातिक उम्मेदवार सूचीप्रति आफ्नो असहमति सामाजिक सञ्जालमार्फत व्यक्त गरेकी छन्।
समानुपातिक प्रणालीले भौगोलिक विकटता, पहुँच र पावर नभएका योग्य व्यक्तिहरूलाई प्रतिनिधित्व दिने उद्देश्य राखेको भन्दै पार्टीको समानुपातिक उम्मेदवार सूचीप्रति आफ्नो असहमति जनाएकी हुन् ।

उनले लेखेकी छन्, ‘समानुपातिक को अवधारणा नै भौगोलिक विकटताले ठाउँ पाओस्, पहुँच र पावर नभएका तर सक्षमहरुले प्रतिनिधित्व पाउन् भनेर राखिएको हो। सुचिले विपन्नलाई पनि ठाउँ दिनुपर्छ। सुचिले कर्णाली बोल्नुपर्छ। सुदुर पश्चिम बोल्नुपर्छ।’

उनले पार्टी भित्रका पदाधिकारी र सचिवालय सदस्यका आफन्त वा नातेदारले अग्रपङ्तिमा नाम सुरक्षित गर्ने प्रवृत्तिले समानुपातिक प्रणालीको औचित्यमाथि प्रश्न उठाएको बताइन्।

उनले भनेकी छन्, ‘समानुपातिकले समावेश गराउनुपर्छ, निषेध होइन। पार्टीका भाईटल पोसिसनमा बस्ने साथीहरूले प्रत्यक्ष चुनाव लड्न हिम्मत गर्नुपर्छ। यदि सचिवालय सदस्य वा पदाधिकारी नै चुनाव लड्न डराउँछन् भने अरूले के गर्ने?’

कार्कीले आफन्तवाद र नातावादलाई पूर्णरूपले निषेध गर्नुपर्ने माग गर्दै समानुपातिक सूचीमा पारदर्शिता र न्याय सुनिश्चित गर्न पार्टी नेतृत्वलाई ध्यानाकर्षण गराएकी छन्।

उनले उदाहरणिय नेतृत्व गर्नका लागि समानुपातिकको सुचीमा आफन्तवाद र नातावादलाई पूर्ण रुपले निषेध गरिनुपर्ने बताइन् ।

हामीले साच्चिकै उदाहरणिय नेतृत्व गर्ने हो भने सबै पदाधिकारी तथा सचिवालय सदस्यहरुले आ–आफ्नो नाम समानुपातिकको सूचीबाट हटाएर प्रतक्ष चुनाव लड्ने हिम्मत गर्नुपर्छ। साथै समानुपातिकको सूचीमा आफन्तवाद र नातावादलाई पूर्ण रुपले निषेध गरिनुपर्छ।’

काठमाडौं । एमाले अध्यक्ष केपी शर्मा ओलीले कुखुरा, बाख्रा र स्यालको मोर्चाले बाघको सिकार गर्न नसक्ने बताएका छन् । मंगलबार काठमाडौंमा आयोजित एमालेको ११ औं महाधिवेशनका सन्देश र राजनीतिक निकास विषयक विचार गोष्ठीमा उनले बलियासँग लड्नको लागि दुब्लाले एकता नै गर्ने भन्दै विशाल एमाले देखेपछि कुखुरा, बाख्राको मोर्चा बनेको बताए ।

उनले भने, ‘यसो हेर्दा विशाल एमाले देखेपछि तिमी र म मिलौं भन्या छ, उसँग पनि मिलौं भन्या छ । विशाल एमालेसँग भीड्नु छ अनि मिलौं भनिएको छ । कुखुरा र बाख्राले मोर्चा गरेर, स्यालले मोर्चा गरेर बाघ र सिंहको शिकार हुन्छ र ? प्रतिस्पर्धा हुन्छ ? दुब्लाको काम नै मोर्चा गर्ने हो । बलियासँग लड्नको लागि दुब्लाले गर्ने नै एकता हो, आज पनि एउटा एकता हुन्छ राति सम्ममा, भोलि पनि हुन्छ ।’
यस्तै, उनले चुनाव आउनु अगाडि नै प्रधानमन्त्री बनाइसकेको टिप्पणी गर्दै यसको जवाफ दिने प्रतिक्षाका साथ तयारी पनि गरिरहेको बताए ।

उनले भने, ‘महाधिवेशनले अर्को एउटा अवसरमा जवाफ दिने प्रतिक्षाका साथ तयारी पनि गरेको छ । त्यो भनेको देशमा को लोकप्रिय छ भन्ने अलिकति चर्चा निर्वाचनसम्म नै रहन्छ । प्रधानमन्त्री बनाइसके मान्छेले, हामी चुनाव पर्खिरहेका छौं । कहिले होला ? फागुन २१ मा होला वा बैशाखमा होला वा अर्को मंसिरमा होला हामी पर्खिरहेका छौं ।’

महाधिवेशले जसरी धेरै कुराहरुको जवाफ दिएको थियो त्यस्तै निर्वाचनबाट राष्ट्रिय फैसला पनि दिने भन्दै त्यसका लागि तयार छौ भन्ने कुराको सन्देश पनि महाधिवेशले दिएको उनको भनाई छ ।

काठमाडौं । प्रधानमन्त्री सुशीला कार्कीले सांस्कृतिक विविधता नेपालको गौरव र ठूलो शक्ति भएको बताएकी छन् । मंगलबार काठमाडौंमा आयोजित तमु ल्होसार महोत्सव २०८२ मा उनले सांस्कृतिक विविधता नेपालको गौरव भएको भन्दै तमु ल्होसारजस्ता पर्वहरूले मौलिक पहिचान जोगाउँदै आपसी सद्भाव, सहिष्णुता र एकताको भावना अझ बलियो बनाउन प्रेरित गरेको बताइन् ।
उनले भनिन्, ‘सांस्कृतिक विविधता नेपालको गौरव हो । यही विविधता नै हाम्रो ठूलो शक्ति पनि हो । तमु ल्होसारजस्ता पर्वहरूले हामीलाई आफ्नो मौलिक पहिचान जोगाउँदै आपसी सद्भाव, सहिष्णुता र एकताको भावना अझ बलियो बनाउन प्रेरित गर्छन् । यस्ता पर्वहरूले समाजमा मेलमिलापको सन्देश फैलाउँछन् र प्रकृतिसँग सहअस्तित्वको पाठ सिकाउँछन् ।’
यस्तै, उनले सरकार पछिल्ला दिनहरूमा देखिएका परिस्थितिबाट पाठ सिक्दै शान्तिपूर्ण, संविधानसम्मत र लोकतान्त्रिक बाटोमार्फत युवाहरूले चाहेजस्तो देश निर्माण गर्ने दिशामा अग्रसर भएको पनि जानकारी दिएकी छन् ।
उनले भनिन्, ‘पछिल्ला दिनहरूमा देखिएका परिस्थितिबाट पाठ सिक्दै आज हामी शान्तिपूर्ण, संविधानसम्मत र लोकतान्त्रिक बाटोमार्फत युवाहरूले चाहेजस्तो देश निर्माण गर्ने दिशामा अग्रसर भएका छौँ । त्यसको मुख्य आधार भनेको स्वच्छ र निष्पक्ष निर्वाचन नै हो । आगामी फागुन २१ गते हुन लागेको निर्वाचनको वातावरण देशभरि बन्दै गएको छ । राजनीतिक दलहरुका तर्फबाट उत्साहका साथ समानुपातिक निर्वाचन प्रणालीतर्फका उम्मेदवारको बन्दसूची निर्वाचन आयोगमा पेस भएका छन् ।’
उनले निर्वाचन सम्पन्न गर्ने दिशामा नयाँ कोशेढुंगा पार गरेको भन्दै यसका लागि राजनीतिक दलको नेतृत्व तथा युवाहरुले देखाएको सुझबुझका लागि आभार व्यक्त पनि गरेकी छन् ।
सरकारले शान्ति, सुरक्षा र सुव्यवस्था कायम गर्दै भयरहित वातावरणमा निर्वाचन सम्पन्न गर्न कुनै कसर बाँकी नराखेको पनि उनको भनाई छ ।
उनले भनिन्, ‘सरकारले शान्ति, सुरक्षा र सुव्यवस्था कायम गर्दै भयरहित वातावरणमा निर्वाचन सम्पन्न गर्न कुनै कसर बाँकी राखेको छैन । यस कार्यमा सबै राजनीतिक दल, नागरिक समाज र सम्पूर्ण नेपाली दाजुभाइ दिदीबहिनीहरूको साथ, सहयोग र सक्रिय सहभागिता अत्यन्तै आवश्यक छ । मुलुकले अब थप अस्थिरता होइन, स्थायित्व र विश्वास चाहेको छ । हामी सबै मिलेर शान्ति, एकता र समृद्धिको मार्गमा अघि बढ्नुको विकल्प छैन ।’