काठमाडौं । भारतको राजधानी नयाँ दिल्लीस्थित जन्तर–मन्तरमा जारी रहेको कक्रोज जनता पार्टी (सीजेपी) को प्रदर्शन स्थगित गरिएको छ । आन्दोलनकारी समूहले सरकारसँग भएको छलफलपछि प्रदर्शन फिर्ता लिने घोषणा गरेको हो ।

सीजेपीले आफ्ना माग सम्बोधन भएको दाबी गर्दै समर्थकहरूलाई शान्तिपूर्ण रूपमा घर फर्किन आग्रह गरेको हो । यसअघि प्रदर्शनका क्रममा पक्राउ परेका व्यक्तिहरूको रिहाइ र अन्य मागलाई लिएर आन्दोलन चर्किएको थियो ।

जन्तर–मन्तर क्षेत्रमा केही दिनदेखि जारी प्रदर्शनका कारण सुरक्षा व्यवस्था कडा पारिएको थियो । दिल्ली प्रहरीले जन्तरमन्तर वरिपरि ठूलो संख्यामा सुरक्षाकर्मी परिचालन गरेको थियो भने प्रदर्शनस्थलमा निगरानी बढाइएको थियो ।

सीजेपीको प्रदर्शन शिक्षा क्षेत्रका समस्या, परीक्षा अनियमितता र सरकारको जवाफदेहितासँग सम्बन्धित मागहरूलाई लिएर सुरु भएको थियो । आन्दोलनका क्रममा विद्यार्थी तथा युवा समूहको ठूलो सहभागिता देखिएको थियो । एएनआई

काठमाडौं । सरकारले एक रुपैयाँ दरको सिक्काको नयाँ डिजाइन स्वीकृत गर्दै त्यसमा नेपालको चुच्चे नक्सासहित आकाश भैरवको चित्र समावेश गर्ने निर्णय गरेको छ । मन्त्रिपरिषद्बाट स्वीकृत भएको नयाँ डिजाइन कार्यान्वयनका लागि अर्थ मन्त्रालय हुँदै नेपाल राष्ट्र बैंक पुगेको छ ।

यसअघि नेपाल राष्ट्र बैंकले मुस्ताङस्थित घार गुम्बाको तस्वीर समेटिएको डिजाइन स्वीकृतिका लागि मन्त्रिपरिषद्मा पठाएको थियो । तर मन्त्रिपरिषद्ले उक्त प्रस्ताव फिर्ता गर्दै परिमार्जित डिजाइन तयार गर्न निर्देशन दिएपछि नयाँ डिजाइनमा आकाश भैरवको चित्र समावेश गरिएको हो ।

नेपाल राष्ट्र बैंक ऐनअनुसार कुनै पनि नोट वा सिक्काको नयाँ डिजाइन वा डिजाइन परिवर्तन मन्त्रिपरिषद्बाट स्वीकृत हुनुपर्ने व्यवस्था छ । नयाँ सिक्कामा नेपालको चुच्चे नक्सा यथावत् राखिनेछ। साथै सिक्काको आकार र तौलमा समेत परिवर्तन गरिने भएको छ ।

हाल प्रचलनमा रहेको एक रुपैयाँको सिक्का उत्पादन गर्दा यसको निर्माण लागत अंकित मूल्यभन्दा बढी पर्ने भएकाले उत्पादन खर्च घटाउने उद्देश्यले नयाँ सिक्कामा मिश्रित धातुको सट्टा स्टिल प्रयोग गर्ने तयारी गरिएको राष्ट्र बैंक स्रोतले जनाएको छ । स्टिलको प्रयोगले उत्पादन लागत घट्नुका साथै वातावरणीय दृष्टिले पनि उपयुक्त र दीर्घकालीन रूपमा लाभदायी हुने अपेक्षा गरिएको छ ।

यसअघि पनि सिक्काको तौल घटाउने प्रयास भएको थियो। नयाँ डिजाइनमा तौल र आकार दुवै परिमार्जन गरी सिक्का उत्पादनलाई थप लागत–प्रभावकारी बनाइने भएको छ ।

सांस्कृतिक पक्षलाई निरन्तरता दिँदै नयाँ सिक्कामा परम्परागत रूपमा रहने ६४ वटा थोप्ला यथावत् राखिनेछन् । यी थोप्लालाई ६४ योगिनीको प्रतीकका रूपमा लिइन्छ। राष्ट्र बैंकका अनुसार सिक्कामा समावेश गरिने चित्र तथा चिन्हहरूले नेपालको इतिहास, संस्कृति र राष्ट्रिय पहिचानलाई प्रतिबिम्बित गर्नेछन् ।

काठमाडौं । जर्मनीको राजधानी बर्लिनमा आयोजित वार्षिक क्रिस्टोफर स्ट्रिट डे (सीएसडी) प्राइड कार्यक्रममा शनिबार राति मानिसको भीडमा एक गाडि पस्दा कम्तीमा एक जनाको मृत्यु भएको छ भने १७ जना घाइते भएका छन् । घाइतेमध्ये केहीको अवस्था गम्भीर रहेको जनाइएको छ ।

घटना टियरगार्टेन पार्क नजिक भएको हो । घटनापछि चालक फरार भएका छन् भने घटनास्थलमा क्षतिग्रस्त अवस्थामा एउटा सेतो गाडी फेला परेपछि प्रहरीले चालकको खोजीका लागि व्यापक अभियान सञ्चालन गरेको छ ।

बर्लिन प्रहरीका प्रवक्ता फ्लोरियन नाथका अनुसार एउटा सवारीसाधन टियरगार्टेन पार्कमा प्रवेश गरी धेरै मानिसलाई ठक्कर दिएको प्रारम्भिक जानकारी प्राप्त भएको छ । यद्यपि घटना नियोजित आक्रमण थियो वा थिएन भन्ने विषयमा अनुसन्धान जारी रहेको प्रहरीले जनाएको छ ।

घटनापछि ठूलो संख्यामा प्रहरी र उद्धार टोली परिचालन गरिएको थियो । प्रहरीले सम्भावित शंकास्पद व्यक्तिको खोजी तीव्र बनाइएको र घटनाको सबै पक्षबाट अनुसन्धान भइरहेको जनाएको छ ।

बर्लिन प्रहरीले घाइते १७ जनामध्ये केहीको अवस्था जीवन–मरणको अवस्थामा रहेको जानकारी दिएको छ । पीडितका आफन्तका लागि छुट्टै सूचना केन्द्र पनि स्थापना गरिएको छ । घटनास्थलको निरीक्षणपछि बर्लिनका मेयर काइ वेग्नरले घटनाको कडा निन्दा गर्दै यसलाई बर्लिनको स्वतन्त्र, खुला र सहिष्णु समाजमाथिको आक्रमण भएको बताएका छन् । उनले पीडित र उनीहरूका परिवारप्रति समवेदना व्यक्त गर्दै घटनाको तीव्र अनुसन्धान हुने विश्वास व्यक्त गरेका छन् ।

शनिबार बर्लिनमा सहिष्णुता र विविधताको पक्षमा आयोजित प्राइड कार्यक्रममा लाखौं सहभागी भएका थिए । ब्रान्डेनबर्ग गेट नजिक सांगीतिक कार्यक्रमसमेत चलिरहेका बेला राति करिब १०ः१५ बजे दुर्घटनापछि परेड तत्काल स्थगित गरिएको थियो ।

प्रहरीले सर्वसाधारणलाई टियरगार्टेन क्षेत्रबाट टाढा रहन र आपत्कालीन उद्धार कार्यमा सहयोग गर्न घर फर्किन आग्रह गरेको छ । घटनाको कारण र चालकको उद्देश्यबारे अनुसन्धान जारी रहेको छ । एएनआई

काठमाडौं । भारतको बिहार राज्यको राजधानी पट्नामा भारतको चिकित्सा शिक्षामा भर्नाका लागि सञ्चालन हुने राष्ट्रिय प्रवेश परीक्षा (निट) को प्रश्नपत्र चुहावट प्रकरणलाई लिएर केन्द्रीय शिक्षामन्त्री धर्मेन्द्र प्रधानविरुद्ध विद्यार्थीहरूले प्रदर्शन गरेका छन् ।

प्रदर्शनका क्रममा विद्यार्थीहरूले प्रश्नपत्र चुहावट प्रकरणमा शिक्षा मन्त्रालयको जवाफदेहिता माग गर्दै नाराबाजी गरेका छन् । प्रदर्शन उग्र हुनसक्ने सम्भावनालाई मध्यनजर गर्दै घटनास्थलमा ठूलो संख्यामा प्रहरी परिचालन गरिएको छ ।

प्रत्यक्षदर्शीका अनुसार प्रदर्शनका क्रममा केही समय अफरातफरीको अवस्था सिर्जना भएको थियो । प्रदर्शनकारी र सुरक्षाकर्मीबीच धकेलाधकेल भएको तथा भीड नियन्त्रणका लागि प्रहरीले हस्तक्षेप गरेको थियो ।

प्रहरीले केही प्रदर्शनकारीलाई नियन्त्रणमा लिएर सोधपुछका लागि लगेको जनाएको छ । घटनास्थलमा सञ्चारमाध्यमका प्रतिनिधिहरूले प्रत्यक्ष प्रसारणमार्फत प्रदर्शनको गतिविधि सार्वजनिक गरेका थिए ।

निट प्रश्नपत्र चुहावट प्रकरणलाई लिएर भारतका विभिन्न राज्यमा विद्यार्थी र अभिभावकले परीक्षा प्रणालीको निष्पक्षता तथा पारदर्शितामाथि प्रश्न उठाउँदै आएका छन् । पछिल्लो प्रदर्शन पनि सोही प्रकरणको विरोधस्वरूप आयोजना गरिएको बताइएको छ । एएनआई

काठमाडौं । नेकपा (एमाले) र नेपाली कम्युनिष्ट पार्टी (नेकपा)बीच सातै प्रदेशमा सरकार गठन तथा सहकार्य गर्ने विषयमा सहमति भएको छ।

शनिबार भएको सहमतिअनुसार पछिल्लो समय प्रदेश सभामा बजेट निर्माणमा देखिएको असमझदारी, बजेटविहीन अवस्था र अस्वस्थ राजनीतिक प्रतिस्पर्धाका कारण उत्पन्न समस्या समाधान गर्दै राजनीतिक स्थिरता, सुशासन, समृद्धि र प्रादेशिक विकासलाई तीव्रता दिने उद्देश्यले दुई दल सहमतिमा पुगेका हुन्।

सहमति पत्रमा भनिएको छ, ‘पछिल्लो समय प्रदेश सभामा बजेट निर्माणमा देखिएका असमझदारी, बजेटविहीनताको अवस्था र अस्वस्थ राजनीतिक प्रतिस्पर्धा लगायतका समस्यालाई समाधान गर्दै जनताको चाहनाअनुरूप राजनीतिक स्थिरता, सुशासन, समृद्धि र प्रादेशिक विकासको गतिलाई तीव्र तुल्याउन हामी दुई राजनीतिक दलहरु नेपाल कम्युनिष्ट पार्टी (एमाले) र नेपाली कम्युनिष्ट पार्टी सहमतिमा पुगेका छौं।’

सहमतिअनुसार प्रदेश सभामा संयुक्त रूपमा सहकार्य गर्दै संयुक्त सरकार गठन गरिनेछ । कोशी, बागमती र लुम्बिनी प्रदेशको सरकारको नेतृत्व एमालेले गर्नेछ भने कर्णाली र सुदूरपश्चिम प्रदेशको नेतृत्व नेपाली कम्युनिष्ट पार्टीले गर्ने सहमति भएको छ ।

त्यस्तै, मधेश प्रदेश र गण्डकी प्रदेशमा भने प्रदेश सभामा प्रतिनिधित्व गर्ने अन्य राजनीतिक दलसँग समेत परामर्श गरी सरकारको नेतृत्व र सहभागिताको स्वरूप तय गर्ने उल्लेख गरिएको छ।

मुगु । मुगुको मुगुम कार्मारोङ गाउँपालिका–५ पुलु बजारमा शनिबार बिहान ४ बजेतिर पहिरो खस्दा तीन वर्षीय बालकको मृत्यु भएको छ भने उनका बाबुआमा घाइते भएका छन् । 

जिल्ला प्रहरी कार्यालय मुगुका प्रहरी नायव उपरीक्षक रबिराज थपलियाका अनुसार बिहान करिब ४ः०० बजे पुलु बजारस्थित पेमा लामाको घरमा भाडामा होटल व्यवसाय सञ्चालन गर्दै बसिरहेका छायाँनाथ रारा नगरपालिका–१३ तिर्प निवासी ३२ वर्षीय जगनाथ बडुवाल, उनकी २७ वर्षीया श्रीमती सृजना बडुवाल र तीन वर्षीय छोरा रमेश बडुवाल सुतिरहेको अवस्थामा माथिबाट ढुङ्गासहितको पहिरो खसेको थियो।

घटनामा जगनाथ र सृजनालाई सामान्य चोट लागेको छ । उनीहरू आफैं उपचारका लागि पुलु स्वास्थ्य चौकी पुगेका छन् र उनीहरूको अवस्था सामान्य रहेको प्रहरीले जनाएको छ ।

पहिरोमा च्यापिएका तीन वर्षीय रमेश बडुवाललाई प्रहरी चौकी डोल्फु पुलुबाट प्रहरी नायब निरीक्षक वीरबहादुर चन्दको कमाण्डमा खटिएको पाँच सदस्यीय प्रहरी टोली र स्थानीयवासीले उद्धार गरी उपचारका लागि पुलु स्वास्थ्य चौकी पुर्याएका थिए। प्रारम्भिक अवस्थामा उनको अवस्था मध्यम रहेको बताइएको थियो।

तर बिहान करिब ५ः४५ बजे उपचारकै क्रममा चिकित्सकले उनको मृत्यु भएको पुष्टि गरेका छन्।

पहिरोले उनीहरू बस्दै आएको घर पूर्ण रूपमा क्षतिग्रस्त भएको प्रहरीले जनाएको छ। साथै घटनास्थल आसपासका अन्य ८ वटा घर पनि उच्च जोखिममा परेका छन्। जोखिममा रहेका घरका बासिन्दालाई सुरक्षित स्थानमा सारिएको छ ।

अधिकांशलाई पुलु बजारस्थित आफन्तको घरमा राखिएको छ भने सातआठ जनालाई पुलु स्वास्थ्य चौकीमा अस्थायी रूपमा आश्रय दिइएको छ।

घटनास्थल प्रहरी चौकी डोल्फु पुलुबाट करिब ३०० मिटर पश्चिममा पर्छ। घटनाबारे थप विवरण संकलन भइरहेको प्रहरीले जनाएको छ।

काठमाडौं । चीनको दक्षिण–पश्चिमी सिचुआन प्रान्तस्थित संरक्षण केन्द्रमा रहेका विशाल पाण्डा (जाइन्ट पाण्डा) को रुख चढ्ने अद्भुत क्षमता क्यामेरामा कैद भएको छ । हालै सार्वजनिक गरिएको भिडियोमा पाण्डाहरूले उचाइसँग कुनै डर नमानी रुखका हाँगामा सहज रूपमा हिँडडुल गरेको देखाइएको छ ।

चीन संरक्षण तथा अनुसन्धान केन्द्र फर द जाइन्ट पाण्डा (सीसीआरसीजीपी) ले जुन महिनामा खिचिएको भिडियो सार्वजनिक गरेको हो । भिडियोमा दुई विशाल पाण्डा ‘छिन सियाओ’ र ‘फेङ ये’ ले आफ्ना लचिला शरीर र चुस्त गतिविधिमार्फत रुखका हाँगामा सन्तुलन कायम गर्दै अघि बढिरहेको देखिन्छ ।

दुई वर्ष उमेरको छिन सियाओ हाल सीसीआरसीजीपीको दुजियाङयान खण्डमा रहेको छ भने तीन वर्षको फेङ ये याआन सहरस्थित केन्द्रको बिफेङ्सिया आधार क्षेत्रमा राखिएको छ ।

भिडियोमा पाण्डाहरूले बाक्लो रौँ भएका पछाडिका खुट्टा हावामा हल्का रूपमा हल्लाउँदै हाँगामा सावधानीपूर्वक चढिरहेको देखिन्छ । सामान्यतया भद्दा र ढिलो गतिका जनावरका रूपमा चिनिने विशाल पाण्डाहरूको यस्तो चपलता र सन्तुलनले संरक्षणकर्मीहरूलाई समेत आकर्षित गरेको छ ।

सीसीआरसीजीपी चीनको राष्ट्रिय सम्पदाका रूपमा लिइने विशाल पाण्डाको प्रजनन, संरक्षण र अनुसन्धानमा विश्वकै अग्रणी संस्थामध्ये एक हो । संस्थाले पाण्डा संरक्षणसम्बन्धी अन्तर्राष्ट्रिय सहकार्य विस्तार गर्दै आएको छ । हाल यसले १६ देश तथा क्षेत्रका १८ वटा चिडियाखाना, ३९ वटा घरेलु पशु प्रजनन संस्था तथा १० भन्दा बढी वैज्ञानिक अनुसन्धान संस्थासँग सहकार्य गरिरहेको छ । सीसीटीभी

काठमाडौं । साउन महिना सुरु भएसँगै नेपाली महिलाहरूको गला पोते र नाडी हरिया तथा पहेँला चुराले सजिने गर्दछन् । हिन्दु धर्मावलम्बी महिलाहरूका लागि साउन केवल एउटा महिना मात्र नभएर प्रकृति र संस्कृतिको संगम पनि हो ।

विशेषगरी प्रकृतिसँग एकाकार हुन हरियो पहिरन र श्रृंगारका सामग्री लगाउने यो परम्परा जति सुन्दर छ, यसको आर्थिक पाटो भने उत्तिकै परनिर्भर देखिन्छ । नेपाली महिलाले लगाउने चुरा, रङ्गीन पोते र निधारमा टल्किने टिकाका लागि वर्षेनी करोडौँ रुपैयाँ बाहिरिने गरेको छ ।

भन्सार विभागको पछिल्लो तीन आर्थिक वर्षको तथ्यांकलाई हेर्ने हो भने नेपालमा श्रृंगारका यी सामग्रीको आयात दर निकै उच्च छ । गत आर्थिक वर्ष २०८२÷८३ मा नेपालले ६० करोड ४५ लाख ८१ हजार रुपैयाँ बराबरको चुरा, टिका र पोते आयात गरेको छ ।

यस अवधिमा ३४ लाख ७० हजार ५२५ ग्रस यस्ता सामग्री भित्रिएका छन् । विभागले चुरा, पोते र टिका आयातका लागि ग्रस एकाई प्रयोग गर्दछ । एक ग्रसमा १४४ वटा चुरा हुन्छन् ।

यो तथ्यांकले के देखाउँछ भने, स्वदेशमा उत्पादनको पर्याप्त सम्भावना नहुँदा वा भएका उद्योगहरूले बजार धान्न नसक्दा नेपाली महिलाको श्रृंगार पूर्णतः विदेशी आयातमा टिकेको छ ।

यसअघिको आर्थिक वर्ष २०८१÷८२ मा ५४ करोड ६४ लाख ८८ हजार रुपैयाँ बराबरको ३८ लाख ५२ हजार ८०३ ग्रस चुरा, पोते र टिका आयात भएको तथ्यांक छ । त्यस्तै, आर्थिक वर्ष २०८०÷८१ मा पनि ५४ करोड २० लाख ७४ हजार रुपैयाँ खर्चिएर ३७ लाख ५२ हजार ग्रस यी सामग्री भित्रिएका थिए ।

विगत तीन वर्षको तथ्यांक विश्लेषण गर्दा नेपालबाट वार्षिक औसत ५३ करोड रुपैयाँभन्दा बढी रकम केवल चुरा, पोते र टिका खरिदका लागि विदेशीने गरेको देखिन्छ ।

नेपालमा यी सामग्रीहरू छिमेकी मुलुक भारत र चीनबाट मात्र नभई विश्वका विभिन्न सुदूर देशहरूबाट समेत आयात हुने गरेका छन् । भन्सार विभागको तथ्यांक अनुसार भारत र चीन बाहेक कतार, अमेरिका, उज्वेकस्तान र अस्ट्रेलिया लगायतका मुलुकबाट समेत नेपालमा चुरा, पोते र टिका आउने गरेको छ ।

सुन्दा अचम्म लाग्न सक्छ, तर नेपालीले लगाउने परम्परागत पोते र श्रृंगारका सामग्रीको व्यापारिक सञ्जाल विश्वका शक्तिशाली अर्थतन्त्र भएका मुलुकसम्म फैलिएको छ । विशेषगरी पोतेका दानाहरू तेस्रो मुलुकबाट आउने र यहाँ उनेर बजारमा पठाइने गरिन्छ ।

साउन महिनामा विशेषगरी विवाहित महिलाहरू श्रीमानको दीर्घायुको कामना गर्दै र अविवाहित युवतीहरू असल वरको कामना गर्दै शिवजीको पूजा आराधना गर्छन् । यसै क्रममा हरियो र पहेँलो रङलाई प्राथमिकता दिइन्छ । बजारमा साउन लाग्नुभन्दा हप्ता दिन अघिदेखि नै पोते र चुरा पसलहरूमा भीड लाग्न थाल्छ । सहरका गल्लीदेखि गाउँका पसलहरूसम्म हरिया चुराले भरिभराउ हुन्छन् । तर, ती पसलमा झुण्डिएका रङ्गीन सामग्रीहरूले हाम्रो व्यापार घाटाको एउटा पाटोलाई पनि प्रतिनिधित्व गरिरहेका हुन्छन् ।

संस्कृतिविद्हरूका अनुसार साउनमा हरियो लगाउनुको अर्थ प्रकृतिसँग नजिक हुनु हो । वर्षायाममा चारैतिर हरियाली हुने भएकाले त्यसैको प्रतीक स्वरूप महिलाहरूले हरियो पहिरन र श्रृंगार गर्ने गर्छन् । तर, यो सांस्कृतिक सौन्दर्यभित्र लुकेको आर्थिक परनिर्भरता भने डरलाग्दो छ । यदि स्वदेशमै यस्ता सामग्रीहरूको उत्पादनमा जोड दिने हो भने वर्षेनी विदेशिने ५० करोडभन्दा बढी रुपैयाँ जोगिन सक्छ ।

भन्सार विभागको तथ्यांकले नेपाली बजारमा श्रृंगारका सामग्रीको माग स्थिर र उच्च रहेको देखाउँछ । चाडपर्व र विशेष महिनाहरूमा हुने यस्तो खपतलाई स्वदेशी उत्पादनसँग जोड्न सके मात्र हाम्रो संस्कृति र अर्थतन्त्र दुवै बलियो हुने देखिन्छ । अहिलेलाई भने, नेपाली महिलाको साउने उत्साह विदेशी चुरा र पोतेकै भरमा टिकेको छ ।

एजेन्सी । भारतीय सर्वोच्च अदालतले परीक्षा प्रश्नपत्र चुहावटको विरोधमा जन्तर मन्तर तथा देशका विभिन्न स्थानहरूमा प्रदर्शन गरेका विद्यार्थीहरूमाथि प्रहरीले अत्यधिक बल प्रयोग गरेको आरोपसम्बन्धी निवेदनमाथि जुलाई २७ मा सुनुवाइ गर्ने सहमति जनाएको छ।

उक्त विषयलाई प्रधान न्यायाधीश सूर्यकान्त तथा न्यायाधीशहरू जॉयमल्या बागची र भी. मोहन सम्मिलित इजलाससमक्ष वरिष्ठ अधिवक्ता गोपाल शङ्करनारायणनले प्रदर्शनकारीमाथि भएको भनिएको हिंसासम्बन्धी दुईवटा निवेदन दर्ता भएको जानकारी दिए।

शङ्करनारायणनले ती निवेदनहरू विद्यार्थी प्रदर्शनका क्रममा भएको भनिएको प्रहरी हिंसासँग सम्बन्धित रहेको र त्यसमा विभिन्न राज्यहरूलाई पक्षकार बनाइएको बताए।

उनले ती निवेदनहरू यसअघि उल्लेख नगरिनुको कारण तिनले दर्ता नम्बर प्राप्त गर्ने प्रक्रियामा रहेको बताए।

उनले मुद्दाको तत्काल सुनुवाइ आवश्यक रहेकोमा जोड दिँदै, विद्यार्थीहरूमाथि प्रहरीले अत्यधिक बल प्रयोग गरिरहेको समाचारहरू निरन्तर आइरहेको र त्यसलाई रोक्न अदालतको तत्काल हस्तक्षेप आवश्यक रहेको बताए।

उनको भनाइलाई ध्यानमा राख्दै प्रधान न्यायाधीशले निवेदनहरू सुनुवाइका लागि स्वीकार गर्ने सहमति जनाउँदै सोमबारका लागि सूचीमा राख्न निर्देशन दिएका छन् । 

प्रधान न्यायाधीशले भने, ‘यसलाई सूचीमा राख्नुहोस्, हामी सुनुवाइ गर्नेछौँ।’

जुलाई २० मा संसदतर्फ गरिएको आन्दोलन र ककरोच जनता पार्टीले जन्तर मन्तरमा हप्तौँसम्म गरेको प्रदर्शन र आमरण अनशन गरेको थियो ।

उक्त प्रदर्शनमा हजारौँ विद्यार्थी सहभागी भएका थिए। उनीहरूले परीक्षा प्रश्नपत्र चुहावटको आरोपका कारण केन्द्रीय शिक्षा मन्त्री धर्मेन्द्र प्रधानको राजीनामा र परीक्षा प्रणालीमा व्यापक सुधारको माग गर्दै संसदतर्फ प्रदर्शन गर्ने प्रयास गरेका थिए।

प्रदर्शनकारीहरूले संसदतर्फ अघि बढ्ने क्रममा केन्द्रीय दिल्लीमा राखिएका प्रहरीका विभिन्न अवरोध (ब्यारिकेड) तोड्ने प्रयास गरेपछि सुरक्षा निकायले भीडलाई तितरबितर पार्न अश्रुग्यास प्रहार गरेको र लाठीचार्ज गरेको थियो।

सामाजिक सञ्जालमा सार्वजनिक भएका धेरै भिडियोहरूमा प्रदर्शनकारीहरूलाई प्रहरीले दुव्र्यवहार गरेको देखिएको दाबी गरिएको थियो।

तर, दिल्ली प्रहरीले आफ्नो कारबाहीको बचाउ गर्दै भीडका केही समूह हिंसात्मक बनेर ढुंगामुढा गर्न थालेपछि मात्र बल प्रयोग गरिएको जनाएको छ।

त्यस्तै, दिल्लीको जन्तर–मन्तरमा जुलाई २० मा भएको विद्यार्थी प्रदर्शनका क्रममा प्रहरीले पेलेट गन प्रयोग गरेको जनाइएको छ ।

अस्पतालको चिकित्सकीय प्रतिवेदनले एक प्रदर्शनकारीको शरीरमा पेलेटका चोट देखिएको उल्लेख गरेपछि आरोप पुष्टि भएको बताइएको छ । (एएनआइ)

काठमाडौं । देशका विभिन्न स्थानमा भइरहेको अविरल वर्षा र पहिरोका कारण प्रमुख राजमार्ग तथा सडक खण्डहरू अवरुद्ध भएका छन्। बाढी र पहिरोका कारण यातायात सेवा प्रभावित भएपछि सम्बन्धित निकायले सतर्कता अपनाउन आग्रह गरेको छ।

प्रहरीले दिएको जानकारी अनुसार लगातारको वर्षाका कारण काभ्रेपलाञ्चोक र सिन्धुली जोड्ने बीपी राजमार्गको खुर्कोट–नेपालथोक–कटुन्जेबेँसी खण्डमा सवारी साधन सञ्चालनमा पूर्ण रोक लगाइएको छ । सम्भावित बाढीलाई मध्यनजर गर्दै यस खण्डमा राति ६ बजेदेखि बिहान ०४ बजेसम्म सवारी आवतजावत निषेध गरिएको छ भने दिउँसोको समयमा खुला रहनेछ। त्यसैगरी, मकवानपुरको कान्ति लोकपथमा पनि वर्षाका कारण रातिको समयमा सबै किसिमका सवारी साधन चलाउन रोक लगाइएको छ।

इलाम नगरपालिका–९ राजदुवालीमा वर्षाले बाटो हिलो भई सवारी आवतजावत ठप्प भएपछि मेची राजमार्ग पूर्ण रूपमा अवरुद्ध बनेको छ भने त्यहाँ वैकल्पिक मार्गको व्यवस्था गरिएको छ। सिन्धुपाल्चोकको भोटेकोशी गाउँपालिका–४ जिरोकिलो र वडा नं. २ कोदारीको इकु पहिरोमा सडक माथिबाट लेदो, माटो र पहिरो खस्दा अरनिको राजमार्ग पनि पूर्ण रूपमा बन्द भएको छ।

यस्तै, बागलुङको जैमिनी नगरपालिका–८ बेलबगरमा सडकमाथिबाट ढुङ्गा र माटोसहितको पहिरो खस्दा कालीगण्डकी करिडोर पूर्ण रूपमा अवरुद्ध भएको छ। दोलखाको तामाकोशी गाउँपालिका–५ किर्नेटारमा तामाकोशी खोलाको कटानले लामासाघु–रामेछाप राजमार्ग अवरुद्ध भए पनि खिम्ती ग्रामीण विद्युत सहकारी संस्थाको परिसरबाट वैकल्पिक बाटो सञ्चालनमा ल्याइएको छ। रोल्पाको परिवर्तन गाउँपालिका–१ खोलावाङमा सुख्खा पहिरो खस्दा घोराही–थवाङ शहीद राजमार्ग पूर्ण रूपमा अवरुद्ध बनेको छ।

मुगुको छायानाथ रारा नगरपालिका–७ पिना खोलामा पहिरो र ढुंगा खस्दा नाग्म–गमगडी सडक खण्ड बन्द भएको छ भने रसुवाको गोसाइँकुण्ड गाउँपालिका–३ कुलुङमा पहिरो खस्दा पासाङ ल्हामु सडक अवरुद्ध भएको छ। यसैगरी, लमजुङको मस्र्याङदी गाउँपालिका–४ म्याग्दे भिरमा पहिरो झरेका कारण बेसीशहर–च्यामे मनाङ सडक खण्ड पनि पूर्ण रूपमा बन्द रहेको छ।

सडक विभाग तथा सुरक्षा निकायले अवरुद्ध सडकहरू खुलाउने प्रयास भइरहेको जनाएका छन्। यात्रा गर्नुअघि सम्बन्धित क्षेत्रको सडकको अवस्था बुझ्न अनुरोध गरिएको छ।