काठमाडौं । आज फागुन ७ गते देशभर राष्ट्रिय प्रजातन्त्र दिवस विविध कार्यक्रमका साथ मनाइँदै छ । २००७ सालको जनक्रान्तिमार्फत निरङ्कुश राणा शासनको अन्त्य भई प्रजातन्त्र स्थापना भएको ऐतिहासिक दिनको सम्झनामा यो दिवस मनाउने गरिएको हो ।

प्रजातन्त्र स्थापनाका लागि जीवन उत्सर्ग गर्ने शहीदहरू दशरथ चन्द, धर्मभक्त माथेमा, गङ्गालाल श्रेष्ठ र शुक्रराज शास्त्रीको योगदानको स्मरण गर्दै आज देशभर श्रद्धाञ्जली अर्पण गरिँदै छ ।

प्रजातन्त्र स्थापना भएसँगै नेपाली नागरिकले हाल सङ्घीय लोकतान्त्रिक गणतान्त्रिक व्यवस्थामार्फत आफ्ना अधिकारको अभ्यास गर्दै आएका छन् । संवैधानिक रूपमा प्रजातान्त्रिक मूल्य, मान्यता र व्यवहारलाई संस्थागत गर्ने बलियो आधार २००७ सालको जनक्रान्तिले तयार पारेको इतिहासकारहरूको भनाइ छ ।

यस वर्षको मूल समारोह काठमाडौंस्थित सैनिक मञ्च, टुँडिखेलमा विशेष कार्यक्रमका साथ आयोजना हुँदैछ । प्रधानमन्त्री सुशीला कार्कीको अध्यक्षतामा गठन गरिएको मूल समारोह समितिमा सरकारका मन्त्रीहरू, काठमाडौं उपत्यकाका नगरप्रमुखहरू, मुख्य सचिव, प्रधान सेनापति, सुरक्षा निकायका प्रमुखहरू लगायत उच्च पदाधिकारीहरू सदस्य छन् भने गृह मन्त्रालयका सचिव सदस्य सचिवको भूमिकामा छन्।

प्रजातन्त्र दिवसका अवसरमा सरकारले देशभर सार्वजनिक बिदा दिएको छ । राष्ट्रपति, प्रधानमन्त्री तथा विभिन्न राजनीतिक दलका नेताहरूले प्रजातन्त्र स्थापनाका लागि योगदान पु¥याउने शहीदहरूको स्मरण गर्दै देशवासीलाई शुभकामना व्यक्त गरेका छन् ।

मोरङ । आगामी फागुन २१ गते हुने प्रतिनिधिसभा सदस्य निर्वाचन नजिकिँदै जाँदा मोरङ निर्वाचन क्षेत्र नम्बर–२ राजनीतिक रूपमा अत्यन्तै चासोको केन्द्र बनेको छ। परम्परागत रूपमा नेपाली कांग्रेस र नेकपा (एमाले) बीच प्रतिस्पर्धा हुँदै आएको यस क्षेत्रमा यस पटक भने बहुकोणीय प्रतिस्पर्धाले चुनावी समीकरण थप पेचिलो बनाएको छ।

नेपाली कांग्रेस, नेकपा (एमाले), नेपाली कम्युनिस्ट पार्टी (नेकपा) र राष्ट्रिय स्वतन्त्र पार्टी (रास्वपा) बीचको भिडन्तले मतदाताको ध्यान तानेको छ।
नेपाली कांग्रेसले पूर्वमन्त्री डा. मीनेन्द्रप्रसाद रिजाललाई उम्मेदवार बनाएको छ। रिजाल यस क्षेत्रका लागि नयाँ अनुहार होइनन्।

२०७४ सालको निर्वाचनमा तत्कालीन एमाले–माओवादी गठबन्धनका साझा उम्मेदवार ऋषिकेश पोख्रेललाई पराजित गर्दै उनले कांग्रेसको प्रभाव कायम राखेका थिए। तर २०७९ सालमा पार्टीभित्रको गठबन्धन समीकरणका कारण टिकट नपाएपछि कांग्रेस कमजोर देखिएको थियो। त्यसबेला कांग्रेसबाट सुजाता कोइराला उम्मेदवार बनेकी थिइन् तर एमालेका पोख्रेलसँग पराजित हुनुपरेको थियो। यस पटक कांग्रेसले पुरानो जनाधार पुनः सक्रिय बनाउने लक्ष्यसहित रिजाललाई अघि सारेको छ।

कांग्रेस नेताहरूका अनुसार अघिल्लो निर्वाचनमा देखिएको आन्तरिक असन्तुष्टि समाधान भइसकेको छ र संगठन चुनाव केन्द्रित रूपमा सक्रिय भएको छ। निर्वाचन प्रसार समितिका सचिव आशिष कार्कीले कार्यकर्ता विस्तारै खुल्दै गएको र परिणाम सकारात्मक हुने दाबी गरेका छन्। कांग्रेसले ‘विश्वसनीय नेतृत्व र स्थिर राजनीति’ लाई मुख्य एजेन्डा बनाएको छ।

यता नेकपा (एमाले) ले रङ्गेली नगरपालिकाका पूर्वप्रमुख दिलीपकुमार अग्रवाललाई उम्मेदवार बनाएको छ। स्थानीय तहमा विकास निर्माणका काम गरेको अनुभवलाई चुनावी मुद्दा बनाउँदै अग्रवाल मतदाता माझ पुगेका छन्। रङ्गेली जस्तै मोरङ–२ को विकास भन्ने नारासहित एमालेले संगठनात्मक शक्ति र स्थानीय निर्वाचनको मत परिणामलाई आफ्नो बलियो आधार मानेको छ। एमाले नेताहरूका अनुसार स्थानीय तह निर्वाचनमा प्राप्त अग्रता यस पटक पनि कायम रहने विश्वास छ।

स्थानीय निर्वाचनको तथ्यांकले प्रतिस्पर्धाको आधार स्पष्ट देखाउँछ। २९ वडामध्ये एमालेले १६ वडा जितेको थियो भने कांग्रेसले ११ वडा र माओवादी केन्द्रले दुई वडा जितेका थिए। मतपरिणाममा एमालेले ३१ हजार १६१ मत पाउँदा कांग्रेसले २८ हजार ६८१ मत प्राप्त गरेको थियो। माओवादी केन्द्रले ६ हजार ८०१, जसपाले ३ हजार १८८ र राप्रपाले १ हजार ८८४ मत ल्याएका थिए। यही मत आधारले कांग्रेस–एमालेबीच मुख्य प्रतिस्पर्धा हुने अनुमान गरिएको छ।

तर यस पटकको चुनावमा नयाँ राजनीतिक शक्तिको प्रवेशले समीकरण बदलिने संकेत देखिएको छ। राष्ट्रिय स्वतन्त्र पार्टी (रास्वपा) बाट कृष्णकुमार कार्की उम्मेदवार छन्। अघिल्लो निर्वाचनमा करिब पाँच हजार मत ल्याएको रास्वपाले यस पटक आक्रामक प्रचार शैली अपनाएको छ। पार्टीका जिल्ला संगठन विभाग सचिव सुनीलदत्त अधिकारीका अनुसार भ्रष्टाचार नियन्त्रण, पारदर्शिता र सुशासनको मुद्दाले मतदातामा आकर्षण बढाएको छ। रास्वपाले विशेषगरी युवा र वैकल्पिक राजनीति खोजिरहेका मतदातालाई लक्षित गर्दै अभियान चलाइरहेको छ।

यसैबीच नेपाली कम्युनिस्ट पार्टी (नेकपा) ले पुराना कम्युनिस्ट नेता चन्द्रवीर राईलाई उम्मेदवार बनाएको छ। लामो समय शिक्षण पेशामा आबद्ध रही राजनीतिमा सक्रिय भएका राई नेकपा (माले) स्थापनाकालदेखि वाम आन्दोलनमा संलग्न रहँदै आएका नेता हुन्। जिल्ला विकास समितिको सदस्य भएर काम गरिसकेको अनुभव पनि उनीसँग छ। पार्टीका नेता प्रकाश पौडेलका अनुसार विचारधारात्मक राजनीति र जनमुखी कार्यक्रमका आधारमा मतदाताको विश्वास जित्ने प्रयास भइरहेको छ।

मोरङ–२ भौगोलिक रूपमा विविध संरचना भएको निर्वाचन क्षेत्र हो। रतुवामाई नगरपालिकाका सबै १० वडा, सुनवर्षी नगरपालिकाका ९ वडा, रङ्गेली नगरपालिकाका वडा नम्बर १, २, ३, ८ र ९, पथरी शनिश्चरेका वडा नम्बर ५ र ६ तथा कानेपोखरी गाउँपालिकाका वडा नम्बर १, २ र ३ यस क्षेत्रमा पर्छन्। कुल एक लाख २९ हजार १८४ मतदाता रहेको यस क्षेत्रमा ग्रामीण र शहरी दुवै चरित्रको मतदाता मिश्रण छ।

राजनीतिक विश्लेषकहरूका अनुसार यस क्षेत्रमा परम्परागत पार्टीको संगठन बलियो भए पनि मतदाताको मनोविज्ञान बदलिँदो अवस्थामा छ। युवा मतदाता, वैदेशिक रोजगारीबाट फर्किएका नागरिक तथा पहिलो पटक मतदान गर्ने समूह निर्णायक बन्न सक्ने अनुमान गरिएको छ। विकास, रोजगारी, सुशासन र स्थानीय पूर्वाधार चुनावी बहसका मुख्य विषय बनेका छन्।

चार स्वतन्त्रसहित १७ उम्मेदवार चुनावी मैदानमा रहे पनि वास्तविक प्रतिस्पर्धा चार दलबीच सीमित देखिन्छ। चुनाव नजिकिँदै जाँदा घरदैलो, कोणसभा र मतदाता भेटघाट कार्यक्रम तीव्र बनेका छन्। दलहरूले आफ्ना उपलब्धि र योजनाको प्रचार गरिरहेका छन् भने मतदाता भने विगतको कामको मूल्यांकन गर्दै निर्णय गर्ने मनस्थितिमा देखिन्छन्।

मोरङ–२ को चुनाव मात्र प्रतिनिधिसभा सदस्य चयन गर्ने प्रक्रिया मात्र होइन, बदलिँदो राजनीतिक धारणा र जनमतको परीक्षण पनि हो। परम्परागत शक्ति पुनः स्थापित हुन्छन् कि नयाँ विकल्पले स्थान बनाउँछ भन्ने प्रश्नको उत्तर अब मतपेटिकाले दिनेछ।

काठमाडौं । शेर्पा समुदायले आज विभिन्न कार्यक्रम गरी ग्याल्पो ल्होसार पर्व मनाउँदै छन् । ल्हो अर्थात् वर्ष अनि छार अर्थात नयाँ भनिन्छन् । शेर्पा समुदायले यसलाई नयाँ वर्षका रुपमा मनाउँने गर्दछन् ।

पर्वको अवसरमा शेर्पा समुदायमा आफ्नो गाउँघर, टोलमा रहेका बाटोघाटो तथा पानीका मूलहरूको सरसरफाइ गर्ने, नौ प्रकारको अन्न मिसाइएको परिकार गुथुक र खाप्से खाने तथा आपसमा शुभकामना आदानप्रदान गर्दै नयाँ वर्षको स्वागत गर्ने परम्परा रहेको छ । पारिवारिक एवं सामाजिक मेलमिलाप अभिवृद्धि गर्ने अवसरका रूपमा यस पर्वलाई लिइन्छ ।

नेपालको हिमाली क्षेत्रमा बसोबास गर्ने शेर्पा समुदायलगायत महायान बौद्ध परम्परामा चन्द्रमास गणना गरी फागुन शुक्लपक्ष प्रतिपदा तिथिका दिन नयाँ वर्ष सुरु हुने विश्वाससहित ग्याल्पो ल्होसार मनाइन्छ । स्याब्रु नृत्य, तुङ्गना (डम्याङ) को मधुर धुन र सामूहिक उल्लासले ग्याल्पो ल्होसारलाई अझ अर्थपूर्ण बनाउँछ ।

नयाँ वर्षका रुपमा मनाइने यो पर्वले नयाँ आशा, उमङ्ग र उल्लास बोकेर समाजमा आपसी प्रेम, भाइचारा, सद्भाव र एकताको भावना अझ सबल बनाउन सहयोग पुग्ने पनि विश्वास छ । यस अवसरमा सरकारले आज सार्वजनिक बिदा समेत दिएको छ ।

काठमाडौं । बंगलादेशमा आज नयाँ सरकार गठन हुँदैछ । बंगलादेश नेशनलिस्ट पार्टी (बीएनपी) का अध्यक्ष तारिक रहमानले आज प्रधानमन्त्रीको रूपमा शपथ लिँदैछन् । फेब्रुअरी १२ मा सम्पन्न भएको आम निर्वाचनमा बीएनपीले २०९ सिट जित्दै गठबन्धनसहित २१२ सिटमा दुई तिहाइ बहुमत हासिल गरेको थियो ।

तारिक रहमानको शपथग्रहण समारोह भव्य रूपमा आयोजना गरिएको छ । शपथ कार्यक्रममा १२ सय स्वदेशी तथा विदेशी अतिथिहरू सहभागी हुने अपेक्षा गरिएको छ ।
समारोह राजधानी ढाकास्थित संसद भवनको साउथ प्लाजामा आयोजना हुनेछ । राष्ट्रपति मोहम्मद शहाबुद्दिनले नयाँ मन्त्रिपरिषद्का सदस्यहरूलाई पद तथा गोपनीयताको शपथ गराउने कार्यक्रम रहेको छ ।

काठमाडौं । निर्वाचन आचारसंहिता विपरीत समाचार प्रकाश गरेको भन्दै ‘सेतोपाटी अनलाइन’ लाई कारवाहीको माग गरिएको छ । निर्वाचन आयोगले सेतोपाटीलाई कारबाही गर्नको लागि प्रेस काउन्सिललाई पत्राचार गरेको हो ।

‘सेतोपाटी’ ले प्रकाशन गरेको चितवन ३ मा ‘सोविता गौतमले जित्नेछिन् निर्वाचन ? रेणु दाहाल दोस्रो’ र ‘भोट रास्वपालाई दिने हो, तर निकुञ्ज छेउका बस्तीबारे बालेनको तर्क गलत छ ’ शीर्षकको समाचारप्रति आयोगले आपत्ति जनाएको छ ।

आयोगले गरेको पत्राचारमा भनिएको छ,‘सेतोपाटी अनलाइनले मिति २०८२/११/०३ मा चितवन–३ मा सोविता गौतमले जित्नेछिन् निर्वाचनः रेणु दाहाल दोस्रो र मिति २०८२/११/०४ मा भोट रास्वपालाई दिने हो, तर निकुञ्ज छेउका बस्तीबारे बालेनको तर्क गलत छ शिर्षकमा समाचार प्रकाशन गरेको सम्बन्धमा आयोगको गम्भिर ध्यानाकर्षण भएको छ । उल्लिखित सन्दर्भमा ऐ. अनलाईनबाट गरिएको कार्य निर्वाचन आचारसंहिता, २०८२ को दफा ४ को खण्ड (त) मा रहेको उम्मेदवारको मनोनयन दर्ता भएको मितिदेखि मतदान सम्पन्न नभएसम्म उम्मेदवार वा राजनीतिक दलको मतपरिणामको सम्बन्धमा मत सर्वेक्षण गर्न वा त्यस्तो सर्वेक्षणको परिणाम घोषणा गर्न वा प्रकाशन गर्न नहुने र ऐ. आचारसंहिताको दफा २५ को उपदफा (१) को खण्ड (ख) मा रहेको कसैको पक्ष वा विपक्षमा समाचार प्रकाशन वा प्रसारण गर्न नहुने व्यवस्थाको प्रतिकूल रहेको देखिँदा सोउपर आवश्यक कारवाही हुन निर्णयानुसार अनुरोध छ ।’

रौतहट । सर्लाहीको सदरमुकाम मलंगवामा आइतबार साँझ एक इन्जिनियरको अज्ञात समूहले गोली प्रहार गरी हत्या गरेको छ । मलंगवास्थित पूर्वाधार विकास कार्यालयमा कार्यरत ३६ वर्षीय इन्जिनियर प्रमोदकुमार यादवको गोली हानी हत्या गरिएको हो ।

सिरहाको सुखीपुर नगरपालिका–६ घर भई मलंगवा–१० देबिटोलमा श्रीमतीसँगै डेरा गरी बस्ने यादवमाथि अज्ञात समूहले छातीमा गोली प्रहार गरेको थियो ।

जिल्ला प्रहरी कार्यालय सर्लाहीका सूचना अधिकारी एवं डिएसपी सरोज राईका अनुसार प्रारम्भिक अनुसन्धानमा इन्जिनियर यादवलाई फोन गरेर डेरा बाहिर बोलाइएको र लगत्तै गोली प्रहार गरिएको देखिएको छ । गोली लागेर अचेत भएका यादवलाई तत्काल प्रादेशिक अस्पताल मलंगवा पुर्याइए पनि चिकित्सकले उनलाई मृत घोषणा गरेका थिए ।

घटनाको कारण अझै खुल्न सकेको छैन । प्रहरीले शंकास्पद क्षेत्रमा ’सिल’ गरेर अनुसन्धान अगाडि बढाएको जनाएको छ । मृतकको शव अहिले प्रादेशिक अस्पताल मलंगवामा राखिएको छ ।

सर्लाहीका प्रमुख जिल्ला अधिकारी रामुराज कडरियाका अनुसार नेपाली सेना, नेपाल प्रहरी र सशस्त्र प्रहरी बल परिचालन गरी अपराधीको खोजी तीव्र बनाइएको छ । नेपाल–भारत सीमा क्षेत्रमा सुरक्षाकर्मी तैनाथ गरिएको र आवागमनमा अत्यन्त कडाइ गरिएको उनले जानकारी दिए । सदरमुकामको आवासीय क्षेत्रमै सरकारी कर्मचारीको हत्या भएपछि स्थानीय बासिन्दा त्रसित बनेका छन् ।

रामेछाप । सोलुबाट काठमाडौंतर्फ जाँदै गरेको टाटा सुमोले सिन्धुलीको गोलञ्जोर गाउँपालिका–३ लामसोतीस्थित मध्यपहाडी लोकमार्ग सडक खण्डमा आइतबार ठक्कर दिँदा एक बालकको मृत्यु भएको छ ।
आइतबार दिउँसो सोलुखुम्बुबाट काठमाडौँतर्फ जाँदै गरेको ना. १ ज ४६२३ नम्बरको सुमोले पैदल यात्री बालकलाई ठक्कर दिँदा गम्भीर घाइते भएका थिए ।

उनलाई गोलञ्जोर अस्पतालमा उपचारको लागि पठाएकोमा त्यही मृत्यु भएको जिल्ला प्रहरी कार्यालय सिन्धुलीले जनाएको छ । मृतक गोलञ्जोर गाउँपालिका–२ निवासी ठाकुर बयलकोटीका करिब ९ वर्षीय छोरा अषिक बयलकोटी भएको प्रहरीले जनाएको छ ।

दुर्घटनापछि आक्रोशित स्थानीयवासीले ग्वाल्टारस्थित मध्यपहाडी लोकमार्ग अवरुद्ध गरेका छन् । सडक अवरुद्ध हुँदा सवारी आवागमन पूर्ण रूपमा प्रभावित भएको छ ।
दुर्घटनाको खबर पाए लगत्तै प्रहरी चौकी ग्वालटार र इलाका प्रहरी कार्यालय खुर्कोटबाट प्रहरी निरीक्षकको कमान्डमा टोली घटनास्थलमा खटिएको थियो । प्रहरीले सुमो र चालक दुवैलाई नियन्त्रणमा लिएर इलाका प्रहरी कार्यालय खुर्कोटमा राखेको छ ।

प्रारम्भिक अनुसन्धानमा तीव्र गतिका कारण दुर्घटना भएको आशङ्का गरिएको छ भने घटनाबारे थप अनुसन्धान भइरहेको प्रहरीले जनाएको छ । चालक सोलुखुम्बुको नेचसल्यान गाउँपालिका–२ का २७ वर्षीय गोपाल भुजेल भएको प्रहरीले जानकारी दिएको छ ।

काठमाडौं । टी–२० विश्वकपमा नेपाल ९ विकेटले वेस्ट इन्डिजसँग पराजित भएको छ । भारत र श्रीलंकामा जारी टी–२० विश्वकप अन्तर्गत वेस्ट इन्डिज सुपर एटमा प्रवेश गरेको छ ।

आजको खेलमा नेपाललाई ९ विकेटले हराउँदै लगातार तीन जितसहित वेस्ट इन्डिजले समूह ‘सी’बाट ६ अंक जोड्दै एक खेल अगावै सुपर एटको टिकट पुगेको हो । यता, लगातार तीन हार ब्यहोरेको नेपाल भने एक खेल अगावै सुपर एट दौडबाट बाहिरिएको छ ।
नेपाल पहिलो खेलमा इंग्ल्यान्डसँग ४ रनले पराजित भएको थियो भने दोस्रो खेलमा इटालीसँग १० विकेटको हार ब्यहोरेको थियो । वेस्ट इन्डिजले पहिलो खेलमा स्कटल्यान्डलाई ३५ रनले हराएको थियो भने इंग्ल्यान्डमाथि ३० रनको जित निकालेको थियो ।

१३४ रनको लक्ष्य वेस्ट इन्डिजले १५.२ ओभरमा ९ विकेट गुमाएर भेट्टायो । उसका लागि कप्तान शाइ होपले अर्धशतकीय इनिङ्स खेले । उनी ४४ बलमा ६१ रनसहति अविजित रहे । यस्तै, शिमरोन हेटमायर ४६ रनमा अविजित रहँदा ब्रान्डन किङले २२ रनको योगदान दिए ।
बलिङतर्फ नेपालको एकमात्र विकेट नन्दन यादवले लिए । त्यसअघि मुम्बईस्थित वानखेडे मैदानमा टस हारेर पहिले ब्याटिङमा उत्रिएको नेपालले २० ओभरमा ८ विकेट गुमाएर १३३ रन जोड्यो ।

दीपेन्द्र सिंह ऐरीले अर्धशतकीय पारी खेल्दै नेपालको लक्ष्य केही हदसम्म माथि उकासे । टी–२० विश्वकपमा उनी अर्धशतक बनाउने दोस्रो खेलाडी हुन्। यसअघि सुवास खकुरेलले २०१४ टी–२० विश्वकपमा अर्धशतक बनाएका थिए । दीपेन्द्र ४७ बलमा ५८ रन जोडेर आउट भए । यस्तै, सोमपाल कामी २६ रनमा अविजित रहे । लोकेश बमले १३, आसिफ शेखले ११, रोहित पौडेलले ५, आरिफ शेखले २, कुशल भुर्तेलले १ गुलशन झाले ११ रन जोडे । बलिङतर्फ वेस्ट इन्डिजका जेसन होल्डरले चार तथा अकिल हुसेन, म्याथ्यु फोर्डे, समर जोसेफ र रोस्टन चेजले एक–एक विकेट लिए ।

रियाद (साउदी अरब)। किराँत राई यायोक्खा क्षेत्रीय कार्य समिति रियादको नयाँ अध्यक्षमा सुजन सेर राई सर्वसम्मत रूपमा चयन हुनुभएको छ। गत फागुन १ गते शुक्रबार साउदी अरबको रियादस्थित होटल डिमोरा बथामा सम्पन्न समितिको नियमित बैठकले राईलाई नेतृत्वको जिम्मेवारी सुम्पिएको हो ।

निवर्तमान अध्यक्ष विज्ञान राईले व्यक्तिगत कारणले संस्थालाई समय दिन नसक्ने उल्लेख गर्दै आफ्नो पदबाट राजीनामा दिनुभएको थियो। बैठकले उक्त राजीनामा स्वीकृत गरेसँगै रिक्त रहेको अध्यक्ष पदमा सल्लाहकार समितिका सदस्य सुजन सेर राईलाई चयन गर्ने निर्णय गरेको हो ।

साथै उक्त बैठकले भोजपुरस्थित किराँत राई समुदायको सांस्कृतिक एवं ऐतिहासिक उद्गम स्थल 'साल्पा सिलिचुङ' मा भइरहेका विभिन्न निर्माण कार्यका लागि आर्थिक सहयोग गर्ने विषयमा समेत प्रारम्भिक छलफल गरेको छ । संस्थामा प्राप्त सहयोगको प्रस्तावमाथि विस्तृत छलफल गरी आगामी बैठकबाट ठोस निर्णय लिइने समितिले जनाएको छ ।

कार्यवाहक अध्यक्ष सुजता राईको अध्यक्षतामा बसेको उक्त बैठकमा संस्थाका संरक्षक राज कुमार राई (तोङ्मालुङ्ग) र प्रवास शाखा केन्द्रीय वरिष्ठ उपाध्यक्ष भोगेन्द्र चाम्लिङ राईको विशेष उपस्थिति रहेको थियो ।

बैठकमा सचिवद्वय जहान सिं राई र मनिष राई, कोषाध्यक्ष रोसन राई लगायत कार्यसमितिका पदाधिकारी, सदस्य तथा सल्लाहकारहरूको उल्लेख्य सहभागिता थियो । बैठकको अन्त्यमा कार्यवाहक अध्यक्ष सुजता राईले उपस्थित सबैलाई धन्यवाद ज्ञापन गर्दै समितिको अर्को बैठक आगामी मार्च ६ तारिख (शुक्रवार) बस्ने जानकारी दिनुभयो ।

काठमाडौं । आज ३१ औँ जनयुद्ध दिवसका अवसरमा नेपाली कम्युनिष्ट पार्टीले रुकुम पूर्वमा विभिन्न कार्यक्रम आयोजना गर्दै दिवस मनाउँदै छ । जनयुद्धको सुरुआत भएको स्थल रुकुम पूर्वमा सहिद तथा बेपत्ता परिवार, घाइते, अपाङ्ग र स्थानीयबासीसँग संयुक्त रूपमा यो दिवस मनाउन नेकपाका संयोजक पुष्पकमल दाहाल ‘प्रचण्ड’ बिहीबार रुकुम पूर्व पुगेका छन् ।

वि.सं.२०५२ फागुन १ गते तत्कालीन नेकपा (माओवादी)ले सुरु गरेको जनयुद्ध दस वर्षसम्म चलेको थियो। जनयुद्धका प्रमुख नेता प्रचण्डले पहिलो पटक रुकुम पूर्वमा जनयुद्ध दिवस मनाउँदै लागेका हुन् । जनयुद्धको उपलब्धिमध्ये संघीयतापछि बनेको कान्छो जिल्लामध्ये रुकुम पूर्व एक हो। प्रचण्ड आफ्नो नेतृत्वको जनयुद्धको आधार इलाकाबाट समाजवादी क्रान्तिको सुरुवात गर्ने उदेश्यले रुकुम पूर्वबाट प्रतिनिधिसभा सदस्यका उम्मेदवार बनेका हुन् ।

भूमे गाउँपालिका–२, खाबाङ बगरमा आज आयोजना हुने जनयुद्ध दिवस कार्यक्रममा नेकपाका संयोजक प्रचण्डले सहिद परिवारलाई सम्मान गर्ने कार्यक्रम रहेको छ । रुकुम पूर्वमा २ सय ५२ जना सहिद रहेका छन् ।

राजतन्त्रको अन्त्य र नयाँ जनवादी व्यवस्था कायम गर्ने उद्देश्यसहित तत्कालीन नेकपा (माओवादी) ले २०५२ फागुन १ गते जनयुद्धको सुरुआत गरेको थियो। रुकुमको आठबीसकोट प्रहरी चौकी, रोल्पाको होलरी प्रहरी चौकी, सिन्धुलीको सिन्धुलीगढी प्रहरी चौकी तथा गोरखाको च्याङ्लीस्थित कृषि विकास बैंकमा आक्रमण गरी माओवादीले जनयुद्ध सुरु गरेको थियो।

जनयुद्ध अगाडि बढाउन तात्कालिन माओवादीले रुकुम पूर्व, रुकुम (पश्चिम र पूर्वी) र रोल्पालगायतका जिल्लालाई आधार इलाका बनाएको थियो।
वि.सं. २०५३ वैशाख २३ गते उपल्लो सेराको छेराबाङमा माओवादीले एम्बुस आक्रमण गर्दा एक प्रहरीको ज्यान गएको थियो। २०५४ माघ १६ गते क्यूबाङमा गरिएको एम्बुस आक्रमणमा माओवादीले नेपालमै पहिलो पटक थ्री नट थ्री राइफल कब्जा गरेको थियो।

वि.संं २०५६ असोज ५ गते महतमा रहेका प्रहरीमाथि आक्रमण गरी कब्जामा लिँदै प्रहरी नायब उपरीक्षक ठूले राईसहितका सुरक्षाकर्मीलाई नियन्त्रणमा लिइएको थियो। राई जनयुद्धका क्रममा माओवादी नियन्त्रणमा परेका उच्च प्रहरी अधिकारीमध्येका एक थिए। माओवादीले आफ्ना शीर्ष नेता देव गुरुङसँग राईको साटफेर गरेको थियो।

वि.सं.२०५७ चैतमा रुकुमकोट प्रहरी चौकीमा आक्रमण गरी पूर्ण रूपमा कब्जा गरिएको थियो। उक्त आक्रमणमा ३२ प्रहरी र ८ छापामगरसहित ४० जनाको ज्यान गएको थियो।

वि.सं.२०६१ माघमा रुकुमको लाबाङमा बसेको माओवादी पोलिटब्युरो बैठकले डा.बाबुराम भट्टराईलाई पार्टीबाट कारबाही गरेको थियो। २०६२ असोजमा रुकुमको चुनबाङमा बसेको तत्कालीन नेकपा (माओवादी)को केन्द्रीय समिति बैठकले लोकतान्त्रिक गणतन्त्रको कार्यदिशा पारित गर्दै शान्तिपूर्ण राजनीतिक यात्राको मार्ग तय गरेको थियो।

चुनबाङ बैठकको निर्णय कार्यान्वयनका क्रममा सात राजनीतिक दलबीच १२ बुँदे सहमति भएको थियो। उक्त सहमतिअनुसार जनयुद्ध र जनआन्दोलनको संयोजनबाट राजतन्त्रको अन्त्य भई गणतन्त्र, संघीयता, धर्मनिरपेक्षता र सामाजिक न्यायसहितको समानुपातिक प्रणाली स्थापना भएको हो।

आज जनयुद्ध दिवस मनाउनुअघि संयोजक प्रचण्डले छापामारले प्रहरी नायब उपरीक्षक ठूले राईलाई नियन्त्रणमा लिएको महत गाउँ र डा. बाबुराम भट्टराईलाई कारबाही गर्ने निर्णय गरिएको लाबाङ गाउँको भ्रमण गर्ने कार्यक्रम रहेको छ । ती गाउँमा उनले मतदाता भेटघाट गर्ने छन् भने प्रचण्ड आजै चुनबाङ पनि जाने कार्यक्रम रहेको छ ।