इलाम । इलामको देउमाई नगरपालिका–१, चमैता स्थित चौरी बजारमा बोलेरो गाडी दुर्घटना हुँदा चालकको घटनास्थलमै मृत्यु भएको छ।

आइतबार बिहान करिब ६ः३० बजे बोलेरो गाडी सडकबाट करिब दुई मिटर तल खसेर दुर्घटना भएको हो। दुर्घटनामा देउमाई नगरपालिका–१, चमैता निवासी अन्दाजी २१ वर्षीय विपिन दियालीको मृत्यु भएको प्रहरीले जनाएको छ।

दुर्घटनाको सूचना प्राप्त भएपछि प्रहरी टोली घटनास्थलमा पुगेर आवश्यक जाँचबुझ गरेको थियो। 

जिल्ला प्रहरी कार्यालयका सूचना अधिकारी प्रहरी नायव उपरीक्षक लक्ष्मी भण्डारीले घटनाबारे थप अनुसन्धान भइरहेको समेत जानकारी दिए ।

भोजपुर । यात्रु बोकेको बोट सप्तकोशीमा दुर्घटना भएको छ । आइतबार दिउँसो करिब साढे एक बजेतिर भोजपुरको कोप्चेबाट १४ जना यात्रु बोकेर सुनसरीको वराहक्षेत्रतर्फ आउँदै गरेको बोट दुर्घटनामा परेको जिल्ला प्रहरी कार्यालय भाेजपुरका प्रमुख प्रहरी नायव उपरीक्षक ज्ञान बहादुर खडकाले बताए । 

दुर्घटना हुँदा तीन जनाको मृत्यु भएको छ, भने एक जना बेपत्ता भएको प्रहरीले जनाएको छ ।  

चल्दै गरेको बोटको इन्जिन बन्द हुँदा दुर्घटना भएको प्रारम्भिक जानकारी प्राप्त भएको प्रहरीले जनाएको छ ।

प्रहरीका अनुसार दुर्घटनामा गम्भीर घाइते भएका चार जनामध्ये तीन जनाको मृत्यु भएको छ भने एकको उपचार भईरहेको छ भने एक जना बेपत्ता छन् । दुर्घटनापछि बेपत्ता भएका व्यक्तिको खोजी तथा उद्धार सम्बन्धी थप विवरण प्राप्त हुन बाँकी छ ।

एजेन्सी । उत्तर कोरियाली नेता किम जोङ उन चीन र उत्तर कोरियालाई जोड्ने नवनिर्मित यालु नदी पुल हुँदै चीनको सीमावर्ती सहर डानडोङ पुगेका छन्। 

सरकारी स्रोतलाई उद्धृत गर्दै योनहाप समाचार संस्थाले शनिबार यसबारे जानकारी दिएको हो।

योनहापका अनुसार, सरकारी स्रोतले किम उक्त दिनको सुरुमै नयाँ पुल हुँदै डानडोङ पुगेको पुष्टि गरेको छ।

चीनले चीन र उत्तर कोरियाबीचको सीमा निर्धारण गर्ने यालु नदीमाथि निर्माण गरिएको नयाँ पुल सञ्चालनमा आएको घोषणा गरेपछि यो घटनाक्रम सार्वजनिक भएको हो। 

चीनको सरकारी समाचार संस्था सिन्ह्वाका अनुसार, चिनियाँ विदेश मन्त्रालयकी प्रवक्ता माओ निङले अक्टोबर १४ मा उक्त पुलले दुई देशबीचको व्यापार तथा जनस्तरको आदानप्रदानलाई सहज बनाउने बताएकी थिइन्।

‘चीन र डीपीआरकेबीच भएको सहमतिअनुसार उक्त पुल बिहीबारदेखि औपचारिक रूपमा सञ्चालनमा आउनेछ। सोही दिन दुवै पक्षले संयुक्त रूपमा उद्घाटन समारोह आयोजना गर्नेछन्,’ माओले नियमित पत्रकार सम्मेलनमा भनेकी थिइन्।

चीन र उत्तर कोरियालाई ‘पहाड र नदीले जोडिएका मित्रवत् छिमेकी’ को संज्ञा दिँदै माओले नयाँ पुल दुई देशबीचको सम्पर्क सञ्जालका लागि महत्त्वपूर्ण पूर्वाधार भएको बताएकी थिइन्।

उनले उक्त पुलले द्विपक्षीय व्यापार र जनस्तरको आदानप्रदान बढाउनुका साथै दुवै देशका जनताको जीवनस्तर सुधार गर्न सहयोग पुग्ने अपेक्षा गरिएको पनि बताएकी थिइन्।

यसैबीच, उत्तर कोरियाली नेता किम जोङ उनकी बहिनी किम यो जोङले बिहीबार दक्षिणी सीमामा ‘नयाँ प्रतिकारात्मक साधन’ तैनाथ गर्ने र दक्षिण कोरियालाई लक्षित प्रचारप्रसारका लागि प्रयोग गरिने लाउडस्पिकर केही दिनभित्रै तयारी अवस्थामा राख्ने चेतावनी दिएकी छन्।

योनहाप समाचार संस्थाका अनुसार, उत्तर कोरियाली केन्द्रीय समाचार संस्था (केसीएनए) ले प्रकाशित गरेको वक्तव्यमा किम यो जोङले भनेकी छन्, ‘हाम्रा नयाँ प्रतिकारात्मक साधनहरू दक्षिणी सीमाको सम्पूर्ण क्षेत्रमा परिचालनका लागि सतर्क अवस्थामा राखिनेछन् र दक्षिण कोरिया गणतन्त्र (आरओके) विरुद्ध प्रयोग गरिने लाउडस्पिकर केही दिनभित्रै तयारी अवस्थामा रहनेछन्।’

योनहापका अनुसार, उनको यो भनाइ सार्वजनिक हुनुभन्दा एक दिनअघि उनले उत्तर कोरियाले यसै महिनाको अन्त्यतिर दक्षिण कोरियातर्फ प्रचारात्मक लाउडस्पिकर प्रसारण पुनः सुरु गर्ने चेतावनी दिएकी थिइन्। यसले दुई छिमेकी देशबीचको तनाव थप बढ्ने संकेत गरेको छ।

किम यो जोङले दक्षिणी सीमालाई थप मजबुत बनाउने प्योङयाङको प्रयासको पनि बचाउ गरेकी छन्। उनले उक्त निर्माण कार्य उत्तर कोरियाको आफ्नै भूभागभित्र निरन्तर जारी रहने बताएकी छन्।

यी घटनाक्रमबीच सामाजिक सञ्जालमा किम जोङ उनको गम्भीर मस्तिष्क रक्तस्रावका कारण मृत्यु भएको दाबीसमेत फैलिएको छ । यद्यपि, ती दाबी स्वतन्त्र रूपमा पुष्टि गर्न सकिने आधारहरु फेला परेका छैनन् । 

यसैबीच, उत्तर कोरियाको सरकारी सञ्चारमाध्यमले किम जोङ उनले एक प्रदर्शनीमा जुत्ता तथा महिलाका लुगाहरूको निरीक्षण गरिरहेको तस्बिर सार्वजनिक गरेको छ।

न्युयोर्क पोस्टका अनुसार, कोरियाली केन्द्रीय समाचार संस्थाले किमले सोमबार उक्त प्रदर्शनीको भ्रमण गरेको जनाएको छ। यद्यपि, ती तस्बिरको स्वतन्त्र रूपमा प्रमाणीकरण हुन सकेको छैन।

अमेरिकामा रहेका चिनियाँ असन्तुष्ट वानजुन सीले सामाजिक सञ्जालमा किम अस्पताल भर्ना भएको र सम्भावित उत्तराधिकारीसम्बन्धी संकटका बीच चीनले प्योङयाङमा सेना परिचालन गरेको दाबी गरेपछि यी अफवाह थप फैलिएका हुन्।

तर, उनका दाबीलाई पुष्टि गर्ने स्वतन्त्र रूपमा प्रमाणित गर्न सकिने आधार सार्वजनिक गरिएको छैन। (एएनआई, फोटो–रोयर्टस/एएनआई)

एजेन्सी । होर्मुज जलडमरूमध्यको दक्षिणतर्फ रहेको ‘अनधिकृत’ मार्गबाट अघि बढ्ने प्रयास गरिरहेका दुईवटा विशाल तेलवाहक जहाज शुक्रबार नौसैनिक बारुदी सुरुङमा ठोक्किएर विस्फोट भएका छन्। 

रणनीतिक रूपमा महत्त्वपूर्ण उक्त जलमार्गमा एक दिनअघि पनि सुरक्षा घटना भएको खबर सार्वजनिक भएको थियो।

इरानको इस्लामिक रिभोलुसनरी गार्ड कोप्र्स (आईआरजीसी)को नौसेनाका अनुसार, विस्फोटका कारण दुवै जहाजका इन्जिन कक्षमा आगलागी भएको र जहाजहरू रोकिएको नौसेनाले जनाएको छ। 

आईआरजीसीको आधिकारिक समाचार माध्यम सेपाह न्युजमा प्रकाशित विज्ञप्तिमा उक्त जानकारी दिइएको हो।

आईआरजीसीको नौसेनाका अनुसार, ती दुई तेलवाहक जहाजमा कुल ४५ लाख ब्यारेलभन्दा बढी कच्चा तेल लोड गरिएको थियो। विस्फोटपछि दुवै जहाजका चालक दलका सदस्यहरूले जहाज छाडेका थिए।

यसअघि शुक्रबार नै अर्धसरकारी समाचार संस्था तस्निमले आईआरजीसीको नौसेनानिकट एक स्रोतलाई उद्धृत गर्दै होर्मुज जलडमरूमध्यमा नियम उल्लङ्घन गर्ने जहाजहरूको आवागमन ‘पूर्ण रूपमा रोकिएको’ जनाएको थियो।

इरानले त्यस्ता जहाजलाई सहयोग गर्ने नेभिगेसन प्रणालीहरू नष्ट गर्नुका साथै बिहीबार जलमार्गमा चारवटा ‘नियम उल्लङ्घन गर्ने’ तेलवाहक जहाजलाई निशाना बनाएको समाचारमा उल्लेख थियो।

‘जलडमरूमध्यमा तेल तस्करी पुनः सुरु भएमा नियम उल्लङ्घन गर्ने जहाजहरू र तिनलाई सहयोग गर्ने प्राविधिक प्रणालीविरुद्ध अझ कडा कारबाही गरिनेछ,’ ती अधिकारीले बताए।

फेब्रुअरी २८ देखि इरानले होर्मुज जलडमरूमध्यमा आफ्नो नियन्त्रण थप कडा बनाएको थियो। इरानी भूभागमा इजरायल र अमेरिकाले संयुक्त रूपमा आक्रमण गरेपछि इरानले ती दुई देशका वा तिनसँग सम्बन्धित जहाजहरूलाई सुरक्षित रूपमा आवतजावत गर्न रोक लगाएको थियो।

यसैबीच, उक्त जलमार्गमा तनाव थप बढिरहेका बेला बेलायतको समुद्री व्यापार सञ्चालन निकाय (यूकेएमटीओ) ले बिहीबार साँझ ओमानको लिमाह क्षेत्रबाट सात समुद्री माइल उत्तरपूर्वमा भएको घटनाबारे जानकारी प्राप्त भएको जनाएको छ।

यूकेएमटीओका अनुसार, होर्मुज जलडमरूमध्य हुँदै बाहिरिँदै गरेको एउटा तेलवाहक जहाजलाई अज्ञात वस्तुले प्रहार गरेको रिपोर्ट प्राप्त भएको थियो। उक्त घटनाबारे थप विवरण भने सार्वजनिक गरिएको छैन। (सीसीटीभीप्लस)

काठमाडौं । बंगालको खाडीमा विकसित हुँदै गरेको चक्रवाती आँधीको प्रभावले आगामी साता नेपालमा २०० मिलिमिटरसम्म वर्षा हुन सक्ने मौसमविद्हरूले चेतावनी दिएका छन् ।

मौसमविद् विनोद पोखरेलले सामाजिक सञ्जालमा लेख्दै आगामी बुधबारदेखि आइतबारसम्म हुने वर्षाका क्रममा केही स्थानमा २०० मिलिमिटरभन्दा बढी पानी पर्न सक्ने सम्भावना रहेको बताएका छन् ।

‘मैले अध्ययन गरिरहेका मौसम पूर्वानुमानले आगामी अवधिमा केही स्थानमा कुल वर्षा २०० मिलिमिटरभन्दा बढी हुन सक्ने संकेत गरेका छन्,’ उनले फेसबुकमा लेखेका छन्, ‘यसको अर्थ एकै दिनमा त्यति धेरै वर्षा हुन्छ भन्ने होइन । वास्तविक वर्षाको मात्रा, समय र प्रभावित क्षेत्र अझै परिवर्तन हुन सक्छन् ।’

२०० मिलिमिटर वर्षाको प्रभाव कस्तो हुन्छ भन्ने विषय वर्षा हुने समय, स्थान र त्यहाँको मौसमी अवस्थामाथि निर्भर रहने पोखरेलले स्पष्ट पारेका छन् ।

‘मनसुनको समयमा पनि छोटो अवधिमा यति धेरै वर्षा हुनु जोखिमपूर्ण हुन्छ । अहिले धान काट्ने समय हो भने हिमाली क्षेत्रमा धेरै मानिस यात्रा गर्ने अवधि पनि हो । त्यसैले यसको असर अझ गम्भीर हुन सक्छ,’ उनले चेतावनी दिएका छन् ।

‘उच्च हिमाली क्षेत्रमा भारी हिमपात, अत्यधिक चिसो र हिमपहिरोको जोखिम बढ्न सक्छ,’ उनले थप लेखेका छन्, ‘मौसमसम्बन्धी पछिल्ला जानकारी र आधिकारिक सूचनाहरू जाँच गरेर मात्रै यात्राको योजना बनाउनुहोस् ।’

मौसमविद् पोखरेलले अहिले विकसित भइरहेको मौसमी प्रणाली सन् २०१४ अक्टोबर १४ मा आएको हिमआँधीको अवस्था सम्झाउने खालको रहेको पनि उल्लेख गरेका छन् ।

‘चक्रवातसँग सम्बन्धित उक्त घटनामा अन्नपूर्ण आसपासका पदयात्रा क्षेत्रसहित ४३ जनाले ज्यान गुमाएका थिए । अहिलेको पूर्वानुमानमा त्यसबेला देखिएका केही मौसमी सूचकसँग मिल्दोजुल्दो अवस्था देखिएको छ,’ उनले भनेका छन्, ‘तर यसको अर्थ यसपटक पनि त्यस्तै परिणाम आउँछ भन्ने होइन । आशा छ, यसपटक हामीले समयमै सतर्कता अपनाएर अझ राम्रो तयारी गर्न सक्नेछौँ ।’

बंगालको खाडीबाट विकसित हुने न्यून चापीय प्रणाली नेपालतर्फ नजिकिएर माथिल्लो वायुमण्डलमा रहेको न्यून चापीय प्रणालीसँग अन्तरक्रिया गरेमा भारी वर्षाको सम्भावना बढ्ने उनले बताएका छन् ।

बंगालको खाडीमा विकसित भइरहेको मौसमी अवस्थासँगै नेपालमा वर्षा गराउन सक्ने मौसमी प्रणाली पनि विकसित हुन थालेको छ ।

शुक्रबार बिहान ५ः४५ बजे बंगालको खाडीको पूर्वमध्य भाग तथा आसपासको दक्षिणपूर्वी क्षेत्रमा न्यून चापीय क्षेत्र बनेको थियो ।

नेपालको जल तथा मौसम विज्ञान विभागले उक्त न्यून चापीय क्षेत्र क्रमशः शक्तिशाली हुँदै सोमबारसम्म चक्रवाती आँधीमा विकसित हुने सम्भावना रहेको जनाएको छ ।

चक्रवाती आँधीमा विकसित भएपछि यो प्रणाली पश्चिम–उत्तरपश्चिम दिशातर्फ अघि बढ्ने र भारतको उत्तरी आन्ध्र प्रदेश तथा दक्षिणी ओडिशाको आसपासको तटीय क्षेत्रमा प्रवेश गर्ने सम्भावना रहेको छ ।

विभागका अनुसार उक्त मौसमी प्रणालीले आगामी बुधबार (अक्टोबर २८) देखि आइतबार (नोभेम्बर १)सम्म नेपालमा प्रभाव पार्न सक्नेछ ।

‘यद्यपि, यो प्रणालीका कारण नेपालमा कति वर्षा हुन्छ, जोखिमको स्तर कस्तो रहन्छ र कस्तो प्रभाव पर्न सक्छ भन्ने कुरा अहिले नै निश्चित रूपमा आकलन गर्न सकिने अवस्था छैन,’ विभागले जनाएको छ, ‘तर सम्भावित प्रतिकूल मौसमले कृषि तथा पर्यटन क्षेत्रमा असर पार्न सक्ने भएकाले सम्बन्धित सबै पक्षलाई सतर्क रहन अनुरोध गरिन्छ ।’

विभागले आगामी एक सातामा देशका विभिन्न भागमा अधिकतम तथा न्यूनतम तापक्रममा समेत सामान्य गिरावट आउने पूर्वानुमान गरेको एएनआई आफ्नो समाचारमा उल्लेख गरेको छ ।

फ्रान्स । शनिबारका लागि तय भएका नयाँ प्रदर्शनअघि फ्रान्सले देशभर करिब ७० हजार प्रहरी परिचालन गर्ने भएको छ ।

गत साता प्रदर्शनका क्रममा व्यापक लुटपाट, आगजनी र तोडफोडका घटना भएका थिए । त्यस्ता घटना पुनः दोहोरिन नदिन अधिकारीहरूले सुरक्षा तयारी तीव्र पारेका छन् ।

फ्रान्स२४ का अनुसार, आन्तरिकमन्त्री लरेन नुनेजले शुक्रबार (स्थानीय समयअनुसार) सुरक्षा व्यवस्थाबारे जानकारी दिँदै सामाजिक सञ्जालमा हिंसा र लुटपाटका लागि आह्वान भइरहेकाले सरकारले सार्वजनिक व्यवस्था कायम राख्न आवश्यक तयारी गरिरहेको बताए ।

बढ्दो संकटका बीच राष्ट्रपति इम्यानुएल म्याक्रोंले वरिष्ठ मन्त्री तथा अधिकारीहरू सम्मिलित रक्षा परिषद्को बैठक बोलाएका थिए । फ्रान्स२४ का अनुसार, उनले सप्ताहान्तमा हुने प्रदर्शनलाई लक्षित गर्दै सुरक्षा तयारी तीव्र पारिएका बेला सुरक्षाकर्मीहरूसँग पनि भेट गर्ने कार्यक्रम थियो ।

खस्कँदो शैक्षिक वातावरणको विरोधमा माध्यमिक विद्यालयका विद्यार्थीहरूले सुरु गरेको प्रदर्शन अहिले देशव्यापी बनेको छ । बढ्दो महँगी र जीवनयापनको लागतले सर्वसाधारणमा बढाएको असन्तुष्टिले पनि प्रदर्शनलाई थप चर्काएको छ ।

प्रदर्शनले उग्र रूप लिएपछि म्याक्रोंले पहिलोपटक माध्यमिक विद्यालयका विद्यार्थी प्रतिनिधिहरूसँग भेट गरेका छन् । तर, विद्यार्थी प्रतिनिधिहरूले आफ्ना माग सम्बोधन गर्ने ठोस प्रस्ताव सरकारले अघि नसारेको भन्दै सहपाठीहरूलाई प्रदर्शन जारी राख्न आग्रह गरेका छन् ।

अभियान समूह ‘हाई स्कुल रिन्युयल’का अध्यक्ष नाथानेल कोम्बारीले म्याक्रोंले भेटका क्रममा आफूहरूका कुरा ध्यानपूर्वक सुनेको बताए ।

यद्यपि, सोमबार प्रधानमन्त्रीसँग हुने छलफलका क्रममा सरकारले ठोस प्रस्ताव अघि सार्ने अपेक्षा विद्यार्थीहरूले गरेको उनले बताए ।

‘हामी सन्तुष्ट छैनौँ,’ कोम्बारीले भने । उनले सरकारमाथि दबाब कायम राख्न विद्यार्थीहरूलाई आन्दोलन जारी राख्न आग्रह गरे ।

फ्रान्स सरकारले प्रदर्शनकारीहरूका जायज गुनासा र शान्तिपूर्ण प्रदर्शनलाई लुटपाट, आगजनी तथा तोडफोडका घटनाबाट अलग राख्ने प्रयास गरिरहेको छ । गत शनिबारको प्रदर्शनका क्रममा यस्ता हिंसात्मक घटना भएका थिए ।

फ्रान्स२४ का अनुसार, न्यायमन्त्री जेराल्ड डार्मानिनले हिंसासम्बन्धी घटनामा अदालतहरूले हालसम्म २१७ जनालाई जेल सजाय सुनाइसकेको बताए । सजाय पाउनेमध्ये करिब आधा पहिलोपटक अपराधमा संलग्न भएका व्यक्ति रहेको उनले जानकारी दिए ।

बिहीबार म्याक्रोंले आपराधिक गतिविधिमा संलग्न हुनेहरूमाथि ‘अधिकतम कडाइ’ गर्न आह्वान गरेका थिए । उनले गत सप्ताहन्तको अशान्तिका क्रममा अतिवामपन्थी समूहहरूले गणतन्त्रलाई कमजोर पार्ने प्रयास गरेको आरोपसमेत लगाएका थिए ।

यी प्रदर्शनले सन् २०२७ मा हुने फ्रान्सको राष्ट्रपति निर्वाचनअघि राजनीतिक तनावसमेत बढाएको छ । फ्रान्स२४ ले उल्लेख गरेको हालैको एक जनमत सर्वेक्षणअनुसार, अतिदक्षिणपन्थी उम्मेदवार मरिनले पेन अझै अग्रस्थानमा रहेकी छन् । पछिल्ला घटनाक्रमले उनको राजनीतिक स्थिति थप बलियो बनाएको बताइएको छ ।

ले पेनको पार्टी ‘नेसनल र्याली’ले यसै सप्ताहन्तमा पेरिसको दक्षिणमा पर्ने ओरलियँ सहरमा महाधिवेशन आयोजना गर्दैछ । उक्त कार्यक्रममा हजारौँ समर्थक सहभागी हुने अपेक्षा गरिएको छ ।

यसैबीच, सोही सहरमा प्रदर्शनको विरोधमा उत्रिने समूहहरूले पनि भेला आयोजना गर्ने योजना बनाएपछि स्थानीय अधिकारीहरूले दुवै पक्षबीच सम्भावित झडपलाई लिएर चिन्ता व्यक्त गरेका छन् । (एएनआई, फोटो : रोयर्टस/एएनआई)

सुर्खेत । चारैतिर पहाड र डाँडाकाँडाले अँगालो हालेको सुर्खेतको वीरेन्द्रनगर उपत्यका यतिबेला पाकेको धानको सुनौलो रङमा सजिएको छ । उपत्यकाको समथर फाँटमा लहलह झुलेका धानका बाला, हावासँगै लहराउने बाली र क्षितिजसम्म फैलिएको पहेँलपुर दृश्यले प्रकृतिको अनुपम सौन्दर्य झल्काएको छ ।

मानौँ, प्रकृतिले हरिया पहाडको काखमा सुनौलो गलैँचा बिछ्याएर वीरेन्द्रनगरलाई सिँगारेकी छन् । वर्षभरि पसिना बगाएका किसानका खेतमा धानका बाला पाकेका छन्। 

बाली भित्र्याउने दिन नजिकिँदै गर्दा खेतबारीमा आशा, खुसी र मेहनतको मीठो प्रतिफल झल्किन थालेको छ । केही दिनभित्रै किसानहरू पाकेको धान भित्र्याउन व्यस्त हुनेछन् ।

पहाडको हरियाली र खेतको सुनौलोपनबीच सजिएको वीरेन्द्रनगर उपत्यकाको यो दृश्यले प्रकृतिको सुन्दरता मात्रै होइन, कृषि र किसानको जीवनसँग जोडिएको समृद्धिको कथा पनि सुनाइरहेको छ ।

एजेन्सी । चीनले दक्षिणपश्चिमी चीनको सिजाङ स्वायत्त क्षेत्रमा गएको ७.० म्याग्निच्युडको भूकम्पपछि आपत्कालीन विपद् राहतका लागि ५ करोड युआन (करिब ७५ लाख अमेरिकी डलर) विनियोजन गरेको छ।

साथै, पुनःस्थापनाका प्रयासका लागि थप तीन करोड युआन छुट्याइएको छ।

बिहीबार राति १०ः३३ बजे नाग्छु सहरको बाकेन काउन्टीमा भूकम्प गएको थियो। भूकम्पमा परी १६ जनाको मृत्यु भएको छ भने ६५ जना घाइते भएका छन्।

चीनको अर्थ मन्त्रालय र आपत्कालीन व्यवस्थापन मन्त्रालयले संयुक्त रूपमा ५ करोड युआन विनियोजन गरेका छन्। उक्त रकम उद्धार कार्य सञ्चालन गर्न तथा प्रभावित बासिन्दालाई सहायता उपलब्ध गराउन प्रयोग गरिनेछ।

यसैबीच, राष्ट्रिय विकास तथा सुधार आयोगले क्षतिग्रस्त पूर्वाधार र सार्वजनिक सेवा सुविधाहरूको पुनःस्थापनाका लागि केन्द्रीय बजेटबाट थप ३ करोड युआन छुट्याएको छ।

चीनले राष्ट्रिय भूकम्प आपत्कालीन प्रतिकार्यको स्तर पनि चौथो तहबाट बढाएर तेस्रो तहमा पु¥याएको छ। साथै, राष्ट्रिय प्राकृतिक विपद् राहतसम्बन्धी छुट्टै चौथो तहको प्रतिकार्य पनि सक्रिय बनाइएको छ।

चीनको राष्ट्रिय अग्नि तथा उद्धार बलले उद्धार कार्यका लागि ३५० जना उद्धारकर्मी र ८३ वटा सवारीसाधन घटनास्थलतर्फ पठाएको छ।

आपत्कालीन व्यवस्थापन मन्त्रालयले सिजाङको आपत्कालीन व्यवस्थापन विभागसँग समन्वय गर्दै विपद्बाट प्रभावित क्षेत्रमा क्षतिको अवस्था निरीक्षण गर्न ‘विङ लुङ’ ड्रोन परिचालनको व्यवस्था मिलाएको छ।

विपद्पछि सबैभन्दा बढी प्रभावित क्षेत्रमध्ये मारु र गाङ्छे सहरबाट घाइते बासिन्दाहरूलाई उपचारका लागि भूकम्पको केन्द्रबिन्दुबाट करिब ५० किलोमिटर टाढा रहेको छिमेकी सोग काउन्टीको जनअस्पतालमा स्थानान्तरण गरिएको छ।

प्रभावित जनसङ्ख्याका लागि प्रमुख चिकित्सा केन्द्रका रूपमा तोकिएको उक्त अस्पतालले घाइतेहरूको उपचार गर्नुका साथै तातो खाना र आधारभूत आवश्यकताका सामग्रीसमेत उपलब्ध गराइरहेको छ।

भूकम्पपछि सरकारी ऊर्जा कम्पनीहरूले स्थानीय इन्धन भर्ने केन्द्रहरूमा सुरक्षा जाँच सुरु गरेका छन्। जाँचका क्रममा कुनै ठूलो सुरक्षा जोखिम वा ग्यास चुहावट नभेटिएको जनाइएको छ।

शुक्रबार बिहान ७ बजेसम्म चाइना नेसनल पेट्रोलियम कर्पोरेसनले बाकेन र सोग काउन्टीमा २३१ टन इन्धन बोकेका १२ वटा ट्याङ्कर पठाइसकेको थियो।

त्यस्तै, सिनोपेकले विपद् प्रभावित क्षेत्रतर्फ जाने प्रमुख मार्गमा रहेका इन्धन केन्द्रहरूमा आपत्कालीन सेवा सञ्चालन गरेको छ।

सोग काउन्टी र बिरु काउन्टीलाई जोड्ने राष्ट्रिय राजमार्ग ३१७ को एउटा महत्त्वपूर्ण उद्धार मार्ग पहिरोका कारण अवरुद्ध भएको थियो। पहिरोले थुपारेका ढुङ्गाहरू हटाएपछि शुक्रबार बिहान ३ बजे उक्त सडक पुनः यातायातका लागि खुला गरिएको छ।

यसैबीच, अस्थायी रूपमा सेवा रोकिएका छिङहाई–सिजाङ रेलमार्गका प्रभावित खण्डहरूमा यात्रुवाहक रेल सेवा पुनः सञ्चालनमा आएको छ। यद्यपि, सुरक्षालाई ध्यानमा राख्दै रेलहरूलाई गति सीमित गरेर सञ्चालन गरिएको छ।(सीसीटीभीप्लस)

काठमाडौं । अर्थमन्त्री डा. स्वर्णिम वाग्ले र भारतीय विदेशमन्त्री डा. एस. जयशंकरबीच बदलिँदो विश्व परिस्थिति, बहुपक्षीयताको भविष्य र अन्तर्राष्ट्रिय सहकार्यका नयाँ स्वरूपबारे प्रश्नोत्तर भएको छ ।

भारतीय टेलिभिजन च्यानल एनडीटीभीले आयोजना गरेको ‘एनडीटीभी वल्र्ड समिट २०२६’ अन्तर्गत बिहीबार आयोजित ‘द जियोपोलिटिक्स अफ सोभरेन चोइस’ शीर्षकको सत्रमा दुई नेताबीच यस विषयमा विचार आदानप्रदान भएको हो । सत्रमा प्रमुख वक्ताका रूपमा सहभागी जयशंकरलाई वाग्लेले विश्व व्यवस्था र क्षेत्रीय सहकार्यको बदलिँदो स्वरूपबारे प्रश्न गरेका थिए । 

वाग्लेले सन् १९९० को दशकमा शीतयुद्धको अन्त्यपछि व्यापार र अर्थतन्त्रमा बहुपक्षीयतालाई प्राथमिकता दिइएको स्मरण गर्दै पछिल्लो समय विश्वमा बढ्दो विखण्डन र व्यापारिक गुटबन्दीले बहुपक्षीय व्यवस्थामाथि चुनौती थपेको बताए ।

उनले विपद् प्रतिकार्य, पोषण, ऊर्जा तथा स्वच्छ ऊर्जाजस्ता क्षेत्रमा द्विपक्षीय, त्रिपक्षीय र उपक्षेत्रीय सहकार्यलाई औपचारिक संरचनामार्फत संस्थागत गर्न सकिने सम्भावनाबारे जयशंकरसँग प्रश्न गरेका थिए ।

‘के हामी पेन्डुलमको अर्को छेउतिर गइरहेका छौं ?’ वाग्लेले प्रश्न गर्दै बहुपक्षीयतालाई क्षेत्रीय तहमा सीमित गर्दै लैजाने प्रवृत्तिले बहुध्रुवीय विश्व व्यवस्थालाई कसरी प्रभाव पार्छ भन्ने जिज्ञासा राखेका थिए ।

जवाफमा भारतीय विदेशमन्त्री जयशंकरले पछिल्ला दुई दशकमा देशहरू औपचारिक प्रतिबद्धताभन्दा व्यावहारिक सहकार्यमा बढी केन्द्रित हुन थालेको बताए ।

उनका अनुसार औपचारिक संरचना निर्माण गर्ने क्रममा वार्ता, प्रशासनिक प्रक्रिया, खर्च व्यवस्थापन र नियम निर्धारणमै धेरै समय बित्ने हुँदा कतिपय अवस्थामा मूल उद्देश्य ओझेलमा पर्ने गरेको छ । विश्वका विद्यमान औपचारिक समूहहरूसमेत विभिन्न समस्यासँग जुधिरहेको उनले उल्लेख गरे ।

जयशंकरले अन्तर्राष्ट्रिय सौर्य गठबन्धनजस्ता पहललाई औपचारिक संरचनामा अघि बढाउनु उपयुक्त भए पनि सबै विषयमा एउटै मोडेल लागू गर्न आवश्यक नरहेको बताए । सहकार्यको स्वरूप सम्बन्धित विषय, साझेदार राष्ट्र र उनीहरूको प्रतिबद्धतामा निर्भर हुने उनको भनाइ थियो ।

उनले ब्रिक्सको उदाहरण दिँदै उक्त समूहमा सचिवालय र सबै सदस्यले हस्ताक्षर गरेको लिखित बडापत्र नरहेको उल्लेख गरे । यसले सबै अन्तर्राष्ट्रिय सहकार्य औपचारिक संस्थागत संरचनामार्फत नै सञ्चालन हुनुपर्छ भन्ने मान्यता आवश्यक नरहेको उनको तर्क थियो ।

जयशंकरका अनुसार पछिल्लो समय कम प्रशासनिक भार भएका, व्यावहारिक र परिणाममुखी सहकार्यका स्वरूपतर्फ विश्वको प्रवृत्ति बढिरहेको छ । उनले भारतले पछिल्लो दशकमा विभिन्न क्षेत्रमा द्विपक्षीयबाहेक त्रिपक्षीय, चतुर्पक्षीय तथा समान विचारधारा भएका राष्ट्रहरूबीच करिब ५० वटा समूहगत पहल अघि बढाएको उल्लेख गरे ।

प्रश्नोत्तरका क्रममा अर्थमन्त्री वाग्लेले नेपालले विपद्का बेला भारतबाट प्राप्त सहयोगको प्रशंसा गरेका थिए ।

उनले हालै रसुवा–भोटेकोशी क्षेत्रमा भएको विपद् तथा सन् २०१५ को भूकम्पका बेला भारतले विपद् आएको केही घण्टाभित्रै सहयोग उपलब्ध गराएको स्मरण गरे। । त्यसप्रति नेपाल कृतज्ञ रहेको उनको भनाइ थियो ।

वाग्लेले विपद् प्रतिकार्य, ऊर्जा, पोषण र स्वच्छ ऊर्जालगायतका क्षेत्रमा भएका सहकार्यलाई दीर्घकालीन र संस्थागत स्वरूप दिन सकिने सम्भावनाबारे पनि चासो व्यक्त गरेका थिए ।

एजेन्सी । चीनको दक्षिणपश्चिमी सिजाङ स्वायत्त क्षेत्रको भूकम्प प्रभावित गाउँमा शुक्रबार बिहानै अग्नि नियन्त्रण तथा उद्धार टोलीहरू पुगेका छन्। 

उक्त क्षेत्रमा बिहीबार राति ७.० म्याग्निच्युडको भूकम्प गएको केही घण्टापछि उद्धार टोलीहरू त्यहाँ पुगेका हुन्।

चीनको भूकम्प सञ्जाल केन्द्रका अनुसार बिहीबार राति २२ः३३ बजे नाग्छु सहरको बाकेन काउन्टीमा १० किलोमिटर गहिराइमा भूकम्प गएको थियो। भूकम्पको केन्द्रबिन्दु उत्तरी अक्षांश ३२.४० डिग्री र पूर्वी देशान्तर ९३.७९ डिग्रीमा रहेको थियो।

भूकम्पको केन्द्रबिन्दु नजिकै र सबैभन्दा बढी प्रभावित क्षेत्रमध्ये एक मानिने गाङ्छे नगरमा ११० जना अग्नि नियन्त्रक, २५ वटा सवारीसाधन र खोज तथा उद्धारका लागि तालिमप्राप्त चारवटा कुकुरसहितको टोली पुगेको छ।

उक्त टोलीले भग्नावशेषमा पुरिएका मानिसहरूको खोजी गर्नुका साथै घरहरूमा भएको क्षतिको आकलन गरिरहेको छ।

उद्धार कार्य जारी रहँदा थप उद्धार टोलीहरू पनि विपद् प्रभावित क्षेत्रमा पुग्ने क्रममा रहेका छन्।

भूकम्पका कारण कम्तीमा १६ जनाको मृत्यु भएपछि शुक्रबार बिहानैदेखि उद्धार टोलीहरू परिचालन भएका हुन् । 

सिजाङको आपत्कालीन कमान्डबाट प्राप्त विवरणअनुसार शुक्रबार बिहान ७ बजेसम्म भूकम्पका कारण ५४ जना घाइते भएका छन् भने ३३९ वटा घर भत्किएका छन्।

भूकम्पपछि चीनको भूकम्प प्रशासनले दोस्रो तहको आपत्कालीन प्रतिकार्य सुरु गरेको हो । (सीसीटीभीप्लस)