काठमाडौँ  । राष्ट्रिय स्वतन्त्र पार्टी (रास्वपा) का प्रमुख सचेतक सन्तोष परियारले नेपाली राज्य र सत्ता सञ्चालकहरूको जनविरोधी चरित्र भिजिट भिसा प्रकरणले छर्लङ्ग पारेको बताएका छन्। शनिबार काठमाडौँमा आयोजित एक छलफल तथा अन्तरक्रिया कार्यक्रममा बोल्दै परियारले जनताको सुविधाका लागि बनाइएको राज्य नागरिकलाई दुःख दिने खालको बनेको भन्दै यसैकारण सदनमा सहमति नगरी आन्दोलन जारी राखिएको स्पष्ट पारे।

परियारले भने, ‘नेपाली राज्य कति हदसम्म जनविरोधी छ, सरकार र सत्ता चलाउनेहरू कुन हदसम्म जनतालाई दुःख दिने खालका छन् भन्ने कुरा भिजिट भिसा काण्डले प्रमाणित गरेको छ। त्यसकारणले पनि हामीले सहमति गरेनौं। लामो समयदेखि नीति र संरचना बनाएर जनताको सजिलोका लागि यो राज्य बनाएको हो। तर हाम्रो राज्य कस्तो भएछ भने नीति र संरचना बनाएर नागरिकलाई दुःख दिने खालको बनाएका रहेछौं। त्यसकारण पनि हामीले सदनमा सहमति नगरी आन्दोलन जारी राखेका हौं।’

उनले नेपाली कांग्रेस, नेकपा एमाले र नेकपा माओवादी केन्द्रबाट अब देशको विकास सम्भव नभएको दाबी गरे। रवि लामिछानेमाथि षड्यन्त्र गरी रास्वपालाई समाप्त पार्न खोजिए पनि पार्टी सांगठनिक रूपमा झन् बलियो बनेको उनको भनाइ थियो।

परियारले थपे, ‘नेपाली कांग्रेस, नेकपा एमाले र नेकपा माओवादी केन्द्रबाट अब यो देशलाई न्याय र विकास हुँदैन। यिनीहरूलाई लागेको थियो रवि लामिछानेमाथि षड्यन्त्र गरेर जेल हालिदिएपछि सिंगो रास्वपा समाप्त हुन्छ भन्ने। तर यहाँसम्म आउँदा राष्ट्रिय स्वतन्त्र पार्टी हिजोभन्दा आज सांगठनिक हिसाबमा सबैभन्दा बलियो भएको छ।’

रवि लामिछानेको नेतृत्वमा सुरु भएको संघर्षले गर्दा आम मानिसले सदनसम्म पुग्ने मौका पाएको भन्दै परियारले विगतका लोकतन्त्रवादी, समाजवादी र कम्युनिष्ट भनिनेहरूले आम नागरिकलाई राज्य सत्ताको पहुँचमा नपुर्‍याएको आरोप लगाए।

‘नेपालको राजनीतिमा तपाईं हामीजस्ता आम गरिखाने मान्छेले पहुँच राख्न सक्दैनन्,’ उनले भने, ‘आज त हामीले रवि लामिछानेको नेतृत्वमा एउटा संघर्ष सुरु गरेको हुनाले सन्तोष परियारजस्तो आम मान्छे सदनसम्म पुग्ने मौका पायो। विगतका मै हुँ भन्ने लोकतन्त्रवादी, समाजवादी र आफूलाई कम्युनिष्ट भन्नेहरूले पनि आम नागरिकलाई राज्य सत्ताको पहुँचमा पुर्‍याएका छैनन्। सधैं त्यही वर्ग, जाति र समुदायले नेपाली राजनीति र सत्ता चलायो।’

सात दशकभन्दा लामो समय शासन गरेर पनि निश्चित समूहबाहेक अन्य समूहको हित नगर्ने, नेपाली, मधेसी, पहाडी, दलित, महिलाको हित नगर्ने यस्ता राजनीतिक पार्टीहरू आवश्यक छैनन् भनेर नै राष्ट्रिय स्वतन्त्र पार्टीको स्थापना भएको उनको भनाइ थियो।

काठमाडौँ । नेपाल कम्युनिष्ट पार्टीका महासचिव नेत्र विक्रम चन्द (विप्लव) ले आजको राज्य भद्रगोल हुनुमा सबैभन्दा बढी जिम्मेवार माओवादी नै भएको बताएका छन् । शुक्रवार काठमाडौँमा आयोजित नेपाल समाजवादी पार्टी (नयाँ शक्ति) को १० औँ पार्टी स्थापना दिवसको अवसरमा उनले वर्तमान अवस्थाको सबैभन्दा बढी जिम्मेवार माओवादी भएको भन्दै हाम्रो ध्यान राज्यमा भन्दा पनि मन्त्री हुने, सांसद हुने र पद बाँडफाँट गर्नेतिर गएको बताए । 

उनले भने, ‘आजको राज्य भद्रगोल हुनेमा सबैभन्दा बढी जिम्मेवार माओवादी नै हो । यो कुरा हामीले गम्भीरतापूर्वक मनन् गर्नुपर्छ । माओवादी भनेपछि प्रचण्ड र बाबुरामको कुरा मात्र होइन, हामी सबैको कुरा हो । सायद नेपालमा जुन राजनीतिक सङ्क्रमण पैदा भयो त्यसले के के कुराहरूको माग गर्छ भन्ने कुरामा हाम्रो जति गहन बहस हुनुपर्ने थियो त्यतापट्टी प्रवेश नै गरेनौ । हाम्रो ध्यान राज्यमा भन्दा पनि मन्त्री हुने, सांसद हुने, पद बाँडफाँट गर्नेतिर गयो । यो कुरामा हामी चुकेको हौं । समय त गई नै सक्यो, अब त्यसको समाधान हेर्नुपर्छ ।’

सोही कार्यक्रममा उनले नेकपा एकीकृत समाजवादीका महासचिव घनश्याम भुषालले आज भएकै पार्टीहरूले, बनिबनाउ पार्टीहरूले जस्ताको त्यस्तै अवस्थामा रहेमा मुलुकको मुहार नफेरिने बताए ।

धरान, जेठ ३० । राष्ट्रिय आविष्कार केन्द्रका अध्यक्ष महाविर पुनले नेपाल सरकारका उपप्रधानमन्त्री तथा शहरी विकास मन्त्री प्रकाशमान सिंहलाई 'अँध्यारो' को उपमा दिएका छन्। मन्त्री सिंहले आफ्ना स्वर्गीय बुबाको स्मृतिमा १५ वटा पार्क निर्माणका लागि करिब २८ करोड रुपैयाँ बजेट विनियोजन गर्ने निर्णय गरेको भन्दै पुनले सामाजिक सञ्जालमार्फत आलोचना गर्दै उक्त उपमा दिएकाहुन । अमृत साइन्स कलेजका पूर्व सहपाठीसमेत रहेका पुनले मन्त्री सिंहको नाम 'प्रकाश' भए पनि काम भने 'अँध्यारो' भएको बताएका छन्। 

पुनका अनुसार, मन्त्री सिंहले आफ्नो स्वर्गीय बुबाको दीर्घकालीन स्मृति कायम राख्न भन्दै देशभर १५ वटा पार्क निर्माण गर्ने  योजना अघि सारेका छन् र यसका लागि सरकारी कोषबाट २८ करोड रुपैयाँको ठूलो रकम छुट्याइएको उल्लेख गरेका छन् ।

पुनले आज सामाजिक सञ्जालमार्फत सार्वजनिक गरेको एक स्टाटसमा उनले लेखेका छन्, "अँध्यारोमान ज्यू, तपाईँले तपाईँकै स्वर्गीय बुबाको स्मृति लामो समयसम्म रहोस् भनेर मन्त्रीको हैसियतले बुद्धिमा बिर्को लागेर १५ वटा पार्कहरू बनाउनको लागि मात्र करिब २८ करोड रुपैयाँ छुट्याउनु भएछ। ती पार्कहरू बनाउनुको सट्टा प्रतिभाशाली र सृजनशील युवाहरूको लागि तपाईँकै बुबाको नाममा एउटा अत्याधुनिक नवप्रवर्तन केन्द्र खोल्ने बुद्धि आएको भए सुनमा सुगन्ध हुने थियो। त्यसैले रीसको झोंकमा तपाईँको नाम 'प्रकाश' अनुसारको काम नभएकोले 'अँध्यारो' भनेर नाम राखिदिएँ। तपाईँ र म अमृत साइन्स कलेजमा सँगै पढेका थियौँ। साथीलाई यत्ति भनें ल। माफ गर्नुहोला।"

पुनले मन्त्रीको निर्णयलाई 'बुद्धिमा बिर्को लागेको' भन्दै सिर्जनशील र दूरगामी प्रभाव पार्ने वैकल्पिक परियोजनामा लगानी गर्नुपर्ने सुझाव दिएका छन्। उनको भनाइमा, नवप्रवर्तन केन्द्रले युवाहरूलाई अवसर प्रदान गर्ने र देशको बौद्धिक विकासमा टेवा पुर्याउने छ।

मन्त्री सिंहमाथि यसअघि पनि आफ्नो पार्टीको युवा भ्रातृ संगठनलाई कार्यालय बनाउन राज्यकोषबाट बजेट छुट्याइदिएको आरोप लाग्दै आएको थियो। उक्त आलोचना सेलाउन नपाउँदै महाविर पुनले आज आफ्नो फेसबुकमार्फत सार्वजनिक कोषको दुरुपयोगमाथि फेरि प्रश्न उठाउँदै अर्को आलोचना गरेका छन्।  

काठमाडौँ  । नेपालमा मनसुनी वायु सक्रिय हुने क्रममा रहेको मौसमविद्हरूले बताएका छन्। जल तथा मौसम विज्ञान विभागका अनुसार, पूर्वी नेपालमा मनसुन भित्रिसकेको र अब मध्य तथा पश्चिमी क्षेत्रमा पनि सक्रिय हुँदैछ। यद्यपि, मनसुन सधैँ एकनासको नहुने र कहिलेकाहीँ 'ब्रेक' भई तापक्रम बढ्न सक्ने विभागकी प्रवक्ता विभूति पोखरेलले जानकारी दिइन्।

विभागकी वरिष्ठ मौसमविद् शान्ति कँडेलले आगामी २४ घण्टामा देशका धेरै स्थानमा वर्षा हुने र विशेषगरी कोशी, मधेश, गण्डकी, सुदूरपश्चिम प्रदेशमा भारी वर्षाको सम्भावना रहेको बताइन्। यस वर्ष नेपालमा औसतभन्दा बढी वर्षा हुने तथा अधिकतम र न्यूनतम दुवै तापक्रम औसतभन्दा बढी मापन हुने सम्भावना रहेको उनको भनाइ छ।

मनसुनको समयमा हुने क्षति न्यूनीकरणका लागि तीनै तहका सरकार र नागरिक स्वयंले जोखिम क्षेत्र पहिचान गरी पूर्वतयारी गर्नुपर्नेमा मौसमविद्हरूले जोड दिएका छन्। साथै, चट्याङबाट बच्नका लागि घरभित्र बस्न र विद्युतीय उपकरण चलाउँदा सावधानी अपनाउन आग्रह गरिएको छ। रुखमुनि बस्ने वा छाता ओड्ने जस्ता प्रचलन चट्याङबाट बच्न गलत रहेको र फलामका वस्तुबाट टाढा रहन तथा जुत्ता चप्पल लगाइरहनुपर्ने सुझाव दिइएको छ।

काठमाडौं । नेपाल समाजवादी पार्टी (नयाँ शक्ति) का अध्यक्ष डा.बाबुराम भट्टराईले तीन दलका तीन नेताहरुको चर्तिकला आगामी दिनमा झन् बढि नाङ्गिदै जाने बताएका छन् । 

बिहिबार काठमाडौंमा नेपाल समाजवादी पार्टीको १० औं स्थापना दिवसको अवसरमा आयोजित कार्यक्रममा उनले अहिले दलहरुले एकअर्काका खुट्टा तानातान, पोल खोला खोल गरिरहेको भन्दै त्यस अर्थमा बृहत नयाँ वैकल्पिक शक्तिहरुको ध्रुविकरणको प्रक्रिया अगाडि बढेर जाने बताए । 

उनले भने, ‘अहिले जसरी उनीहरुले एकअर्काका खुट्टा तानातान गरेर पोल खोला खोल गरिरहेका छन् आगामी दिनमा त्यो झन् बढ्दै जानेछ र यो मुख्य तीन दलका तीन नेताहरुको चर्तिकला आगामी दिनमा झन् बढि नाङ्गिदैछ । त्यस अर्थमा यो बृहत नयाँ वैकल्पिक शक्तिहरुको ध्रुविकरणको प्रक्रिया पनि आगामी दिनमा अगाडि बढेर जान्छ ।’

यस्तै, उनले पुराना दलहरु विघटन भईरहेको भन्दै आगामी वर्षहरु एउटा ठूलो उथलपुथल वर्ष हुने पनि बताए । 

काठमाडौँ । पूर्वप्रधानमन्त्री एवं एकीकृत समाजवादीका अध्यक्ष माधवकुमार नेपालमाथि भ्रष्टाचार मुद्दा दायर भई सांसद पद स्वतः निलम्बनमा परेपछि पार्टीभित्र भावी नेतृत्व र नेपालको नैतिकताबारे गम्भीर बहस सुरु भएको छ। बिहीबार अख्तियार दुरुपयोग अनुसन्धान आयोगले पतञ्जलीको जग्गा सट्टापट्टा प्रकरणमा नेपालविरुद्ध मुद्दा दायर गरेपछि उनको राजनीतिक जीवनमा नयाँ मोड आएको छ। नेपालको इतिहासमा पूर्वप्रधानमन्त्री अर्थात् मन्त्रिपरिषद्को निर्णयमाथि भ्रष्टाचार मुद्दा चलेको यो नै पहिलो घटना हो । 

अख्तियारले मुद्दा दायर गरेलगत्तै एकीकृत समाजवादीका सम्मानित नेता झलनाथ खनाल पक्षले आगामी नेतृत्वबारे छलफल तीव्र पारेको छ। खनालले विभिन्न सञ्चारमाध्यममा सार्वजनिक रुपमै नेपालको 'नैतिकता'माथि प्रश्न उठाउँदै अदालतले सफाइ दिए पनि नैतिक प्रश्नको जवाफ स्वयं नेपालबाटै आउनुपर्ने धारणा राखेका छन्। खनालको यस अभिव्यक्तिले पार्टीभित्रै आन्तरिक मतभेद बढाएको छ।

युवा नेताहरूद्वारा 'राजनीतिक प्रतिशोध'को आरोप; ओलीमाथि निशाना

यता, अध्यक्ष नेपालनिकट युवा नेताहरूले भने नेपालमाथि लागेको भ्रष्टाचार मुद्दालाई प्रधानमन्त्री केपी शर्मा ओलीको 'पूर्वाग्रही र प्रतिशोधपूर्ण सोच'को उपज भएको प्रतिक्रिया दिएका छन्।

पोलिटब्युरो सदस्य सुदेश पराजुलीले एकीकृत समाजवादी पार्टी स्थापनाकालदेखि नै ओलीले विभिन्नखाले षड्यन्त्र गरेर पार्टीलाई सिध्याउन खोजेको आरोप लगाए। उनले सत्ताको आडमा ओलीले रचेको षड्यन्त्रका कारण नै मुद्दा दायर भएको दाबी गरे। पराजुलीले मन्त्रिपरिषद्ले गर्ने नीतिगत निर्णय अख्तियारको क्षेत्राधिकारभित्र नपर्ने तर्क गर्दै विगतका मान्यताहरूलाई बेवास्ता गरी राजनीतिक प्रतिशोधका लागि ओलीले पूर्वाग्रह साँधेको पुष्टि हुने बताए।

पराजुलीले छानबिन गर्ने हो भने ओलीकै कार्यकालमा भएका भ्रष्टाचारका घटनाहरू, जस्तै: गिरीबन्धु टी स्टेटको जग्गा दुरुपयोग र गोकर्ण फरेस्ट जग्गा प्रकरणको छानबिन हुनुपर्ने माग गरे। उनले २०४६ सालपछिका सबै मन्त्रिपरिषद्का निर्णयहरूको छानबिनका लागि उच्चस्तरीय समिति गठन गरिनुपर्ने आवश्यकता औंल्याए। उनले रामदेव र आचार्य बालकृष्णलाई छानबिन नगरिएको विषयमा सत्ता पक्ष नै दोषी रहेको बताए।

माधव नेपाल 'निर्दोष', 'क्लिनचिट' लिएरै छाड्ने दाबी

केन्द्रीय सदस्य संगीता पाख्रिनले माधवकुमार नेपाललाई कसैले फसाउन खोजेको तर्क गरिन्। उनले जीवित प्रधानमन्त्रीहरूमध्ये नेपालजस्तो सफा नियत भएको व्यक्ति नभएको दाबी गर्दै सामाजिक सञ्जालदेखि सडकमा चिया पसलेहरूसम्मले नेपाल निर्दोष रहेको बताउने गरेको जानकारी दिइन्।

गणतन्त्रका पक्षमा आवाज उठाएकाले नेपालमाथि बारम्बार प्रहार भइरहेको र फसाउन लागिएको उनको भनाइ छ। पाख्रिनले एउटै मुद्दामा बारम्बार मुछिएकाहरू छुटे पनि गल्ती नै नगरेका व्यक्तिलाई फसाइएको भन्दै यसबारे छलफल गरेर 'क्लिनचिट' लिएरै छाड्ने बताइन्। उनले प्रधानमन्त्री ओलीले बाल्यकालमा गुच्चा खेलेको व्यक्तिलाई बुढेसकालमा झोक फेरेको कुरा प्रमाणित भएको टिप्पणी गरिन्।

पतञ्जली योगपीठ तथा आयुर्वेद कम्पनीका रामदेव र आचार्य बालकृष्णलाई छानबिन नगरी नेपाललाई मात्र बारम्बार प्रहार हुनु षड्यन्त्र भएको उनको भनाइ थियो। उनले पार्टी कार्यालय र घर नै जलाइएका प्रसंग पनि उठाइन्।

कानुनी परामर्श र कार्यकर्ताको समर्थन

नेता नेपालमाथि मुद्दा दर्ता भएपछि नेताहरूले कानुनी परामर्श लिइरहेका छन्। पार्टी कार्यालय आलोकनगर र नेता नेपालको घर कोटेश्वरमा कार्यकर्ताहरूको उल्लेख्य भीड बढेको छ, जसले नेता नेपालप्रति समर्थन व्यक्त गरिरहेका छन्।

यो प्रकरणले एकीकृत समाजवादीभित्रको आन्तरिक शक्ति सन्तुलनमा कस्तो प्रभाव पार्ला र आगामी दिनमा यसले कस्तो राजनीतिक मोड लिनेछ भन्ने हेर्न बाँकी नै छ ।

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले पतञ्जली जग्गा हिनामिना प्रकरणमा नेकपा एकीकृत समाजवादीका अध्यक्ष माधव नेपाललाई प्रतिशोध राखेर मुद्दा दर्ता गरेको दाबी गरेका छन् ।

शुक्रबार बसेको संघीय संसद् भवनमा बसेको प्रतिपक्षी दलहरूको बैठकपछि सञ्चारकर्मीसँगको कुराकानीमा उनले नेपालविरूद्ध मुद्दा दर्ता हुनुमा प्रधानमन्त्री ओलीको प्रतिशोधको गन्ध आएको आरोप लगाए । 

उनले भने माधवजीको विषयमा माधवजी नै आश्चर्य छु भन्नुभएको छ । अदालतप्रति माधवजीले भरोसा छ । अदालतले न्याय गर्छ म छिटै सफाइ पाएर फर्कन्छु भन्ने विश्वास पनि उहाँले व्यक्त गर्नुभएको छ । तर यसमा प्रधानमन्त्रीजीको राजनीति प्रतिशोधको गन्ध त आएको छ । र अख्तियारले पनि कतै न कतै गम्भीर प्रश्न जन्माएको छ ।’

त्यस्तै प्रतिपक्ष दलहरूले पछिल्लो राजनीतिक घटनाक्रमका बारेमा सत्तारूढ नेपाली कांग्रेसका सभापति शेरबहादुर देउवासँग छलफल गर्ने निष्कर्ष निकालेको पनि जानकारी गराए । 

भिजिट भिसा प्रकरणको छानबिनका लागि सरकारको प्रतिबद्धता आए पछिल्लो राजनीतिक घटनाक्रमलाई सकारात्मक ढंगले टुंग्याउन सकिने उनको भनाइ छ ।

काठमाडौं । नेकपा एमालेका प्रमुख सचेतक तथा सांसद महेश बर्तौलाले माधव नेपालले प्रधानमन्त्री केपीओलीको निर्देशनमा आफू माथि भ्रष्टाचारको मुद्दादर्ता गरेको आरोपलगाएको भन्दै आपत्ति जनाएकाछन् । 
बिहीबार संसद भवन बाहिर सञ्चारकर्मीसँगको कुराकानीमा उनले संवैधानिक आयोगहरूले गरेका काम प्रकृयामा प्रधानमन्त्रीले गर्यो भनेर आरोप लगाउँदै जाने र राज्यका अंगहरुको फितलो टिप्पणी गर्नु उपयुक्तनहुने बताए । 
उनले भने, ‘यो उहाँहरूको प्रतिशोधपूर्ण अभिव्यक्तिहो उहाँहरुको । अरू केहीनभएपछि यसप्रकारको आरोप लगाउने कुरा गर्नु उपयुक्तहोईन् । यो उहाँहरूलाई पनि राम्रो गर्दैन । संवैधानिक आयोगहरूले गरेका काम प्रकृयामा हरेक कार्यमा प्रधानमन्त्रीले गर्यो भनेर आरोप लगाउँदै जाने र राज्यका अंगहरु यस प्रकारको फितलो टिप्पणी गर्नु राम्रोहुँदैन ।’

काठमाडौं । नेकपा एकीकृत समाजवादीका वरिष्ठ उपाध्यक्ष राजेन्द्र पाण्डेले सरकारले राजनीतिक प्रतिशोधको आधारमापार्टीका अध्यक्ष माधव कुमार नेपालमाथि मुद्दा दर्ता गरेको आरोप लगाएका छन् । 
बिहीबार सञ्चारकर्मीहरुकोसँगको कुराकानीमा उनले अध्यक्ष नेपालले जग्गा प्रकरणमा जग्गा खरिद विक्री प्रकरणमा भ्रष्टाचारसँग जोडिने कुनै अपराध नगरेको दाबी गरे । 
उनले भने, ‘जग्गा खरिद विक्रीकरणमा भ्रष्टाचारसँग जोडिने कुनै अपराध भएको जस्तो लाग्दैन् । यतिबेला यो घट्ना जन्मनु, आउँदो २८ गतेभित्र अख्तियारलगायत सबै संवैधानिक निकायहरूको म्याद सकिने फैसला पनि हुनु अनि यही छोटो अवधिमा के–के गर्नुपर्ने गरिभ्याउनुपर्ने बाध्यता भएकाले नै यो सबै भएको हो कि जस्तो लाग्छ । यो राजनीतिक प्रतिशोध नै हो ।’
उनले गिरीबन्धुमा पनि यस्तै नीतिगत निर्णय भएको भन्दै नीतिगत निर्णयलाई यसैगरी भ्रष्टाचार हो भन्दै मुद्दा लगाउने हो भने संसदमा रहेका धेरै मान्छेहरू बिदा हुने समेत धारणा राखे । 
अख्तियारले पतञ्जली योगपीठ तथा आयुर्वेद विद्यालयको नाममा दिइएको जमिन अनियमितता प्रकरणमा पूर्वप्रधानमन्त्री माधवकुमार नेपालमाथि १८ करोड ५८ लाख ५० हजार बिगो मागदाबीसहित भ्रष्टाचार मुद्दा दायर गरेको छ ।

धरान, सुनसरी। जनता समाजवादी पार्टी (जसपा) का अध्यक्ष एवं पूर्व मन्त्री अशोककुमार राईले नेपालमा राजतन्त्रको पुनरुत्थानको बहसलाई प्रतिगामी संज्ञा दिँदै यसलाई गाडी दुर्घटनापछि गोरुगाडा रोज्नु सरहको अविवेकी निर्णय भएको बताएका छन्। आज बुधवार सुनसरीको धरानमा समाजवादी विद्यार्थी युनियनको प्रशिक्षण तथा समितिको दोस्रो पूर्ण बैठकलाई सम्बोधन गर्दै राईले वर्तमान राजनीतिक समस्याको समाधानका लागि पुरानो व्यवस्थामा फर्कने सोच जनहितविपरीत रहेको बताए।

अध्यक्ष राईले देशमा देखिएका चुनौतीहरू समाधानका लागि जनताले लोकतान्त्रिक विधिबाटै वर्तमान नेता र पार्टीहरूलाई जिम्मेवार बनाउनुपर्छ। उनले भने राजतन्त्र अन्त्यका लागि भएका संघर्षमा हजारौँले बलिदान दिएको, जेल जीवन भोगेको र ज्यान गुमाएको स्मरण गराउँदै आजको लोकतान्त्रिक व्यवस्था तिनै बलिदानको प्रतिफल भएको प्रस्ट्याए।

राजतन्त्रकालका नर्मिता सुनीता काण्ड र पत्रकार पदम ठकुरानीको गोलीकाण्ड जस्ता त्रासदीपूर्ण घटनाहरूलाई उल्लेख गर्दै राईले ती घटना राजतन्त्रकै उपज भएको दाबी गरे। उनले भने, त्यस्ता अमानवीय घटनाहरू अब दोहोरिन दिनु हुँदैन ।

अध्यक्ष राईले राजतन्त्रलाई पुरानो, अनुचित र भ्रष्ट प्रणाली को रूपमा चित्रण गरे। उनका अनुसार, राजतन्त्रमा शक्ति योग्यताका आधारमा नभई वंशका आधारमा हस्तान्तरण हुने विकृति रहेको छ, जुन लोकतान्त्रिक मूल्यमान्यता विपरीत छ।

बैठकमा विद्यार्थीहरूलाई सम्बोधन गर्दै राईले अहिलेको युवा पुस्ताले आफ्नो पुस्ताले भोगेको जस्तो कष्टकर संघर्ष भोग्न नपर्ने बताए। उनले युवाहरूलाई आत्मविश्वासी भई देशको नेतृत्व लिन प्रोत्साहित गर्दै जनता समाजवादी पार्टीले उनीहरूलाई पूर्ण साथ र मार्गदर्शन प्रदान गर्ने प्रतिबद्धता व्यक्त गरेका थिए।